Atus 5:1-42
5 Aibâ Anania na isisi hã timro Safiraha me, ma tô duré tinhiptiꞌa hã wede zahuré.
2 Ta hã tiꞌai waꞌâ iꞌapoꞌo si ma tô tiꞌâ, Zezusihi zadawa wasuꞌuꞌwa norĩ ma. Te te sima iꞌapo hã ma tô sisa tihi. Ãne hã Safira te te waihuꞌu pese di.
3 Tawamhã Pedru hã te sadanha, ãne:
— Anania, e marĩ da, Satanasi ma, ma asina irowairé, aipẽꞌẽ ꞌre sébré da hã, ꞌRe ihâimana uꞌâsi mono Pẽꞌẽzani ma, asadawa nhipese da, duré robꞌuiprazé apo hã asisa hiri da, asiptiꞌai waꞌâ hã.
4 Asiptiꞌa, da te aiwi uipra õ ré hã, ate hã aré. Duré, da te aiwi uipra parimhã, iwaꞌâbâ zama ate hã aré. Tawamhã e marĩ da, ma tô bété ãne hã iꞌmanha. Tiꞌai ãma aibâ norĩ ma asadawa nhipese õ di. ꞌRe ihâimana uꞌâsi mono ma, ma asadawa nhipe.
5 Ãne hã te te wapari wamhã, Anania hã dâꞌâ siromo ma tô waptãrã. Duré ã hã iromhâimanazém na da te iwaihuꞌu zaꞌra norĩ hã ma tô tapahi pese zaꞌra ni.
6 Tawamhã ipréduptém norĩ hã ma tô sô aiꞌabaꞌré. Ma tô siwi ubu Ananiaha hâiba hã. Taha pari ma tô siwi tiꞌâ, ꞌri waꞌõtõ nhiti. Ma tô ãma siwi tiꞌa.
7 Bâtâ pibuzé siꞌubdatõ siꞌutõrĩ parimhã, ma tô ãzé imro hã. Timro dâꞌâzém na iromhâimanazé hã te te waihuꞌu õ di.
8 Tawamhã Pedru hã ma tô sadanha, ãne:
— Maꞌãpé, ĩma wasuꞌu na! E tô ã hã asiptiꞌa iwede aba waꞌâ hã, wahuré.
Piꞌõ hã ma sadaꞌâ, ãne:
— Ĩhe, tô wahuré.
9 Tawamhã Pedru hã te tãma tinha, ãne:
— E marĩ da, aimro me ma tô asima irowairébé waꞌwa, Uburé Danhibꞌapito Pẽꞌẽzani hã pibui waꞌaba da. Maꞌãpé, wapari. Ipréduptém norĩ aimro na te te itiꞌa zaꞌra hã rowi te aimasa, ꞌridawa ãma. Te za duré siwi tiꞌâ za, aihâiba hâ hã.
10 Tawamhã awaꞌawi ma tô duré waptãrã, dâꞌâ siromo, Pedruhu papara. Tawamhã ipréduptém norĩ hã ma tô duré apâ asisi. Ma tô siwi sõpẽtẽ piꞌõ idâ hã. Ma tõ duré siwi tiꞌâ. Ma tô duré ãma tiꞌa, imro zababa.
11 Tawamhã uburé pese isazeiꞌwa norĩ hã duré uburé rowasuꞌu iromhâimanazém na da te iwapari zaꞌra hã ma tô tapẽꞌẽwara pese zaꞌra ni.
Zezusihi zadawa wasuꞌuꞌwa norĩ hã ihâzé ré norĩ ahâ na te te ꞌre ipese zaꞌra mono zé
12 Zezusihi zadawa wasuꞌuꞌwa norĩ hã ma tô te te ꞌre ꞌmanharĩ zaꞌra, ahâ na marĩ dama iꞌmanharĩ waihuꞌuꞌõ hã duré iwẽ uptabi hã dawaꞌwa. Uburé da te ꞌre isaze zaꞌra mono hã ma tô ꞌre dasiꞌrãꞌõtõ, Salomahã nhisi na ꞌri zahâpâ ãma.
13 Niꞌwa isazeiꞌõꞌwa hã pahi ãna iteme sébré waihuꞌu zaꞌra õ di. Tane nherẽ, wasuꞌu wẽ na ma tô isazeiꞌwa norĩ hã da te dasima ꞌre wasuꞌu zaꞌra.
14 Tahawa, ma tô daꞌahâ na dasina dahâꞌâ uꞌâsi, aibâ norĩ duré piꞌõ zama Wanhibꞌapito zazeiꞌwa hã.
15 Isiré ꞌre inomro mono norĩ hã, marĩ dama iꞌmanharĩ waihuꞌuꞌõ hã te te ꞌre ꞌmanharĩ zaꞌra mono wa, ma tô ihâzé ré norĩ hã da te ꞌre saꞌra, ꞌri nhiꞌriti wa, isaꞌwarizé wa duré dahâzé wa, wetenhamri na dazaꞌwarizé wa. Ãne hã ma tô da te ꞌre ꞌmanharĩ zaꞌra, Pedru hã iwaꞌwaibaba zaꞌra te te roꞌrazâri wa, iꞌawã hã te te ꞌre hâiba upsibi zaꞌra mono wa, nima norĩ hã te te ꞌre pese zaꞌra mono da.
16 Zeruzalẽ ꞌrata ꞌri waꞌõtõ mono hawimhã, ma tô daꞌahâ na ꞌre dasito, Zeruzalẽ u hã. Ihâzé ré norĩ hã ma tô da te dasiré ꞌre ꞌwasari, duré waꞌuburé ré ꞌre ihâimana zaꞌra mono norĩ zama. Ta norĩ hã uburé ma tô ꞌre pese zaꞌra.
Zezusihi zadawa wasuꞌuꞌwa norĩ ma, da te ꞌre irobꞌmanharĩ wasété zaꞌra mono zé
17 Tawamhã sasedoti tisiré norĩ nhipai u ipire hã duré uburé isiré saduceu norĩ me, ma tô Zezusihi zadawa wasuꞌuꞌwa norĩ hã sõꞌru zaꞌra.
18 Tahawa, ma tô dama ꞌru zaꞌra, da te dasiwi waibu da, Zezusihi zadawa wasuꞌuꞌwa norĩ hã. Ãne wa, dazazéb ꞌre, ma tô séme ni.
19 Tane nherẽ, taha mara na hã Uburé Danhibꞌapito te, hâiwa hawi romhuriꞌwa hã ma tô ꞌridawa zaꞌẽne dazazém nhitobzé hã tãma ꞌridawa zaꞌra. Taha pari, rob u ma tô te te simro. Tame ma tô ãne tãma nharĩ zaꞌra:
20 — Mo oto aiꞌabaꞌréi waꞌaba, ꞌRe ihâimana uꞌâsi mono nhorõwa ꞌri ꞌrãihâ u. Dama rowasuꞌu pese zaꞌra waꞌaba, ꞌre idahâimana uꞌâsi zaꞌra mono zém na.
21 Tawamhã ma tô sadawa zamarĩ zaꞌra. Awẽm na ma tô aiꞌabaꞌré, ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra u hã. Tame rowahutu na ma tô dama sãnaꞌrata zaꞌra.
Tawamhã sasedoti tisiré norĩ nhipai u ipire hã, isiré ꞌre inomro mono norĩ zama ma tô Zudeu norĩ ma ipire norĩ zô tihârâ zaꞌra, dasiꞌrãꞌõno daꞌãma rowairébéꞌwa danhipai u ipire norĩ u. Taha pari dazazéb u ma tô satõrĩ zaꞌra, nima norĩ robꞌmadâꞌâꞌwa norĩ hã Zezusihi zadawa wasuꞌuꞌwa norĩ zô.
22 Tane nherẽ, ꞌRe ihâimana uꞌâsi mono nhorõwa ꞌmadâꞌâꞌwa norĩ hã, dazazéb u sihutu wamhã, te te sõpẽtẽ zaꞌra õ di, Zezusihi zadawa wasuꞌuꞌwa norĩ hã. Tahawa apâ ma tô aiꞌabaꞌré.
23 Ma tô rowasuꞌu zaꞌra, ãne:
— Dazazé hã ꞌridawa tété wẽ na, wa tô wasiwi sõpẽtẽ ni, duré robꞌmadâꞌâ pese na. Dazazéb ꞌmadâꞌâꞌwa norĩ hã te robꞌmadâꞌâ zaꞌra, ꞌridawa zaꞌẽtẽ mono bâ. Tane nherẽ, wa te wasiwi ꞌridawa wamhã, ꞌriparamhã niꞌwai õ di.
24 Tawamhã ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ nhibꞌihâꞌa hã duré sasedoti ipire norĩ, ãne hã te te wapari zaꞌra wamhã, ma tô tiwi tirowaihuꞌuꞌõ zaꞌra. Niha hã te te rosaꞌrata waihuꞌu zaꞌra õ di, Zezusihi zadawa wasuꞌuꞌwa norĩ ma, iromhâimanazém na hã.
25 Taha ré hã, niꞌwa ma tô ãzé. Ta hã ma tô tãma rowasuꞌu zaꞌra, ãne:
— Ĩwapari zaꞌra waꞌaba. Aibâ norĩ hã dazazéb ꞌre, iséme ꞌwa hã, ꞌRe ihâimana uꞌâsi mono nhorõwa, ꞌri ꞌrãihâ ꞌwawi waꞌra ꞌre, te dama rowahutu zaꞌra.
26 Tawamhã ꞌRe ihâimana uꞌâsi mono nhorõwa ꞌri ꞌmadâꞌâꞌwa norĩ hã ma tô sô aiꞌabaꞌré, tinhibꞌihâꞌa siré. Ta norĩ hã ma tô apâ te te simro, Zezusihi zadawa wasuꞌuꞌwa norĩ hã. Tane nherẽ, isimroi mono ꞌwa norĩ hã ẽtẽ na da te hâ zaꞌra õꞌumnhasite, ma tô ãma pibui pese zaꞌra, te te isimroi mono zém na hã, te te tãma robꞌmanharĩ zaꞌra ãna.
27 Te te ãwisi zaꞌra wamhã, ma tô sõré ni daꞌãma rowairébéꞌwa norĩ nhoꞌre, Zezusihi zadawa wasuꞌuꞌwa norĩ hã. ꞌRe ihâimana uꞌâsi mono ma daꞌãma romhuriꞌwa, tisiré norĩ nhipai u ipire hã ma tô tãma nharĩ zaꞌra, ãne:
28 — Wa tô aré aiwi sawi zaꞌra waꞌaba ni, tô õ hã aibâ nhisi na dama rowahutu zaꞌra waꞌaba tõ da. Tane nherẽ, Zeruzalẽ ꞌremhã asimirowahutu na ma tô daꞌãma iwazere zaꞌra waꞌwa. Wa norĩ wa te wasiwi iwĩrĩ na hã wapisutu zaꞌra waꞌaba da, ma tô duré asima iwẽ zaꞌra waꞌwa.
29 Tawamhã Pedru hã duré isiré norĩ Zezusihi zadawa wasuꞌuꞌwa norĩ zama ma tô sadaꞌâbâ zaꞌra, ãne:
— ꞌRe ihâimana uꞌâsi mono mreme si wa za ꞌmadâꞌâ pese zaꞌra ni. Mare di, tiꞌai ãma aibâ norĩ mreme hã.
30 ꞌRe ihâimana uꞌâsi mono wahiꞌrata norĩ te hã, ma tô hâiwaꞌutu, Zezusi hã, asiwi iwĩrĩ ꞌwa hã duré wedepoꞌo nhonhiꞌrãmi na asiwi isasõmri ꞌwa hã.
31 Ta hã ma tô ꞌRe ihâimana uꞌâsi mono hã tisã tinhimire niwĩ, Danhibꞌihâꞌa da duré Danhoꞌreptuiꞌwa da, Izaraéu nhihudu norĩ ma, tiwasété na ꞌre sisãmri zaꞌra mono wa, ꞌre siwẽꞌõ zaꞌra mono wa, iwasédé hã te te ãma ꞌre abꞌmadâꞌâ tõ mono da.
32 Wa norĩ hã watõmo na wa tô ꞌmadâꞌâ zaꞌra ni, uburé ã hã iromhâimanazé hã. ꞌRe ihâimana uꞌâsi mono Pẽꞌẽzani zama te te waihuꞌu pese di. Ta hã te ꞌRe ihâimana uꞌâsi mono hã niꞌwam norĩ te te ꞌre iwapari pese zaꞌra mono norĩ ma, te te ꞌre anhomri.
33 Tawamhã ãne hã te te wapari zaꞌra wamhã, ma tô abꞌrui pese zaꞌra. Tahawa, te te aré isimro da si.
34 Tane nherẽ, farizeu Gamaliéu na isisi hã ma tô hâiwi za, daꞌãma rowairébézéb ãma. Ta hã ꞌRe ihâimana uꞌâsi mono nhimiroti zahi na dama rowahutuꞌwa, dama wazé pese di, uburé aꞌuwẽ norĩ ma hã. Ta hã ma tô waptẽ, Zezusihi zadawa wasuꞌuꞌwa norĩ hã aꞌâ suru na da te sani zaꞌra da, rob u.
35 Taha pari, ma tô daꞌãma rotiꞌwa norĩ ma tinha, ãne:
— Izaraéu nhihudu norĩ, ãma pibui pese zaꞌra waꞌaba, marĩ za iꞌmanharĩ zaꞌra waꞌaba zém na hã, ã hã aibâ norĩ ãma.
36 Duréihã aibâ Teudasi na isisi hã ma tô dama sihâiꞌré, dama pire na ꞌre siwasuꞌu mono wa, te te idaꞌrãꞌõno hã, 400 na dahâiba na. Tane nherẽ, ma tô wĩrĩ ni, ta hã. Tahawa isiré ꞌre inomro mono hã ma tô ropé. Tahawa tinhimirowaꞌõno hã te te ãma uwaimrami waihuꞌu zaꞌra õ di, ta norĩ hã.
37 Isaꞌu hã, dazaꞌrada hâimana ré, Zudasi hã ma tô duré sihâiꞌré, Galiléia ãma ꞌre isãmra mono hã. Taha siré ma tô duré ꞌre danomro, danhibꞌihâꞌa norĩ zada. Tane nherẽ, ma tô duré wĩrĩ ni, ta hã. Tawamhã uburé isiré ꞌre inomro mono hã ma tô duré ropé.
38 Tahawa, ãhã na hã, ãne wa za aima waihuꞌu zaꞌra waꞌwa: Ã hã aibâ norĩ hã sima iwẽ na hâimana zaꞌra. Duré dazazém hawimhã sani zaꞌra waꞌaba. Isimirowaꞌõtõ zaꞌra hã duré isimiromhuri zaꞌra hã sihawi wamhã, te za tiwi abꞌuwa zaꞌra za.
39 Tanei õ di, ꞌRe ihâimana uꞌâsi mono zadawa para wamhã, tiwi uprosi waihuꞌu zaꞌra waꞌaba õ di za, isimiromhuri zaꞌra hã. E marĩ wa. ꞌRe ihâimana uꞌâsi mono hã asiwi ꞌwapéi waꞌaba wa aré.
Tawamhã daꞌãma rowairébéꞌwa norĩ, Gamaliéu hã ma tô siwi saze.
40 Tahawa, Zezusihi zadawa wasuꞌuꞌwa norĩ zô ma tô tihârâ zaꞌra apâ. Ma tô dama ꞌru zaꞌra, romhâ ꞌmanharĩ na da te ꞌre préꞌé zaꞌra mono da. Taha pari, ma tô duré tiwi sawi zahi zaꞌra, te te dama ꞌre rowahutu zaꞌra mono tõ da, Zezusihi wasuꞌu na hã. Taha pari, ma tô tãma robꞌru zaꞌra, oto siꞌabaꞌré da.
41 Tawamhã Zezusihi zadawa wasuꞌuꞌwa norĩ hã tãma rowẽ uptabi zaꞌra sina ma tô wairé, daꞌãma rowairébézém hawimhã, ꞌRe ihâimana uꞌâsi mono hã te te pisutu zaꞌra wa, Zezusihi uꞌâbâ te te robzépata zaꞌra da.
42 Tawamhã bâtâ sidâpâsi, ma tô nasi dama rowahutu uꞌâsi zaꞌra, ꞌRe ihâimana uꞌâsi mono nhorõwa ꞌri ꞌwawi waꞌra ꞌremhã duré ꞌri babamhã, Zezusi hã Danhoꞌreptuiꞌwa na.
