AKO 4
Neʼe Ina Fakafiafiaʼi Te Loto ʼo Tana Tamai Pea Mo ʼAe ʼo Sehova
ʼE ke sio ki te kiʼi taʼahine ʼi te pakī?— ʼE ko te ʼofafine ʼo te tagata ko Sefete. ʼE mole fakaha mai ʼi te Tohi-Tapu tona higoa, kaʼe ʼe tou iloʼi neʼe ina fakafiafiaʼi te loto ʼo tana tamai pea mo ʼae ʼo Sehova. Ta vakaʼi he tahi ʼu faʼahi ʼo ʼuhiga mo ia pea mo tana tamai ko Sefete.
Ko Sefete neʼe ko he tagata agalelei pea neʼe lahi te temi ʼae neʼe ina ako ai ki tona ʼofafine pe ko ai ia Sehova. Neʼe toe malohi pea mo poto ʼi te takitaki ʼo tana hahaʼi. Koia, neʼe kole ai e te kau Iselaele ke ina takitaki natou ʼi tanatou tauʼi ʼonatou fili.
Neʼe faikole ia Sefete ke tokoni age ia te ʼAtua ke feala hana malo. Neʼe fakapapau e Sefete kapau ʼe malo pea ʼe ina foaki anai kia Sehova ia ia ʼae ka ʼuluaki hu mai anai ki tuʼa mai tona ʼapi moka liliu kiō ia. Ko
tona fakaʼuhiga ʼae ʼe maʼuli pea mo gaue anai ʼi tona maʼuli katoa ʼi te tapenakulo ʼa te ʼAtua. Ko te tapenakulo neʼe ko te koga meʼa ʼae neʼe tauhi ai te hahaʼi ki te ʼAtua ʼi te temi ʼaia. Pea neʼe malo ia Sefete ʼi te tau. ʼE ke iloʼi peʼe ko ai ʼae neʼe ʼuluaki hu mai ki tuʼa ʼi tana liliu atu ki tona ʼapi?—ʼE moʼoni, neʼe ko te ʼofafine ʼo Sefete. Neʼe ko tana tamasiʼi pe ʼaia ʼe tahi pea neʼe tonu ai ke tuku e Sefete ke alu. Neʼe lotomamahi ʼaupito. Kaʼe ʼe ke manatuʼi neʼe ina fai te fakapapau. Neʼe ui age e tona ʼofafine: ‘Tamai, neʼe ke fai he fakapapau kia Sehova pea ʼe tonu ke ke fakahoko.’
Neʼe toe lotomamahi foki mo te ʼofafine ʼo Sefete. Heʼe kapau ʼe nofo ʼi te tapenakulo, ʼe mole feala anai ke ʼohoana pea mo maʼu fanau. Kaʼe neʼe maʼuhiga age kia ia ke mulimuli ki te fakapapau ʼa tana tamai pea ke ina fakafiafiaʼi te loto ʼo Sehova. Neʼe maʼuhiga age ia ʼi hana ʼohoana pea mo maʼu fanau. Koia neʼe mavae ai ʼi tona ʼapi pea neʼe maʼuli leva ʼi te tapenakulo ʼi tona maʼuli katoa.
ʼI tau manatu la, neʼe ina fakafiafiaʼi koa te loto ʼo tana tamai pea mo ʼae ʼo Sehova?— ʼE mahino ia. Kapau ʼe ke fakalogo pea mo ʼofa kia Sehova, ʼe ke faʼifaʼitakiʼi te ʼofafine ʼo Sefete. ʼE ke toe fakafiafiaʼi anai ia te loto ʼo ʼau matuʼā pea mo ʼae ʼo Sehova.