KOTEĀ takotou mahino ki te ’Aho ’o Te Fakamāu? Tokolahi ’e nātou ’ui, ko te ’u lau’i miliona haha’i ’e nātou fakahoahoa takitokotahi iā mu’a ’o te Heka’aga Faka Hau ’o te ’Atua. ’I te temi ’aia ’e fai anai ia te fakamāu ki te haha’i takitokotahi. ’E fakapale anai ’ihi ke nātou mā’u’uli ’i te palatiso ’i te lagi, pea ko ’ihi ’e tautea’i anai ke ’olo ki te ’ifeli kakaha. Kae ’i te Tohi-Tapu ’e mole feiā te ’Aho ’o Te Fakamāu. ’E fakamatala ’i te Folafola ’a te ’Atua ia te ’aho ’aia, ohage ko he temi ’o te ’amanaki pea mo te fakafo’ou, kae ’e mole ko he temi fakamataku.

Iā Apokalipesi 20:11, 12 (MN), ’e tou lau ai te fakamatalatala ’a te ’apositolo ko Soane ’o ’uhiga mo te ’Aho ’o Te Fakamāu: “Ne’e au sio ki te heka’aga faka hau lahi e lanu hina, pea mo ia ’aē ne’e heka ’i ai. ’I ’ona mu’a ne’e feholaki mai ai te kele pea mo te lagi, pea ne’e mole ma’u he nofo’aga mo’o nāua. Pea ne’e au sio ki te kau mate, ia nātou lalahi pea mo nātou liliki, ’e nātou tutu’u iā mu’a ’o te heka’aga faka hau, pea ne’e avahi te ’u takaiga tohi. Kae ne’e avahi te tahi takaiga tohi; ko te takaiga tohi ’o te ma’uli. Pea ne’e fakamāu’i te kau mate ’o mulimuli ki te ’u me’a ’aē ne’e tohi ’i te takaiga tohi, ’o mulimuli ki tanatou ’u gāue.” Ko ai te Tu’i Fakamāu ’aia?

Ko Sehova ’Atua ia te Tu’i Fakamāu Lahi ’o te malamanei. Kae ne’e ina tuku ki te tahi kehe ke ina fai ia te fakamāu ’aia. Iā Gaue 17:31 (MN), ne’e ’ui ai e te ’apositolo ko Paulo ko te ’Atua “kua ina fakakatofa he ’aho ’e tonu ke ina fakamāu’i ai te kele kātoa ’i te faitotonu, ’aki he tagata ne’e kua ina fakanofo.” Ko te Tu’i Fakamāu ’aia ’e ko Sesu Kilisito ’aē kua fakatu’uake. (Soane 5:22) Kae ’e kamata ’afea te ’Aho ’o Te Fakamāu? Pea ’e fai ’o a’u ki ’āfea?

’I te tohi ’o Apokalipesi ’e fakahā ai ko te ’Aho ’o Te Fakamāu ’e kamata ’i te hili ’o te tau ’o Halamaketone, mokā faka’auha anai te tu’u ’a Satana.* (Apokalipesi 16:14, 16; 19:19-20:3) ’I te hili ’o Halamaketone, ’e pilisoni’i anai ia Satana mo tana kau temonio ’i te vanu ia ta’u e afe. Lolotoga te temi ’aia, ko te toko 144 000 kaugā ma’u tofi’a ’i selo ’e nātou liliu anai ko te kau tu’i fakamāu pea ’e nātou “hau [anai] mo Kilisito lolotoga ia ta’u e afe.” (Apokalipesi 14:1-3; 20:1-4; Loma 8:17) Ko te ’Aho ’o Te Fakamāu ’e mole fai pe anai ’i te ’aho e tahi, kae ia ta’u e afe.

Lolotoga te ’u ta’u ’aia e afe, ko Sesu Kilisito ’e ina “fakamau’i anai te hahai mauli mo te hahai mate.” (2 Timoteo 4:1) Ko “te hahai mauli” ’e ko “te toe haha’i tokolahi” ’aē ka mā’u’uli ’i Halamaketone. (Apokalipesi 7:9-17, MN) Ne’e toe sio ia te ’apositolo ko Soane ki “te kau mate…’e nātou tutu’u iā mu’a ’o te heka’aga faka hau” ’o te fakamāu. Ohage ko tona fakapapau e Sesu, ka hoko anai te fakatu’uake, “ko nātou…’e nonofo ’i te ’u falemaka fakamanatu ’e nātou logo anai ki [te] le’o [’o Kilisito] pea ’e nātou hū mai anai ki tu’a.” (Soane 5:28, 29, MN; Gaue 24:15) ’E feafea’i anai tonatou fakamāu’i?

’I te me’a ’aē ne’e hā ki te ’apositolo ko Soane, “ne’e avahi te ’u takaiga tohi” pea “ne’e fakamāu’i te kau mate ’o mulimuli ki te ’u me’a ’aē ne’e tohi ’i te takaiga tohi, ’o mulimuli ki tanatou ’u gāue.” ’E tu’u koa ’i te ’u takaiga tohi ’aia te ’u aga ’aē ne’e fai e te haha’i ’i tanatou kei mā’u’uli? Kailoa, ’e mole fakamāu’i anai nātou ’o mulimuli ki tanatou ’u aga ’aē ne’e nātou fai ’i mu’a ’o tonatou mamate. ’E tou ’ilo’i feafea’i ia te fa’ahi ’aia? ’E ’ui fēnei ’i te Tohi-Tapu: “He ko ae kua mate, kua faka’ateaina mai te agahala.” (Loma 6:7) Koia ko te kau fakatu’uake ’aia ’e nātou toe mā’u’uli ake anai kae kua molehi tanatou ’u agahala ’āfea. Ko te ’u takaiga tohi ’e ko te ’u fakatotonu ’a te ’Atua. Ke feala hanatou mā’u’uli ’o talu ai, ’e tonu anai ki te haha’i ’aē ne’e hāo ’i Halamaketone pea mo te kau fakatu’uake, ke nātou fakalogo ki te ’u fakatotonu ’a te ’Atua, ’o feiā mo te ’u fakama’ua fo’ou ’aē ka fakahā mai e Sehova lolotoga te ’u ta’u e afe. Koia, ’e fakamāu anai te haha’i ’o mulimuli pe ki te ’u me’a ’aē ka nātou fai lolotoga te ’Aho ’o Te Fakamāu.

’I te ’Aho ’o Te Fakamāu ’e feala anai ki te ’u lau’i miliona haha’i ke nātou ma’u te ’uluaki faigamālie ’aia ke nātou ako ia te finegalo ’o te ’Atua pea mo faka ’alutahi kiai tonatou ma’uli. Ko tona faka ’uhiga ’e ako’i anai te tokolahi. ’Io, “’e ko te faitotonu ’aē ka ako mo’oni anai e te ’u haha’i ’o te kele ma’uli.” (Isaia 26:9) Kae ’e mole ko te haha’i fuli ’aē ka fakalogo anai ki te finegalo ’o te ’Atua. ’E ’ui iā Isaia 26:10: “Tatau aipe pe’e kita ’ofa ki te tagata agakovi, kae ’e mole ina ako anai ia te faitotonu. ’I te fenua ’o te faitotonu ’e ina fai anai he aga he’e faitotonu, pea ’e mole sio anai ki te mā’oluga ’o Sehova.” ’E matehi anai ’o talu ai ia te kau agakovi ’aia ’i te lolotoga ’o te ’Aho ’o Te Fakamāu.—Isaia 65:20.

’I te faka’osi ’o te ’Aho ’o Te Fakamāu, ko te haha’i ’aē ka hāo, ’e nātou ma’u kātoa anai ia ‘te ma’uli,’ he’e kua nātou haohaoa. (Apokalipesi 20:5) Koia, ’i te ’Aho ’o Te Fakamāu ’e toe liliu anai te malamanei ’o ma’uli haohaoa ohage ko te kamata’aga. (1 Kolonito 15:24-28) Pea ’e fai anai te ’ahi’ahi faka’osi, he’e toe tuku mai anai ia Satana mai te pilisoni pea ’e fakagafua age anai ke ina fakahē’i faka’osi ia te malamanei. (Apokalipesi 20:3, 7-10) Ko nātou ’aē ka fakafeagai kiā te ia, ’e nātou sio anai ki te fakahoko kātoa ’o te fakapapau faka Tohi-Tapu ’aenī: “’E ma’u anai te kele e te kau faitotonu, pea ’e nātou nonofo ai anai ’o talu ai.” (Pesalemo 37:29) Ei, ko te ’Aho ’o Te Fakamāu ’e ko he tapuakina anai ki te kau agatonu fuli!

*  ’O ’uhiga mo Halamaketone, vaka’i te Lua Tohi Étude perspicace des Écritures, ’i te pasina 63 mo te 64, mo te ’Uluaki Tohi Étude perspicace des Écritures, ’i te pasina 1 073 mo te 1 074, pea mo te kapite 20 ’o te tohi Koutou Atolasio Ki Te ’Atua Mo’oni Pe e Tahi, ne’e tā e te kau Fakamo’oni ’a Sehova.

← Vaka’i te pasina ’o te kāpite