Taʼaga Lea 31:1-31
31 Koʼeni te ʼu palalau ʼa te Hau ko Lemuele, ʼe ko te ʼu palalau maʼuhiga ʼa tana faʼe moʼona akoʼi:+
2 Siʼaku tama, kotea ka au ui atu?ʼEi, siʼi koe ʼae neʼe au fuafatuʼi, kotea ka au ui atu?Kotea he palalau ka au foaki atu, tama ʼo ʼaku fakaʼamu?+
3 ʼAua naʼa ke fakaʼaogaʼi tou malohi ki te hahaʼi fafine,+Mo ke fai he aga ʼe tuʼutamaki ai ni hau.+
4 Lemuele, ʼe mole ʼa te ʼu hau,ʼEi, ʼe mole ʼa te ʼu hau te inu ʼo te vinoPea ke ui e te ʼu pule: “Foaki mai he meʼa ke matou iinu,”+
5 Naʼa natou iinu mo galoʼi te laoPea mo kakaʼi natou ʼae ʼe liliki.
6 Kotou foaki he kava kia natou ʼae ka mamate+Pea mo he vino kia natou ʼae ʼe lotomamahi.+
7 Ke natou iinu mo galoʼi ai tonatou masivaPea ke mole natou manatuʼi ai tonatou malaʼia.
8 Palalau maʼa ia ʼae ʼe ʼalelo mateMo haofaki natou fuli ʼae ka mamate.+
9 Palalau mo fakamau ʼi te faitotonuMo haofaki ia natou ʼae ʼe liliki mo masisiva.+
א [Alefa]
10 Ko ai ʼae ʼe feala ke ina maʼu hona ʼohoana fafine faʼafai?*+
ʼE maʼuhiga age ia ʼi te ʼu feo.*
ב [Peta]
11 ʼE falala katoa tona ʼohoana kia ia,ʼO mole masiva ia ʼi he meʼa.
ג [Kimela]
12 ʼE fai e te fafine ki tona ʼohoana te meʼa ʼae ʼe lelei, kae mole ko te meʼa ʼae ʼe kovi,ʼI te ʼaho fuli ʼo tona maʼuli.
ד [Taleta]
13 ʼE ina maʼu te fuluʼi ovi mo te lino.Ko he fafine faʼa gaue ia.+
ה [He]
14 ʼE hage ko ni vaka ʼo he tagata faikoloa,+ʼE ina kumi mai mamaʼo tana meʼa kai.
ו [Vave]
15 Pea tahi ʼae, ʼe tuʼu ake ia kae kei poʼuli.ʼE ina foaki te meʼa kai ki tona famili,Pea ki ʼana fafine kaugana tonatou vahe.+
ז [Saini]
16 ʼE ina fakatotonu ke ina maʼu he gaueʼaga pea ʼe ina totogi.ʼAki te fua ʼo tana gaue kinakina,* neʼe ina to he gaueʼaga vite.
ח [Heti]
17 ʼE ina teuteuʼi he gaue kinakina+Pea ʼe ina fakamalohiʼi ʼona nima.
ט [Teta]
18 ʼE sio ʼe haʼele lelei tana faikoloa.ʼE mole mate tona malama ʼi te poʼuli.
י [Iota]
19 ʼE puke e ʼona nima te meʼa gaue ʼae ʼe ʼai ki ai te fuluʼi oviPea mo puke te meʼa takai filo.+
כ [Kafa]
20 ʼE tokoni kia ia ʼae ʼe veliveli,Pea ʼe lotofoaki kia ia ʼae ʼe masiva.+
ל [Lameta]
21 ʼE mole tuʼania ia ʼo ʼuhiga mo tona famili ʼi te temi niveHe ʼe natou kofu mafana fuli.
מ [Mema]
22 ʼE ina fai tonu ʼana kie kafu.
Pea ʼe ina fai ʼaki te lino mo te fuluʼi ovi huʼa lotuma fakapoʼuli ʼona mutuʼi meʼa.
נ [Nuna]
23 ʼE iloa tona ʼohoana ʼi te ʼu matapa ʼo te kolo,+Pea ʼe heka fakatahi mo te kau takitaki ʼo te fenua.
ס [Sameke]
24 ʼE ina fai mo fakatau ni mutuʼi meʼa lino,Pea mo toe fakatau ni kiliʼi pipi ki te ʼu tagata faikoloa.
ע [Aini]
25 ʼE ina maʼu te malohi mo te taulekaleka,ʼE sio mo lotofalala ki te ka haʼu.
פ [Pe]
26 ʼE palalau fakapotopoto,+ʼE mulimuli ʼana palalau ki te lao ʼo te manavaʼofa.*
צ [Sati]
27 ʼE tokaga ki te ʼu gaue ʼo tona loto fale,Pea mole ina kai te pane ʼo te pikoʼelo.+
ק [Kofi]
28 ʼE tutuʼu ake ʼana fanau ʼo fakavikiviki kia ia,Pea toe tuʼu ake tona ʼohoana ʼo vikiʼi ia ia.
ר [Lesa]
29 ʼE lahi ni fafine faʼafai*Kae ʼe ke laka age koe ia natou fuli.
ש [Sini]
30 ʼE feala ke kaka te matalelei mo fakatemi* te taulekaleka,+Kae ʼe palalau leleiʼi te fafine ʼae ʼe manavasiʼi kia Sehova.+
ת [Tau]
31 Kotou fakapale ia ia ki te ʼu gaue ʼae neʼe ina fai,+ʼEi, ke vikiʼi ia ia ʼi te ʼu matapa ʼo te kolo.+
Nota
^ Peʼe “ ʼe lelei ʼaupito.”
^ Vakaʼi Te ʼu Kupu.
^ Peʼe “ ʼAki te paʼaga ʼae neʼe ina maʼu.”
^ Peʼe “ ʼofa agatonu.”
^ Peʼe “ ʼe lelei ʼaupito.”
^ Peʼe “vaʼiganoa.”
