Fakakaukauʼi muʼa te aluʼaga ʼaeni: Ko David ʼe lolotoga haʼele lalo ʼi he kolo ʼe fakapoʼuli. Pea ʼe mole kei sio lelei ki te ʼu fakailoga ʼo te ala. ʼE mahino ia David kua hehe. Neʼe lagi faihala ʼi te ala ʼae neʼe alu ai.

Ka na pau la ko koe ia David, kotea ʼae ka ke fai anai?

ʼE lahi te ʼu fakatuʼutuʼu ʼe feala ke ke fai:

1. Kole age ki he tahi ke ina fakaha atu te ala.

2. Fakaʼaogaʼi he kiʼi hila.

3. Haga haʼele ʼo ke fakaʼamu ʼe ke toe maʼu pe anai tou ala.

ʼE ha lelei mai, ʼe mole ko te 3 Fakatuʼutuʼu ʼae ka ke filifili.

Pea ʼe lelei age te 2 Fakatuʼutuʼu ʼi te ʼuluaki. Koteʼuhi ʼaki he kiʼi hila ʼe ke inaina ai anai tou ala.

Ko te Tohi-Tapu ʼe feala ke toe tokoni feia atu.

Ko te tohi ʼaia ʼae ʼe lahi ʼaupitō tona fakatau ʼe feala

• ke ina takitaki koe ʼi ʼou faigataʼaia

• ke tokoni atu ke ke iloʼi ia koe totonu pea ke ke liliu ko he tahi ʼe lelei age

• ke ina fakaha atu pe ʼe feafeaʼi hau maʼu ia te maʼuli ʼae ʼe lelei tokotahi

Talu mai te temi ʼae neʼe tou kamata palalau ai, ʼe lahi te ʼu fehuʼi ʼe tou fai.

• He koʼe ʼe lanu ʼuʼui te lagi?

• He koʼe ʼe gigila te ʼu fetuʼu?

Ki muli age ʼe tou kamata fai he ʼu fehuʼi ʼo ʼuhiga mo te malama ʼae ʼe tou maʼuʼuli ai.

• He koʼe ʼe hoko ia he ʼu aluʼaga fakatupu mamahi?

• He koʼe ʼe tou mamate?

ʼE feafeaʼi mo ka na pau la neʼe maʼu tuʼumaʼu pe ʼi te Tohi-Tapu ia te ʼu tali ʼo te ʼu fehuʼi ʼaia?

Tokolahi ʼe natou ui ko te Tohi-Tapu ʼe ko he tohi fagana, ʼe ko he tohi ʼe mole kei ʼi ai hona ʼaoga peʼe faigataʼa fau hatatou mahino ki ai. Kaʼe ʼe moʼoni koa ia te ʼu manatu ʼaia, peʼe faihala te hahaʼi ki te Tohi-Tapu?

Ohage la maʼa te tokolahi, ʼe ko te ʼAtua ʼae ʼe ina puleʼi te malamanei. Kaʼe ʼe moʼoni koa te faʼahi ʼaia? Kua hoko te ʼu maveuveu ʼi te malamanei. Kua lahi te lotomamahi, mo te mahaki pea mo te mate, mo te masiva pea mo te ʼu tuʼutamaki fakanatula. ʼE feala koa ki he ʼAtua ʼofa ke ina fakatupu te ʼu aluʼaga ʼaia?

ʼE ke fia iloʼi koa ia tona tali? ʼE lagi ke punamaʼuli anai ʼi tau iloʼi ia te manatu ʼa te Tohi-Tapu.

Lagi neʼe ke fakatokagaʼi ko te ʼu tokoni ʼae ʼe maʼu ʼi te kaupepa ʼaeni ʼe fakatafito ki te Tohi-Tapu. Pea ʼe tui papau ia te kau Fakamoʼoni ʼa Sehova ko te Tohi-Tapu ʼe ko he takitaki ʼe tuha mo te falala. Koteʼuhi “e hau te Tohi tapu katoa mai te tuku manava a te Atua, pea e aoga ia ki te fakaako o te mooni, mo te tekei o te kaka, mo te fakatonutonu o te hala.” (2 Timoteo 3:16, 17) ʼE tonu ke ke vakavakaʼi te tohi ʼaia logo la kua ʼafeā, kaʼe ʼe kei ʼaoga pe ʼi totatou temi.