AKO 13
Neʼe Fia Tokoni Ia Timoteo Ki Te Hahaʼi
Ko Timoteo neʼe ko te tupulaga neʼe fiafia ʼi te tokoni ki te hahaʼi. Neʼe faifolau ki te ʼu koga meʼa kehekehe ʼo tokoni ki te hahaʼi. Neʼe fiafia lahi ai tona maʼuli. ʼE ke fia logo koa ki tona hisitolia?—
Ko te faʼe pea mo te kui ʼa Timoteo neʼe nā akoʼi age pe ko ai ia Sehova
Neʼe lahilahi ake ia Timoteo ʼi te kolo neʼe higoa ko Lisitia. ʼI tana kei veliveli, ko tana kui ko Loisa mo tana faʼe ia Eunise, neʼe nā akoʼi age pe ko ai ia Sehova. ʼI te lahilahi ake ʼa Timoteo, neʼe fia tokoni ki te hahaʼi ke natou iloʼi ia Sehova.
ʼI te kei tupulaga ʼa Timoteo, neʼe kole age e Paulo kia ia peʼe fia folau mo ia ʼo faifakamafola ʼi te tahi atu ʼu koga meʼa. Neʼe ui e Timoteo: ‘ ʼEi!’ Neʼe loto ia ke alu pea mo tokoni ki te hahaʼi.
Neʼe folau ia Timoteo pea mo Paulo ki te kolo ʼi Masetonia neʼe higoa ko Tesalonika. Ke feala hanā kaku ki ai, neʼe tonu ke nā haʼele ʼi he ʼala loaloaga pea mo olo leva ʼi he vaka. ʼI tanā tau atu leva ki ai, neʼe nā tokoni ki te hahaʼi tokolahi ke natou iloʼi ia Sehova. Kaʼe ko ʼihi hahaʼi neʼe natou iita pea mo natou gaohi koviʼi naua. Neʼe tonu ai kia Paulo mo Timoteo ke nā mavae ai ʼo nā olo ʼo faifakamafola ʼi he tahi age kolo.
Hili ki ai ni mahina, neʼe kole age e Paulo kia Timoteo ke liliu ki Tesalonika, ʼo fakasiosio te ʼu tehina. Neʼe tonu ke lototoʼa ia Timoteo ke toe liliu ai ki te kolo fakamataku ʼaia. Kaʼe neʼe alu ia Timoteo he neʼe manatu ia ki ʼona tehina ʼi ai. Neʼe toe liliu mai kia Paulo mo ni ʼu logo ʼe lelei. Neʼe lelei pe te aluʼaga ʼo te ʼu tehina ʼo Tesalonika.
Neʼe fualoa te gaue ʼa Timoteo mo Paulo. Neʼe tohi e Paulo ʼo ʼuhiga mo Timoteo, ʼo ina ui neʼe ko ia pe ʼae neʼe feala ke ina fekauʼi ke alu ʼo tokoni ki te ʼu kokelekasio. Neʼe ʼofa ia Timoteo kia Sehova pea mo te hahaʼi.
ʼE ke ʼofa koa ki te hahaʼi pea mo ke fia tokoni kia natou ke natou iloʼi ia Sehova?— Kapau koia, pea ʼe ke maʼu anai he maʼuli ʼe fiafia, ohage pe ko Timoteo.