Senesi 2:1-25
2 Neʼe ʼosi ai leva te fakatupu ʼo te lagi, mo te kele pea mo te ʼu meʼa fuli ʼae ʼi ai.*+
2 Pea ʼi te fitu ʼaho, neʼe kua fakaʼosi e te ʼAtua tana gaue, pea neʼe kamata malolo ʼi te fitu ʼaho mai ʼana gaue fuli.+
3 Pea neʼe tapuakiʼi e te ʼAtua te fitu ʼaho pea neʼe ina fakaliliu ko he ʼaho taputapu, koteʼuhi ʼi te ʼaho ʼaia ʼe malolo te ʼAtua mai te ʼu meʼa fuli ʼae neʼe ina fakatupu, ʼei, te ʼu meʼa fuli ʼae neʼe ina fakatuʼutuʼu ke ina fai.
4 ʼE ko te hisitolia ʼaeni ʼo te lagi pea mo te kele ʼi te temi ʼae neʼe fakatupu ai, ʼi te ʼaho ʼae neʼe faʼu ai e Sehova* ʼAtua te kele pea mo te lagi.+
5 Neʼe heʼeki ʼi ai he ʼu kiʼi fuʼu ʼakau ʼi te kele pea neʼe heʼeki homo he ʼu vao ʼakau, he neʼe heʼeki fakato e Sehova ʼAtua he ʼua ki te kele pea neʼe mole ʼi ai he tagata ke ina gaueʼi te kele.
6 Kae neʼe alu ake he kakapu mai te kele, pea neʼe ina palapalaʼi ai te fuga kele katoa.
7 Neʼe faʼu leva e Sehova ʼAtua te tagata ʼaki te efu+ ʼo te kele pea neʼe ina pupuhi ki ʼona poga ihu te manava ʼo te maʼuli,+ pea neʼe liliu ai te tagata ko he tahi* ʼe maʼuli.+
8 Pea tahi ʼae meʼa, neʼe fakatuʼu e Sehova ʼAtua he ʼoloto ʼi Eteni,+ ʼi te potu esite. Pea neʼe ina tuku ki ai te tagata ʼae neʼe ina faʼu.+
9 Neʼe fakahomo leva e Sehova ʼAtua ʼi te kele te ʼu fuʼu ʼakau matalelei fuli pea mo lelei ki te kai, ʼo feia mo te fuʼu ʼakau ʼo te maʼuli+ ʼae ʼi te lotomalie ʼo te ʼoloto, pea mo te fuʼu ʼakau ʼo te iloʼi ʼo te meʼa ʼae ʼe lelei pea mo te meʼa ʼae ʼe kovi.+
10 Neʼe ʼi ai he vai tafe neʼe tafe mai Eteni ʼo fakavai te ʼoloto, pea neʼe mavaevae leva ʼo liliu ai ko vai tafe ʼe fa.
11 Ko te higoa ʼo te ʼuluaki vai tafe ʼe ko Pisoni. ʼE ko te vai tafe ʼae ʼe ina ʼa takai te fenua katoa ʼo Avila, ʼae ʼe maʼu ai te aulo.
12 ʼE lelei te aulo ʼo te fenua ʼaia. ʼE toe maʼu ai foki mo te puluʼi ʼakau magoni ʼae ko te piteliomi pea mo te maka maʼuhiga ʼae ko te onise.
13 Ko te higoa ʼo te lua vai tafe ʼe ko Kioni. ʼE ko te vai tafe ʼae ʼe ina ʼa takai te fenua katoa ʼo Kusi.
14 Ko te higoa ʼo te tolu vai tafe ʼe ko Itekele.*+ ʼE ko te vai tafe ʼae ʼe alu ki te potu esite ʼo Asilia.+ Pea ko te fa vai tafe ʼe ko Efalate.+
15 Neʼe toʼo e Sehova ʼAtua te tagata ʼo ina tuku ki te ʼoloto ʼo Eteni ke ina gaueʼi pea mo tokaga ki ai.+
16 Neʼe toe fai foki e Sehova ʼAtua te fakatotonu ʼaeni ki te tagata: “ ʼE feala ke ke kai ki te ʼu fuʼu ʼakau fuli ʼo te ʼoloto ʼo aʼu ki tau makona.+
17 Kae ʼe mole tonu ke ke kai ki te fuʼu ʼakau ʼo te iloʼi ʼo te meʼa ʼae ʼe lelei pea mo te meʼa ʼae ʼe kovi, koteʼuhi, ko te ʼaho pe ʼae ka ke kai anai ki ai ʼe ke mate moʼoni anai.”+
18 Neʼe ui leva e Sehova ʼAtua: “ ʼE mole lelei ke nofo tokotahi te tagata. ʼE au foaki anai ki ai hona tokoni, ke liliu ko hona hoa.”+
19 Pea neʼe faʼu e Sehova ʼAtua ʼaki te efu te ʼu manu fuli ʼo te vao mo te ʼu manulele fuli, pea neʼe ina ʼaumai ki te tagata ke ina iloʼi pe ʼe fakahigoaʼi feafeaʼi anai e te tagata ia natou takitahi. Pea neʼe foaki e te tagata he higoa ki te ʼu manu* takitahi ʼaia.+
20 Neʼe foaki ai e te tagata he ʼu higoa ki te ʼu manu lalata fuli, mo te ʼu manulele fuli pea mo te ʼu manu fuli ʼo te vao, kae neʼe mole he tahi moʼo tokoni ki te tagata, ke liliu ko hona hoa.
21 Koia, neʼe fakamoe mate e Sehova ʼAtua ia te tagata, pea lolotoga tana moe ʼaia, neʼe ina toʼo hona hui vakavaka pea neʼe ina pupunu leva te kakano.
22 Pea neʼe fakatupu* e Sehova ʼAtua ʼaki te hui vakavaka ʼae neʼe ina toʼo mai te tagata ia he fafine, pea neʼe ina ʼaumai leva ki te tagata.+
23 Pea neʼe ui leva e te tagata:
“Koʼeni la te hui ʼo ʼoku huiPea mo te kakano ʼo toku kakano.
ʼE fakahigoa anai ia ia ʼaeni ko te Fafine,He neʼe toʼo ia mai te tagata.”+
24 Koia, ʼe mavae anai te tagata mai tana tamai mo tana faʼe pea ʼe pipiki anai ki* tona ʼohoana, ʼo nā liliu ai ko he kakano ʼe tahi.+
25 Pea neʼe nā telefua,+ ia te tagata mo tona ʼohoana, kae neʼe mole nā ufiufi.
Nota
^ Hep. “pea mo tanā kautau fuli.”
^ ʼE ko te ʼuluaki ha ʼaeni ʼo te huafa totonu ʼo te ʼAtua, ʼae neʼe tohi ʼaki te ʼu mataʼi tohi Fakahepeleo ʼaeni: יהוה (JHVH). Vakaʼi Te ʼu Fakamahino 1.4.
^ Hep. nèphèsh. Vakaʼi Te ʼu Kupu.
^ Peʼe “Tikeli.”
^ Hep. nèphèsh. Vakaʼi Te ʼu Kupu.
^ Hep. “faʼu.”
^ Peʼe “nofo anai mo.”
