Senesi 11:1-32
11 Neʼe palalau te hahaʼi fuli ʼo te kele ʼi he lea pe ʼe tahi pea neʼe tatau te ʼu kupu ʼae neʼe natou fakaʼaogaʼi.
2 ʼI tanatou faifagona ki te potu esite, neʼe natou maʼu ai he potu fenua laulelei ʼi te fenua ʼo Sinea,+ pea neʼe natou nonofo ai.
3 Neʼe natou feuiʼaki leva: “Tou faʼu ni piliki pea mo taʼo ʼi te afi.” Koia neʼe mole natou fakaʼaogaʼi ai te maka kae ko te piliki, pea mo he meʼa ʼe huʼa ʼuli* ohage ko he sima.
4 Neʼe natou toe ui: “Tou laga he kolo maʼa tatou pea mo he tule ʼe aʼu tona tumutumu ki te lagi. Pea ʼe logologona anai totatou higoa, pea ʼe mole tou mavetevete anai ʼi te fuga kele katoa.”+
5 Pea neʼe hifo ifo ia Sehova ʼo sio ki te kolo pea mo te tule ʼae neʼe laga e te ʼu foha ʼo te tagata.
6 Pea neʼe ui leva e Sehova: “Kua natou liliu ko he hahaʼi ʼe tahi mo palalau ʼi he lea ʼe tahi,+ pea koʼeni te meʼa ʼae kua natou kamata fai. ʼI te temi nei, ʼe feala anai hanatou fakahoko te ʼu meʼa fuli pe ʼae ʼe natou manatu anai ki ai.
7 Ke ta*+ hifo pea ke ta fai he meʼa ke mole natou toe palalau ai ki he lea ʼe tahi, pea ke mole natou toe femahinoʼaki ai.”
8 Koia neʼe fakamavetevete ai natou e Sehova ʼi te fuga kele katoa,+ pea neʼe mole kei hoko atu leva te laga ʼo te kolo.
9 Ko te tupuʼaga la ʼaia ʼo te fakahigoaʼi ʼo te kolo ko Papele,*+ koteʼuhi neʼe ko te koga meʼa ʼaia ʼae neʼe fai ai e Sehova he meʼa ke mole natou toe palalau ai ki he lea ʼe tahi ʼi te kele katoa, pea neʼe fakamavetevete ai natou e Sehova ʼi te fuga kele katoa.
10 Ko te hisitolia ʼaeni ʼo Semi.+
Neʼe taʼu 100 ia Semi ʼi te temi ʼae neʼe tupu ai tona foha ko Alapasate+ hili taʼu ʼe lua ʼi te ʼosi ʼo te Tulivio.
11 Neʼe maʼuli ia Semi lolotoga taʼu ʼe 500 ʼi te ʼosi tupu ʼo tona foha ko Alapasate. Neʼe ina toe maʼu foki hona ʼu foha pea mo hona ʼu ʼofafine.+
12 Neʼe maʼuli ia Alapasate lolotoga taʼu ʼe 35 pea neʼe tupu leva tona foha ko Sila.+
13 ʼI te ʼosi tupu ʼa Sila, neʼe maʼuli ia Alapasate lolotoga taʼu ʼe 403. Neʼe ina toe maʼu foki hona ʼu foha pea mo hona ʼu ʼofafine.
14 Neʼe maʼuli ia Sila lolotoga taʼu ʼe 30 pea neʼe tupu leva tona foha ko Epele.+
15 ʼI te ʼosi tupu ʼa Epele, neʼe maʼuli ia Sila lolotoga taʼu ʼe 403. Neʼe ina toe maʼu foki hona ʼu foha pea mo hona ʼu ʼofafine.
16 Neʼe maʼuli ia Epele lolotoga taʼu ʼe 34 pea neʼe tupu leva tona foha ko Peleki.+
17 ʼI te ʼosi tupu ʼa Peleki, neʼe maʼuli ia Epele lolotoga taʼu ʼe 430. Neʼe ina toe maʼu foki hona ʼu foha pea mo hona ʼu ʼofafine.
18 Neʼe maʼuli ia Peleki lolotoga taʼu ʼe 30 pea neʼe tupu leva tona foha ko Leu.+
19 ʼI te ʼosi tupu ʼa Leu, neʼe maʼuli ia Peleki lolotoga taʼu ʼe 209. Neʼe ina toe maʼu foki hona ʼu foha pea mo hona ʼu ʼofafine.
20 Neʼe maʼuli ia Leu lolotoga taʼu ʼe 32 pea neʼe tupu leva tona foha ko Seluke.
21 ʼI te ʼosi tupu ʼa Seluke, neʼe maʼuli ia Leu lolotoga taʼu ʼe 207. Neʼe ina toe maʼu foki hona ʼu foha pea mo hona ʼu ʼofafine.
22 Neʼe maʼuli ia Seluke lolotoga taʼu ʼe 30 pea neʼe tupu leva tona foha ko Naole.
23 ʼI te ʼosi tupu ʼa Naole, neʼe maʼuli ia Seluke lolotoga taʼu ʼe 200. Neʼe ina toe maʼu foki hona ʼu foha pea mo hona ʼu ʼofafine.
24 Neʼe maʼuli ia Naole lolotoga taʼu ʼe 29 pea neʼe tupu leva tona foha ko Tela.+
25 ʼI te ʼosi tupu ʼa Tela, neʼe maʼuli ia Naole lolotoga taʼu ʼe 119. Neʼe ina toe maʼu foki hona ʼu foha pea mo hona ʼu ʼofafine.
26 Neʼe maʼuli ia Tela lolotoga taʼu ʼe 70 pea neʼe tupu leva ʼona foha ko Apalamo,+ mo Naole+ pea mo Halani.
27 Ko te hisitolia ʼaeni ʼo Tela.
Ko Tela ko te tamai ʼa Apalamo, mo Naole, pea mo Halani. Pea ko Halani ko te tamai ʼa Lote.+
28 ʼI te kei maʼuli ʼo tana tamai ko Tela, neʼe mate leva ia Halani ʼi te fenua ʼae neʼe tupu ai, ʼi Ule,+ te kolo ʼo te kau Kaletea.+
29 Neʼe ʼi ai leva te ʼu ʼohoana ʼo Apalamo mo Naole. Ko te higoa ʼo te ʼohoana ʼo Apalamo ko Salai,+ pea ko te higoa ʼo te ʼohoana ʼo Naole ko Milika.+ Ko Halani ko te tamai ʼa Milika pea mo Siseka.
30 Neʼe paʼa ia Salai,+ pea neʼe mole maʼu hana fanau.
31 Neʼe toʼo leva e Tela tona foha ko Apalamo pea mo Lote tona mokopuna,+ te foha ʼo Halani, pea mo Salai, te ʼohoana ʼo Apalamo tona foha. Neʼe natou mavae mo ia mai Ule, te kolo ʼo te kau Kaletea ʼo olo ki te fenua ʼo Kanaane.+ Ki muli age, neʼe natou tau leva ki Halani+ ʼo nonofo ai.
32 Koia neʼe maʼuli ia Tela ia taʼu ʼe 205, pea neʼe mate leva ʼi Halani.
Nota
^ Neʼe hage ko te kolota.
^ ʼI te Fakahepeleo, ʼe feala ke fakaʼuhiga ki he foʼi toko lua peʼe laka atu.
^ Ko tona fakaʼuhiga “Maveuveu.”
