Apocalipsi 7:1-17
7 Tawamhã wa tô duré ꞌmadâ, maparane siꞌuiwa na hâiwa ãma ꞌRe ihâimana uꞌâsi mono ma, romhuriꞌwa norĩ hã. Bâtâ pusizém niwĩ misi te za, tiꞌai ãma hã. Bâtâ zasizém niwĩ te duré misi za. Duré hâiwa siꞌuiwa na te duré siꞌuiwada zahuré. ꞌRe ihâimana uꞌâsi mono te te tãma ipisutu zaꞌra zéb zarina, te ta norĩ hã rowaꞌu hã siꞌu tété zaꞌra, bâtâ pusizém niwĩ, duré bâtâ zasizém niwĩ, duré hâiwa siꞌuiwa na, te te ꞌre rowapõrĩ tõ zaꞌra mono da. Te te duré ꞌre âzasisi zaꞌra tõ mono da, te rowaꞌu hã siwi tété, duré wede hã te te ꞌre rési tõ zaꞌra mono da.
2 7:2-3 Taha parimhã, wa tô duré ꞌmadâ, hâiwa ãma romhuriꞌwa aimawi hã. Bâtâ pusizém hawi ma tô we sihâiꞌré. Ta hã te robꞌuiꞌéré siro hã tinhibꞌrata we ꞌre tiꞌâ, ꞌRe ihâimana uꞌâsi mono nhibꞌaꞌuwẽ ãma te te ꞌre iꞌazaꞌra mono da hã. Tawamhã maparane siꞌuiwa na hâiwa ãma romhuriꞌwa norĩ hã te ꞌmahârâ zaꞌra, mreme ꞌrãihâ na, ãne:
— Tôꞌã. Tiꞌai ma, robꞌmanharĩ zaꞌra waꞌaba tõ aꞌâ, â poré ma zama, duré wede ma zama. Wanhibꞌapito ꞌRe ihâimana uꞌâsi mono nhibꞌaꞌuwẽ hã aꞌâ wa te aꞌuihâ uiꞌéré mono, pibui pese da, ꞌRe ihâimana uꞌâsi mono nhimihâzém na dazu te te robzépata zaꞌra tõ da. — Ãne te ꞌmahârâ zaꞌra hâiwa ãma romhuriꞌwa hã, tinhibꞌrata robꞌuiꞌéré siro te te ꞌre iꞌrâꞌâri hã. Tawamhã ma tô oto aꞌuihâ uiꞌéré, bâtâ pusizém hawi iwatobro hã tisiré norĩ me. Maparane siꞌuiwa na hâiwa ãma romhuriꞌwa norĩ ma, ma tô ꞌRe ihâimana uꞌâsi mono hã tãma ꞌru zaꞌra aré, isimiꞌmanharĩ waihuꞌu pese zém na tiꞌai ma, te te robꞌmanharĩ zaꞌra da aré, duré â poré ma, te te robꞌmanharĩ zaꞌra da. Tane nherẽ, hâiwa ãma romhuriꞌwa aimawi hã ma tô ãma paꞌuwati zaꞌra, tiꞌai ma, te te aꞌâ robꞌmanharĩ tõ zaꞌra da.
3 ꞌMadâꞌâ 7:2
4 Tawamhã wa tô duré wapa, niꞌwai mreme hã. Te ĩma wasuꞌu, ꞌRe ihâimana uꞌâsi mono nhibꞌaꞌuwẽ zaꞌratazé hã. Ãne te ĩma wasuꞌu:
— ꞌRe ihâimana uꞌâsi mono nhibꞌaꞌuwẽ zaꞌratazé hã ãne, iꞌuihâ uiꞌéré ré norĩ hã 144 miu na ihâiba zaꞌra hã. — Ãne ma tô niꞌwa hã ĩma waihuꞌu. Ã hã Izaraéu nhihudu norĩ zaꞌratazé, te wasuꞌu. Isihudu sidâpâsi, te awasuꞌu.
5 Zudaha nhihudu uihâ uiꞌéré zaꞌratazé hã 12 miu na. Duré tô Rubẽhẽ nhihudu uihâ uiꞌéré zaꞌratazé hã 12 miu na. Duré Gadihi nhihudu uihâ uiꞌéré zaꞌratazé hã tô 12 miu na.
6 Duré tô Aséhé nhihudu uihâ uiꞌéré zaꞌratazé hã 12 miu na. Duré Naptalihi nhihudu uihâ uiꞌéré zaꞌratazé hã tô 12 miu na. Duré tô Manaséhé nhihudu uihâ uiꞌéré zaꞌratazé hã 12 miu na.
7 Duré Simiãhã nhihudu uihâ uiꞌéré zaꞌratazé hã tô 12 miu na. Duré tô Levihi nhihudu uihâ uiꞌéré zaꞌratazé hã 12 miu na. Duré Isacaha nhihudu uihâ uiꞌéré zaꞌratazé hã tô 12 miu na.
8 Duré tô Zébulõhõ nhihudu uihâ uiꞌéré zaꞌratazé hã 12 miu na. Duré Zuzéhé nhihudu uihâ uiꞌéré zaꞌratazé hã tô 12 miu na. Duré tô Bẽzamihĩ nhihudu uihâ uiꞌéré zaꞌratazé hã 12 miu na. Simisutu hã, iꞌuihâ uiꞌéré zaꞌrata zaꞌra zé hã 144 miu na ma watobro, Izaraéu nhihudu norĩ zaꞌratazé, isihudu sidâpâsi hã.
Daꞌahâ uptabi na ꞌRe ihâimana uꞌâsi mono nhoꞌre idahâimana zaꞌra zé wasuꞌu
9 7:9-10 Taha parimhã, wa hã Zuwã, wa tô duré ꞌmadâ. Te ꞌmadâꞌâ wamhã, wa tô daꞌaꞌmadâ, daꞌahâ uptabi na, da te idazaꞌrata waihuꞌu õ hã. Dapoto mono bâ te aimasam ni, damreme sipoꞌo mono bâ ꞌre idahâimana zaꞌra mono hã. Danhibꞌapito simasisizém nhoꞌre te aimasam ni, duré Poneꞌẽrebâ nhoꞌreb zama. Daꞌuza hâpa hâirã ré te isõꞌre aimasam ni. Tawamhã waꞌasu ne hã, da te tété zaꞌra sina, te damreme ꞌrãihâ na ãma tawata zaꞌra ni, ãne:
— Wanhibꞌapito ꞌRe ihâimana uꞌâsi mono, danhibꞌapito simasisizém na isãmra hã ta hã, Waꞌanhoꞌreptuiꞌwa. Duré Poneꞌẽrebâ hã tô isiré Waꞌanhoꞌreptuiꞌwa. Ã norĩ hã ma tô wawasété wi te te ꞌre waꞌanhoꞌreptu zahuré, ꞌre iwasiꞌutõrĩ zaꞌra mono zé wib zama.
10 ꞌMadâꞌâ 7:9
11 Tawamhã hâiwa ãma romhuriꞌwa norĩ hã te zahadu danhibꞌapito simasisizé mana wawi aimasa. 24 na dama ipire zaꞌra norĩ hã isisõré mana wawib zama te zahadu aimasa, maparane siꞌuiwa na ropoto na ihâiba norĩ mana wawib zama. Ta norĩ hã hâiwa ãma romhuriꞌwa norĩ hã ma tô duré danhibꞌapito simasisizém nhoꞌre hiꞌrãtitõ ana, ꞌRe ihâimana uꞌâsi mono ãma wata zaꞌra da.
12 Ãne te ãma tiwata zaꞌra:
— Tô sena, wa aiꞌãma si ꞌre wawata uꞌâsi zaꞌra. Tô sena, aiwaihuꞌu pese uptabi di. Duré aiwẽ uptabi di. Duré asõprub uptabi di. Tô sena danhipai u uptabi dama aipire na te ꞌre aihâimana mo. Tô sena, wa ãne aiꞌãma wawata zaꞌra ni.
13 Tawamhã ãma wata zaꞌra pari, ma tô 24 na dama ipire norĩ siré hã misi ĩꞌmazadanha, ãne:
— E ꞌwam norĩ, õ norĩ hã, daꞌuza hâpa hâirã ré hã. E ma hawi we idasiꞌabaꞌré.
14 Tawamhã asa wa tãma tinha, ãne:
— Me. Wa hã te waihuꞌu õ di. Aima waihuꞌu pese di, a hã.
Tawamhã ma tô oto ĩma waihuꞌu, ãne:
— Ã norĩ hã ropsiꞌutõrĩzéb ãma, tiꞌai ãma da te ꞌre irobzépata zaꞌẽtẽ zaꞌra mono zéb ꞌrãsutu u, hâiba ré ꞌre ihâimana zaꞌra mono. Da te dasima ꞌre irobꞌmanharĩ wasété zaꞌra mono zém na ꞌre idasiꞌutõrĩ mono zém hawib õ di. Te te ꞌre robzépata zaꞌẽtẽ zaꞌra mono nherẽ, hâiba ré we iwairébé, ã norĩ hã. ꞌRe ihâimana uꞌâsi mono ma, ma tô sihâiba ꞌru zaꞌra, Poneꞌẽrebâ wapru na dazada idâꞌâzém na iwasété wi te te ꞌre aꞌupsõi pese mono da, daꞌuza hã hâirã da, da te ꞌre iꞌupsõi pese zaꞌra mono ne.
15 Tahawa, te ã norĩ hã ꞌRe ihâimana uꞌâsi mono simasisizém nhoꞌre aimasa, uza hâpa hâirã ré. Romhuri sahâri waihuꞌu ãna te te tãma ꞌre romhuri uꞌâsi zaꞌra, isõrõwa ãma hã. Duré danhibꞌapito simasisizém na isãmra hã te za duré ꞌrâwi ãma ꞌre sisaprĩ uꞌâsi zaꞌra, iꞌuza hâpa hâirã ré norĩ ãma hã, iꞌrata za oto ꞌre sãmra uꞌâsi zaꞌra mono wa.
16 Tawamhã ã norĩ hã mra te te ꞌre sépata zahu zaꞌra mono õ di za oto. Duré te te ꞌre ꞌrubu zahu zaꞌra mono õ di za oto. Bâdâ hã te te ꞌre hâiba zata waihuꞌu zaꞌra mono õ di za oto. Duré aimawi rowaꞌro ipire hã te te ꞌre hâiba zata waihuꞌu zaꞌra mono õ di za oto.
17 E marĩ wa, te te ꞌre robzépata waihuꞌu zaꞌra mono õ di za oto. Poneꞌẽrebâ hã danhibꞌapito simasisizéb ãma isa hã te te ꞌre ꞌmadâꞌâ pese zaꞌra mono wa, te te ꞌre robzépata waihuꞌu zaꞌra mono õ di za. Aꞌubuni wi, danhimizama da te ꞌre iꞌmadâꞌâ pese zaꞌra mono ne, te za te te ꞌre ꞌmadâꞌâ pese zaꞌra. Te za duré ubꞌre u te te ꞌre simroi uꞌâsi, â uꞌâsi u, da te ꞌre âhuri mono wa, ꞌre idanomro uꞌâsi mono zéb u. ꞌRe daꞌruꞌru mono wa, daꞌupĩ hã da te dasima ꞌre iꞌuꞌõ zaꞌra mono ne, te za duré te te ꞌre apawapto, pẽꞌẽzé ãna oto ꞌre nomro uꞌâsi mono da.
