MANATU TAFITŌ
Ko Ai Te Kau Fakamoʼoni ʼa Sehova?
“Neʼe au iloʼi ia Mike talu mai fualoa. ʼE ko te Fakamoʼoni ʼa Sehova. Kaʼe neʼe mata faikehe kia au tana lotu. Neʼe au feʼekeʼaki fenei ai: ‘Ko ai ia Sehova? He koʼe ʼe mole kau te kau Fakamoʼoni ʼa Sehova ki te ʼu ʼaho lalahi? Neʼe kau koa ia Mike ki he magaʼi lotu?’ ”—Becky, Californie, Amelika.
“ ʼI te kamata ako ʼe ʼoku vahaʼa fale ia te Tohi-Tapu mo te kau Fakamoʼoni ʼa Sehova, neʼe au feʼekeʼaki fenei: ‘Kotea ia te fakaʼuhiga ʼo te higoa Fakamoʼoni ʼa Sehova? ʼE faikehe ʼosi te higoa ʼo te lotu.’ ”—Zenon, Ontario, Kanata.
“Ko au mo toku ʼohoana neʼe ma lotovaivai ʼi tamā mole kei olo ki te ʼu misa. Pea ʼi tamā manatu ʼe fakaʼaogaʼi e te kau Fakamoʼoni ʼa Sehova ia te faigamalie ʼaia ke ma kau ki he lotu. Kaʼe, neʼe ma manatu kapau ʼe mole tou maʼu ia te ʼu meʼa ʼae ʼe tou kumi ʼi te ʼu lotu lalahi ʼo te malamanei, ʼe mole feala anai ke tou maʼu ʼi he magaʼi lotu ohage ko te kau Fakamoʼoni ʼa Sehova.”—Kent, Washington, Amelika.
“ ʼE au ui fakahagatonu atu ʼe mole au iloʼi ia natou peʼe kotea ʼae ʼe natou fai.”—Cecilie, Esbjerb, Danemark.
ʼE lagi neʼe kua kotou sisio kia natou ʼi te faifakamafola ʼi te ʼu ʼapi peʼe ko te ʼu koga meʼa ʼae ʼe feʼoloʼaki ai te hahaʼi. Pe ʼe natou tufa he ʼu tohi Fakatohi-tapu pea mo fai he ʼu ako Tohi-Tapu ʼe mole totogi. ʼE lagi neʼe kua kotou maʼu he tohi ʼi ʼanatou tohi. Pe ʼe lagi neʼe kotou feʼekeʼaki pe ko ai moʼoni ia te kau Fakamoʼoni ʼa Sehova. ʼE lagi neʼe kotou manatu tahi mo natou ʼae neʼe tou talanoa ki ai ʼi te kamata.
Kapau ʼe kotou fai he ʼu fehuʼi pea mo kotou tuʼania, ʼe kotou maʼu koa ʼifea ʼona tali? ʼE kotou lava iloʼi feafeaʼi te ʼu akonaki ʼae ʼe tui ki ai te kau Fakamoʼoni ʼa Sehova? Pe ʼe fakapaʼaga feafeaʼi tanatou gaue faifakamafola pea mo ʼonatou fale fono? Pea he koʼe ʼe natou olo atu ki ʼokotou ʼapi pea mo palalau atu ʼi te ʼu koga meʼa ʼae ʼe feʼoloʼaki ai te hahaʼi?
ʼE ui fenei e Cecilie ʼae neʼe tou talanoa ki ai ʼi te kamata: “Neʼe lahi te ʼu faʼahi neʼe au lau ʼi te Neti ʼo ʼuhiga mo te kau Fakamoʼoni ʼa Sehova. Pea neʼe au logo ki he ʼu palalau loi ʼe feʼaveʼaki pea mo te ʼu meʼa kovi ʼe lau ʼo ʼuhiga mo natou. Ki muli age, neʼe au maʼu he ʼu manatu ʼe mole lelei ʼo ʼuhiga mo te kau Fakamoʼoni ʼa Sehova.” Kaʼe, ki muli age leva, neʼe palalau fakahagatonu ia Cecilie mo te kau Fakamoʼoni ʼa Sehova. Pea neʼe fiafia ʼi te ʼu tali ʼae neʼe ina maʼu ki ʼana fehuʼi.
ʼE kotou fia maʼu koa te ʼu tali ʼae ʼe moʼoni ki ʼakotou fehuʼi ʼo ʼuhiga mo te kau Fakamoʼoni ʼa Sehova? ʼE matou fakalotomalohiʼi koutou ke kotou kumi tokoni ki te kau Fakamoʼoni ʼa Sehova he ʼe natou tali atu anai ki ʼakotou fehuʼi. Pea ko natou ʼae neʼe natou ta ia te nusipepa ʼaeni. (Taaga Lea 14:15) Koia, ʼe matou fakaʼamu ʼe tokoni atu anai ia te ʼu alatike ʼae ka hoa mai ke kotou mahino pe ʼe ko ai ia natou. Pea kotea te ʼu akonaki ʼe natou tui ki ai mo te gaue ʼae ʼe natou fai.
