Te Kau Tagata ʼAfeā Kilisitiano ʼe Ko He Kau Gaue Ki Totatou Fiafia
Te Kau Tagata ʼAfeā Kilisitiano ʼe Ko He Kau Gaue Ki Totatou Fiafia
“E [matou] kumi ke [matou] kaugaue fakatahi mo koutou o uhiga mo tokotou fiafia.”—2 KO. 1:24.
KUMI TE ʼU TALI KI TE ʼU FEHUʼI ʼAENI:
Neʼe fakaha feafeaʼi e Paulo tana mole puleʼi ia te tui ʼo ʼona tehina pea mo tana gaue ki tonatou fiafia?
Kotea ʼae ʼe tonu ke fai e te kau tagata ʼafeā moʼo tokoni ki te ʼu tehina mo tuagaʼane ke natou fiafia ʼi te tauhi ki te ʼAtua?
Kotea ʼae ʼe feala ke tou fai ke tuputupu ai te fiafia ʼo te kokelekasio?
1. Kotea ʼae neʼe tupu ai te fiafia lahi ʼa Paulo ʼo ʼuhiga mo te kau Kilisitiano ʼo Kolinito?
ʼI TE taʼu 55, neʼe logo ia te apositolo ko Paulo ki te fetokakoviʼaki ʼo te ʼu tehina ʼo Kolinito. Neʼe ʼofa kia natou ohage ko te ʼofa ʼa he tamai ki ʼana fanau, koia neʼe ina fai ai te tohi moʼo fakatonutonuʼi ʼo natou. (1 Ko. 1:11; 4:15) Neʼe toe kole e Paulo ki tona tehina ko Tito ke alu ʼo ʼaʼahi ia natou pea ke nā felaveʼi ʼi te ʼuafu ʼo te kolo ko Toloasi ke ina fakamatala age te meʼa ʼae neʼe hoko. Hili kiai te ʼu mahina, neʼe talitali ia Paulo ʼi Toloasi ke haʼu ia Tito ʼo fakamatala age te meʼa ʼae neʼe fai e te ʼu tehina ʼo Kolinito, he neʼe kei tuʼania pe ʼo ʼuhiga mo natou. Meʼa fakaʼofaʼofa foki, he neʼe mole haʼu ia Tito, pea neʼe folau ai ia Paulo ki Masetonia. Kaʼe neʼe fiafia lahi ʼi tana toe felaveʼi mo Tito ki muli age. Neʼe fakamatala age e Tito neʼe fakalogo lelei te ʼu tehina ʼo Kolinito ki ʼana tokoni pea ʼe natou fakaʼamu ke natou felaveʼi mo ia. ʼI tana logo ʼae ki tana fakamatala neʼe “toe lahi age” tona fiafia.—2 Ko. 2:12, 13; 7:5-9.
2. (1) Kotea ʼae neʼe tohi e Paulo ʼo ʼuhiga mo te tui pea mo te fiafia? (2) Ko te ʼu fehuʼi fea ʼae ka tou tali anai kiai?
2 Mole faʼa fualoa kiai, neʼe toe faitohi ai Paulo ki te kau Kolinito. Neʼe ina ui fenei age kia natou: “E mole uhi ke [matou] pulei takotou tui, koteuhi kua koutou tuu malohi i te tui; kae e [matou] kumi ke [matou] kaugaue fakatahi mo koutou o uhiga mo tokotou fiafia.” (2 Ko. 1:24) Neʼe kotea ʼae neʼe fia talanoa kiai ia Paulo? Pea kotea te ako ki te kau tagata ʼafeā ia ʼaho nei?
TATATOU TUI PEA MO TOTATOU FIAFIA
3. (1) Kotea ʼae neʼe fia talanoa kiai ia Paulo ʼi tana ui fenei: “Kua koutou tuu malohi i te tui”? (2) ʼE faʼifaʼitakiʼi feafeaʼi e te kau tagata ʼafeā ia Paulo ia ʼaho nei?
3 Neʼe talanoa ia Paulo ki te ʼu kalitate ʼe lua ʼe tonu ke maʼu e te kau Kilisitiano: te tui pea mo te fiafia. ʼO ʼuhiga mo te tui neʼe ina tohi fenei: “E mole uhi ke [matou] pulei takotou tui, koteuhi kua koutou tuu malohi i te tui.” Neʼe mahino kia Paulo neʼe tauhi agatonu te ʼu tehina ʼo Kolinito ʼuhi ko tanatou tui ʼae ki te ʼAtua kaʼe mole ʼuhi ko ia peʼe ko he tahi age. Neʼe ina iloʼi papau ia neʼe natou ʼofa moʼoni ki te ʼAtua pea mo natou fia fai te meʼa ʼae ʼe totonu. Koia neʼe mole ʼaoga kia Paulo ke ina puleʼi te tui ʼo ʼona tehina, pea neʼe mole loto tuʼa tahi ia kiai. (2 Ko. 2:3) Ia ʼaho nei, ʼe faʼifaʼitakiʼi e te kau tagata ʼafeā ia Paulo pea mo natou fakamoʼoni ki te tui ʼo ʼonatou tehina ki te ʼAtua pea mo tanatou tauhi ʼae kia te ia ʼaki he loto katoa. (2 Tes. 3:4) ʼE mole natou fakatuʼu he ʼu lekula mamafa ʼi te loto kokelekasio. Kaʼe ʼe natou tokoni ki ʼonatou tehina ke natou fai he ʼu tonu ʼaki tanatou fakaʼaoga te ʼu ako Fakatohi-tapu pea mo tanatou mulimuli ki te takitaki ʼa te kautahi ʼa Sehova. Ia ʼaho nei, ʼe mole puleʼi e te kau tagata ʼafeā ia te tui ʼo ʼonatou tehina.—1 Pet. 5:2, 3.
4. (1) Kotea te fakaʼuhiga ʼo te palalau ʼaeni ʼa Paulo ʼi tana ui ʼae: “E [matou] kumi ke [matou] kaugaue fakatahi mo koutou o uhiga mo tokotou fiafia”? (2) ʼE faʼifaʼitakiʼi feafeaʼi e te kau tagata ʼafeā ia Paulo ia ʼaho nei?
4 Neʼe toe ui fenei e Paulo: “E [matou] kumi ke [matou] kaugaue fakatahi mo koutou o uhiga mo tokotou fiafia.” Ko ai ʼae neʼe talanoa ki ai ia Paulo? Neʼe talanoa ia kia ia totonu pea mo natou ʼae neʼe gaue kinakina mo ia. He ko ʼe koa ʼe tou iloʼi te faʼahi ʼaia? Koteʼuhi ʼi te tohi pe ʼaia ki te kau Kolinito, neʼe talanoa ia Paulo ki te toko lua ʼo natou ʼi tana tohi ʼae ko Sesu “ae nee matou akonaki kia koutou, e au, mo Silivano, pea mo Timoteo.” (2 Ko. 1:19) Pea tahi, ka fakaʼaogaʼi e Paulo ia te kupu “kaugaue” ʼi ʼana tohi, ʼe ina fakaʼuhiga tuʼumaʼu kia natou ʼae neʼe gaue kinakina mo ia ʼi te gaue faifakamafola, ohage la ko Apolosio, mo Akilasi, mo Pelesila, mo Timoteo pea mo Tito. (Loma 16:3, 21; 1 Ko. 3:6-9; 2 Ko. 8:23) Koia ʼi te ui ʼae ʼa Paulo: “E [matou] kumi ke [matou] kaugaue fakatahi mo koutou o uhiga mo tokotou fiafia,” neʼe ina ui ki te kau Kolinito ko ia mo natou ʼae neʼe kauga gaue mo ia neʼe natou gaue kinakina moʼo tokoni ki te kokelekasio ke natou tauhi ki te ʼAtua ʼi te fiafia. Ia ʼaho nei, ʼe toe fai feia mo te kau tagata ʼafeā. ʼE natou lotolelei ʼo fai te ʼu meʼa fuli ʼae ʼe natou lavaʼi moʼo tokoni ki ʼonatou tehina ke natou tauhi kia Sehova ʼi te fiafia.—Pes. 100:2; Filp. 1:25.
5. Ko te fehuʼi fea ʼae neʼe fai ki ʼihi tehina mo tuagaʼane? Kotea ʼae ʼe tonu anai ke tou fai ʼi te lolotoga ʼo tatatou talanoa ki ʼanatou tali?
5 ʼE mole heʼeki faʼa fualoa, neʼe fai ki ʼihi tehina mo tuagaʼane faʼafai ʼi te ʼu potu kehekehe ʼo te malamanei ia te fehuʼi ʼaeni: “Kotea te ʼu palalau mo te ʼu gaue neʼe fai e te kau tagata ʼafeā neʼe lahi ai tokotou fiafia?” ʼE tou talanoa anai ki ʼanatou tali. ʼI tatatou fai te faʼahi ʼaia, tou fakakaukauʼi ia te ʼu meʼa ʼae neʼe fai pe neʼe ui atu e te kau tagata ʼafeā ʼo lahi ai tatatou fiafia. Pea ʼe toe feala foki hatatou fakakaukau ʼo ʼuhiga mo te meʼa ʼae ʼe feala ke tou fai moʼo tokoni ki te fiafia ʼo te kokelekasio. *
“AVAGE OKU OFA KIA PELESITA TE OFAAGA”
6, 7. (1) Ko te aga fea ʼae ʼe faʼifaʼitakiʼi ai e te kau tagata ʼafeā ia Sesu, mo Paulo pea mo ʼihi atu kaugana ʼa te ʼAtua? (2) He ko ʼe koa ʼe fiafia te ʼu tehina moka tou manatuʼi ʼonatou higoa?
6 Neʼe ui e te tokolahi ʼi te ʼu tehina mo tuagaʼane ʼe natou fiafia moka ʼe tokaga age te kau tagata ʼafeā kia natou. Ka natou fai te faʼahi ʼaia, pea ʼe faʼifaʼitakiʼi e te kau tagata ʼafeā ia Tavite, mo Eliu pea mo Sesu. (Lau ia 2 Samuele 9:6; Sopo 33:1; Luka 19:5.) Neʼe fakaha e te ʼu kaugana ʼaia ʼa Sehova tanatou tokagaʼi te hahaʼi ʼaki tanatou fakaʼaogaʼi ʼonatou higoa. Neʼe toe mahino kia Paulo ia te maʼuhiga ʼae ʼo te manatuʼi mo te toʼo ʼo te ʼu higoa ʼo te ʼu tehina mo te ʼu tuagaʼane. ʼI te fakaʼosi ʼo tana tahi tohi, neʼe ina lau te ʼu higoa ʼo te ʼu tehina mo te ʼu tuagaʼane ʼe toko 25 tupu. Pea ko te toko tahi ʼo natou neʼe higoa ko Pelesita. Neʼe ui fenei e Paulo ʼo ʼuhiga mo ia: “Avage oku ofa kia Pelesita te ofaaga.”—Loma 16:3-15.
7 ʼE faigataʼa ki ʼihi tagata ʼafeā tanatou fakamaʼumaʼu te ʼu higoa. Kaʼe kapau ʼe faiga te tagata ʼafeā ke ina fai te faʼahi ʼaia, pea ʼe logoʼi anai e te ʼu tehina mo te ʼu tuagaʼane tana tokaga moʼoni ʼae kia natou. (Eke. 33:17) ʼE toe fiafia te ʼu tehina moka toʼo age tonatou higoa ʼi te temi ʼae ʼe natou fai ai hanatou tali ʼi te fono ʼo Te Tule Leʼo peʼe ko he tahi age fono.—Vakaʼi ia Soane 10:3.
“NEE LAHI OSI TANA GAUE KI TE ALIKI”
8. Kotea te faʼahi maʼuhiga ʼae neʼe faʼifaʼitakiʼi ai e Paulo ia Sehova pea mo Sesu?
8 Neʼe toe fakaha e Paulo tana loto tokaga ʼaki tana hufakiʼi ia natou. Ko te faʼahi ʼaia ʼe toe tokoni ki te ʼu tehina mo tuagaʼane ke natou tauhi ki te ʼAtua ʼi te fiafia. ʼI tana tohi ʼae ki te kau Kolinito, neʼe fakaha age e Paulo tona fiafia katoa ʼo ʼuhiga mo natou. Neʼe ina ui fenei: “E au mau he fiafia katoa o uhiga mo koutou i te u mea fuli.” (2 Ko. 7:4) ʼE mahino ia, neʼe logoʼi e te ʼu tehina ʼo Kolinito ia te ʼofa ʼo Paulo ʼaki tana palalau ʼaia. Neʼe toe fakafetaʼi ia Paulo ki te ʼAtua ʼo ʼuhiga mo te lelei ʼo te ʼu gaue neʼe fakahoko e ʼihi kokelekasio. (Loma 1:8; Filp. 1:3-5; 1 Tes. 1:8) ʼOsi ʼaia, pea neʼe talanoa leva ia Paulo ʼo ʼuhiga mo Pelesita ʼi tana tohi ʼae ki te kokelekasio ʼo Loma, ʼo ina ui fenei: “Nee lahi osi tana gaue ki te Aliki.” (Loma 16:12) ʼE mahino ia neʼe lotomalohi ia Pelesita ʼi tana logo ki te ʼu palalau ʼaia. ʼAki tana hufaki ʼona tehina neʼe faʼifaʼitakiʼi ai e Paulo ia Sehova pea mo Sesu.—Lau ia Maleko 1:9-11; Soane 1:47; Apk. 2:2, 13, 19.
9. He ko ʼe koa ʼe fiafia te kokelekasio katoa moka ʼe natou fehufakiʼaki?
9 ʼE toe mahino ki te kau tagata ʼafeā ia te maʼuhiga ʼo te fakaha ʼo tanatou leleiʼia ʼonatou tehina. (Taag. 3:27; 15:23) Ka faikole te kau tagata ʼafeā ʼo ʼuhiga mo ʼonatou tehina pea ʼe natou fakaha ai tonatou ʼofa pea mo tanatou tokagaʼi ʼae ʼanatou gaue. ʼE ʼaoga ki te ʼu tehina mo tuagaʼane ke natou logo ki he ʼu palalau fakalotomalohi ʼe fai age e te kau tagata ʼafeā. Neʼe ui e te tuagaʼane ʼe taʼu 50 tupu, neʼe mole heʼeki fai age he ʼu fakamalō ʼo ʼuhiga mo tana gaue. Ko te hahaʼi ʼi te temi nei ʼe natou tahi kumi tona lelei. Koia ka fakamalō age he tagata ʼafeā ʼo ʼuhiga mo he gaue neʼe ina fai ʼi te kokelekasio, pea ʼe fiafia ʼosi. ʼO ina ui fenei: “ ʼE au logoʼi ai te ʼofaʼinaʼi ʼo ʼoku e taku Tamai ʼae ʼe ʼi selo.” Neʼe fakaha e te tehina neʼe ina pusiaki tokotahi ʼana tamaliki ʼe toko lua, neʼe ui age e te tagata ʼafeā ʼe ina leleiʼia te meʼa ʼae ʼe ina fai. ʼAki te ʼu palalau ʼaia ʼa te tagata ʼafeā, neʼe maʼu ai e te tehina te lotomalohi moʼoni ke hoko atu tana kataki ʼi te tauhi ki te ʼAtua. ʼE mahino mai, ka faikole fakamalotoloto he tagata ʼafeā ʼo ʼuhiga mo ʼona tehina pea mo tuagaʼane, pea ʼe tokoni ia kia natou ke hoko atu tanatou tauhi ki te ʼAtua ʼi te fiafia pea ke ʼaua naʼa natou vaivai.—Esa. 40:31.
FAFAGA TE KOKELEKASIO ʼA TE ʼATUA
10, 11. (1) ʼE feala ke faʼifaʼitakiʼi feafeaʼi e te kau tagata ʼafeā ia Neemia? (2) Kotea ʼae ʼe feala ke fai e he tagata ʼafeā moʼo fakamalohiʼi te tui ʼo ʼona tehina mo tuagaʼane ʼi tana ʼaʼahi ia natou?
10 Kotea te tahi faʼahi ʼae ʼe toe fakaha ai e te kau tagata ʼafeā tanatou ʼofa ki ʼonatou tehina pea mo natou lagolago ai ki te fiafia ʼo te kokelekasio? ʼAki tanatou fakatuʼutuʼu ʼae ke natou ʼaʼahi ia natou ʼae ʼe ʼaoga ki ai he ʼu fakalotomalohi. (Lau ia Gaue 20:28.) ʼE natou faʼifaʼitakiʼi ai te ʼu kaugana agatonu ʼa te ʼAtua ʼo te temi muʼa. Ohage la, ʼe ui ʼi te Tohi-Tapu ʼi te temi ʼae neʼe tokagaʼi ai e Neemia te ʼaoga ʼae ʼo ni fakalotomalohi ki ʼona tehina Sutea, neʼe ina fai ai te fakatuʼutuʼu ke ina fakalotomahiʼi ia natou. (Nee. 4:14) ʼE toe fai feia mo te kau tagata ʼafeā ia ʼaho nei. Ka lotovaivai ʼonatou tehina pea ʼe natou faiga ke natou fakalotomalohiʼi ia natou. ʼE faiga te kau tagata ʼafeā ke natou ʼaʼahi ia natou ki ʼonatou ʼapi pea mo foaki age “ni meaofa fakalaumalie,” ko he ʼu palalau ke malohi ai tanatou tui. (Loma 1:11) ʼE natou fakahoko feafeaʼi te gaue ʼaia?
11 ʼI muʼa ʼo tana alu ʼo fakalotomalohiʼi he tahi, ʼe ʼaoga ke fakakaukau lelei te tagata ʼafeā ʼo ʼuhiga mo te faʼahi ʼaia. Ohage la, ʼe feala ke ina fai te ʼu fehuʼi ʼaeni: “Kotea te ʼu fihifihia ʼae ʼe lolotoga tau mo ia? Kotea ʼae ka au ui age anai ke fimalie ai tona loto? Ko te vaega peʼe ko te faʼifaʼitaki fea ʼo te Tohi-Tapu ʼae ka au fakalotomalohiʼi ʼaki anai ia ia?” Kapau ʼe toʼo e te tagata ʼafeā he temi ke ina fakakaukauʼi te ʼu faʼahi ʼaia ʼi muʼa ʼo tana alu, pea ʼe mahino ia ʼe ina foaki age anai he tokoni ʼe ʼaoga moʼoni, ʼi hana hoko palalau feia pe. ʼI tana ʼaʼahi ia natou, ʼe fakafealagia e te tagata ʼafeā ke palalau te ʼu tehina mo te ʼu tuagaʼane pea ke ina tokagaʼi te ʼu meʼa ʼae ʼe natou ui. (Sakp. 1:19) Neʼe ui fenei e te tuagaʼane: “ ʼE au lotomalohi ʼosi moka tokaga lelei he tagata ʼafeā ki te ʼu meʼa ʼae ʼe au ui age.”—Luka 8:18.
12. Ko ai ʼae ʼe ʼaoga ki ai te fakalotomalohi ʼi te loto kokelekasio? Kotea tona tupuʼaga?
12 Ko ai ʼae ʼe ʼaoga ki ai te fakalotomalohi ʼa te kau tagata ʼafeā? Neʼe ui e Paulo ʼe tonu ke tokaga te kau tagata ʼafeā ki te “faga ovi katoa.” Koia ʼe ʼaoga te fakalotomalohi ki te kokelekasio katoa, ʼo kau ai ia natou ʼae kua fualoa tanatou kau ki te gaue faifakamafola peʼe ko te gaue pionie. He ko ʼe koa ʼe toe ʼaoga kia natou ʼaia te fakalotomalohi ʼa te kau tagata ʼafeā? Logola te malohi ʼo tanatou tui ki te ʼAtua, kaʼe ʼi ʼihi temi ʼe feala ke natou logoʼi ʼe mole kei feala hanatou tauʼi tokotahi te ʼu fihifihia ʼuhi ko te tuʼu agakovi ʼaeni. ʼE toe ʼaoga ki te ʼu tehina mo tuagaʼane ʼaia he tokoni, ohage pe ko te Hau ko Tavite ʼi te temi ʼae neʼe meimeihiʼi tuʼutamaki ai tona maʼuli.
NEʼE HAʼU LEVA IA APISAI “O TOKONI KIA TAVITE”
13. (1) Ko te temi fea ʼae neʼe fakatuʼutuʼu ai e Sisepi-Penope ke ina tauʼi ia Tavite? (2) Neʼe tokoni feafeaʼi ia Apisai kia Tavite ʼi tona temi totonu?
13 Mole faʼa fualoa ki te temi ʼae neʼe hinoʼi ai te tupulaga ko Tavite ke hau, neʼe tauʼi leva e Tavite ia Koliate, te tagata mai te fanau ʼa Lafa neʼe meta tolu tona maʼoluga. Neʼe lototoʼa ia Tavite ʼo ina tamateʼi ia te tagata lahi ʼaia. (1 Sam. 17:4, 48-51; 1 Klk. 20:5, 8) Hili kiai ni taʼu, neʼe toe tauʼi e Tavite ia te tahi tagata lahi ʼi te tahi fehokosi ʼa te kau Iselaele mo te kau Filisitini. Ko te higoa ʼo te tagata ʼaia ko Sisepi-Penope, mai te fanau pe ʼa Lafa. (2 Sam. 21:16) Kaʼe ʼi te temi leva ʼaia neʼe meimeihiʼi ke matehi e te tagata ia Tavite. He kotea ʼae neʼe hoko? Neʼe mole kei lototoʼa leva ia Tavite. ʼE ui ʼi te Tohi-Tapu “nee fakaalu leva ke gaegae ia Tavite.” Kaʼe neʼe “hau leva” ia Apisai ʼo tokoni kia Tavite mo ina taʼi te Filisitini ʼo mate. (2 Sam. 21:15-17) Neʼe meimeihiʼi pe ke mate ia Tavite! ʼE mahino ia, neʼe lotofakafetaʼi lahi kia Apisai ʼi tana tokagaʼi te tuʼutamaki ʼae neʼe meʼa ke hoko kia ia pea mo tana foimo haʼu ʼo haofaki tona maʼuli. Kotea te ako ʼe tou maʼu mai te fakamatala ʼaeni?
14. (1) Kotea ʼae ʼe feala ke tokoni mai ke tou nofo agatonu lolotoga te ʼu temi faigataʼa? (2) Kotea ʼae ʼe feala ke fai e te kau tagata ʼafeā moʼo tokoni ki ʼihi ke natou toe maʼu te malohi pea mo te fiafia? Kotou tuku mai he faʼifaʼitaki.
14 ʼE hoko atu te tauhi ʼa te hahaʼi ʼa Sehova ʼi te malamanei katoa, logo aipe te ʼu fakataga ʼa Satana pea mo ʼihi atu. Ko ʼihi faigataʼaʼia ʼe hage ko te lahi ʼo “Koliate.” Kaʼe tou falala ʼaupito kia Sehova pea ʼe tou maʼu ia te malohi feʼauga ʼae ke tou nofo agatonu ʼi te ʼu aluʼaga faigataʼa ʼaia, ohage ko te malohi ʼae neʼe maʼu e Tavite ke feala hana tamateʼi ia Koliate. Kaʼe ʼi ʼihi temi; ʼe mole kei feʼauga tokita malohi moʼo tauʼi te malama ʼa Satana. ʼI te ʼu lakaga ʼaia, ʼe faigafua anai hatatou lotovaivai heʼe ʼi te agamahani ʼe tou lava katakiʼi te ʼu fihifihia ʼaia. ʼE feala leva ke tokagaʼi tatou e he tagata ʼafeā pea mo ina foaki mai te tokoni ʼae ʼe ʼaoga kia tatou ʼi tona temi totonu. ʼO tou logoʼi ai leva kua feala te hoko atu ʼo tatatou tauhi ki te ʼAtua ʼi te fiafia. Tokolahi ia tatou neʼe tou maʼu te taʼi tokoni ʼaia. Neʼe ui fenei e te tuagaʼane kua finematuʼa: “ ʼI te tahi temi, neʼe kua kovi toku gaʼegaʼe, pea neʼe kua faigataʼa kia au te fakahoko ʼo taku gaue faifakamafola. Neʼe tokagaʼi e te tagata ʼafeā toku vaivai pea neʼe fakaovi mai. Neʼe au lotomalohi ʼi tamā faipalalau ʼaia ʼo ʼuhiga mo te vaega Tohi-Tapu. Neʼe au mulimuli ki ʼana tokoni pea mo au maʼu ai toku fimalie.” Neʼe ina toe hoko atu fenei: “ ʼI meʼa fakalotomalohi foki te tokagaʼi e te tagata ʼafeā ʼaia toku maʼuli faigataʼaʼia pea mo tana tokoni mai ʼae kia au!” ʼE ko he meʼa fakalotofimalie te iloʼi ʼae ʼe tou maʼu ʼi te kokelekasio te kau tagata ʼafeā ʼe natou tokaga pea mo tokoni mai kia tatou ʼaki te lotolelei, ohage ko te tokoni ʼa Apisai kia Tavite.
“KE KOTOU ILOI TE OFA LAHI E AU MAU KIA KOUTOU”
15, 16. (1) He ko ʼe koa neʼe ʼoʼofa te ʼu tehina mo tuagaʼane kia Paulo? (2) He ko ʼe koa ʼe tonu ke tou ʼoʼofa ki ʼotatou tagata ʼafeā?
15 ʼE gaue kinakina te kau tagata ʼafeā. ʼI ʼihi temi, ʼe mole feala hanatou momoe ʼuhi ko tanatou manatu ʼae ki ʼonatou tehina mo tuagaʼane, pea ʼe natou faikole ʼo ʼuhiga mo natou peʼe ko te foaki ʼo he tokoni kia natou. (2 Ko. 11:27, 28) Ohage ko Paulo, ʼe fiafia te kau tagata ʼafeā ʼi te fakahoko ʼo ʼonatou maʼua. Neʼe ina tohi fenei ki te kau Kolinito: “E au fiafia lahi anai i te foaki o te u mea fuli ae e au mau mo toku mauli totonu o uhiga mo okotou laumalie.” (2 Ko. 12:15) Neʼe ina “foaki” ia ia totonu, tona malohi katoa moʼo fakamalohiʼi ʼo natou ʼuhi ko tona ʼofa lahi ʼae ki ʼona tehina mo tuagaʼane. (Lau ia 2 Kolinito 2:4; Filp. 2:17; 1 Tes. 2:8) Ko te tupuʼaga la ʼaia ʼo te ʼofa mamahi ʼa te ʼu tehina kia Paulo.—Gaue 20:31-38.
16 ʼE tou toe ʼofa mo tatou ki ʼotatou tagata ʼafeā pea mo tou fakamalō kia Sehova ʼi tana fakaʼaogaʼi ia natou moʼo tokoni mai kia tatou. ʼE tou toe fiafia mo lotomalohi ʼuhi ko tanatou tokaga pea mo tanatou ʼaʼahi ʼae kia tatou takitokotahi. Pea ʼe tou toe lotofakafetaʼi ki tanatou lotolelei tuʼumaʼu ke natou tokoni mai ʼi te ʼu temi ʼae ʼe mole kei feala ai hatatou tauʼi tokotahi ʼotatou fihifihia. ʼEi, ʼe ko te ʼu taʼi tagata ʼafeā la ʼaia ʼae ʼe gaue kinakina moʼoni ki totatou fiafia.
[Nota]
^ Neʼe toe fai pe ki te ʼu tehina mo tuagaʼane ʼaia te fehuʼi ʼaeni: “Ko te kalitate fea ʼae ʼe maʼuhiga ʼaupito kia koutou ʼi he tagata ʼafeā?” Tokolahi ia natou neʼe natou ui ʼe natou leleiʼia te tagata ʼafeā ʼae ʼe agalelei pea mo faigafua te felogoi mo ia. ʼE tou talanoa anai ki te maʼuhiga ʼae ki te kau tagata ʼafeā ke natou maʼu te ʼu kalitate ʼaia ʼi he tahi age alatike.
[ʼU fehuʼi ʼo te ako]
[Paki ʼo te pāsina 30]
ʼE fakakaukau lelei te kau tagata ʼafeā ki he ʼu fakalotomalohi ʼi muʼa ʼo tanatou ʼaʼahi ia tatou