ʼE Ke Fakahoko Koa Te ʼu Meʼa Neʼe Ke ʼIo Ki Ai?
Tou fakakaukauʼi te aluʼaga ʼaeni: ʼE fai e te tagata ʼafeā ʼe kau ki te Komite Fakafelogoʼi Mo Te Lopitali he fakatuʼutuʼu ke faifakamafola mo te tehina tupulaga ʼi he ʼAhotapu uhu. Kaʼe ʼi te ʼaho ʼaia neʼe pauʼi age te tehina ki te tagata ʼafeā koteʼuhi neʼe fakaʼi tona ʼohoana pea neʼe leletakiʼi ki te lopitali. ʼE ina kole ki te tagata ʼafeā ke ina maʼu age he toketa ʼe mole ina fakaʼaogaʼi anai te ʼu foʼi huki toto. Koia ʼe mole alu anai te tagata ʼafeā ʼo faifakamafola mo te tehina tupulaga, kaʼe ʼe alu ia ʼo tokoni ki te kiʼi famili ʼae ʼe tau mo te faigataʼaia.
Tou vakaʼi te tahi ʼaeni aluʼaga: ʼE fakaafe e te taumatuʼa Kilisitiano te finetaka mo ʼana taʼahine ʼe tokolua ke natou fakatahi ʼi he afiafi. Neʼe fakaha e te faʼe te faʼahi ʼaia ki ʼana taʼahine ʼo nā fiafia ʼaupito ai pea neʼe nā ʼamusia age ke hoko mai la te afiafi ʼaia. Kaʼe ʼi te ʼaho pe ʼae ʼe hoa atu ki te afiafi ʼaia, neʼe holoʼi e te taumatuʼa tanā faifakaafe takua neʼe hoko he aluʼaga. Ki muli age, neʼe iloʼi e te faʼe tona tupuʼaga. Hili pe tanā faifakaafe, neʼe fakaafe ia naua e ʼonā kaumeʼa pea neʼe nā tali.
ʼI totatou ʼuhiga Kilisitiano, ʼe tonu ke tou fakahoko ʼatatou fakapapau. ʼE mole tonu ke tou ʼio ki he faʼahi kaʼe mole tou fakahoko. (2 Ko. 1:18) Kaʼe ʼe ha mai ʼi te ʼu faʼifaʼitaki ʼe lua ʼae neʼe tou vakaʼi, ʼe kehekehe te ʼu aluʼaga. ʼI ʼihi temi, ʼe lagi maʼua ke tou fetogi he fakatuʼutuʼu neʼe tou fai. Pea ko te aluʼaga ʼaia neʼe hoko ki te apositolo ko Paulo.
NEʼE TUKUGAKOVIʼI IA PAULO ʼE KO HE TAHI ʼE HOLO TALAGA
ʼI te taʼu 55 H.T.S., neʼe ko te tolu folau fakamisionea ʼa Paulo pea neʼe nofo ʼi Efeso. Neʼe fia alu ia Paulo ki Kolinito ʼi tana ʼosi fakalaka ʼi te Tai Égée, ʼo alu ki Masetonia. Pea neʼe ina fakatuʼutuʼu leva tana lua ʼaʼahi te kokelekasio ʼo Kolinito ʼi muʼa ʼo tana toe liliu ki Selusalemi koteʼuhi neʼe lagi ina fia ʼave ʼanatou meʼa ʼofa ki te ʼu tehina ʼi Selusalemi. (1 Ko. 16:3) ʼE ha lelei te fakatuʼutuʼu ʼaia ia 2 Kolinito 1:15, 16 ʼae ʼe ui fenei ai: “I te falala pau aena, nee au loto ke au alu atu kia koutou i mua, ke kotou mau ni kalasia e lua; nee au loto ke au fakalaka atu ia koutou o alu ki Masetonia, pea ke au toe liliu leva mai Masetonia kia koutou, pea e kotou tokoni mai anai ki taku fagona ki Sutea.”
Neʼe kua faitohi ia Paulo ki te ʼu tehina ʼo Kolinito ʼo ina fakaha age tana fakatuʼutuʼu ʼaia. (1 Ko. 5:9) Kaʼe ʼi te ʼosi pe ʼo tana faitohi, neʼe logo ia Paulo mai ia natou ʼo te loto fale ʼo Koloe neʼe ʼi ai te ʼu fihi ʼi te kokelekasio. (1 Ko. 1:10, 11) Koia la ʼae neʼe fakatotonu ai e Paulo ke ina holoʼi tana ʼuluaki fakatuʼutuʼu, ʼo ina tohi ai te Uluaki Tohi ki te kau Kolinito. Neʼe fakatonutonuʼi ai e Paulo te kokelekasio pea mo foaki age he ʼu tokoni ʼaki he agaʼofa. Neʼe ina toe talanoa ai ki te fetogi ʼo tana faifolau ʼaki tana alu muʼa ki Masetonia, pea hoki alu leva ki Kolinito.—1 Ko. 16:5, 6. *
ʼI te maʼu e te ʼu tehina ʼo Kolinito te tohi ʼaia, neʼe tukugakoviʼi e ʼihi “apositolo lalahi” ko Paulo ko he tahi ʼe holo talaga he neʼe mole ina fakahoko te meʼa ʼae neʼe ina talanoa ki ai. Neʼe fakafeagai Paulo ki te manatu ʼaia ʼi tana fai te fehuʼi ʼaeni: “I taku fai te tonu aena, pe nee au fai he mea fakavale? Pe ko aku fakatuutuu ko te u fakatuutuu fakatagata, o hage e mau ia au te io mo te kailoa?”—2 Ko. 1:17; 11:5.
ʼE feala pe ke tou feʼuiʼaki pe neʼe fai e te apositolo ko Paulo “he mea fakavale” pe neʼe mole fakamalotoloto ʼi te aluʼaga ʼaia. Kaʼe neʼe mole feia. Ko te kupu ʼae neʼe fakaliliu ʼaki te kupu “fakavale” ʼe fakaʼuhiga ki he tahi ʼe holo talaga, ko he tahi ʼe mole tuha mo te falala he ʼe mole ina fakahoko te meʼa neʼe palalau ki ai. ʼI te fehuʼi e Paulo ki te kau Kilisitiano ʼo Kolinito pe ‘ko ʼana fakatuʼutuʼu ko te ʼu fakatuʼutuʼu fakatagata,’ neʼe ina fakaha ai ko tana fetogi ia tana tonu neʼe mole fakaʼuhiga ʼe mole tuha ia mo te falala.
Neʼe fakamahino lelei e Paulo neʼe hala te tukugakovi ʼaia ʼi tana tohi fenei: “E au fakamooni atu i te Atua, ae e agatonu, ko te folafola nee ma fakaha atu kia koutou nee mole ko te io mo te kailoa.” (2 Ko. 1:18) ʼE mahino ia, neʼe fetogi e Paulo tana fakatuʼutuʼu he neʼe ina loto ke fua lelei ki ʼona tehina mo tuagaʼane ʼo Kolinito. ʼE tou lau ia 2 Kolinito 1:23, neʼe mole alu muʼa ki Kolinito ʼuhi ko tana loto ʼae ke natou “hao”. Neʼe natou maʼu ai te faigamalie ke natou fakatokatoka te ʼu fihi neʼe hoko ʼi te kokelekasio ʼi muʼa ʼo tana alu kia natou. Pea ʼi tana ʼi Masetonia, neʼe fakaha e Tito kia Paulo neʼe natou lotomamahi ʼaupito ʼuhi ko tana tohi, ʼo natou fakahemala leva, ohage ko tana fakaʼamu ki ai ʼa Paulo. Neʼe fiafia lahi ia Paulo ʼi tana logo ki te faʼahi ʼaia.—2 Ko. 6:11; 7:5-7.
TE “AMENI” KI TE ʼATUA
Neʼe lagi manatu ʼihi kapau ko Paulo ko he tahi neʼe holo talaga pea neʼe mole tuha ia tana gaue faifakamafola mo te falala. Kaʼe neʼe fakamanatuʼi e Paulo ki te kau Kolinito neʼe ina fakaha age kia natou te moʼoni ʼo ʼuhiga mo Sesu Kilisito. “Ko te Alo o te Atua, Sesu-Kilisito, ae nee matou akonaki kia koutou, e au, mo Silivano, pea mo Timoteo, nee mole ko te io mo te kailoa, kae nee io pe ia.” (2 Ko. 1:19) Kapau neʼe mulimuli ia Paulo ki te faʼifaʼitaki ʼa Sesu Kilisito, pea neʼe mole koa tuha ia mo te falala? Neʼe tala tuʼumaʼu e Sesu te moʼoni ʼi tona maʼuli pea mo tana minisitelio. (Soa. 14:6; 18:37) Kapau neʼe moʼoni ia te faifakamafola ʼa Sesu pea mo tuha mo te falala pea neʼe toe fakamafola pe e Paulo te logo ʼaia. Pea ʼe feala leva ke ui neʼe toe tuha mo te falala ia te faifakamafola ʼa te apositolo.
Ko Sehova ʼe ko te “Atua o te mooni.” (Pes. 31:6) Pea ʼe ha lelei te faʼahi ʼaia ʼi te ʼu palalau ʼaeni ʼa Paulo: “Koteuhi ko te u fakapapau fuli a te Atua e io ia te ia,” ʼae ko Kilisito. Neʼe ha lelei ʼi te maʼuli agatonu ʼa Sesu ʼi te kele, ko te ʼu fakapapau fuli ʼa Sehova neʼe moʼoni. ʼE hoko atu fenei ia Paulo: “Pea koia foki ae e tou puaki ai te Ameni ia te ia [Sesu] ki te kololia o te Atua.” (2 Ko. 1:20) Ko Sesu ʼe ko te “Ameni” ko tona fakaʼuhiga ʼaki ia ia ʼe hoko moʼoni anai te ʼu fakapapau fuli ʼae neʼe fai e Sehova ʼAtua.
Koia neʼe moʼoni te ʼu palalau ʼa Paulo, ohage pe ko Sesu Kilisito pea mo Sehova ʼAtua. (2 Ko. 1:19) Neʼe mole ko he tahi ʼe holo talaga, peʼe ko he tahi ʼe ina fai he ʼu fakapapau “fakatagata.” (2 Ko. 1:17) Kaʼe neʼe haʼele ia mo te laumalie. (Kal. 5:16) Pea ka felogoʼi mo te hahaʼi, neʼe tokaga pe ia ki te ʼu faʼahi ʼae neʼe lelei kia natou. Neʼe ina fakahoko tuʼumaʼu te ʼu meʼa ʼae neʼe ʼIo ki ai.
ʼE KE FAKAHOKO KOA TE FAʼAHI NEʼE KE ʼIO KI AI?
Ia ʼaho nei, tokolahi te hahaʼi ʼae ʼe mole natou mulimuli ki te ʼu pelesepeto Fakatohi-tapu, ʼe mole natou fakahoko ʼanatou fakapapau mo kapau ʼe hoko he kiʼi meʼa noa peʼe ko he aluʼaga ʼe natou leleiʼia age. ʼI te faʼahi ʼo te gaue, ʼe tautau galoʼi te ʼu fakapapau neʼe fai, tatau aipe pe neʼe fakamoʼoni ki ai ʼi te pepa. Ki te tokolahi ko te fakapapau ʼae ʼe fai e he foʼi tokolua ʼi tanā ʼohoana ʼe mole tologa ia. Ko te ʼaʼasili ʼo te mavete ʼohoana ʼe ha lelei ai ʼe mole kei maʼuhiga ia te ʼohoana ki te tokolahi, he ʼe kia natou ʼe ko te fakatahi fakatemi pe ia ʼa he taumatuʼa.—2 Tim. 3:1, 2, MN.
Kaʼe ʼe feafeaʼi kia koe? ʼE ke fakahoko koa te faʼahi neʼe ke ʼIo ki ai? ʼE moʼoni, ʼi ʼihi temi ʼe feala ke hoko he ʼu aluʼaga ʼe mole lava hau taʼofi pea ʼe maʼua leva ke ke holoʼi tau fakatuʼutuʼu. Kaʼe ʼe mole tupu ko tau holo talaga. Kapau ʼe ke fai he fakapapau pea ʼe tonu ke ke faiga lahi ke ke fakahoko koteʼuhi ko koe ko te Kilisitiano moʼoni. (Pes. 15:4; Mat. 5:37) ʼE mahino ai anai ki te hahaʼi ʼe ke tuha mo te falala pea ʼe ke tala tuʼumaʼu te moʼoni. (Efe. 4:15, 25; Sakp. 5:12) ʼI te sio ʼa te hahaʼi ʼe ke tuha mo te falala ʼi te ʼu aluʼaga fuli ʼo tou maʼuli, pea ʼe lagi natou fia logo anai ki tau palalau age ki te moʼoni ʼo ʼuhiga mo te Puleʼaga ʼo te ʼAtua. Koia tou faiga malohi ke tou fakahoko tuʼumaʼu te ʼu faʼahi neʼe tou ʼIo ki ai.
^ pal. 7 ʼE moʼoni, mole faʼa fualoa ʼi te hili ʼo tana fai tana Uluaki Tohi ki te kau Kolinito, neʼe fakalaka ia Paulo ʼi Toloasi pea mo alu leva ki Masetonia. Pea neʼe tohi leva ʼi ai e Paulo ia te Lua Tohi ki te kau Kolinito. (2 Ko. 2:12; 7:5) Ki muli age, neʼe alu ʼo ʼaʼahi te kokelekasio ʼo Kolinito.