Taʼaga Lea 12:1-28
12 Ko ia ʼae ʼe manako ki te fakatonutonu ʼe toe manako ia ki te ʼatamai malama,+Kae ko ia ʼae ʼe fehiʼa ki te fakatonutonu ʼe mole ʼatamai ia.+
2 ʼE fiafia ia Sehova ʼi te tagata agalelei,Kae ʼe ina fakatuʼā te tagata ʼae ʼe ina fai ni fakatuʼutuʼu kovi.+
3 ʼE mole feala ke maʼuli fimalie he tahi ʼi tana agakovi,+Kae ʼe mole taʼaki anai te tagata faitotonu ʼi he temi.
4 ʼE ko he kolona te fafine faʼafai ki tona ʼohoana,+Kae ʼe hage te fafine aga fakaufiufi ko he mahaki ʼe ina kaina te ʼu hui.+
5 ʼE totonu te ʼu manatu ʼa te kau faitotonu,Kae ʼe kaka te ʼu tokoni ʼa te kau agakovi.
6 ʼE fakatupu mate te ʼu palalau ʼa te kau agakovi,+Kae ʼe maʼu te haofaki ʼi te ʼu palalau ʼa te hahaʼi ʼae ʼe totonu.+
7 ʼE pupuli anai te kau agakovi moka holoʼi natou,Kae ʼe tuʼu pe anai te ʼapi ʼo te kau faitotonu.+
8 ʼE palalauʼi lelei he tagata ʼuhi ko ʼana palalau fakapotopoto mo fakaʼeteʼete,+Kae ʼe meʼa noaʼi anai ia ia ʼae ʼe kaka tona loto.+
9 ʼE lelei age te maʼuli malalo kae ʼe maʼu he kaugana,ʼI te fiameʼameʼa kae mole maʼu he meʼa kai.+
10 ʼE tokaga te tagata faitotonu ki ʼana manu lalata,+Kae ʼe lotofefeka te tagata agakovi logo la tana ui ʼae ʼe manavaʼofa.
11 ʼE makona anai te tagata ʼae ʼe ina gaueʼi tona kele,+Kae ʼe mole aga fakapotopoto ia ia ʼae ʼe ina tuli te ʼu meʼa vaʼiganoa.
12 ʼE manumanū te tagata agakovi ki te ʼu meʼa ʼae neʼe faʼao e ʼihi kau agakovi,Kae ʼe maʼuli lelei te aka ʼo te kau faitotonu.
13 ʼE to ki he hele te tagata agakovi ʼuhi ko ʼana palalau kaka,+Kae ʼe hao mai te mamahi te tagata faitotonu.
14 ʼE fimalie te tagata ʼi te meʼa ʼae ʼe lelei ʼuhi ko ʼana palalau,+Pea ʼe fua lelei anai te gaue ʼo ʼona nima.
15 ʼE matatonu ki te tagata vale tana aga,+Kae ʼe fakalogo te tagata poto ia ki te ʼu tokoni.+
16 ʼE iloga vave te sosaʼa ʼa te tagata vale,+Kae ʼe mole tokagaʼi ia e te tagata poto te laukovi.
17 ʼE fakaha e he fakamoʼoni agatonu te moʼoni,Kae ʼe fai e he fakamoʼoni loi ni palalau kaka.
18 ʼE hage ko he heleta te ʼu palalau ʼae ʼe mole fakakaukauʼi,Kae ʼe fakamalolo te ʼu palalau ʼa te kau popoto.+
19 ʼE tologa te ʼu palalau ʼae ʼe moʼoni ʼo talu ai,+Kae ʼe fakatemi pe te ʼu palalau loi.+
20 ʼE kaka te loto ʼo natou ʼae ʼe natou fai ni fakatuʼutuʼu kovi,Kae ʼe fiafia ia natou ʼae ʼe natou kumi te tokalelei.+
21 ʼE mole hoko anai he kovi ki te tagata faitotonu,+Kae ʼe maʼuli mamahi pe te tagata agakovi.+
22 ʼE fakalialia ia Sehova ki te kau gutuloi,+Kae ʼe fiafia ia ia natou ʼae ʼe agatonu.
23 ʼE mole fakaha e te tagata poto te meʼa ʼae ʼe ina iloʼi,Kae ʼe hoko palalau te kau agavale.+
24 ʼE pule anai ia natou ʼae ʼe gaue kinakina,+Kae ʼe fakakauganaʼi anai ia natou ʼae ʼe pipikoʼelo.+
25 ʼE lotovaivai te tagata ʼuhi ko tana tuʼania,+Kae ʼe fiafia ia ʼi he palalau lelei.+
26 ʼE alu te tagata faitotonu ʼo vakavakaʼi ʼona koga meʼa lunaʼia,Kae ʼe hehe te kau agakovi ia ʼuhi ko ʼanatou aga.
27 ʼE mole tuli e te tagata pikoʼelo te manu ke ina kai,+Kae ʼe maʼuhiga te faʼafai ki te tagata.
28 ʼE taki te ala ʼo te faitotonu ki te maʼuli,+ʼE mole maʼu te mate ʼi te ala ʼaia.
