AKO 2
Neʼe Fia Fakafiafiaʼi e Lepeka Te Loto ʼo Sehova
Ko Lepeka neʼe ko he fafine neʼe ʼofa kia Sehova. Ko te higoa ʼo tona ʼohoana, neʼe ko Isaake. Neʼe toe ʼofa mo ia kia Sehova. Neʼe feiloʼiʼaki feafeaʼi ia Lepeka pea mo Isaake? Neʼe ina fakaha feafeaʼi tana fia fakafiafiaʼi te loto ʼo Sehova? Ta vakaʼi he tahi ʼu faʼahi ʼo ʼuhiga mo ia.
Ko te ʼu matuʼā ʼa Isaake, neʼe ko Apalahamo mo Sala. Neʼe natou maʼuʼuli ʼi te fenua ko Kanaane, ʼae neʼe mole tauhi ai te hahaʼi kia Sehova. Kaʼe neʼe loto e Apalahamo ke ʼohoana tona foha mo he fafine ʼe tauhi kia Sehova. Koia la ʼae neʼe ina fekauʼi ai tana tagata faifekau, neʼe lagi ko Eliesele, ke ina maʼu he ʼohoana ʼo Isaake ʼi te fenua ʼae ʼe higoa ko Halane, ʼae neʼe maʼuʼuli ai ʼihi kaiga ʼo Apalahamo.
Neʼe faifolau ia Eliesele pea mo ʼihi atu ʼu kaugana ʼa Apalahamo. Neʼe ko he toe folau loaloaga. Neʼe natou olo mo he ʼu kamelo ʼe hogofulu neʼe natou ʼamoga te ʼu meʼa kai pea mo ni meʼa ʼofa. Neʼe iloʼi feafeaʼi e Eliesele te fafine ʼae ka ina filifili maʼa Isaake? ʼI te tau atu ʼa Eliesele pea mo te ʼu kaugana ki Halane, neʼe natou tutuʼu ʼi he vai keli, koteʼuhi neʼe iloʼi e Eliesele ka vave ʼomai pe ia te hahaʼi ʼo ʼohu vai. Neʼe faikole kia Sehova pea mo ui: ‘Kapau ʼe au kole ki he taʼahine ke ina foaki mai he moʼi vai, pea mo ina foaki mai pea mo ina toe fakainu foki mo ʼaku kamelo, ʼe au iloʼi anai ʼe ko te taʼahine ʼaia neʼe ke filifili.’
Pea neʼe haʼu leva ia te finemui ko Lepeka ki te vai keli. ʼE ui ʼi te Tohi-Tapu neʼe matalelei ʼaupito. Neʼe kole age e Eliesele hana moʼi vai ke inu pea neʼe ui age e Lepeka: ‘ ʼEi. ʼE au foaki atu hau moʼi vai pea ʼe au toe fakainu mo ʼau kamelo.’ Neʼe ko he gaue kinakina, koteʼuhi ʼe faʼa inu te ʼu kamelo. Koia neʼe tonu ai ke lele tuʼa lahi ia Lepeka ki te vai keli. ʼE ke sio ʼi te pakī ki tana gaue kinakina?— Neʼe punamaʼuli ia Eliesele ki te tali e Sehova ia tana kole.
Neʼe foaki age e Eliesele kia Lepeka he ʼu tuʼuga meʼa ʼofa matalelei. Neʼe fakaafe e Lepeka ia Eliesele mo te ʼu kaugana ki tonatou ʼapi. Neʼe fakamahino e Eliesele te tupuʼaga ʼo te fekauʼi ʼo ia e Apalahamo ki te fenua ʼaia pea mo te tali e Sehova ki tana faikole. Neʼe fiafia te famili ʼo Lepeka ke ʼohoana ia Lepeka mo Isaake.
Neʼe alu ia Lepeka mo Eliesele ki Kanaane pea neʼe ʼohoana mo Isaake
Kaʼe ʼi tau manatu la, neʼe loto koa ki ai ia Lepeka?— Neʼe iloʼi e Lepeka neʼe ko Sehova ʼae neʼe ina fekauʼi age ia Eliesele. Koia, ʼi te temi ʼae neʼe kole age ai e te famili ʼo Lepeka peʼe fia alu ki Kanaane pea mo ʼohoana mo Isaake, neʼe ina ui fenei: ‘ ʼEi. ʼE au loto ki ai.’ Neʼe mavae atu aipe mo Eliesele. ʼI tanatou tau atu ki Kanaane, neʼe ʼohoana leva ia mo Isaake.
Neʼe fai e Lepeka ia te meʼa ʼae neʼe loto ki ai ia Sehova. Pea neʼe tapuakina ia ia e Sehova. ʼO fualoa ki muli age, neʼe tupu ia Sesu mai tona famili! Kapau ʼe ke hage ko Lepeka pea mo ke fakafiafiaʼi te loto ʼo Sehova, ʼe ina toe tapuakina anai mo koe.