1, 2. (1) Ko ai ia “te tagata fakamooni agatonu mo mooni”? (2) Kotea te fakaʼuhiga ʼo te higoa ʼo Sesu? Kotea ʼae neʼe fai ʼe Sesu ke feala ai ki te kau Sutea ke natou toe maʼu ia te ʼofa ʼo Sehova?

ʼI TE temi ʼae neʼe fakamauʼi ai ia Sesu, neʼe ina ui fakahagatonu ki te kovana Loma ʼo Sutea, ʼae ko Posio Pilato: “Nee au tupu pea nee au hau ki te malamanei o fakamooni ki te mooni.” (Lau ia Soane 18:33-37.) Hili ki ai ni taʼu, neʼe ui e Paulo ʼo ʼuhiga mo Sesu, ʼe ko ia “ae nee ina fai he fakamooni lelei ia mua o Posio Pilato.” (1 Tim. 6:13) ʼE tou maʼuʼuli ʼi he malama agakovi ʼe puleʼi e Satana. Ke feala hatatou haga taupau totatou ʼuhiga fakamoʼoni, ʼe tonu ke tou lototoʼa ohage ko Sesu, “te tagata fakamooni agatonu mo mooni.”—Apk. 3:14.

² Neʼe fakahigoaʼi ia te kau Sutea ko te kau fakamoʼoni ʼa Sehova. Kaʼe neʼe liliu ia Sesu ko te tagata fakamoʼoni ʼe lahi tokotahi ia natou fuli ʼaia. (Esa. 43:10) ʼI muʼa ʼo te tupu ʼa Sesu, neʼe ui fenei e te ʼaselo kia Sosefo, te tamai tauhi ʼa Sesu: “E ke foaki anai kia ia te higoa ko Sesu; ko ia ae e ina haofaki anai tana hahai mai anatou agahala.” (Mat. 1:20, 21) Ko te higoa ʼo Sesu ʼe fakaʼuhiga ʼi te Fakahepeleo “Ko Sehova ʼe Ina Haofaki.” ʼE fakaʼaogaʼi anai e Sehova ia Sesu moʼo haofaki ia te malamanei mai  te agahala pea mo te mate. Neʼe fakaha e Sesu ki te kau Sutea te maʼuhiga ʼae ke natou fakahemala mai ʼanatou agahala, ke feala hanatou toe maʼu ia te ʼofa ʼo Sehova. (Mat. 10:6; 15:24; Luka 19:10) Neʼe fakamafola e Sesu ia te logo lelei ʼo ʼuhiga mo te Puleʼaga ʼo te ʼAtua. Koia neʼe tohi fenei e Maleko: “Nee alu leva ia Sesu ki Kalilea, o fagonogono te Evaselio o te Atua [pea] nee ina ui: Kua hoko te temi, pea kua ovi mai te puleaga o te Atua. Koutou fakahemala, pea koutou tui ki te logo lelei.” (Mko. 1:14, 15) Neʼe faʼafai ia Sesu pea mo lototoʼa ʼi te gaue faifakamafola. Neʼe ina fakatonutonuʼi ia te kau takitaki lotu, ʼo tupu ai tanatou fia matehi ia ia.—Mko. 11:17, 18; 15:1-15.

3. Kotea ʼae neʼe hoko hili ʼaho ʼe tolu ki te mate ʼo Sesu?

³ Hili ʼaho ʼe tolu ki te matehi ʼae ʼa Sesu, neʼe ʼi ai te aluʼaga fakaofoofo neʼe hoko. Neʼe fakatuʼuake ia ia e Sehova, mole ʼaki he sino fakakakano, kaʼe ʼaki he sino fakalaumalie. (1 Pet. 3:18) Neʼe ha ia Sesu ki ʼana tisipulo ʼaki he sino tagata, ʼo fakamoʼoni ai kia natou kua toe maʼuli ake. ʼI te ʼaho ʼo tana fakatuʼuake, neʼe toe ha tuʼa nima peʼe laka atu, ki ʼana tisipulo.—Mat. 28:8-10; Luka 24:13-16, 30-36; Soa. 20:11-18.

4. Kotea ʼae neʼe hoko ʼi te temi ʼae neʼe ha ai ia Sesu ki ʼana tisipulo? Kotea ʼae neʼe fakaha age e Sesu kia natou?

⁴ ʼI te ha tuʼa hiva ʼa Sesu kia natou, neʼe fakatahitahi ai ʼana apositolo pea mo ʼihi atu tisipulo. Neʼe ina fakamahino age kia natou ia te kua fakakikite ʼi te Tohi-Tapu tana mate pea mo tana fakatuʼuake. ʼI te hili ʼo te fono ʼaia, neʼe fakaha age e Sesu ki ʼana tisipulo pe kotea ʼae ʼe tonu ke natou fai. Neʼe ina ui fenei: “E fakaha anai te fakahemala mo te fakamolemole o te u agahala i tona huafa ki te u puleaga fuli, o kamata mai Selusalemi.” Pea neʼe ina fakaha fenei age: “Ko koutou e ko te kau tagata fakamooni koutou o te u mea aia.” *—Luka 24:44-48.

5, 6. (1) He ko ʼe neʼe ui e Sesu: “E koutou liliu anai ko aku tagata fakamooni”? (2) Kotea ʼae neʼe tonu leva ke fakamoʼoni ki ai ia te ʼu tisipulo ʼa Sesu?

⁵ Hili ki ai ʼaho ʼe 40, ʼi te toe ha fakamuli leva ʼae ʼa Sesu, neʼe mahino lelei ai te kau apositolo ki te tahi fakatotonu neʼe fai age e Sesu. Neʼe ina ui fenei: “E koutou liliu anai ko aku tagata fakamooni i Selusalemi, mo Sutea katoa, mo Samalia o kaku ki te u potu fuli o te malamanei.” (Gaue 1:8) Ko te kau tisipulo ʼa Sesu neʼe ko te kau Iselaele, koia neʼe kua natou kau ki te kau fakamoʼoni ʼa Sehova. Kaʼe neʼe tonu leva ke natou toe fakamoʼoni kia Sesu. ʼO feafeaʼi?

⁶ Neʼe tonu ke natou kamata fakaha ʼe fakaʼaogaʼi anai e Sehova ia Sesu moʼo haofaki ia te malamanei. Ko te faʼahiga haofaki ʼaia ʼe maʼuhiga age ia ʼi te ʼu haofaki ʼae neʼe fai e Sehova ki te kau Iselaele ʼi te temi muʼa. ʼAki te mate ʼa Sesu pea mo tona fakatuʼuake, kua feala leva ki te hahaʼi ke natou ʼateaina mai te agahala pea mo te mate. ʼI te temi ʼae neʼe fakanofo ai te ʼu tisipulo ʼa Sesu ʼaki te laumalie maʼoniʼoni, ʼi te Penikosite ʼo te taʼu 33 H.T.S., * neʼe natou kamata fakamoʼoni ai ʼo ʼuhiga mo “te u mea matalelei a te Atua.” Tokolahi ia natou ʼae neʼe natou logo ki te logo ʼaia, neʼe natou fakahemala pea mo tui ki te sakilifisio ʼa Sesu. Kua pule nei ia Sesu ʼi te lagi. Pea ʼe fakaʼaogaʼi e Sehova ia ia moʼo haofaki te toko lau i afe hahaʼi ʼi te kele.—Gaue 2:5, 11, 37-41.

7. Kotea ʼae neʼe fakamoʼoni ki ai ia te ʼu aluʼaga ʼae neʼe hoko ʼi te Penikosite ʼo te taʼu 33 H.T.S.?

⁷ ʼAki te ʼu aluʼaga ʼae neʼe hoko ʼi te Penikosite ʼo te taʼu 33 H.T.S., neʼe fakamoʼoni ai  neʼe tali e Sehova ia te sakilifisio haohaoa ʼa Sesu, ko he totogi moʼo haofaki ia te hahaʼi mai te agahala. (Hep. 9:11, 12, 24) Neʼe fakamahino e Sesu “nee mole hau ke faifekau age kia ia, kae ke faifekau mo foaki tona mauli ke totogi ai te kaugamalie.” (Mat. 20:28) ʼE fua lelei pe koa te totogi ʼaia ki te kau Sutea? Kailoa ia. ʼE fakafealagia e te totogi ke “fakamolemole te agahala a te malamanei.” ʼE ko te finegalo ʼo te ʼAtua “ke fakamauli te tagata fuli.”—Soa. 1:29; 1 Tim. 2:4-6.

8. Neʼe lava hoko atu feafeaʼi e te ʼu ʼuluaki tisipulo ʼa Sesu, tanatou fakamoʼoni ʼo ʼuhiga mo ia? Pea kotea ʼae neʼe natou fai?

⁸ ʼAki he lototoʼa, neʼe toe hoko atu pe te fakamoʼoni ʼa te ʼu ʼuluaki tisipulo ʼa Sesu ʼo ʼuhiga mo ia. Neʼe lava hoko feafeaʼi te faʼahi ʼaia? Neʼe mole ʼaki tonatou malohi totonu. Neʼe natou kole kia Sehova tona laumalie maʼoniʼoni, ke feala hanatou maʼu ia te lototoʼa ke hoko atu tanatou taupau tonatou ʼuhiga fakamoʼoni. (Lau ia Gaue 5:30-32.) ʼOsi taʼu ʼe 27 ki te Penikosite ʼo te taʼu 33 H.T.S., neʼe natou hoko atu pe “te fagonogono o te mooni, te folafola o te Evaselio” ki te kau Sutea mo “te u tagata fuli i te lalo lagi.”—Kol. 1:5, 23.

9. Ohage ko tona fakakikite e Sesu, kotea ʼae neʼe hoko ki te kokelekasio Fakakilisitiano?

⁹ ʼAki te temi, neʼe ʼi ai ʼihi ʼi te kokelekasio neʼe natou kamata fai he ʼu akonaki loi. (Gaue 20:29, 30; 2 Pet. 2:2, 3; Suta 3, 4) Koia, neʼe ʼulihi ai e te ʼu tagata faiakonaki loi ʼaia ia te kokelekasio katoa. Kaʼe neʼe fakakikite e Sesu, ʼe haga mafola anai te aposetasia ʼaia, ʼo kaku ki “te fakaosi o te malamanei.” (Mat. 13:37-43) ʼI te mahina ʼo Oketopeli 1914, neʼe fakanofo e Sehova ia Sesu ke Hau ki te malamanei katoa. Neʼe kamata ʼi te temi ʼaia, “te u aho fakamuli” ʼo te malama ʼa Satana.—2 Tim. 3:1.

10. (1) Kotea ʼae neʼe kua fakaha e te kau Kilisitiano fakanofo ki te hahaʼi? (2) Kotea ʼae neʼe hoko ʼi te mahina ʼo Oketopeli 1914? ʼE tou lava iloʼi feafeaʼi ia te faʼahi ʼaia?

¹⁰ Ia taʼu ʼe 30 ʼi muʼa ʼo te fakanofo hau ʼo Sesu, neʼe kamata fakamafola e te kau Kilisitiano fakanofo, ʼe pule anai ia te Puleʼaga ʼo te ʼAtua ʼi te taʼu 1914. Neʼe natou mahino ki te faʼahi ʼaia ʼaki te lea fakapolofeta ʼo Taniela, ʼae ʼe talanoa ai ki te fuʼu ʼakau ʼae neʼe tuʼusi pea ki muli age, neʼe toe homo ake. (Tan. 4:16) Neʼe talanoa ia Sesu ki he fakaʼiloga, ʼe tokoni anai ki ʼana tisipulo ke natou mahino, kua fakanofo Hau ia ia pea kua  kamata te ʼu ʼaho fakaʼosi. ʼAki te ʼu aluʼaga ʼae neʼe hoko ʼi te malamanei, talu mai te taʼu 1914, neʼe fakamoʼoni ai kua Hau nei ia Sesu. (Mat. 24:3, 7, 14; Luka 21:24) Ia ʼaho nei, ʼe tou fakaha ki te hahaʼi “te u mea matalelei a te Atua,” pea ʼe kau ki te ʼu meʼa ʼaia ia te fakanofo ʼae e Sehova ia Sesu ko te Hau ʼo te Puleʼaga, ʼi te taʼu 1914.

11, 12. (1) Kotea ʼae neʼe hoko ʼi te taʼu 1919? (2) Kotea ʼae neʼe mahino ki ai te ʼu tehina ʼi te taʼu 1935? (Vakaʼi te ʼuluaki pakī.)

¹¹ Neʼe fakanofo Hau ia Sesu Kilisito ʼi te taʼu 1914. Pea neʼe ina kamata fakaʼateaina ai te kau tisipulo fakanofo mai te ʼu lotu hala, ia “Papilone lahi.” (Apk. 18:2, 4) ʼI te taʼu 1919, ʼi te hili pe ʼo te ʼUluaki Tau Fakamalamanei, neʼe faigafua leva ki te ʼu tehina fakanofo hanatou faifakamafola ʼi te malamanei katoa. Neʼe natou fakaha ki te hahaʼi, kua feala ke haofaki natou ʼaki te sakilifisio faitotogi ʼa Kilisito pea mo fakaha age te logo lelei ʼo ʼuhiga mo te Puleʼaga ʼo te ʼAtua. Koia, neʼe feala ai ki te toko lau ʼi afe hahaʼi ke natou ako te moʼoni pea mo fakanofo natou ke natou kaugā hau mo Kilisito ʼi Selo.

¹² ʼI te taʼu 1935, neʼe mahino lelei ai neʼe kua kamata fakatahiʼi e Sesu ia te “tahi ʼu ovi.” Ia ʼaho nei, ko te toko lau ʼi miliona hahaʼi mai te malamanei katoa, kua natou kau ki te tahi ʼu ovi ʼaia. ʼE natou fakatahi mo te kau Kilisitiano fakanofo, ʼo natou fakamoʼoni ai ki ʼihi, ʼaki he lototoʼa ohage ko Kilisito. ʼE natou tui, ʼe gata pe ki te sakilifisio ʼa Sesu, ʼe feala ke haofaki ai ia natou. ʼE natou iloʼi, kapau ʼe natou faʼa kataki ʼi te gaue faifakamafola pea mo fakafiafiaʼi ia te loto ʼo Sehova, ʼe feala anai ke natou hao mai “te mamahi lahi” pea mo maʼuʼuli ʼi te malama foʼou ʼa te ʼAtua.—Soa. 10:16, MN; Apk. 7:9, 10, 14.

13. ʼI totatou ʼuhiga Fakamoʼoni ʼa Sehova, kotea ʼae ʼe tonu ke tou fai? ʼE tou lava faʼifaʼitakiʼi feafeaʼi ia te ʼu ʼuluaki Kilisitiano?

¹³ ʼE ko he toe pilivilesio hatatou fakamoʼoni ki ʼihi ʼo ʼuhiga mo “te u mea matalelei” ʼae neʼe fai e Sehova pea mo ʼana fakapapau ʼo ʼuhiga mo te ka haʼu. ʼE moʼoni ʼe mole faigafua tatatou haga fakahoko ia te gaue ʼaia. ʼE ʼi ai ʼihi ʼe mole natou tali lelei te logo peʼe natou fakatagaʼi tatou. Kapau ko ia, ʼe lelei ke tou faʼifaʼitakiʼi ia te apositolo ko Paulo pea mo ʼona kaumeʼa. Neʼe ui fenei e Paulo: “Nee toe fakamalohii omatou loto e te Atua ke matou fakaha kia koutou te Evaselio a te Atua, i lotomalie o ni tau lahi aupito.” (1 Tes. 2:2) ʼE tonu ke tou fakahoko te fakapapau ʼae neʼe tou fai ʼi te temi ʼae neʼe tou foaki ai totatou maʼuli kia Sehova. ʼE tou haga taupau anai totatou ʼuhiga Fakamoʼoni ʼa Sehova ʼo kaku ki te fakaʼauha ʼo te malama ʼa Satana. (Esa. 6:11) Kaʼe ʼe mole feala ke tou fai ia te faʼahi ʼaia ʼaki pe totatou malohi. ʼE tonu ke tou faʼifaʼitakiʼi te ʼu ʼuluaki  Kilisitiano. ʼE tonu ke tou kole kia Sehova tona laumalie maʼoniʼoni, ke feala ai ke tou maʼu te malohi ʼae ʼe fakalaka ʼi te malohi mahani.—Lau ia 2 Kolinito 4:1, 7; Luka 11:13.

14, 15. (1) ʼI te temi ʼo te kau apositolo, neʼe feafeaʼi te aga ʼa te hahaʼi ki te kau Kilisitiano moʼoni? Neʼe fakalotomalohiʼi feafeaʼi natou e Petelo? (2) Kotea ʼae ʼe tonu ke tou manatuʼi moka fakatagaʼi tatou ʼuhi ko totatou ʼuhiga kau Fakamoʼoni ʼa Sehova?

¹⁴ Ia ʼaho nei, ʼe ko te toko lau ʼi miliona hahaʼi ʼe natou lau ko natou ko te kau Kilisitiano, kaʼe ʼe natou fai ia te ʼu aga ʼae ʼe fehiʼa ki ai te ʼAtua. Koia ʼe mole ʼofa ai te ʼAtua ia natou. (Tito 1:16) ʼI te temi ʼo te kau apositolo, tokolahi neʼe mole natou fakahoko te faʼahiga tauhi ʼae ʼe leleiʼia e te ʼAtua. Tokolahi neʼe natou fehiʼa ʼi te kau Kilisitiano moʼoni. Koia neʼe fia fakalotomalohiʼi natou e Petelo, ʼo ina ui fenei: “Kapau e laukovii koutou o uhi ko te huafa o Kilisito, e kotou manuia.” He ko ʼe neʼe tonu ke natou fiafia? Koteʼuhi ʼe ʼofa ia Sehova ia natou pea ʼe natou maʼu ia tona laumalie maʼoniʼoni.—1 Pet. 4:14.

¹⁵ Ia ʼaho nei, ʼe laukoviʼi koa te kau Fakamoʼoni ʼa Sehova “uhi ko te huafa o Kilisito”? ʼEi, koteʼuhi ʼe mole gata ʼaki pe tanatou fakamoʼoni ʼo ʼuhiga mo Sehova, kaʼe ʼe natou toe palalau foki ʼo ʼuhiga mo Sesu, pea mo fakaha ko ia ko te Hau ʼo te Puleʼaga ʼo te ʼAtua. Maʼia mo Sesu neʼe fakatagaʼi ʼuhi ko tana fakamoʼoni ʼo ʼuhiga mo Sehova. Neʼe ina ui fenei ki te kau fakafeagai: “Nee au hau i te huafa o taku Tamai, pea e mole kotou tali au.” (Soa. 5:43) Koia ka fakatagaʼi koutou ʼuhi ko koutou ko he kau fakamoʼoni, kotou manatuʼi ʼe ʼofa ia Sehova ia koutou pea ʼe kotou maʼu ia tona laumalie maʼoniʼoni.

16, 17. (1) Kotea ʼae ʼe logoʼi e te hahaʼi ʼa Sehova ʼi tanatou gaue faifakamafola? (2) Kotea ʼae ʼe tonu ke tou haga fai?

¹⁶ ʼAua naʼa galo kia koutou, ʼe kaugā malie te hahaʼi ʼi te malamanei katoa ʼe natou ʼomai ki te moʼoni. Maʼia mo te ʼu koga meʼa ʼae ʼe mole hahaʼi ai te kau Fakamoʼoni ʼa Sehova, ʼe ʼi ai pe ʼihi ʼe natou fia logo ki tatatou logo. Koia ka tou felaveʼi mo he tahi ʼe ina fia iloʼi te moʼoni, tou faiga ke tou liliu ʼo ʼaʼahi ia ia pea mo kamata he ako Tohi-Tapu mo ia. Kapau ʼe tou fai feia, ʼe tou tokoni kia ia ke ina iloʼi ia Sehova pea mo fia foaki tona maʼuli kia te ia ʼaki te papitema. Kotea ʼae ʼe kotou logoʼi moka kotou fai te gaue ʼaia? Neʼe ui fenei e Sarie, ko te tuagaʼane mai Afelika Saute, kua taʼu 60 tupu tana ʼi te moʼoni: “ʼE au lotofakafetaʼi koteʼuhi ʼe fakafealagia mai te sakilifisio faitotogi ʼa Sesu ke au felogoʼi mo Sehova, te Tuʼi ʼAliki ʼo te ʼatulaulau. ʼE au fiafia koteʼuhi ʼe feala ke au fakaha tona huafa lahi.” Neʼe tokoni ia ia pea mo tona ʼohoana ko Martinus, ki ʼana fanau ʼe toko tolu pea mo ʼihi atu, ke natou tauhi kia Sehova. Neʼe ina hoko atu fenei: “ʼE mole he tahi age gaue ʼe maʼu ai he toe fiafia lahi feia. ʼE foaki mai e Sehova kia tatou fuli ia tona laumalie maʼoniʼoni, ke tou maʼu ai te malohi ke tou hoko atu te gaue ʼaia ʼe haofaki ai te hahaʼi.”

¹⁷ Peʼe kua tou papitema peʼe kailoa, kaʼe ʼe tonu ke tou lotofakafetaʼi ʼuhi ko te pilivilesio ʼae ke tou fakatahi mo te kau Fakamoʼoni ʼa Sehova. Koia, tou haga foaki fakatahi mo tana hahaʼi he fakamoʼoni ʼi te malamanei katoa. Tou nonofo maʼa mai te malama ʼa Satana. Kapau ʼe tou fai ia te faʼahi ʼaia, ʼe tou fakavikiviki anai ia ia ʼae ʼe tou fakafofoga, tatatou Tamai ʼofa ʼae ko Sehova.