Pesalemo 92:1-15
Pesalemo. Ko he hiva ki te ʼaho ʼo te Sapato.
92 ʼE ko he meʼa lelei te fakafetaʼi kia Sehova,+ʼAtua Maʼoluga, mo te vikiʼi ʼo tou huafa ʼaki ni hiva,*
2 Mo te kalagaʼi ʼo tou ʼofa agatonu+ ʼi te uhu,Mo tau agatonu ʼi te poʼuli,
3 ʼO fai ʼaki he meʼa faimaholo ʼe kauʼi uka hogofulu mo he lute,*Mo he alepa ʼe logo mālie.+
4 Sehova e, neʼe ke fakafiafiaʼi au ʼaki ʼau gaue.ʼE au kalaga fakafiafia ʼi taku sio ki te ʼu gaue ʼo ʼou nima.
5 Sehova e, ʼi fakaofoofo leva ʼo ʼau gaue!+
ʼI lahi leva ʼo tou poto!+
6 ʼE mole feala ia ke iloʼi e te tagata hala mo ʼatamai,Pea ʼe mole feala ia ke mahino te tagata vale ki te manatu ʼaeni:+
7 Logo la te tuputupu ʼa te kau agakovi ohage ko te homo ʼa te vao kovi,Pea mo te mafola ʼo te kau agamalohi,Kae ʼe pulihi anai ia natou ʼo talu ai.+
8 Pea ko koe Sehova, ʼe ke maʼoluga ʼo talu ai.
9 Sehova e, sio ki te to ʼo ʼou fili,Sio ki te mamate ʼo ʼou fili.ʼE mavetevete fuli anai te kau agakovi.+
10 Kae ʼe ke fakamalohiʼi anai au* ohage ko te malohi ʼo he vitulo vao.ʼE au vali anai ki toku kili he lolo ke au fimalie ai.+
11 ʼE au fiafia anai ʼi te sio ki te to ʼo ʼoku fili.+ʼE au logo anai ki te fakamatala ʼo te to ʼo te kau agakovi ʼae ʼe natou tauʼi au.
12 Kae ʼe hage anai te kau faitotonu ko he ʼu fuʼu palema ʼe lahi ʼonatou fua,Pea ʼe natou malolohi anai ohage ko he ʼu fuʼu sete ʼo Lipane.+
13 ʼE to ia natou ʼi te fale ʼo Sehova,Pea ʼe natou mātala ʼi te ʼu malaʼe ʼo totatou ʼAtua.+
14 Maʼia mo te temi matuʼa, ʼe natou malolohi,+ʼE kei natou malolohi pe mo maʼuli malolo lelei,+
15 Pea ʼe natou kalagaʼi anai ʼe faitotonu ia Sehova.
Ko toku ʼUtu,+ ʼe mole ina fai he meʼa ʼe kovi ʼi he temi.
Nota
^ Peʼe “te faimaholo ki tou huafa.”
^ Ko he meʼa faimaholo.
^ Hep. “ ʼe ke hiki ake anai taku tala.”
