AKO 8
Neʼe Filifili Pe e Sosiasi He ʼu Kaumeʼa ʼe Lelei
ʼI tau manatu la, ʼe faigataʼa koa ia te fai ʼo te meʼa ʼae ʼe lelei?— ʼE manatu e te hahaʼi tokolahi ʼe faigataʼa te faʼahi ʼaia. ʼE fakaha mai ʼi te Tohi-Tapu neʼe faigataʼa ki te tama neʼe higoa ko Sosiasi tana fai ia te meʼa ʼae ʼe lelei. Kaʼe neʼe ina filifili he ʼu kaumeʼa ʼe lelei pea neʼe natou tokoni kia ia. Ta vakaʼi he tahi ʼu faʼahi ʼo ʼuhiga mo Sosiasi pea mo ʼona kaumeʼa.
Ko te tamai ʼa Sosiasi neʼe ko Amone, te hau ʼo Suta. Neʼe fai e Amone te ʼu aga ʼe kovi pea neʼe tauhi ki te ʼu ʼatua hala. ʼI te mate ʼo te tamai ʼa Sosiasi, neʼe liliu ia Sosiasi ko te hau ʼo Suta. Kaʼe neʼe kei taʼu valu pe. ʼI tau manatu la, neʼe agakovi koa ohage ko tana tamai?— Kailoa ia.
Logo la tana kei veliveli kaʼe neʼe fia fakalogo ia Sosiasi kia Sehova. Koia neʼe ina filifili ke kaumeʼa pe mo natou ʼae ʼe ʼoʼofa kia Sehova. Pea neʼe natou tokoni kia Sosiasi ke ina fai te meʼa ʼae ʼe lelei. Neʼe ko ai koa te ʼu kaumeʼa ʼo Sosiasi?
Neʼe kau ai ia Sofoni. Ko Sofoni neʼe ko he polofeta neʼe ina fakatokaga te hahaʼi ʼo Suta ʼe hoko anai kia natou he ʼu malaʼia mo
kapau ʼe natou tauhi ki ni ʼatua hala. Neʼe fakalogo ia Sosiasi kia Sofoni pea neʼe tauhi ia kia Sehova, kaʼe mole ki ni ʼatua hala.Ko te tahi age kaumeʼa ʼo Sosiasi, neʼe ko Selemia. Neʼe nā teitei taʼu tahi pea mo nā lalahi fakatahi ake. Neʼe nā kaumeʼa lelei ʼosi. Koia ʼi te mate ʼae ʼo Sosiasi, neʼe tohi e Selemia te hiva tauhi ʼofa neʼe ha ai tona lotomamahi. Neʼe fetokoniʼaki ia Selemia mo Sosiasi ke nā fai ia te meʼa ʼae ʼe lelei pea mo nā fakalogo kia Sehova.
Neʼe fetokoniʼaki ia Sosiasi mo Selemia ke nā fai ia te meʼa ʼae ʼe lelei
Kotea te ako ʼe feala ke ke maʼu mai te faʼifaʼitaki ʼo Sosiasi?— ʼI te kei veliveli ʼa Sosiasi, neʼe ina fia fai ia te meʼa ʼae ʼe lelei. Neʼe ina iloʼi neʼe tonu ke kaumeʼa mo natou ʼae ʼe ʼoʼofa kia Sehova. Ke ke kaumeʼa mo natou ʼae ʼe ʼoʼofa kia Sehova pea mo lava tokoni atu ke ke fai te meʼa ʼae ʼe lelei.