1. Neʼe ha feafeaʼi te maʼuhiga ʼo te gaue faifakamafola kia Sesu? Fakamahino.

NEʼE fia palalau tuʼumaʼu ia Sesu ki te Puleʼaga ʼo te ʼAtua. ʼI tana kei nofo ʼi te kele, neʼe tuʼa lahi tana talanoa ki te Puleʼaga. Koia neʼe tuʼa 100 tupu tana talanoa ki ai lolotoga tana minisitelio. ʼE ha mai ai, neʼe maʼuhiga moʼoni kia Sesu ia te Puleʼaga.—Lau ia Mateo 12:34.

2. Ko te toko fia neʼe logo ki te fakatotonu ʼae ia Mateo 28:19, 20, pea he koʼe ʼe feala ke tou manatu feia?

² ʼI te hili pe ʼo tona fakatuʼuake, neʼe felaveʼi Sesu mo te toko 500 tupu tisipulo. (1 Kolinito 15:6) Neʼe lagi ko te temi ʼaia neʼe ina fai ai te fakatotonu ke fakamafola te logo lelei ki te hahaʼi ʼo “te u puleaga fuli.” Kaʼe ʼe mole faigafua anai te gaue. * (Vakaʼi te kiʼi nota.) Pea neʼe ina ui age kia natou ʼe hoko atu anai te  gaue faifakamafola ʼi he temi loaloaga ʼo kaku ki “te fakaosi o te malamanei.” Koia ka kotou fakamafola te logo lelei ia ʼaho nei, ʼe kotou tokoni ai ki te fakahoko ʼo te lea fakapolofeta ʼaia.—Mateo 28:19, 20.

3. Kotea te ʼu faʼahi ʼe tolu ʼe tokoni mai ki tatatou fakamafola te logo lelei?

³ ʼI te ʼosi fai e Sesu te fakatotonu ki te faifakamafola, neʼe ina ui fenei: “E au fakatahi mo koutou.” (Mateo 28:20) Koia neʼe fakapapauʼi e Sesu ki ʼana tisipulo, ʼe ina takitaki anai te gaue faifakamafola. Pea ʼe tokoni anai ki tanatou faifakamafola ʼi te malamanei katoa. ʼE toe fakatahi foki ia Sehova mo tatou. Koteʼuhi neʼe ina foaki mai “te u mea fuli e lelei” moʼo tokoni ki tatatou faifakamafola. (Hepeleo 13:20, 21) ʼI te alatike ʼaeni, ʼe tou vakaʼi anai te ʼu faʼahi ʼe tolu ʼo te ʼu meʼa lelei ʼaia: (1) te ʼu meʼa gaue ʼae ʼe tou maʼu, (2) te ʼu faʼahiga fakahoko ʼae ʼe tou fakaʼaogaʼi, pea (3) te ʼu faʼahiga ako ʼae ʼe tou maʼu. ʼUluaki, tou vakaʼi ʼihi meʼa gaue neʼe tou fakaʼaogaʼi ʼi te ʼu taʼu 100 kua hili.

4. ʼE tokoni feafeaʼi mai te ʼu meʼa gaue kehekehe ki tatatou faifakamafola?

⁴ Neʼe fakatatau e Sesu ia te Puleʼaga ki he pulapula neʼe to kia faʼahiga kele kehekehe. (Mateo 13:18, 19) Ko he tagata fai ʼoloto, ʼe ina fakaʼaogaʼi te ʼu meʼa gaue kehekehe moʼo teuteuʼi te kele. ʼE toe feia pe, ʼe foaki mai e totatou Hau te ʼu meʼa gaue ke tou fakaʼaogaʼi, ke tokoni ki te hahaʼi ke natou tali te logo lelei. Ko ʼihi meʼa gaue neʼe fakaʼaogaʼi ʼi he kiʼi temi veliveli, pea ko ʼihi ʼe kei fakaʼaogaʼi pe nei. Kaʼe ko meʼa gaue fuli ʼaia ʼe tokoni mai ke tou faiva ʼi te faifakamafola.

5. Kotea te kiʼi kate faifakamafola, pea neʼe feafeaʼi tona fakaʼaogaʼi?

⁵ ʼI te taʼu 1933, neʼe kamata fakaʼaogaʼi e te kau faifakamafola te kiʼi kate faifakamafola. Pea neʼe tokoni te meʼa gaue ʼaia ki te tokolahi ke natou kamata faifakamafola. Neʼe veliveli pea neʼe tuʼu ai te ʼu manatu Fakatohi-tapu ʼe nounou mo faigafua. ʼI ʼihi temi, neʼe ta te ʼu kiʼi kate foʼou mo te ʼu manatu Fakatohi-tapu foʼou. Ko te tehina ko Erlenmeyer, neʼe ina kamata fakaʼaogaʼi te kiʼi kate faifakamafola ʼi tona teitei taʼu hogofulu. Neʼe ina ui fenei: “Neʼe matou fai mahani te ʼu ʼuluaki palalau ʼaeni, ‘ ʼE feala la ke ke lau te kiʼi kate ʼaeni?’ Hili ia, pea matou fakaha age mo te tohi pea matou olo ai leva.”

6. Kotea te ʼu aluʼaga neʼe tokoni ai te kiʼi kate ki te kau faifakamafola?

⁶ Neʼe lahi te ʼu aluʼaga neʼe tokoni ai te kiʼi kate ki te kau faifakamafola. Ohage la, ko ʼihi kau faifakamafola neʼe aga ufiufi mo natou fia gaue ʼi te minisitelio, kaʼe neʼe mole natou iloʼi pe kotea ʼe tonu ke natou ui. Pea ko ʼihi neʼe natou lototoʼa. Neʼe natou fia fakaha ia meʼa fuli kua natou iloʼi ʼi ni kiʼi minuta pe. Kaʼe neʼe mole natou fai tuʼumaʼu ʼaki he aga fakaʼeteʼete. Neʼe tokoni te kiʼi kate ki te kau faifakamafola fuli ke mahino mo tasilo te logo lelei ʼae ʼe natou tala.

7. Kotea te ʼu fihifihia neʼe hoko ʼi te fakaʼaogaʼi ʼo te kiʼi kate?

⁷ Neʼe toe ʼi ai foki mo te ʼu fihifihia ʼo ʼuhiga mo te kiʼi kate. Neʼe ui fenei e te tuagaʼane  ko Grace Estep: “ ʼI ʼihi temi, neʼe fehuʼi mai, ‘Kotea ʼae ʼe talanoa ki ai? Fakaha mai pe koe.’” Pea tahi, ko ʼihi ʼae neʼe natou faifakamafola ki ai neʼe mole popoto ʼi te lautohi. Ko ʼihi neʼe natou toʼo te kiʼi kate mo pupunu atu aipe te matapa. Pea ko ʼihi neʼe mole natou leleiʼia te logo lelei, koia neʼe natou haehae liki te kiʼi kate. Logo la te ʼu fihifihia ʼaia, kaʼe neʼe tokoni te kiʼi kate ki te kau faifakamafola, ke natou tala te logo lelei ki ʼonatou tatau mo iloʼi ai natou ko te kau faifakamafola ʼo te Puleʼaga.

8. Neʼe feafeaʼi te fakaʼaogaʼi ʼo te fakatagi feʼaveʼaki? (Vakaʼi te ʼuluaki pāki.)

⁸ Lolotoga te ʼu taʼu 1930 mo te kamata ʼo te ʼu taʼu 1940, ko te tahi meʼa gaue neʼe fakaʼaogaʼi, ko te fakatagi feʼaveʼaki. Neʼe fakahigoaʼi e ʼihi kau faifakamafola te meʼa gaue ʼaia ko Alone. Koteʼuhi neʼe mole natou palalau, kaʼe fakaʼaogaʼi pe te fakatagi. (Lau ia Ekesote 4:14-16.) Kapau neʼe fia logo he tahi, neʼe fakatagi he akonaki Fakatohi-tapu ʼe nounou pea fakatoʼo age hana ʼu tohi. ʼI ʼihi temi, neʼe ko he ʼu famili katoa neʼe fakatahitahi ʼo fagono ki he akonaki neʼe fakatagi. ʼI te taʼu 1934, neʼe kamata faʼu e te Sosiete Watch Tower te ʼu fakatagi feʼaveʼaki neʼe fakatuʼutuʼu ke fakaʼaogaʼi ʼi te minisitelio. Ki muli age, neʼe ko akonaki ʼe 92 neʼe puke e te ʼu tehina.

9. Kotea te ʼu fua lelei ʼo te fakaʼaogaʼi ʼo te fakatagi feʼaveʼaki?

⁹ ʼI te logo ʼa Hillary Goslin ki te akonaki neʼe fakatagi, neʼe ina kole te fakatagi ke nofo mo ia ʼi he vahaʼa katoa ke ina vaevae ai te logo lelei mo ʼona vahaʼa fale. Neʼe leleiʼia e ʼihi te moʼoni pea natou papitema. Ki muli age, neʼe ako te ʼu ʼofafine ʼe toko lua ʼo te tehina ko Goslin ʼi te Ako ʼo Kileate pea nā liliu ai ʼo misionea. Ohage pe ko te kiʼi kate faifakamafola, neʼe tokoni te fakatagi feʼaveʼaki ki te tokolahi ke natou kamata faifakamafola. Pea ki muli mai, ʼaki te Ako Fakateokalatike neʼe akoʼi e te Hau ia tana hahaʼi ke natou liliu ko he kau faiako faiva.

10, 11. Neʼe feafeaʼi te fakaʼaogaʼi ʼo te ʼu nusipepa mo te latio moʼo tala te logo lelei? He koʼe neʼe fua lelei te ʼu faʼahiga fakahoko ʼaia?

¹⁰ ʼAki te takitaki ʼo totatou Hau, ʼe fakaʼaogaʼi e te hahaʼi ʼa te ʼAtua te ʼu faʼahiga fakahoko kehekehe ʼo te faifakamafola ke kakusia te tokolahi. Neʼe maʼuhiga tafitō te ʼu faʼahiga fakahoko ʼaia ʼi te temi neʼe kei tokosiʼi ai te kau gaue faifakamafola. (Lau ia Mateo 9:37.) Ohage la, kua hiki ki ai ni taʼu neʼe fakaʼaogaʼi te ʼu nusipepa moʼo tala te logo lelei. ʼI te vahaʼa fuli, neʼe momoli e te tehina ko Russell tana akonaki Fakatohi-tapu ki te fale sulunale. ʼOsi ʼaia, pea toe momoli e te fale ʼaia tana akonaki ki ʼihi fale sulunale ʼi Kanata, mo Eulopa pea mo Amelika. ʼI te taʼu 1913, neʼe ta te ʼu akonaki ʼa te tehina ko Russell ia sulunale ʼe 2 000 pea neʼe lau e te teitei toko hogofulu ma nima miliona hahaʼi.

¹¹ Neʼe toe fua lelei foki te fakaʼaogaʼi ʼo te latio moʼo tala te logo lelei. ʼI te ʼaho 6 ʼo Apelili 1922, neʼe fai e te tehina ko Rutherford tana ʼuluaki akonaki ʼi te latio, pea neʼe  fagono ki ai te teitei toko 50 000 hahaʼi. Mole tuai, neʼe matou fakaʼaogaʼi tomatou fale latio ko te WBBR, pea neʼe fai te ʼuluaki polokalama ʼi te ʼaho 24 ʼo Fepualio 1924. Neʼe ui fenei ʼi Te Tule Leʼo ʼo te ʼaho 1 ʼo Tesepeli 1924: “ ʼE matou tui ko te latio ʼe ko he faʼahiga fai ʼe mole totogi kovi pea ʼe fua lelei ki te fakamafola ʼo te logo ʼo te moʼoni.” Ohage pe ko te ʼu nusipepa, neʼe tokoni mai te latio ke matou fakakaku te logo lelei ki te tokolahi ʼi te ʼu koga meʼa neʼe kei tokosiʼi ai te kau faifakamafola.

12. (1) Ko te ʼu faʼahiga aluʼaga fea ʼe kotou leleiʼia tafitō ʼi te faifakamafola faigamalie? (2) Kotea ʼe feala ke tokoni mai ke tou tauʼi totatou mataku?

¹² Ko te faifakamafola faigamalie, ʼe ko he faʼahiga fakahoko lelei ʼaia ʼe fakaʼaogaʼi ia ʼaho nei moʼo fakakaku te moʼoni ki te hahaʼi. Neʼe lahi te ʼu faiga neʼe fai moʼo faifakamafola ki te hahaʼi ʼi te ʼu talitaliʼaga ka, te ʼu talitaliʼaga saliote afi, te ʼu tauʼaga motoka, te ʼu koga meʼa ʼe kaugā malie ai te hahaʼi pea mo te ʼu fakatauʼaga meʼa kai. ʼE kotou hoha koa mo kapau ʼe kotou kau ki te faifakamafola faigamalie? Kapau koia, kotou faikole ke kotou maʼu tokoni pea kotou vakaʼi te ʼu palalau ʼaeni neʼe fai e te taupau feʼaluʼaki ko Manera: “Ko te ʼu faʼahiga fakahoko foʼou ʼi te minisitelio, ʼe ko he tahi ʼu faʼahi ʼo tatatou tauhi kia Sehova, ʼe tou fakamoʼoni ai tatatou agatonu kia te ia mo ʼahiʼahiʼi tatatou tui. Pea ʼe tou fia fakaha ai tatatou lotolelei ʼae ke tou tauhi kia te ia tatau aipe pe ʼe feafeaʼi tona faʼahiga fakahoko.”  Ka tou tauʼi totatou mataku mo tou fakaʼaogaʼi te ʼu faʼahiga fakahoko foʼou ʼi te faifakamafola, ʼe tou fakamalohiʼi ai tatatou falala kia Sehova mo tou liliu ai ʼo faiva ʼi te minisitelio.—Lau ia 2 Kolinito 12:9, 10.

13. He koʼe ʼe fua lelei te fakaʼaogaʼi ʼo totatou tuʼasila ʼi te Neti ʼi te minisitelio? Kotea he ʼu aluʼaga neʼe hoko ʼi takotou fakaʼaogaʼi totatou tuʼasila?

¹³ Tokolahi te kau faifakamafola ʼe natou fiafia ʼi te fakaha ki te hahaʼi totatou tuʼasila ʼi te Neti, jw.org. Pea ʼe feala ki te hahaʼi hanatou lau peʼe natou toʼo mai totatou tuʼasila ʼaia he ʼu tohi Fakatohi-tapu ia lea ʼe 700 tupu. ʼI te ʼaho fuli, ko te toko tahi miliona onogeau afe tupu hahaʼi ʼe natou vakaʼi totatou tuʼasila ʼi te Neti. ʼI muʼa atu, ʼaki te latio neʼe feala ke logo te hahaʼi ʼae ʼe nonofo ʼi te ʼu koga meʼa mamaʼo ki te logo lelei. Pea ʼe toe feia pe ia ʼaho nei ʼaki totatou tuʼasila ʼi te Neti.

14. He koʼe neʼe ʼaoga ke akoʼi te kau faifakamafola? Pea kotea te ako neʼe tokoni kia natou ke natou liliu ko he kau faiako faiva?

¹⁴ Ko te ʼu meʼa gaue mo te ʼu faʼahiga fakahoko neʼe tou talanoa ki ai, neʼe fua lelei. Kaʼe neʼe ʼaoga ke akoʼi te kau faifakamafola ʼo te ʼu taʼu ʼaia, ke natou fakahoko lelei tanatou minisitelio. Ohage la ʼi ʼihi temi, neʼe mole tali e ʼihi te logo lelei ʼae ʼe fakaha age ʼaki te fakatagi feʼaveʼaki. Pea ʼi ʼihi lakaga, neʼe tali e ʼihi te moʼoni pea natou fia iloʼi he tahi atu ʼu manatu. Neʼe ʼaoga ke iloʼi e te kau faifakamafola pe ʼe feafeaʼi hanatou tali ki te ʼu fehuʼi fakafeagai ʼaki he aga fakaʼeteʼete. Neʼe toe ʼaoga ke natou ako ke natou liliu ko he kau faiako faiva. ʼE moʼoni, neʼe tokoni te laumalie maʼoniʼoni ʼo te ʼAtua ki te tehina ko Knorr, ke mahino ki te maʼuhiga ʼo te akoʼi ʼo te kau faifakamafola ke natou popoto ʼi te palalau ʼi te minisitelio. Koia ʼi te kamata ʼo te taʼu 1943, neʼe fakatuʼutuʼu ai ʼi te ʼu kokelekasio te Ako Fakateokalatike. Neʼe tokoni te ako ʼaia kia natou fuli ke natou liliu ko he kau faiako faiva.

15. (1) Kotea neʼe hoko ki ʼihi ʼi tanatou fakahoko ʼanatou akonaki ʼi te Ako Fakateokalatike? (2) ʼE ha feafeaʼi ia koutou te fakapapau ʼa Sehova ʼae ia Pesalemo 32:8?

¹⁵ Tokolahi te ʼu tehina neʼe mole mahani ʼi te fai akonaki ki te kaugā malie. ʼE manatuʼi e te tehina ko Ramu tana ʼuluaki akonaki ʼi te taʼu 1944. Neʼe ko tana akonaki ʼo ʼuhiga mo te tagata ʼe talanoa ki ai te Tohi-Tapu ʼe higoa ko Toeke. Neʼe ina ui, neʼe tete ʼona tuli, mo ʼona nima ʼi tona mataku. Neʼe ina toe ui fenei: “Ko taku ʼuluaki akonaki ʼaia neʼe fai mai muʼa, kaʼe logola toku mataku, neʼe au hoko atu pe taku akonaki.” Logo la neʼe mole faigafua ki te ʼu fanau, kaʼe neʼe fakahoko pe ʼanatou akonaki ʼi te Ako Fakateokalatike. Koia ʼe manatuʼi e te tehina ko Manera te aluʼaga neʼe hoko ki te kiʼi tupulaga ʼi tana ʼuluaki fai tana akonaki. ʼE ina ui fenei: “ ʼI te lahi fau ʼo tana hoha, neʼe kamata tana akonaki pea tagi. Kaʼe neʼe ina hoko atu pe tana akonaki mo  tana tagi ʼo kaku ki tona ʼosi.” ʼE lagi toe feia mo koutou ʼi te ʼu fono, ʼe lagi mole kotou tali ʼi te ʼu fono koteʼuhi ʼe kotou ufiufi peʼe ʼi takotou manatu ʼe mole kotou lavaʼi. Kapau koia, kotou kole kia Sehova ke tokoni atu ke kotou tauʼi tokotou mataku. ʼE mahino papau ia, ʼe tokoni atu anai ohage pe ko tana tokoni kia natou ʼae neʼe ʼuluaki kau ki te Ako Fakateokalatike.—Lau ia Pesalemo 32:8.

16. Neʼe kotea te fakatuʼutuʼu ʼo te Ako ʼo Kileate (1) ʼi muʼa atu pea (2) talu mai te taʼu 2011?

¹⁶ Neʼe toe fakatuʼutuʼu e te kautahi ʼa te ʼAtua te tahi ako, ko te Ako ʼo Kileate. Neʼe fakatuʼutuʼu te ako ʼaia ke tokoni ki te kau ako ke toe malohi age tanatou tala te logo lelei. Neʼe kamata te Ako ʼo Kileate ʼi te taʼu 1943, pea talu mai ai, neʼe ko te toko 8 500 tupu neʼe kau ki ai pea neʼe hinoʼi natou kia fenua ʼe 170. Talu mai te taʼu 2011, ko natou ʼae neʼe fakaafe ki te ako ʼaia, neʼe ko te ʼu pionie makehe, te ʼu taupau feʼoloʼaki, te ʼu Petelite, pea mo te ʼu misionea neʼe heʼeki kau ki te Ako ʼo Kileate.

17. Neʼe fua lelei feafeaʼi te Ako ʼo Kileate?

¹⁷ Neʼe fua lelei koa te Ako ʼo Kileate? ʼEi. Tou vakaʼi te aluʼaga neʼe hoko ʼi Saponia. ʼI ʼAukusito 1949, neʼe mole maʼu he toko hogofulu ʼo te kau faifakamafola ʼi te fenua ʼaia. Kaʼe ʼi te fakaʼosi pe ʼo te taʼu ʼaia, ko misionea ʼe toko 13 neʼe faifakamafola mo natou. Ia ʼaho nei, ko te teitei toko 216 000 kau faifakamafola ʼi Saponia, pea ko te teitei vaelua ʼo natou ʼe pionie.

18. Kotea te tahi ʼu ako ʼae ʼe tou maʼu?

¹⁸ ʼE ʼi ai foki mo te tahi ʼu ako, ohage la ko te Ako ʼo Te Minisitelio ʼo Te Puleʼaga, te Ako ʼo Te Kau Pionie, te Ako ʼo Te Kau Faifakamafola ʼo Te Puleʼaga, te Ako ʼo Te ʼu Taupau ʼo Te ʼu Siliko Mo ʼOnatou ʼOhoana pea mo te Ako ʼo Te ʼu Tehina ʼo Te Filiale Mo ʼOnatou ʼOhoana. ʼE fua lelei te ʼu ako ʼaia ki te ʼu tehina mo tuagaʼane, ʼo toe malohi ai tanatou tui. Koia ʼe ha lelei mai, ʼe kei hoko atu pe te akoʼi e Sesu te hahaʼi tokolahi.

19. Kotea ʼae neʼe ui e te tehina ko Russell ki te gaue faifakamafola? Pea ʼe feafeaʼi tona fakahoko ia ʼaho nei?

¹⁹ Kua taʼu 100 tupu nei te ʼafio ʼo te Puleʼaga ʼo te ʼAtua. Lolotoga te temi ʼaia, ʼe takitaki e Sesu Kilisito totatou Hau ia te gaue faifakamafola. ʼI te taʼu 1916, neʼe mahino ki te tehina ko Russell, ʼe fakamafola anai te logo lelei ʼi te malamanei katoa. Neʼe ina ui fenei: “ ʼE vave te tuputupu ʼo te gaue, pea ʼe haga tuputupu pe anai, koteʼuhi ʼe lahi ʼaupito te gaue faifakamafola ʼe tonu ke fakahoko ʼi te malamanei katoa ʼo ʼuhiga mo te ‘’evaselio ʼo te puleʼaga.’” (La foi en marche, neʼe tohi e te tehina ko A. H. Macmillan, pasina 69; ʼe maʼu pe ʼi te fakapilitania) ʼE lolotoga fakahoko nei te gaue ʼaia. Koia tou lotofakafetaʼi kia Sehova, te ʼAtua ʼo te tokalelei, ʼae ʼe ina foaki mai ia meʼa fuli ʼe ʼaoga moʼo fakahoko tona finegalo.