Zuã 7:1-53
7 Ãne parimhã, Zezusi hã ma tô datẽme ꞌre mo, Galiléia na tiꞌa nhisi ꞌremhã. Te te sima wẽ õ di oto, Zudéa na tiꞌa nhisi ãma ꞌre imorĩ da hã, Zudeu norĩ ma rotiꞌwa norĩ hã te te siwi wĩrĩ da, sô rĩtĩ zaꞌra wa.
2 Tawamhã romhutu di oto, Zudeu norĩ te dato, da te dasima ꞌre iꞌri nhoré mono zém na iromhâimanazéb u hã.
3 Tahawa te Zezusihi ma ino norĩ hã nharĩ zaꞌra, ãne:
— Maꞌãpé aiwatobro ã hawi. Zudéa u aimorĩ, tame asazeiꞌwa norĩ hã asimiromhuri ꞌre iꞌabꞌmanharĩ mono zé hã te te ꞌmadâꞌâ zaꞌra da.
4 Niꞌwa hã dama saꞌrese zaꞌẽtẽ da wamhã, marĩ hã piꞌuriwi te te ꞌre abꞌmanharĩ mono õ di. Tahawa ã hã marĩ ꞌre iꞌabꞌmanharĩ mono zé hã, maꞌãpé uburé dama hâiꞌré na.
5 Tawamhã Zezusihi no norĩ zama te te siwi sazei õ di. Tahawa, ma tô ãne hã tãma nharĩ zaꞌra.
6 Tawamhã Zezusi hã te tãma nharĩ zaꞌra, ãne:
— Zahadu bâdâ ĩma hã iwa waptãꞌã õ di. Tazahã, aima zaꞌra waꞌaba hã siwaꞌru bâdâ hã iꞌuwaibaba.
7 A norĩ waꞌwa hã da te aiꞌruiwapari zaꞌra waꞌaba õ di. Tazahã, wa hã dama ĩwẽꞌõ uptabi di, tô sena te ꞌre daꞌawasuꞌu mono wa, marĩ, da te ꞌre iꞌmanharĩ zaꞌra mono hã, iwasété si wa.
8 Dato za ihâimana u aiꞌabaꞌréi waꞌaba. Wa hã ãma ĩmorĩ õ di za, zahadu bâdâ hã ĩma iwa waptãꞌã õ wa.
9 Tawamhã Zezusi hã ãne te te tãma nharĩ zaꞌra parimhã, ma tô aꞌâ nhamra, Galiléia ãma.
Zezusi hã, dato ihâimana u imorĩzé
10 Tawamhã ino norĩ hã dato ihâimana u siꞌabaꞌré zaꞌu, Zezusihi zama ma tô oto mo. Tane nherẽ, sõꞌawi morĩ õ di. Piꞌuriwi ma tô mo.
11 Dato ihâimana ãma, Zudeu norĩ hã ma tô Zezusihi zô tirĩtĩ zaꞌra. Ãne te nasi sô anharĩ zaꞌra:
— E mame te tihâiba, aibâ hã.
12 Tawamhã datoi ãma daꞌahâ uptabi na idahâimana zaꞌra ꞌremhã ma tô niꞌwam norĩ hã nasi ãne nharĩ zaꞌra:
— Ta hã aibâ, ꞌre imorĩ wẽ.
Duré niꞌwam norĩ hã ma tô nasi ãne nharĩ zaꞌra:
— Mare di. Sadawa nhipese na te te dama ꞌre arobꞌrãmi.
13 Tane nherẽ, sõꞌawi da te dasima ãma rowasuꞌu zaꞌra õ di, Zudeu norĩ ma rotiꞌwa norĩ ma, dapahi zaꞌra wa.
14 Tawamhã dato isaꞌẽne hã iwaꞌwa u oto ihâimanazéb u, Zezusi hã ma tô mo, ꞌRe ihâimana uꞌâsi mono nhorõwa ꞌri ꞌrãihâ u. Tame ma tô oto dama rowahutu.
15 Tawamhã Zudeu norĩ ma rotiꞌwa norĩ hã ma tô ãma titobꞌuzu zaꞌra. Ãne ma tô nharĩ zaꞌra:
— E niha te te irowaihuꞌu pese uptabi, te te romnhoré õ nherẽ hã.
16 Tawamhã Zezusi hã ma sadaꞌâbâ zaꞌra, ãne:
— Ĩnhimirowahudu hã ĩsihawib õ di. We ĩzatõrĩꞌwai hawip si.
17 Niꞌwa hã te te sima wẽ wamhã, ꞌRe ihâimana uꞌâsi mono te te sima ꞌre iwẽ mono zé te te ꞌre ꞌmanharĩ mono da wamhã, te za waihuꞌu, e ꞌRe ihâimana uꞌâsi mono hawim na, wa tô te ꞌre rowahutu, e niwamhã duré ĩsihawim na.
18 Niꞌwa hã sihawim na te te dama ꞌre rowahutu mono wamhã, ta hã te te sima ꞌre robꞌruiwapari, da te dasiwi ꞌre uzei mono da. Tazahã, niꞌwa hã tipisutuꞌwai ma si te te ꞌre rowẽ zani mono da, te te sima ꞌre robꞌruiwapari mono wamhã, ta hã tô sena ihâimana. Marĩ iꞌuptabi õ hã ãma hâimana õ di.
19 E Mozési hã roti zahi te te aima hiri zaꞌra waꞌaba ã bâ bété. Tane nherẽ, ꞌmaiꞌmadâꞌâ pese aba õ di, roti zahi hã. E marĩ da, te bété asima iwẽ zaꞌra waꞌwa, asiwi ĩwĩrĩ aba da hã.
20 Tawamhã ma tô dasiwi ꞌmahârâ ni, ãne:
— Waꞌuburé ré, te ꞌre aimo. E ꞌwa hã te te sima wẽ bâ, te te aiwĩrĩ da hã.
21 Tawamhã Zezusi hã te asa dama tinha, ãne:
— Misi wa tô ꞌmanha marĩ dama iꞌmanharĩ waihuꞌuꞌõ hã. Tahawa, ma tô taha na uburé atobꞌuzu zaꞌra waꞌwa.
22 ꞌWatébrémi hã te sabadu na zama ꞌre isihâiwata nhihâri zaꞌra waꞌaba mo, Mozési hã te te aima ꞌru zaꞌra waꞌaba wa. Tane nherẽ, danhihâiwata nhihâri hã Mozésihi ãma sãnaꞌrata õ di. Ihiꞌrata norĩ ãma ma tô tinhanaꞌrata.
23 Mozési, roti zahi te te ihiri hã ꞌre ꞌmadâꞌâ rẽme zaꞌra waꞌaba mono tõ da, ꞌwatébrémi hã te sabadu na nherẽ ꞌre isihâiwata nhihâri zaꞌra waꞌaba mo. Tawamhã e marĩ wa, ma tô ĩzada asitiꞌru zaꞌra waꞌwa, sabadu na te ipesezém na aibâ hã hâiba wahuré.
24 Sahâri zaꞌra waꞌaba, dahâimanazém na daꞌmadâꞌâ na daꞌãma ꞌre irowairébé zaꞌra waꞌaba mono zé hã. Maꞌãpé iꞌuwaibaba na si daꞌãma ꞌre rowairébé zaꞌra waꞌaba mono.
E Zezusi hã ꞌRe ihâimana uꞌâsi mono te te ipisudu, Danhoꞌreptuiꞌwa da
25 Tawamhã niꞌwam norĩ hã, Zeruzalẽ ꞌre, ꞌre isiꞌubumroi mono hã ma tô nasi sisadanharĩ zaꞌra, ãne:
— E ã hãi õ di aibâ hã, dama ipire norĩ te te siwi wĩrĩ da, sô isõpré hã.
26 Maꞌãpé ꞌmadâꞌâ zaꞌra waꞌaba. Sõꞌawi te rowasuꞌu. Tane nherẽ, niꞌwa hã te te tãma nharĩ õ di. Ãté dama ipire norĩ hã te te waihuꞌu pese zaꞌra di, Õ hã ꞌRe ihâimana uꞌâsi mono te te ipisutu na hã, Danhoꞌreptuiꞌwa da.
27 Danhoꞌreptuiꞌwa hã wei wisi wamhã, niꞌwa te te waihuꞌu õ di za, nima hawim na hã. Tazahã, ã hã aibâ hã wama waihuꞌu pese zaꞌra di, isaꞌru hã.
28 Tawamhã Zezusi hã ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra ꞌremhã te te dama rowahutu ré, ma tô mreme ꞌrãihâ na dama tinha, ãne:
— E tô tawamhã aima ĩwaihuꞌu pese zaꞌra waꞌaba di. E duré aima waihuꞌu pese zaꞌra waꞌaba di, nima hawi we ĩmorĩzé hã. Ĩsihawi we ĩmorĩ õ di. We ĩzatõrĩꞌwa hã tô sena te ꞌre hâimana. Tane nherẽ, aima waihuꞌu zaꞌra waꞌaba õ di, ta hã.
29 Tazahã ĩma waihuꞌu pese di, ihawi we ĩmorĩ wa, duré we te te ĩzatõrĩ wa.
30 Tawamhã ma tô aré sada asapẽtẽ zaꞌra, te te siwi âri da. Tane nherẽ, niꞌwa hã te te upi õ di, zahadu bâdâ ite hã iwa waptãꞌã õ wa.
31 Tawamhã daꞌahâ uptabi wazari niꞌwam norĩ ihâimana zaꞌra hã ma tô saze zaꞌra. Te duré nasi anharĩ zaꞌra, ãne:
— Danhoꞌreptuiꞌwa hã wei wisi wamhã, e ã hã aibâ, dama iꞌmanharĩ waihuꞌuꞌõ te te ꞌre iꞌabꞌmanharĩ mono nhipai u, te te ꞌre abꞌmanharĩ mono da bâ.
Dasiꞌwapéi ꞌmanharĩꞌwa norĩ hã, Zezusihi zô da te isatõrĩ zaꞌra zé, te te siwi âri da
32 Tawamhã farizeu norĩ duré sasedoti ipire norĩ hã Zezusi da te dasima iwasuꞌu zaꞌra na, te te dawapari zaꞌra wamhã, ma tô dasiꞌwapéi ꞌmanharĩꞌwa norĩ hã sô satõrĩ zaꞌra, te te siwi âri da.
33 Tawamhã Zezusi hã te tãma nharĩ zaꞌra, ãne:
— Suru na wa za aiꞌrata aꞌâ ĩnhamra ꞌwa. Taha parimhã, wa za oto mo apâ, we ĩzatõrĩꞌwai u.
34 Te za ĩzô airĩtĩ zaꞌra waꞌwa. Tane nherẽ, asiwi ĩnhopẽtẽ aba õ di za, ĩmorĩzéb u hã ãma aiꞌabaꞌréi waihuꞌu aba õ wa.
35 Tahawa, te Zudeu norĩ ma rotiꞌwa norĩ hã sima nharĩ zaꞌra, ãne:
— E momo te za merẽ mo, wa te wasiwi isõpẽtẽ waihuꞌu õ da hã. E Zudeu norĩ, ropâ zudeuꞌõ norĩ ꞌre isiꞌubumroi mono norĩ wazari te za ꞌre sãmra. E tame te za zudeuꞌõ norĩ ma, te te ꞌre rowahutu.
36 E niha na te merẽ sina tinha, ãne te te inharĩ hã: “Te za ĩzô airĩtĩ zaꞌra waꞌwa. Tane nherẽ, asiwi ĩnhopẽtẽ aba õ di za, ĩmorĩzéb u hã ãma aiꞌabaꞌréi waihuꞌu aba õ wa.”
Zezusi hã, â uꞌâsi na isiwasuꞌuzé
37 Dato ihâimanazé bâdâ daꞌrãirẽme hã, ta hã bâdâ ipire. Taha bâtâ na Zezusi hã ma tô hâiwi za. Mreme ꞌrãihâ na ma tô tinha, ãne:
— Niꞌwai ma ꞌrubu wamhã, we ĩtẽme morĩ, â uꞌâ hã te te hâꞌrẽne da.
38 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te ãne ãma tinha: “Niꞌwa hã te te ĩzazei wamhã, te za â uꞌâ hã ꞌre praba uꞌâsi, ipẽꞌẽ ꞌremhã.”
39 Ãne na Zezusi te te rowasuꞌu wamhã, ꞌRe ihâimana uꞌâsi mono Pẽꞌẽzani na te tinha, niꞌwam norĩ hã te te ꞌre saze zaꞌra mono wa, za tãma ꞌre ihâimana zaꞌra mono na hã. Niꞌwam norĩ hã, zahadu ꞌRe ihâimana uꞌâsi mono Pẽꞌẽzani te te waibui õ di, Zezusi hã zahadu morĩ õ wa, ꞌRe ihâimana uꞌâsi mono, iwaihuꞌu pese uptabi ꞌre isãmra mono zéb u hã.
Zezusihi uꞌâbâ dasima idasipoꞌozé
40 Ãne na Zezusihi mreme, da te wapari zaꞌra wamhã, niꞌwam norĩ hã ma tô ãne nharĩ zaꞌra:
— Tô sena ã hã aibâ hã, ꞌRe ihâimana uꞌâsi mono zadawa ꞌmahârâꞌwa, sô ꞌre idanhimipari zaꞌra mono.
41 Niꞌwam norĩ hã te duré ãne nharĩ zaꞌra:
— Õ hã, Cristu.
Niꞌwam norĩ hã te duré ãne sisadanharĩ zaꞌra:
— E niha te za merẽ Cristu hã Galiléia hawi wei mo.
42 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na, iwasuꞌu inomro na hã, Cristu hã Davihi nhihudu za. Belẽ ãma te za duré podo, Davi ꞌre isãmra mono zéb ãma.
43 Tahawa, ma tô dasima aipoꞌo ni, Zezusihi uꞌâbâmhã.
44 Niꞌwam norĩ hã ma tô aré sima wẽ zaꞌra, te te siwi âri da. Tane nherẽ, niꞌwa hã te te upi õ di.
Zudeu norĩ ma rotiꞌwa norĩ hã, Zezusi te te siwi isazei õ zé
45 Tawamhã dasiꞌwapéi ꞌmanharĩꞌwa norĩ, Zezusihi zô aré isiꞌabaꞌré hã ma tô oto apâ aiꞌabaꞌré, sasedoti ipire norĩ, duré farizeu norĩ isiꞌubumrozéb u. Ãne ma tô sadanharĩ zaꞌra:
— E mahãta. E niha bâ, we asiwi saprõni aba õ di.
46 Tawamhã dasiꞌwapéi ꞌmanharĩꞌwa norĩ hã ma sadaꞌâbâ zaꞌra, ãne:
— Niꞌwa niwamhã isine isimirowasuꞌu hã hâimana õ di, isimirowasuꞌu wẽ uptabi hã.
47 Tahawa, te farizeu norĩ hã nharĩ zaꞌra, dasiꞌwapéi ꞌmanharĩꞌwa norĩ ma, ãne:
— E a norĩ waꞌaba ma zama, ma duré aima robꞌrãmi zaꞌra waꞌwa.
48 E niꞌwa dama ipire hã duré farizeu hã te te saze pâ!
49 Niꞌwam norĩ ma, ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézé, tãma iwaihuꞌu õ hã, te ꞌRe ihâimana uꞌâsi mono hã iwasété si te te tãma ꞌre pisutu zaꞌra.
50 Tane nherẽ, Nicodemosi, isiré farizeu na ꞌre ihâimana zaꞌra mono hã, nimahã na Zezusihi u imorĩ hã ma tô ãne tãma nharĩ zaꞌra:
51 — Niꞌwa hã marĩ te te iꞌmanharĩzé hã wa te waihuꞌu wana ré, wa te ãma rowairébé waihuꞌu õ di za. Ãne hã ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézé hã, te te ꞌrui õ di.
52 7:52-53 Tahawa, ma tô siwi sadaꞌâ, ãne:
— E a zama Galiléia hawimhã. Maꞌãpé romnhoré na, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na. Tawapsi te za iwaihu, Galiléia hawimhã niwa niꞌwa iwatobro õ na, ꞌRe ihâimana uꞌâsi mono zadawa ꞌmahârâꞌwa hã.
53 ꞌMadâꞌâ 7:52
Taha pari, danhorõwa u ma tô da te ropé.
