Koteā Ia Te Logo Lelei?
Koteā Ia Te Logo Lelei?
“Ko te logo lelei ʼaenī . . . ”—MATEO 24:14.
ʼE TONU ki te kau Kilisitiano ke natou fakamafola ia “te logo lelei . . . ʼo te puleʼaga” ʼo natou fakahā ki ʼihi, ʼo natou fakamahino ko te Puleʼaga ʼaia ʼe ko te puleʼaga fakamālamanei ʼi te temi kā haʼu ʼaē kā ina puleʼi anai te kele ʼi te faitotonu. Koia, ko te kupusiga palalau ʼaē ko te “logo lelei” ʼe toe fakaʼaogaʼi ʼi te tahi ʼu ʼaluʼaga ʼi te Tohi-Tapu. Ohagē lā, ʼe talanoa ʼi te Tohi-Tapu ki “te logo lelei ʼo tana haofaki” (Pesalemo 96:2); “te logo lelei ʼa te ʼAtua” (Loma 15:16); pea mo “te logo lelei ʼo ʼuhiga mo Sesu Kilisito.”—Maleko 1:1.
Moʼo fakanounou, ko te logo lelei ʼe kau kiai te ʼu moʼoni fuli ʼaē neʼe palalau kiai ia Sesu pea mo ʼaē neʼe tohi e tana kau tisipulo. ʼI muʼa ʼi tana hake ki selō, neʼe ʼui fēnei e Sesu ki tana kau tisipulo: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, ʼo papitemaʼi ia nātou ʼi te huafa ʼo te Tamai pea mo te ʼAlo pea mo te laumālie māʼoniʼoni, ʼo kotou akoʼi ia nātou ke natou mulimuli ki te ʼu meʼa fuli pē ʼaē neʼe au fakatotonu atu kiā koutou.” (Mateo 28:19, 20) Ko te gāue ʼa te kau Kilisitiano moʼoni ʼe mole gata pē ʼi tanatou palalau ki ʼihi ʼo ʼuhiga mo te Puleʼaga ʼaia, kae ʼe tonu foki ke natou toe faiga ke natou fai ni ʼu tisipulo.
Koteā ʼaē ʼe fai e te ʼu lotu ʼo ʼuhiga mo te gāue ʼaia? Ko nātou ʼaia ʼaē ʼe mole natou mahino peʼe koteā ia te Puleʼaga ʼaia pea ʼe natou kaugamālie, ʼe mole feala ke natou akoʼi fakalelei ki te hahaʼi. Kae ʼe natou palalau tāfito ki te ʼu akonaki ʼe lave lelei ʼo ʼuhiga mo te fakamolemole ʼo te ʼu agahala pea mo te tui ʼaē kiā Sesu. ʼE natou faiga foki ke natou fakatafoki te hahaʼi ʼaki he ʼu gāue fakasōsiale ke lelei age te maʼuli ʼo te hahaʼi peʼe ko te laga ʼo he ʼu lōpitali, mo he ʼu faleako pea mo he ʼu fale masiva. Logolā ko te ʼu faiga ʼaia ʼe lagi tuputupu ai te kaugamālie ʼo te hahaʼi ʼaē ʼe ʼolo ki te ʼēkelesia, kae ʼe mole fakatupu ai he kau Kilisitiano moʼoni ʼe natou faiga fakamālotoloto ke natou maʼuliʼi te ʼu meʼa ʼaē neʼe akoʼi mai e Sesu.
Neʼe tohi fēnei e te tagata teolosia: “Teitei pē ko te kau popoto peʼe ko te kau takitaki Kilisitiano ʼe natou ʼio ʼe ko totatou maʼua ʼaē ke tou fai ni ʼu tisipulo ʼa Sesu pea mo akoʼi kiā nātou ke natou fai te ʼu meʼa fuli ʼaē neʼe talanoa kiai ia Sesu. . . . Ko te ʼu fakatotonu ʼa Sesu ʼo ʼuhiga mo te faʼahi ʼaia ʼe matala lelei pē ia. Kae ʼe mole pē lā tou fai pē te ʼu meʼa ʼaē neʼe ina ʼui mai. ʼE mole pē lā tou faigaʼi ke tou fakahoko. Pea ʼe ʼiloga ia ʼe mole pē lā tou ʼiloʼi peʼe feafeaʼi tona fai.”
Neʼe ʼi ai mo te sivi ʼi Amelika ʼo ʼuhiga mo te hahaʼi Katolika, ko te 95 ki te teau ʼo te hahaʼi ʼaia neʼe natou fakamoʼoni ko te fakamafola ʼo te logo lelei ʼe ko he fakamaʼua ki tanatou tui. Kae teitei pē ko te hahaʼi fuli neʼe natou manatu ko te puleʼaki ʼe lelei age moʼo fakahoko te gāue ʼaia, ʼe mole ko te palalau ki te logo lelei, kae ʼe fakalogo ki te ʼu aga ʼaē kā kita fai takitokotahi ʼi tokita maʼuli ke kita liliu ai ko he faʼifaʼitaki ki ʼihi. Neʼe tali fēnei te tahi neʼe fakafehuʼi: “Ko te fai fakamafola ʼo te logo lelei ʼe mole ko he fai pē ʼo he ʼu palalau. ʼE ʼaoga ke tou liliu ko te Logo Lelei.” Neʼe ʼui e te nusipepa U.S. Catholic ʼaē neʼe ina fai te sivi, tokolahi te hahaʼi Katolika ʼe mole natou fia palalau ʼo ʼuhiga mo tanatou tui ʼuhi “ko te lotu ʼe mole ina tuku he faʼifaʼitaki lelei ʼaki te ʼu tānaki fakamuli ʼo te fakaʼalikiʼi ʼo te ʼu kiʼi tamaliki pea mo te ʼu akonaki ʼa te ʼēkelesia ʼaē ʼe fakatupu fihifihia.”
ʼI te tahi potu fenua ko te tagata ʼēpikopō faiako neʼe meo ko tona ʼu ʼēkelesia ʼe mole kei natou logotahi pea kua natou logo kehekehe, ʼe mole natou maʼu he lototoʼa ke natou fakahoko tanatou gāue ʼo natou taupau ia te faʼahiga maʼuli ʼo te mālama ʼaenī. Neʼe ina fakahā tona ʼita ʼo ina ʼui fēnei: “Ko ai ia nātou ʼaē ʼe natou faʼa fua te evaselio ʼo te Puleʼaga?”
Neʼe mole maʼu he tali ʼa te ʼēpikopō ki tana fehuʼi ʼaia. Kae ʼe i ai te tali kiai. ʼE kotou maʼu anai ʼi te ʼalatike ʼaē kā hoa mai.
[Paki ʼo te pasina 6]
Ko te logo lelei ʼe ko te logo ʼo ʼuhiga mo te Puleʼaga ʼo te ʼAtua pea mo te haofaki ʼaki te tui ʼaē kiā Sesu Kilisito