He Koʼē Neʼe Fakaʼaogaʼi e Satana He Gata Moʼo Palalau Kiā Eva?
ʼE Fia ʼIloʼi e Te Kau Lautohi . . .
He Koʼē Neʼe Fakaʼaogaʼi e Satana He Gata Moʼo Palalau Kiā Eva?
▪ Ohagē pē ko tona tuʼu ʼaē ʼi te pāsina 9, ʼe lagi kotou fakamoʼoni anai neʼe ko Satana ʼaē neʼe ina fakaʼaogaʼi te gata moʼo palalau kiā Eva. ʼE mahino ia, ʼe talanoa te Tohi-Tapu ki te faʼahi ʼaia. Kae ʼe lagi kotou feʼekeʼaki fēnei: ‘He koʼē neʼe fakaʼaogaʼi e he ʼāselo mālohi he gata moʼo palalau ki he tahi?’
ʼI te Tohi-Tapu, ʼe fakatatau te ʼu puleʼaki ʼa Satana ki he ʼu “kākā” pea ʼe hā lelei tana aga fakakākā ʼaia ʼi te meʼa ʼaē neʼe hoko ʼi Eteni. (Efesi 6:11) ʼE mole ko he fāgana te meʼa ʼaē neʼe hoko ʼi Eteni ʼo ʼuhiga mo te manu ʼaē neʼe palalau; ʼe ko he ʼaluʼaga ia ʼe ina fakahā lelei mai te fakatuʼutuʼu fakakākā ʼaē neʼe hoko moʼo fakahehē te hahaʼi mai te ʼAtua. Neʼe hoko feafeaʼi te faʼahi ʼaia?
Neʼe vakavakaʼi fakalelei muʼa e Satana ia ia ʼaē kā ina fakahalaʼi. ʼI te ʼatulaulau neʼe ko Eva ʼaē neʼe fakatupu fakamuli ʼi te ʼu meʼa maʼuli poto ʼaē neʼe fakatupu e te ʼAtua. Neʼe ʼiloʼi lelei e Satana te mole heʼeki mahino kātoa ʼaē ʼa Eva ki te ʼu agaaga fuli ʼo te maʼuli ʼaē ʼi te kele, koia neʼe ina fai ai he kākā moʼona fakahehē pea mo fakalalata ia ia. ʼI te fakaʼaogaʼi ʼaē e Satana te gata, ʼaē ko he manu ʼe fakapotopoto, neʼe ina haga ʼo fufū ia tona ʼuluagaaga moʼoni pea mo tana ʼu fakatuʼutuʼu kākā. (Senesi 3:1) Tou vakaʼi age mo te meʼa ʼaē neʼe ina fai ʼi tana fakaʼaogaʼi te gata ke palalau kiā Eva.
ʼUluaki, neʼe poto ʼosi ia Satana ʼi te gaohi ʼo Eva ke fakalogo age kiā ia. Neʼe ʼiloʼi e Eva ko te ʼu gata ʼe mole palalau; neʼe foaki e tona ʼohoana te ʼu higoa ʼo te faga manu fuli ʼi tana kua ʼosi akoako fakalelei ia tonatou ʼu agaaga fuli, ʼo kau ai mo te gata. (Senesi 2:19) ʼE mahino ia, neʼe lagi sioʼi e Eva te manu fakapotopoto ʼaia. Koia ʼaē ʼi te temi ʼaē neʼe fai ai e Satana tana kākā, neʼe fia ʼiloʼi meʼa fuli ai ia Eva, ʼo ina tuku kātoa ai ia tana tokaga ki te meʼa pē e tahi ʼaē neʼe tapuʼi age kiā nāua ʼi te ʼu meʼa fuli ʼaē ʼi te ʼōloto. Lua, kanapau lā neʼe nono te gata ʼi te ʼu vaʼa ʼo te fuʼu ʼakau ʼaē neʼe tapuʼi age kiā nāua, neʼe koteā ʼapē te manatu ʼa Eva kiai? Neʼe lagi feala pē ke ina ʼui, neʼe lagi kai e te manu ʼaia te fuaʼi ʼakau, koia ʼaē kua feala ai hana palalau. Koia ʼi tana manatu, kapau neʼe lava fakahoko e te fuaʼi ʼakau he meʼa fēia ki he gata, pea ʼe lagi feala pē ke ina fakahoko maʼa ia he meʼa lelei. ʼE mole feala ke tou ʼiloʼi papau pe neʼe koteā te manatu ʼa Eva ʼi te temi ʼaia, pe neʼe kai e te gata te fuaʼi ʼakau, kae ko te meʼa ʼaē ʼe feala ke tou mahino kiai, ʼi te temi ʼaē neʼe ʼui ai e te gata kiā Eva ʼe haga anai te fuaʼi ʼakau ʼo fakaliliu ia ia ke “tatau mo te ʼAtua,” neʼe kua faigafua kiā Eva hana tali ia tana loi.
Pea neʼe toe poto foki ia Satana ʼi te fakaʼaogaʼi ʼo te ʼu palalau ʼaē moʼo fakalalata ia Eva. Neʼe fai e Satana te ʼu palalau kiā Eva ke tupu ʼaki ai hana lotolotolua ki te moʼoni ʼo te fakatotonu ʼaē neʼe fai age e te ʼAtua, ʼo ina ʼui age ko te ʼAtua ʼe ina fufū age kiā ia te meʼa ʼe lelei pea ʼe hala tana fakatuʼakoi ʼaē ʼo tona loto faʼifaʼitaliha. Neʼe feala ke hoko te kākā ʼaia ʼa Satana, mo kapau neʼe lahi age te ʼofa ʼo Eva kiā ia totonu pē ʼi tona ʼofa ʼaē ki te ʼAtua, ia ia ʼaē neʼe kua ina foaki age ia meʼa fuli kiā ia. (Senesi 3:4, 5) Kae meʼa fakaʼofaʼofa foki, he neʼe iku te kākā ʼaia ʼa Satana, he neʼe mole he tahi iā Atama peʼe ko Eva neʼe ina maʼu ʼi tona loto te faʼahiga ʼofa pea mo te loto fakafetaʼi ʼaē neʼe tonu ke nā fakahā kiā Sehova. ʼE kei fakatuputupu pē e Satana ʼi te temi ʼaenī ia te taʼi manatu ʼaia ke tahi manatu muʼa te hahaʼi kiā nātou totonu pea mo natou fia fakalakatonuʼi tanatou ʼu aga.
He koʼē neʼe fai e Satana te faʼahi ʼaia? Koteā ʼaē neʼe ina fai ki muli age? ʼI Eteni, neʼe faiga ia ke ina fufū tona ʼuluagaaga pea mo tana ʼu fakatuʼutuʼu. Kae ʼaki te temi, neʼe ina fakahā tona ʼuluagaaga moʼoni. ʼI te temi ʼaē neʼe ina fakahalaʼi ai ia Sesu, ʼe mahino ia neʼe mole feala hana fufū ia tona ʼuluagaaga totonu. Koia neʼe ina ʼui fakahagatonu ai kiā Sesu: “Punou pea mo fai ʼi ʼoku muʼa he ʼatolasio.” (Mateo 4:9) Kua hā lelei mai, talu mai fualoa te maheka ʼa Satana ki te tauhi ʼaē ʼe fai kiā Sehova ʼAtua. ʼE ina fai anai ia meʼa fuli ʼe ina lavaʼi moʼo tāʼofi te hahaʼi ke ʼaua naʼa natou tauhi ki te ʼAtua peʼe ina fakahēʼi anai ia nātou ke natou fai he tauhi ki te ʼAtua ʼe mole ina leleiʼia. ʼE tokaga tāfito ia ke ina maumauʼi te nofo agatonu ʼaē ʼa te hahaʼi ki te ʼAtua.
ʼE mahino ia, ʼe fakahā ʼi te Tohi-Tapu ko Satana ʼe faiva ʼi te fai puleʼaki moʼo matehi ia nātou ʼaē kua ina fakatuʼutuʼu ke ina fakahalaʼi. Meʼa lelei foki, ʼaua naʼa tou tuku ke kākāʼi ia tātou ohagē ko tona hoko ʼaē kiā Eva, “heʼe mole pulipuli kiā tātou ia tana ʼu fakatuʼutuʼu.”—2 Kolonito 2:11.