4 Ko Te ʼAtua ʼe Heʼe Faitotonu—ʼE Moʼoni Koa?

Te ʼu palalau neʼe kua lagi kotou logo kiai: “Ko te ʼAtua ʼe ina takitaki te mālamanei ʼaenī, pea ko meʼa fuli ʼe hoko ʼaki tona finegalo. Mai tona ʼaluʼaga ʼaē ʼe fonu te mālamanei ʼaki te fakapalatahi, mo te heʼe faitotonu, pea mo te agakovi, koia ʼe ko te hala ia ʼa te ʼAtua.”

Te Ako Mai Te Tohi-Tapu: ʼE mole tupu mai te ʼAtua ia te heʼe faitotonu ʼaē ʼe hoko ʼi te mālamanei. ʼE ʼui fēnei ʼi te Tohi-Tapu ʼo ʼuhiga mo Sehova: “ ʼE haohaoa tana gāue, heʼe ko tona ʼu ala fuli ʼe faitotonu.”—Teutalonome 32:4.

Ko te ʼAtua ʼe loto foaki ki te hahaʼi fuli, ʼo kau ai mo nātou ʼaē ʼe hagē ʼe mole tāu mo te faʼahi ʼaia. Ohagē lā, “ ʼe ina fakahopo ake tona laʼā ki te kau agakovi pea mo te kau agalelei, pea ʼe ina fakatō te ʼua ki te kau agatonu pea mo te kau heʼe agatonu.” (Mateo 5:45) ʼE ʼofa tatau ia ki te hahaʼi ʼo te ʼu lanu pea mo te ʼu agaʼi fenua fuli, ohagē ko tona fakahā fēnei mai iā Gāue 10:34, 35: “Ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”

Kae ko ai koa ʼaē ʼe tupu mai ai te heʼe faitotonu? Tokolahi ʼe natou filifili te aga heʼe faitotonu, kae ʼe mole natou mulimuli ki te faʼifaʼitaki ʼo te faitotonu ʼa te ʼAtua. (Teutalonome 32:5) Pea ʼe toe fakahā mai ʼi te Tohi-Tapu ko te ʼAtua ʼe ina fakagafua ki tona fili, ia te Tēvolo, ke ina puleʼi te mālamanei kātoa. a (1 Soane 5:19) Kae kua ovi mai pē te temi ʼaē ʼe mole kei fakagafua ai e te ʼAtua ia te pule heʼe faitotonu ʼaia. Kua ina fai ia he puleʼaki moʼo “maumauʼi te ʼu gāue ʼa te Tēvolo.”—1 Soane 3:8.

Te ʼIloʼi ʼo Te Moʼoni ʼe ʼAoga Kiā Koutou: ʼE feala ke kotou feʼekeʼaki ʼuhi heʼe hagē ia ʼe hoholo atu pē te aga fakahehema, te agakovi, pea mo te heʼe faitotonu. Ko takotou ʼiloʼi te tupuʼaga ʼo te ʼu fihifihia ʼaia, ʼe tokoni atu ke kotou mahino pe koʼē ʼe kovi ʼaupitō te ʼu ʼaluʼaga ʼo te mālamanei pea he koʼē ʼe mole he fua ʼo te ʼu faiga mālohi ʼa te tagata ke lelei age te ʼu ʼaluʼaga ʼo te mālamanei. (Pesalemo 146:3) ʼE feala ke kotou maʼu he ʼamanaki moʼoni ki te kā haʼu ʼe fakatafito ki takotou falala ʼaē ki te ʼu fakapapau ʼa te ʼAtua, kae ʼe mole kotou fakaʼaogaʼi tokotou temi pea mo tokotou mālohi moʼo fai he ʼu fetogi ʼe fakatemi anai pea lagi ʼe mole hoko anai ia ʼi he ʼaho.—Fakahā 21:3, 4.

Ko tatatou mahino ki te tupuʼaga moʼoni ʼo te heʼe faitotonu, ʼe feala ke tokoni tāfito mai mokā hoko he ʼu ʼaluʼaga fakatupu mamahi fēia ʼe ovi mai kiō tātou. Mokā tou tau mo he aga heʼe faitotonu, pea ʼe lagi feala ke tou kalaga ohagē ko tona fai e te kaugana ʼa te ʼAtua ko Hapakuke, ʼo fēnei: “Kua mate noa te lao, pea ʼe mole he ʼaho ʼe hū ai te faitotonu ki tuʼa.” (Hapakuke 1:4) Neʼe mole tauteaʼi e te ʼAtua ia Hapakuke ʼi tana fai te ʼu palalau ʼaia. Kae neʼe fakalotofīmālieʼi e te ʼAtua ia Tana kaugana, ʼo ina fakahā age kua ina fakatuʼutuʼu he temi moʼo fakatokatoka te ʼu ʼaluʼaga ʼaia, pea neʼe tokoni ia kiā Hapakuke ke ina maʼu te fiafia ʼi tana tau ʼaē mo te faʼahi ʼaia. (Hapakuke 2:2-4; 3:17, 18) ʼO toe fēia pē, ko takotou falala ʼaē ki te fakapapau ʼa te ʼAtua ke ina pulihi te heʼe faitotonu, ʼe lava tokoni atu ke kotou maʼu he lotofīmālie pea mo he ʼatamai tokalelei ʼi te mālamanei heʼe faitotonu.

[Nota]

[Fakamatala ʼo te pāsina 7]

ʼE ko he hala moʼoni koa ʼa te ʼAtua mokā hoko te ʼu mamahi pea mo te heʼe faitotonu?

[Haʼuʼaga ʼo te paki pāsina 7]

© Sven Torfinn/Panos Pictures