Zuã 15:1-27
15 Tawamhã Zezusi hã te duré siwasuꞌu, ãne:
— Wa hã uvaꞌru uptabi. Duré Ĩmama hã uvaꞌru ꞌmadâꞌâꞌwa.
2 Ipanhipti norĩ, ĩꞌãma ꞌre hâimana zaꞌra mono nherẽ, ꞌre iꞌrã zaꞌra mono õ hã, ta hã te te ꞌre anhihâri. Tanei õ di, ipanhipti ꞌre iꞌrã zaꞌra mono ma hã. Ta norĩ ma, te za iꞌru nhipti si te te ꞌre anhihâri, te te tãma ꞌre aropese mono da, apâ duré ꞌre ꞌrãi uꞌâsi zaꞌra mono da.
3 A norĩ waꞌwa hã, airã na te oto ꞌre anomro aba mo, te aima ꞌre iroti zaꞌra waꞌaba mono zéb uꞌâbâ hã.
4 Maꞌãpé ĩꞌãma ꞌre aihâimana uꞌâsi zaꞌra waꞌaba mono. Tawamhã wa za asiré ꞌre ĩhâimana uꞌâsi zaꞌra waꞌwa. Uvaꞌru panhipti hã, tiwede na ꞌre sab uꞌâsi mono õ nherẽ, sihawimhã ꞌrãi waihuꞌu õ di. Tane ꞌre aiꞌrãi waihuꞌu zaꞌra waꞌaba mono õ di za, ĩꞌãma ꞌre aihâimana uꞌâsi zaꞌra waꞌaba mono õ wamhã.
5 — Wa hã uvaꞌru uptabi. Tawamhã a norĩ waꞌwa hã ĩpanhipti na te ꞌre aihâimana zaꞌra waꞌaba mo. Niꞌwa hã ĩꞌãma ꞌre hâimana uꞌâsi mono wamhã, duré wa hã isiré ꞌre ĩhâimana uꞌâsi mono wamhã, ta hã ꞌrãi pese di za. E marĩ wa. Ĩꞌãma aihâimana aba õ wamhã, marĩ hã ꞌmanharĩ waihuꞌu aba õ di.
6 Niꞌwa hã ĩꞌãma hâimana uꞌâsi õ wamhã, Ĩmama hã te za time ĩnhiti, ꞌré da, uvaꞌru hã ꞌre ꞌré zaꞌra mono wa, da te ãma ꞌre roꞌo zaꞌra mono da, da te ꞌre iꞌubumroi pese zaꞌra mono ne.
7 Ĩꞌãma ꞌre aihâimana uꞌâsi zaꞌra waꞌaba mono wamhã, duré ĩnhimiroti na ꞌre aihâimana uꞌâsi zaꞌra waꞌaba mono wamhã, uburé marĩ Ĩmama wi ꞌre iwaptẽrẽ zaꞌra waꞌaba mono hã te za te te aima ꞌre anhomri ꞌwa.
8 Taha na te za Ĩmama wẽ uptabi na ꞌre ihâimana mono zé hã dama hâiꞌré, ꞌre iꞌaiꞌrãi pese zaꞌra waꞌaba mono zém na. Taha zarina te za ĩzazeiꞌwa na ꞌre anomro aba mo.
9 Ĩmama hã te te ꞌre ĩzawi pese mono ne, wa duré te ꞌre aiꞌazawi pese ꞌwa. Tahawa, maꞌãpé ĩꞌãma ꞌre aihâimana uꞌâsi zaꞌra waꞌaba mono, te ꞌre iꞌaiꞌazawi pese aba mono zém na.
10 Ĩnhimiroti hã ꞌre ꞌmadâꞌâ pese zaꞌra waꞌaba mono wamhã, wa za te ꞌre aiꞌazawi pese uꞌâsi ꞌwa, Ĩmama nhimiroti te ꞌre iꞌabꞌmadâꞌâ pese mono ne, duré tahawa te te ꞌre ĩzawi pese uꞌâsi mono ne.
11 — Ãne hã wa aima rowasuꞌu zaꞌra waꞌwa, ĩte rowẽ na ꞌre aihâimana zaꞌra waꞌaba mono da, tawamhã duré rowẽ hã, wahuré aima ꞌre hâimana zaꞌra waꞌaba mono da.
12 Aima ĩnhimiroti zaꞌra waꞌwa hã, ã hã: Maꞌãpé, ꞌre asisawi pese zaꞌra waꞌaba mono, te ꞌre iꞌaiꞌazawi pese aba mono ne.
13 Niꞌwa hã simizawi pese wa, tisiwaihuꞌu norĩ nhibrobꞌre sihâiba nhomri wamhã, ta hã danhipai u danhimizawi pese zé, te wasuꞌu.
14 Ĩnhimiroti te aima iꞌru zaꞌra waꞌaba zéb zarina, ꞌre ꞌmanharĩ zaꞌra waꞌaba mono wamhã, ĩsiwaihu te za ꞌre anomro aba mo.
15 Ĩma romhuriꞌwa na te oto ꞌre asisi zaꞌra waꞌaba mono õ di. E marĩ wa. Romhuriꞌwa hã te te waihuꞌu õ di, isibꞌihâꞌa, marĩ te te ꞌre iꞌabꞌmanharĩ mono zé hã. Tahawa, ĩsiwaihuꞌu na, wa oto te ꞌre asisi zaꞌra waꞌwa, Ĩmama mreme uburé te ꞌre iwapari mono zéb zarina, te aima ꞌre rowasuꞌu pese zaꞌra waꞌaba mono wa.
16 A norĩ waꞌwa asima ĩpisutu zaꞌra waꞌaba õ di. Tazahã, wa hã wa tô ĩsima aipisutu zaꞌra waꞌwa, te asatõrĩ zaꞌra waꞌaba da, aiꞌrã zaꞌra waꞌaba da zama, aiꞌrã zaꞌra waꞌwa hã ꞌre hâimana uꞌâsi zaꞌra mono da, sisimini zaꞌra ãna, ãne zarina, Ĩmama hã ĩnhisi na uburé marĩ tiwi ꞌre iwaptẽrẽ zaꞌra waꞌaba mono hã te te aima ꞌre anhomri aba mono da.
17 Ã hã ĩnhimiroti aima zaꞌra waꞌaba hã: Maꞌãpé, ꞌre asisawi pese zaꞌra waꞌaba mono.
Zezusihi siré ꞌre inomro mono norĩ, za da te ꞌre iꞌruiwapari zaꞌra mono zé
18 — Tiꞌai ãma ꞌre idahâimana zaꞌra mono ĩzazeiꞌõꞌwa norĩ hã te te ꞌre aiꞌruiwapari zaꞌra waꞌaba mono wamhã, ãma ꞌre aipoꞌre puꞌu zaꞌra waꞌaba mono, ta norĩ hã asõwa waꞌaba te te siwi ꞌre ĩꞌruiwapari mono na hã.
19 A norĩ waꞌwa hã tiꞌai ãma ꞌre idahâimana zaꞌra mono ĩzazeiꞌõꞌwa norĩ siré ꞌre aihâimana zaꞌra waꞌaba mono ꞌwaꞌâhã, te aré te te ꞌre asawi zaꞌra waꞌwa, isiré ꞌre anomro aba mono wa. Tazahã, wa tô ĩsima aipisutu zaꞌra waꞌwa. Tiꞌai ãma ꞌre idahâimana zaꞌra mono ĩzazeiꞌõꞌwa norĩ ꞌre ihâimana zaꞌra mono hawi, wa tô duré asani zaꞌra waꞌwa. Tahawa, oto a norĩ waꞌwa hã tiꞌai ãma dasiré õ di. Tahawa te ta norĩ hã te te ꞌre aiꞌruiwapari zaꞌra waꞌwa.
20 Maꞌãpé ãma ꞌre aipoꞌre puꞌu zaꞌra waꞌaba mono, ã hã ĩnhimiroti na hã: “Wadaꞌuri zarina titedeꞌwai ma romhuriꞌwa hã pire na hâimana waihuꞌu õ di, tinhibꞌihâꞌa nhipai u hã.” Tiꞌai ãma ꞌre idahâimana zaꞌra mono ĩzazeiꞌõꞌwa norĩ hã ma tô te te ĩma ꞌre robꞌmanharĩ wasété zaꞌra. Tane te za duré te te aima ꞌre robꞌmanharĩ wasété zaꞌra waꞌwa. Ĩnhimiroti te te ꞌre ꞌmadâꞌâ pese zaꞌra mono wamhã, tãma ꞌre irowahutu zaꞌra waꞌaba mono zé hã te za duré te te ꞌre ꞌmadâꞌâ pese zaꞌra.
21 Ĩꞌuꞌâbâ te za uburé ãne hã da te aima ꞌre robꞌmanharĩ wasété zaꞌra waꞌwa, we ĩzatõrĩꞌwa hã da te waihuꞌu zaꞌra õ wa.
22 We ĩmorĩ õ ꞌwaꞌâhã, duré te dama rowasuꞌu õ ꞌwaꞌâhã, dawasédé hã da te aré ꞌre ꞌmanharĩ zaꞌra mono nherẽ, da te ꞌre iꞌupa zaꞌra mono zé hã aré dama ꞌre hâimana zaꞌra mono õ di. Tane nherẽ, ãhã na hã dawasété ꞌmanharĩ na ꞌre idasiꞌudâ zaꞌra mono zé hã oto dama ꞌre hâimana waihuꞌu zaꞌra mono õ di.
23 Niꞌwa hã te te ĩꞌruiwapari wamhã, Ĩmama zama te ꞌruiwapa.
24 Danhoꞌa marĩ hã niwa niꞌwa te te iꞌmanharĩ õ hã te ꞌre abꞌmanharĩ mono õ ꞌwaꞌâhã, dawasédé hã da te aré ꞌre ꞌmanharĩ zaꞌra mono õ di. Tazahã, ãhã na hã ma tô ꞌmadâꞌâ zaꞌra ni, marĩ te ꞌre iꞌabꞌmanharĩ mono zé hã. Te duré da te dasiwi ꞌre ĩꞌruiwapari uꞌâsi, Ĩmama zama.
25 Tane nherẽ, ãne hã ma tô tiromhâiba, tãma roti zahi zaꞌra na robꞌuiꞌéré inomro hã te ĩsina uwaimrami da, ã hã: “Ma tô siwi ĩꞌruiwapari pese, marĩ te upai õ nherẽ.”
26 — Dapawaptoꞌwa Ĩmama Pẽꞌẽzani, tô sena Ĩmama hâimanazé te te dama ꞌre iꞌahâiꞌré mono hã, duré Ĩmama hawi za we te isatõrĩ hã wei morĩ wamhã, ta hã te za te te aima ꞌre ĩwaihuꞌu zaꞌra waꞌwa. Wa hã wa za tô we atẽme satõrĩ zaꞌra waꞌwa, Aipawapto aba ꞌwa da hã, Ĩmama hawi.
27 A norĩ waꞌaba zama te za dama ꞌre ĩwasuꞌu zaꞌra waꞌaba mo, romhuri na te isãnaꞌrata hawim haré, ĩsiré ꞌre aihâimana zaꞌra waꞌaba mono wa.
