ʼI takolua kamata faʼufaʼu tokolua maʼuli fakataumatuʼa, ʼe hoko mai te ʼu fihifihia. ʼE lagi tupu te ʼu fihifihia ʼaia mai te kehekehe ʼo takolua faʼahiga manatu, mo te ʼu meʼa ʼae ʼe kolua logoʼi pea mo tokolua faʼahiga maʼuli. ʼE toe feala ke hoko te ʼu fihifihia ʼuhi ko he aluʼaga neʼe hoko peʼe ko he aluʼaga fakapunamaʼuli.

ʼE feala pe ke kolua feʼuiʼaki ʼe lelei pe ia meʼa fuli ʼi tokolua maʼuli fakataumatuʼa, kaʼe ʼe tokoni mai ʼi te Tohi-Tapu ke tou tauʼi ʼotatou fihifihia. (Mateo 5:23, 24) ʼE kolua maʼu anai he ʼu puleʼaki lelei ki ʼokolua fihifihia ʼi takolua maʼuliʼi te ʼu pelesepeto Fakatohi-tapu.

KOTEA TE MANATU ʼI TE TOHI-TAPU? “E i ai he temi . . . ke palalau ai.” (Ekelesiasi 3:1, 7) Kolua toʼo he temi ke kolua palalau ai ki te fihifihia. Kolua fefakahaʼaki ia te meʼa ʼae ʼe kolua logoʼi pea mo ʼakolua manatu. ʼI te temi fuli pe, kolua “palalau i te mooni.” (Efeso 4:25) Tatau aipe pe ʼe fakatupu ita anai, kaʼe kolua tekeʼi ia te fia laga ke. Ko he palalau ʼe malu, ʼe mole feala ke ina fakatupu he tokakovi.—Taaga Lea 15:4; 26:20.

Tatau aipe pe ʼe mole kolua manatu tahi, kaʼe kolua feagaleleiʼaki, ʼo kolua fefakahaʼaki te ʼofa pea mo te fakaʼapaʼapa. (Kolose 4:6) Kolua faigaʼi ke foimo fakatokatoka te fihifihia, pea kolua taupau ia te felogoʼi.—Efeso 4:26.

KOTEA ʼAE ʼE FEALA KE KOLUA FAI?

• Kolua fakatuʼutuʼu he temi ke kolua palalau ai ki te fihifihia

• Moka hoko te temi ʼae ʼe tonu ke palalau ai tou hoa, tuku muʼa ke fakaʼosi tana palalau, pea hoki ke palalau leva

KOTEA TE MANATU ʼI TE TOHI-TAPU? “Ke kotou fe’ofamamahi’aki. Ke kotou ʼuluaki fefakaʼapaʼapaʼaki tuʼumaʼu.” (Loma 12:10, MN) ʼE maʼuhiga ʼaupito ia takolua faʼahiga fakalogo. Faigaʼi ke ke mahino ki te manatu ʼo tou hoa ʼaki te agavaivai. (1 Petelo 3:8, MN; Sakopo 1:19) ʼAua naʼa ke failoi ʼi te fakalogo ki te ʼu palalau ʼae ʼe fai atu e tou hoa. Kapau ʼe feala, tuku muʼa te gaue ʼae ʼe ke lolotoga fai kaʼe ke fakalogo muʼa ki tou hoa, peʼe ke fakatuʼutuʼu mo ia ke kolua faipalalau ʼi he tahi age temi. Kapau kua kolua manatu tahi, pea ʼe mole ke ita vave anai.—Ekelesiasi 7:9.

KOTEA ʼAE ʼE FEALA KE KOLUA FAI?

• Fakalogo ʼaki he lotomahino, tatau aipe pe ʼe mole ke leleiʼia te ʼu palalau ʼaia

• Faigaʼi ke ke mahino ki te manatu ʼo tou hoa. ʼE tonu ke ke tokagaʼi te agaaga ʼo tona fofoga pea mo tona leʼo

KOTEA TE MANATU ʼI TE TOHI-TAPU? “Ko te ’u gaue kinakina fuli ʼe ʼi ai tona ʼaoga, kaʼe ko he palalau pe ʼe ina taki ki te masiva.” (Taʼaga Lea 14:23, MN) ʼE mole tonu pe anai ke kolua manatu tahi ʼo ʼuhiga mo he puleʼaki ʼe lelei. Kaʼe ʼe toe ʼaoga foki ke kolua fakahoko takolua fakatuʼutuʼu. ʼE lagi tonu anai ke kolua gaue kinakina ki te faʼahi ʼaia, heʼe feala anai ke fua lelei. (Taaga Lea 10:4) Kapau ʼe kolua faiga fakatahi, ʼe kolua maʼu anai “he totogi [ʼe] lelei” ʼi takolua gaue kinakina.—Ekelesiasi 4:9.

KOTEA ʼAE ʼE FEALA KE KOLUA FAI?

• Kolua vakaʼi fakatahi ia te ʼu faʼahi ʼae ʼe tonu ke kolua tahi fakahoko moʼo fakatokatoka te fihifihia

• Kolua vakavakaʼi pe ʼe kolua fakahoko takolua fakatuʼutuʼu