“E Aoga Kia Koutou Te Kataki Fualoa”
ʼI TE liliu ʼa Anita ko he Fakamoʼoni ʼa Sehova, neʼe lahi ʼaupito te ita ʼo tona ʼohoana. * (Vakaʼi te kiʼi nota.) Neʼe faiga ke ina taʼofi tana alu ki te ʼu fono pea neʼe ina fakatotonu age ke ʼaua tana puʼaki ia te huafa ʼo te ʼAtua. ʼI te temi fuli pe ʼae neʼe logo ai ki te huafa ʼo Sehova, neʼe kovi ʼosi tona ita.
Pea tahi, neʼe mole loto e te ʼohoana ʼo Anita ke akoʼi ki tanā fanau ke natou iloʼi ia Sehova peʼe ke ʼave natou ki te ʼu fono. Neʼe faigataʼa ʼaupito ki ai koteʼuhi neʼe ina fai fakafufu te ʼu ako Tohi-Tapu ʼo tanā fanau.
Ohage ko te aluʼaga ʼae neʼe hoko kia Anita, ʼe feala ki he tahi ʼo tokotou famili ke ina taʼofi takotou tauhi ʼae kia Sehova. Peʼe lagi kotou felaveʼi mo he tahi age aluʼaga faigataʼa. ʼE lagi kotou tau mo he mahaki kua fualoa. Pe neʼe lagi mate hakotou fanau, peʼe ko tokotou ʼohoana. Peʼe lagi ko he tahi ʼo tokotou famili neʼe kotou ʼofa ai kua mavae mai ia Sehova. ʼI te ʼu aluʼaga ʼaia, kotea ʼae ʼe kotou lava fai ke kotou nonofo agatonu ai kia Sehova?
Neʼe ui fenei e te apositolo ko Paulo: “E aoga kia koutou te kataki fualoa.” (Hepeleo 10:36) Koia, kotea ʼae ʼe feala ke tokoni atu ke kotou faʼa kataki?
KOTOU FAIKOLE KIA SEHOVA KE TOKONI ATU
Moka kotou lotomamahi, ʼaua naʼa galo kia koutou ʼe tonu ke kotou falala ki te tokoni ʼa Sehova ke kotou faʼa kataki. Kotou faikole kia te ia ke tokoni atu. ʼE ko te faʼahi ʼaia neʼe fai e Ana ʼi te temi ʼae neʼe mate fakapunamaʼuli ai tona ʼohoana. Neʼe kua taʼu 30 ia tanā ʼohoana. ʼE ui fenei e Ana: “Neʼe mole toe liliu mai ki fale mai tana gaue. Neʼe kei taʼu 52 pe.”
Neʼe maʼumaʼua ia Ana ʼi tana gaue, kaʼe neʼe mole feala ke puli tona lotomamahi. Kotea ʼae neʼe ina fai? ʼE ina ui fenei: “Neʼe au avahi toku loto kia Sehova pea neʼe au kole mamahi ke tokoni mai.” ʼE ina iloʼi neʼe tokoni age ia Sehova koteʼuhi hili pe ʼo tana faikole, neʼe logo fimalie ai. Pea ʼe ina ui fenei: “ ʼE au tui papau ki te fakatuʼuake anai ʼo toku ʼohoana e Sehova.”—Filipe 4:6, 7.
ʼE fakapapauʼi e Sehova ki ʼana kaugana ʼe fagono anai ki ʼanatou faikole. (Pesalemo 65:3) Pea ʼe ina foaki anai kia natou ia meʼa fuli ʼae ʼe ʼaoga kia natou moʼo hoko atu tanatou tauhi kia te ia. ʼE tokoni atu anai ia Sehova ke kotou nonofo agatonu kia te ia maʼia ʼi te ʼu aluʼaga faigataʼa.
KOTOU NONOFO OVI KI ʼOKOTOU TEHINA MO TUAGAʼANE
ʼE tokoni mai Sehova ke tou faʼa kataki ʼi hona tahi age aluʼaga. Neʼe ina foaki mai ʼotatou tehina mo tuagaʼane ʼi te kokelekasio. ʼE feala ke tou taʼofi he ako mai te faʼahiga fetokoniʼaki ʼa te ʼu tehina ʼi Tesalonika ʼi tonatou fakatagaʼi. ʼI te temi ʼaia, neʼe tonu ke natou fefakalotomalohiʼaki. (1 Tesalonika 2:14; 5:11) Neʼe natou tokoni ki ʼonatou tehina mo tuagaʼane ke natou nonofo agatonu tuʼumaʼu kia Sehova ʼaki tanatou fakatahi pea mo fakakaumeʼa mo natou. Ohage ko te ʼu tehina mo tuagaʼane ʼi Tesalonika, kotea ʼae ʼe feala ke tou fai ke tou nonofo agatonu?
ʼE tonu ke tou agafakakaumeʼa mo natou ʼo te kokelekasio pea mo fefakalotomalohiʼaki, tafitō ʼi te ʼu temi faigataʼa. (Loma 14:19) Neʼe mamahi ia te apositolo ko Paulo ʼuhi ko te fakataga pea mo ʼihi fihifihia, kaʼe neʼe foaki ki ai e Sehova ia te malohi moʼo maʼu ia te faʼa kataki. Ohage la, neʼe fekauʼi e Sehova ia te ʼu tehina mo te ʼu tuagaʼane ke natou olo ʼo fakalotomalohiʼi ia Paulo. Neʼe ui fenei e te apositolo ko Paulo ʼo ʼuhiga mo ʼona kaumeʼa: “Nee natou fakapelepelei toku loto.” (Kolose 4:10, 11) Neʼe ʼoʼofa ʼona tehina ʼaia kia Paulo. Koia ʼae ʼi te temi ʼae neʼe ʼaoga ki ai he tokoni, neʼe natou fakalotofimalieʼi pea mo fakalotomalohiʼi ia ia. ʼE feala ke kotou manatuʼi tokotou fakalotomalohiʼi e ʼokotou tehina mo tuagaʼane ʼo takotou kokelekasio, lagi ʼaki ʼanatou palalau peʼe ko he meʼa neʼe natou fai maʼa koutou.
KOTOU KOLE TOKONI KI TE KAU TAGATA ʼAFEĀ
Neʼe toe foaki atu e Sehova kia koutou ia he kau tagata ʼafeā ʼi te kokelekasio. ʼE feala ki te ʼu tagata ʼaia ke natou fakalotomalohiʼi koutou pea mo foaki atu he ʼu tokoni ʼe fakatafito ki te Tohi-Tapu. “E natou hage anai ko he nonoaga i te matagi, ko he holaaga i te afa, ko ni vaitafe i he fenua moamoa, ko te malu i he utu lahi i he kolo kele magemage.” (Esaia 32:2) ʼE ko he meʼa fakalotofimalie ia tatatou iloʼi ʼae ko te ʼu tehina ʼaia ʼe natou fia tokoni moʼoni kia koutou. Koia moka kotou fakalaka ʼi he ʼu temi faigataʼa, kotou kole tokoni ki te kau tagata ʼafeā. ʼE feala ke natou tokoni atu ke kotou tauhi tuʼumaʼu kia Sehova.
ʼE mahino ia, ʼe mole feala ki te kau tagata ʼafeā ke natou fakatokatoka ʼokotou fihifihia fuli. Pea ʼe natou heʼe haohaoa ohage pe ko koutou. (Gaue 14:15) Kaʼe ʼe kotou logoʼi anai he fimalie moka kotou kole tokoni ki he tagata ʼafeā pea mo faikole kia Sehova ʼo ʼuhiga mo tokotou fihifihia. (Sakopo 5:14, 15) Ohage la, neʼe fakalotomalohiʼi e te kau tagata ʼafeā ia he tehina ʼi Italia, koteʼuhi neʼe tau mo he mahaki faigataʼa talu mai ni lauʼi taʼu. Neʼe ina ui fenei: “Neʼe feala ke au katakiʼi toku mahaki, ʼuhi ko te ʼofa ʼo te ʼu tehina pea mo tanatou ʼaʼahi tuʼumaʼu ia au.” ʼE loto e Sehova ke kotou kole tokoni ki te kau tagata ʼafeā mo kapau ʼe kotou lotomamahi.
KOTOU TOKAKAGA TAFITŌ KI TAKOTOU TAUHI ʼAE KIA SEHOVA
Moka kotou tokaga tafitō ki takotou tauhi ʼae kia Sehova, ʼe kotou sisio anai pe ʼe tokoni feafeaʼi atu ia Sehova. Ko te faʼahi ʼaia neʼe fai e John. ʼI tona taʼu 39, neʼe ina maʼu ia te kosea. Neʼe manatu ia ʼe mole feala ke mahaki koteʼuhi neʼe kei malohi. Neʼe tuʼania ki tona ʼohoana pea mo tanā tamasiʼi ʼae neʼe kei taʼu tolu pe. ʼE ina ui fenei: “Neʼe tonu ke tokaga toku ʼohoana ki tamā tamasiʼi pea mo au. Neʼe toe tokoni mai ki toku ʼave ʼae ki te toketa.” Neʼe gaʼegaʼe ʼaupito ia John pea neʼe mamahi tona fatu ʼuhi ko te ʼu faitoʼo ʼae neʼe ina toʼo. Kaʼe neʼe mole gata ai. Neʼe iloʼi e John neʼe tau tugaki ia tana tamai pea neʼe tonu ke tokaga he tahi ki ai.
Kotea ʼae neʼe tokoni kia John pea mo tona famili lolotoga ia te aluʼaga faigataʼa ʼaia? Logo la tona gaʼegaʼe kaʼe neʼe ina hoko atu pe ia tana tauhi mo tona famili kia Sehova. ʼE ina ui fenei: “Neʼe matou kau ki te ʼu fono fuli, mo faifakamafola ʼi te vahaʼa fuli pea mo fai tuʼumaʼu ia tamatou ako fakafamili maʼia pe neʼe faigataʼa.” Neʼe mahino kia John te maʼuhiga ʼo tana haga taupau ʼana felogoʼi lelei ʼae mo Sehova. Logo la neʼe punamaʼuli pea mo tuʼania ʼi te kamata, kaʼe neʼe logo fimalie ki ʼamuli. Neʼe ina iloʼi neʼe ʼofa ia Sehova kia ia ʼo ina foaki age te malohi ʼae neʼe ʼaoga kia ia. ʼE feala kia Sehova ke tokoni atu moka kotou tuʼania peʼe mataku. ʼE ui fenei e John: “ ʼE feala kia Sehova ke ina fakalotomalohiʼi koutou ohage pe ko tana fai mai kia au.”
Moka kotou lotomamahi kotou manatuʼi ia te ʼu palalau ʼaeni ʼa Paulo: “E aoga kia koutou te kataki fualoa.” Kotou falala kia Sehova ʼo kotou faikole kia te ia. Kotou nonofo ovi ki ʼokotou tehina ʼi te kokelekasio, mo kotou kole tokoni ki te kau tagata ʼafeā pea mo kotou tokakaga tafitō ki takotou tauhi ʼae kia Sehova. ʼE tokoni atu anai Sehova moka kotou felaveʼi mo he fihifihia pe ia ʼaho nei peʼe ʼi te ka haʼu.
^ pal. 2 Neʼe fetogi te ʼu higoa.