ʼE Feala Tatatou Felogoʼi Mo Sehova ʼAtua
“Fakalogo mai kia au, pea e au palalau anai.”—SOPO 42:4.
KATIKO: 113, 114
1-3. (1) He koʼe ʼe maʼoluga age te ʼu manatu mo te lea ʼa te ʼAtua ʼi ʼae ʼa te tagata? (2) Kotea ʼae ka tou ako anai ʼi te alatike ʼaeni?
NEʼE loto e Sehova ke toe maʼu e ʼihi te maʼuli mo te fiafia, koia neʼe ina fakatupu ai te ʼu ʼaselo mo te tagata. (Pesalemo 36:10; 1 Timoteo 1:11) Neʼe fakahigoaʼi e te apositolo ko Soane te ʼuluaki fakatupu ko “te Folafola.” (Soane 1:1; Apokalipisi 3:14) Neʼe felogoʼi Sehova mo tana fakatupu ʼaia, ia Sesu, pea neʼe ina fakaha age ki ai ʼana manatu mo te ʼu meʼa ʼae ʼi tona loto. (Soane 1:14, 17; Kolose 1:15) ʼE ui e te apositolo ko Paulo, ʼe toe maʼu e te ʼu ʼaselo he faʼahiga lea ʼe maʼoluga age ʼi ʼae ʼa te tagata.—1 Kolinito 13:1.
2 ʼE iloʼi e Sehova ia meʼa fuli ʼo ʼuhiga mo te ʼu toko lauʼi miliale ʼaselo mo tagata ʼae neʼe ina fakatupu. ʼE feala ke fagono ki te ʼu faikole ʼa te ʼu toko lauʼi miliona hahaʼi ʼi he temi ʼe tahi. Pea ʼe mahino ki ʼanatou faikole tatau aipe pe kotea tanatou lea. ʼI tana lolotoga fagono ki te ʼu faikole fuli ʼaia, ʼe felogoʼi mo ina takitaki te ʼu ʼaselo. Ke feala ke fakahoko e Sehova te ʼu faʼahi fuli ʼaia, ʼe mahino mai ai tona mafimafi. (Lau ia Esaia 55:8, 9.) Koia ka felogoʼi mo te tagata, ʼe ina fakafaigafua tana logo ke tou mahino ki ai.
3 ʼI te alatike ʼaeni, ʼe tou ako ai anai pe ʼe felogoʼi feafeaʼi Sehova mo te tagata ke mahino gafua. ʼE tou toe vakaʼi ai anai pe ʼe ina fetogi feafeaʼi tana faʼahiga felogoʼi mo te tagata ʼo mulimuli ki te ʼu aluʼaga ʼae ʼe hoko.
ʼE FELOGOʼI TE ʼATUA MO TE TAGATA
4. (1) Kotea te lea ʼae neʼe fakaʼaogaʼi e Sehova ke felogoʼi ai mo Moisese, Samuele mo Tavite? (2) Kotea ʼae ʼe tou maʼu ʼi te Tohi-Tapu?
4 ʼI te temi ʼae neʼe felogoʼi ai te ʼAtua mo te ʼuluaki tagata, ia Atama, ʼi te ʼoloto ʼo Eteni, neʼe lagi palalau ʼi te faʼahiga lea ʼafeā Fakahepeleo. Ki muli age, neʼe felogoʼi Sehova mo te ʼu tagata ko Moisese, Samuele mo Tavite. ʼE moʼoni, neʼe natou tohi ʼana folafola ʼi te lea Fakahepeleo mo tanatou faʼahiga faitohi, kaʼe ko te ʼu manatu ʼa te ʼAtua ʼae neʼe natou tohi. Neʼe natou tohi te ʼu palalau totonu ʼa Sehova mo te hisitolia ʼo ʼana felogoʼi mo tana hahaʼi. Ohage la, ʼe fakamatala ʼi te Tohi-Tapu tanatou tui mo ʼoʼofa ʼae ki te ʼAtua mo ʼanatou lakahala mo talagataʼa. Neʼe tohi te ʼu folafola fuli ʼaia ke fua lelei kia tatou.—Loma 15:4.
Neʼe tohi e te kau faitohi ʼo te Tohi-Tapu te ʼu palalau totonu ʼa Sehova mo te hisitolia ʼo ʼana felogoʼi mo tana hahaʼi
5. Neʼe ko te lea Fakahepeleo pe koa ʼae neʼe fakaʼaogaʼi e te ʼAtua ke felogoʼi ais mo te tagata? Kotou fakamahino.
5 Neʼe mole felogoʼi tuʼumaʼu Sehova mo te tagata ʼi te lea Fakahepeleo. ʼI te temi ʼae neʼe fakaʼateaina ai te kau Iselaele mai Papilone, ko ʼihi neʼe palalau ʼi te lea Fakaalamea ʼi te ʼaho fuli. Neʼe lagi ko te tupuʼaga ʼaia ʼo te tohi e Taniela mo Selemia mo Esitalasi te ʼu koga ʼo te Tohi-Tapu ʼi te lea Fakaalamea. *—Vakaʼi te kiʼi nota.
6. He koʼe neʼe fakaliliu te Koga Tohi-Tapu Fakahepeleo ki te lea Fakakeleka?
6 Ki muli age, neʼe lahi te ʼu malo ʼa te tagata takitaki Keleka ko Alexandre le Grand, koia neʼe liliu ai te lea Koinè peʼe lea Fakakeleka ko te lea tafitō ʼo te ʼu fenua ʼae neʼe malo ai. Tokolahi te kau Sutea neʼe palalau ʼi te lea Fakakeleka, pea ki muli age, neʼe fakaliliu te Koga Tohi-Tapu Fakahepeleo ki te lea Fakakeleka. Neʼe higoa te fakaliliu ʼaia ko te Septante. Neʼe ko te ʼuluaki fakaliliu ʼaia ʼo te Tohi-Tapu pea neʼe maʼuhiga ʼaupito. ʼI te manatu ʼa te kau poto, neʼe fakaʼosi tona tohi ʼo te Septante e te toko 72 kau faifakaliliu. * (Vakaʼi te kiʼi nota.) Ko ʼihi neʼe natou fakaliliu pe te ʼu kupu ʼo te Koga Tohi-Tapu Fakahepeleo, kaʼe ko ʼihi neʼe natou fakaʼaogaʼi tanatou faʼahiga faitohi. Kaʼe neʼe tui te kau Sutea ʼae neʼe palalau ʼi te lea Fakakeleka mo te kau Kilisitiano, ko te Septante ko te Folafola ʼa Te ʼAtua.
7. Ko te lea fea neʼe akoʼi ai e Sesu ʼana tisipulo?
7 ʼI te kei nofo ʼa Sesu ʼi te kele, neʼe lagi palalau ʼi te lea Fakahepeleo. (Soane 19:20; 20:16; Gaue 26:14) Lagi neʼe ina toe fakaʼaogaʼi ʼihi kupu Fakaalamea neʼe mahani ki ai te hahaʼi ʼi te temi ʼaia. Kaʼe neʼe ina toe iloʼi te lea ʼafeā Fakahepeleo ʼae neʼe palalau ai Moisese mo te kau polofeta. Pea ko te ʼu folafola ʼae neʼe natou tohi, neʼe lau ʼi te sinakoka ʼi te vahaʼa fuli. (Luka 4:17-19; 24:44, 45; Gaue 15:21) Logo la ko te lea Fakakeleka mo te Fakalatina ʼae neʼe fakaʼaogaʼi ʼi te temi ʼo Sesu, kaʼe ʼe mole ui mai ʼi te Tohi-Tapu pe neʼe palalau Sesu ʼi te ʼu lea ʼaia.
8, 9. He koʼe neʼe tokolahi te kau Kilisitiano neʼe palalau ʼi te lea Fakakeleka? Kotea ʼae ʼe tou ako mai ai ʼo ʼuhiga mo Sehova?
8 Neʼe palalau te ʼu ʼuluaki tisipulo ʼa Sesu ʼi te lea Fakahepeleo, kaʼe ʼi te hili ʼo tona mate, neʼe natou palalau ʼi ʼihi age lea. (Lau ia Gaue 6:1.) ʼI te kua mafola ʼo te logo lelei, neʼe tokolahi te kau Kilisitiano ʼae neʼe palalau ʼi te lea Fakakeleka ʼi te lea Fakahepeleo. ʼUhi ʼae neʼe palalau te hahaʼi ʼi te lea Fakakeleka, koia neʼe tufa ai te ʼu tohi ʼo Mateo, mo Maleko, mo Luka pea mo Soane ʼi te lea Fakakeleka. * (Vakaʼi te kiʼi nota.) ʼO toe feia pe, neʼe tohi ʼi te lea Fakakeleka te ʼu tohi ʼa te apositolo ko Paulo mo ʼihi atu tohi Fakatohi-tapu.
9 Ka talanoa te kau faitohi ʼo te Koga Tohi-Tapu Fakakeleka Fakakilisitiano ki te Koga Tohi-Tapu Fakahepeleo ʼi ʼanatou koga Tohi-Tapu, ʼe natou tau fakaʼaogaʼi te Septante. ʼI ʼihi temi, ko te ʼu koga Tohi-Tapu ʼaia ʼe ʼi ai tona kiʼi kehekehe ʼi te faʼahiga fakaalualu ʼo te ʼu kupu ʼi tanatou fakaliliu te lea Fakahepeleo. Koia logo la neʼe mole haohaoa te kau faifakaliliu, kaʼe neʼe maʼuhiga tanatou gaue ki te fakaliliu ʼo te Tohi-Tapu ia ʼaho nei. ʼE tou ako mai ai, ko Sehova ʼe mole ina fakakehekeheʼi he lea peʼe ko he agaʼi fenua.—Lau ia Gaue 10:34.
ʼE mole fakamaʼua mai e te ʼAtua ke tou palalau ʼi he tahi faʼahiga lea ʼe ke feala hatatou iloʼi ia ia mo ʼana fakatuʼutuʼu
10. Kotea ʼae neʼe tou ako mai te faʼahiga felogoʼi ʼa Sehova mo te tagata?
10 Neʼe tou ako ko Sehova ʼe felogoʼi mo te tagata ʼo mulimuli ki te ʼu aluʼaga ʼae ʼe hoko. ʼE mole ina fakamaʼua mai ke tou palalau ʼi he tahi faʼahiga lea ke feala hatatou iloʼi ia ia mo ʼana fakatuʼutuʼu. (Lau ia Sakalia 8:23; Apokalipisi 7:9, 10.) Neʼe tou toe ako ko Sehova neʼe ina takitaki te kau faitohi ʼo te Tohi-Tapu ʼaki tona laumalie, kaʼe neʼe ina fakagafua ke natou tohi ʼana manatu ʼaki ʼanatou kupu ʼa natou totonu.
KO TE ʼATUA ʼE INA PUIPUI TANA LOGO
11. ʼE faigataʼa koa kia Sehova te ʼu lea kehekehe ʼae ʼe fakaʼaogaʼi e te tagata?
11 ʼE fakaʼaogaʼi e te tagata ia faʼahiga lea kehekehe, kaʼe ʼe mole ko he meʼa faigataʼa kia Sehova. ʼE feafeaʼi tatatou iloʼi te faʼahi ʼaia? ʼE mole lahi ʼi te Tohi-Tapu te ʼu kupuʼi palalau ʼa Sesu ʼi te lea ʼae neʼe ʼuluaki palalauʼi. (Mateo 27:46; Maleko 5:41; 7:34; 14:36) Kaʼe neʼe tokaga Sehova ke tohi mo fakaliliu te logo ʼa Sesu ki te lea Fakakeleka, pea ʼaki te temi neʼe toe fakaliliu ki ʼihi atu lea. Neʼe toe puipui mo te logo ʼa te ʼAtua, koteʼuhi neʼe tuʼa lahi te hiki ʼo te Folafola ʼa Te ʼAtua e te kau Sutea mo te kau Kilisitiano. Pea neʼe toe fakaliliu te ʼu hiki ʼaia ki ʼihi atu lea. Ia teitei taʼu ʼe 400 hili te temi ʼo Kilisito, neʼe ui e John Chrysostom ko te ʼu akonaki ʼa Sesu neʼe fakaliliu ki te lea ʼa te kau Silia, mo te kau Esipito, mo te kau Initia, mo te kau Pelesia, mo te kau Etiopea pea mo ʼihi atu.
12. Kotea te ʼu fakafeagai neʼe hoko ki te Tohi-Tapu?
12 Lolotoga te hisitolia ʼo te tagata, neʼe lahi te fakafeagai ki te Tohi-Tapu, mo natou ʼae neʼe natou fakaliliu mo tufa. Ia teitei taʼu ʼe 300 hili te tupu ʼa Sesu, neʼe fakatotonu e te Hau Loma ko Dioclétien ke pulihi te ʼu Tohi-Tapu fuli. Pea ia teitei taʼu ʼe 1 200 ki muli age, neʼe kamata fakaliliu e William Tyndale te Tohi-Tapu ki te lea Fakapilitania. Neʼe ina ui kapau neʼe fakagafua age e te ʼAtua ke toe loaloaga atu tona maʼuli, ʼe ina faigaʼi anai ke mahino lelei age he tagata gaue kele ki te Tohi-Tapu ʼi he patele. Kaʼe ʼuhi ko te fakataga, neʼe tonu kia Tyndale ke hola mai Pilitania ki Eulopa ke feala hana fakaliliu mo ta ia tana Tohi-Tapu. Logo la te ʼu faiga ʼa te kau takitaki lotu ke natou tutu te ʼu Tohi-Tapu ʼae neʼe natou maʼu, kaʼe neʼe tufa aipe te fakaliliu ʼa Tyndale ki te tokolahi. Ki muli age, neʼe tege ia Tyndale mo tutu ʼi te pou. Kaʼe neʼe hao tana fakaliliu mai te ʼu faiga ʼa te kau takitaki lotu, pea neʼe fakaʼaogaʼi moʼo teuteuʼi te fakaliliu ʼo te Tohi-Tapu ʼae ʼe higoa ko te King James Version.—Lau ia 2 Timoteo 2:9.
13. Kotea ʼae neʼe ha ʼi te vakavakaʼi ʼo te ʼu koga tohi ʼafeā ʼo te Tohi-Tapu?
13 ʼE moʼoni, ʼe ʼi ai te ʼu hiki ʼafeā ʼo te Tohi-Tapu ʼe maʼu ai ni kiʼi hala. Kaʼe neʼe vakavakaʼi fakalelei e te kau sivi Tohi-Tapu te ʼu lauʼi afe koga tohi ʼafeā mo te ʼu fakaliliu ʼafeā ʼo te Tohi-Tapu. Hili tanatou fakatatau te ʼu koga Tohi-Tapu ʼaia, neʼe mole lahi te ʼu vaega ʼae neʼe ʼi ai ʼonatou kehekehe, pea neʼe mole faʼa maʼuhiga fau. Kaʼe neʼe mole fetogi te logo ʼo te Tohi-Tapu. Ko te faʼahiga vakavakaʼi ʼaia, ʼe tui papau ai te kau ako ʼo te Tohi-Tapu ʼe natou maʼu ia te Folafola ʼae ʼe haʼu mai te ʼAtua ia ʼaho nei.—Esaia 40:8. * (Vakaʼi te kiʼi nota.)
14. ʼE feala koa ke maʼu gafua e te hahaʼi te Tohi-Tapu ia ʼaho nei?
14 Logo la te ʼu fakafeagai ki te Tohi-Tapu, kaʼe neʼe fakaliliu kia lea ʼe 2 800 tupu. Pea ʼe laka age ʼi te ʼu tohi fuli ʼe tou maʼu ia ʼaho nei. Tatau aipe pe ʼe tokolahi te hahaʼi ʼae ʼe mole tui ki te ʼAtua, kaʼe ko tana Folafola ʼe lahi tokotahi tona tufa ʼi te hisitolia ʼo te tagata. Ko ʼihi fakaliliu ʼo te Tohi-Tapu ʼe mole faigafua tona lau pea ʼe mole totonu. Kaʼe ʼi te ʼu fakaliliu ʼaia, ʼe feala hatatou ako te logo ʼo ʼuhiga mo te ʼamanaki pea mo te maʼuli heʼe gata.
NEʼE ʼAOGA KE TOE FAKALILIU TE TOHI-TAPU
15. (1) Talu mai te taʼu 1919, kotea neʼe hoko ki ʼatatou tohi Fakatohi-tapu? (2) He koʼe ʼe ʼuluaki tohi ʼatatou tohi ʼi te lea Fakapilitania?
15 ʼI te taʼu 1919, neʼe fakanofo te kiʼi kutuga ʼo te Kau Ako ʼo Te Tohi-Tapu ke liliu ko “te tagata faifekau agatonu mo poto.” ʼI te temi ʼaia, neʼe lahi pe te felogoʼi ʼa te tagata faifekau mo te hahaʼi ʼa te ʼAtua ʼi te lea Fakapilitania. (Mateo 24:45) Kaʼe ia ʼaho nei, kua maʼu te ʼu tohi Fakatohi-tapu ia lea ʼe 700 tupu. Ohage ko te lea Fakakeleka ʼi te temi muʼa, kua lahi te fakaʼaogaʼi ʼo te lea Fakapilitania ʼi te ʼu gaue fakamalama, mo te ako pea kua mafola ʼi te malamanei katoa. Koia, ʼe tohi muʼa ʼatatou tohi ʼi te lea Fakapilitania pea hoki fakaliliu leva ki ʼihi atu lea.
16, 17. (1) Kotea ʼae neʼe ʼaoga ki te hahaʼi ʼa te ʼAtua? (2) Neʼe fakahoko feafeaʼi te faʼahi ʼaia? (3) Neʼe kotea te fakaʼamu ʼa te tehina ko Knorr?
16 Ko ʼatatou tohi fuli ʼe fakatafito ki te Tohi-Tapu. ʼI te kamata, neʼe fakaʼaogaʼi e te hahaʼi ʼa te ʼAtua te King James Version, ʼae neʼe katoa tona fakaliliu ʼi te taʼu 1611. Kaʼe ko te lea ʼae neʼe fakaʼaogaʼi ʼi te Tohi-Tapu ʼaia, neʼe ko he lea Fakapilitania ʼafeā pea neʼe faigataʼa te mahino ki ai. ʼI te Tohi-Tapu ʼaia, neʼe mole lahi te fakaʼaogaʼi ʼo te huafa ʼo te ʼAtua, logo la tona fakaʼaogaʼi tuʼa afe mo afe ʼi te ʼu koga Tohi-Tapu ʼafeā. Neʼe maʼu ʼi te fakaliliu ʼaia te ʼu kiʼi hala mo te ʼu vaega neʼe hilifaki ki ai, kaʼe neʼe mole maʼu ʼi te ʼu koga Tohi-Tapu ʼafeā. Neʼe toe feia pe mo ʼihi atu fakaliliu Fakapilitania ʼo te Tohi-Tapu.
17 ʼE ha lelei mai, neʼe ʼaoga ki te hahaʼi ʼa te ʼAtua ke toe fakaliliu te Tohi-Tapu ke totonu mo mahino gafua. Koia neʼe fakatuʼu ai te Komite Fakaliliu ʼo te Tohi-Tapu Traduction du monde nouveau, pea neʼe fakaha mo tufa e te komite ʼaia te ʼu koga Tohi-Tapu mai te taʼu 1950 ki te taʼu 1960.
Neʼe ta te fakaliliu ʼaia kia tohi ʼe ʼono. Ko te ʼuluaki tohi ʼo te ʼu tohi ʼe ono ʼaia, neʼe fakaha ʼi te fakatahi lahi ʼi te ʼaho 2 ʼo ʼAukusito 1950. ʼI te fakatahi lahi ʼaia, neʼe ui e te tehina ko Knorr, neʼe ʼaoga ki te hahaʼi ʼa te ʼAtua ke toe fakaliliu te Tohi-Tapu ke totonu mo mahino gafua. Pea neʼe tonu ke tokoni te fakaliliu ʼaia kia natou ke lelei age tanatou ako te moʼoni. Neʼe ʼaoga ke natou maʼu he fakaliliu ʼe faigafua tona lau mo mahino gafua ohage pe ko te ʼu ʼuluaki tohi ʼa te ʼu tisipulo ʼa Kilisito. Koia neʼe fakaʼamu e te tehina ko Knorr ke tokoni te Tohi-Tapu Traduction du monde nouveau ki te toko lauʼi miliona hahaʼi ke natou iloʼi ia Sehova.18. Kotea ʼae neʼe tokoni ki te fakaliliu ʼo te Tohi-Tapu?
18 ʼI te taʼu 1963, neʼe fakahoko te fakaʼamu ʼo te tehina ko Knorr. Neʼe maʼu te Koga Tohi-Tapu Fakakeleka ʼo te Tohi-Tapu Traduction du monde nouveau, ʼi te lea ʼo Pays-Bas, mo France, mo Allemagne, mo Italie, mo Portugal mo Espagne. ʼI te taʼu 1989, neʼe fakatuʼu e te Kolesi Pule ʼa te kau Fakamoʼoni ʼa Sehova te pilo gaue foʼou ʼi ʼotatou pilo lalahi, ke tokoni ki te kau faifakaliliu ʼo te Tohi-Tapu. Pea ʼi te taʼu 2005, neʼe fakagafua ke fakaliliu te Tohi-Tapu ki te ʼu lea ʼae kua fakaliliu ki ai Te Tule Leʼo. Koia, kua feala tatatou maʼu katoa peʼe fakakoga te Tohi-Tapu Traduction du monde nouveau, ia lea ʼe 130 tupu.
19. Kotea te aluʼaga maʼuhiga neʼe hoko ʼi te taʼu 2013? Kotea ka tou ako anai ʼi te alatike ka hoa mai?
19 ʼAki te temi, kua fetogi te lea Fakapilitania ʼo te ʼuluaki Tohi-Tapu Traduction du monde nouveau, koia neʼe ʼaoga ai ke fai he tahi ʼu fetogi foʼou ki te fakaalualu ʼo te ʼu kupuʼi palalau. ʼI te ʼaho 5 mo 6 ʼo Oketopeli 2013, ko te toko 1 413 676 hahaʼi ia fenua ʼe 31, neʼe natou kau ki te fakatahi ʼe fai ʼi te taʼu fuli ʼo te Watch Tower Bible and Tract Society of Pennsylvania. Neʼe ko te tuʼa 129 fakatahi ʼaia, pea neʼe lahi te ʼu kokelekasio neʼe mulimuli ki te fono ʼaia ʼi te Neti. Ko te tehina ʼo te Kolesi Pule neʼe ina fakaha te Tohi-Tapu Fakapilitania Traduction du monde nouveau, ʼae neʼe toe vakaʼi. Neʼe lahi te fiafia ʼi te nofoʼaki pea tokolahi natou neʼe fetagihi fakafiafia ʼi te temi ʼae neʼe natou maʼu ai tanatou Tohi-Tapu. ʼI te lolotoga lau e te tehina faiakonaki te ʼu vaega ʼo te Tohi-Tapu ʼaia, neʼe ha lelei ki te nofoʼaki katoa ko te Tohi-Tapu ʼaia neʼe toe vakaʼi, neʼe faigafua tona lau mo te mahino. ʼI te alatike ka hoa mai, ʼe lahi anai te ʼu faʼahi ka tou ako ʼo ʼuhiga mo te Tohi-Tapu ʼaia. ʼE tou toe vakaʼi anai pe neʼe feafeaʼi tona fakaliliu ki ʼihi atu lea.
^ pal. 5 Ko te ʼu koga Tohi-Tapu ʼaeni neʼe tohi ʼi te kamata ʼi te lea Fakaalamea: Esetalasi 4:8–6:18; 7:12-26; Selemia 10:11; Taniela 2:4 (lua koga)–7:28.
^ pal. 6 Ko te kupu Septante, ko tona fakaʼuhiga “Fitugofulu.” Neʼe lagi kamata te faifakaliliu ʼaia ia teitei taʼu ʼe 300 ʼi muʼa ʼo Kilisito pea neʼe fakaʼosi ia taʼu ʼe 150 ki muli age. ʼE kei maʼuhiga te fakaliliu ʼaia ia ʼaho nei, koteʼuhi ʼe tokoni ki te kau popoto ke natou mahino ki te ʼu kupu Fakahepeleo mo te ʼu vaega katoa ʼae ʼe faigataʼa.
^ pal. 8 ʼE manatu ʼihi, neʼe tohi e Mateo ia tana tohi ʼi te lea Fakahepeleo pea ki muli age, neʼe lagi ina fakaliliu ki te lea Fakakeleka.
^ pal. 13 Vakaʼi te kaupepa Fakafalani Un livre pour tous, ʼi te pasina 7-9, “Un survivant de l’Histoire.”