Mateus 15:1-39
15 Tawamhã nima norĩ farizeu norĩ hã, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama ma tô aiꞌabaꞌré Zeruzalẽ hawi, Zezusihi u. Ãne ma tô siwi sadanha:
2 — E niha bâ, asiré ꞌre inomro mono norĩ hã te te ꞌre ꞌmadâꞌâ pese zaꞌra mono õ di, wahiꞌrata norĩ hawi wahâimanazé hã. ꞌRe sisimisõ zaꞌra mono õ di, ꞌre saihuri mono wana ré hã.
3 Tawamhã Zezusi hã ma ãma sadaꞌâbâ zaꞌra, ãne:
— E niha bâ bété, a norĩ waꞌaba zama ꞌRe ihâimana uꞌâsi mono nhimiroti zahi hã ꞌre ꞌmadâꞌâ zaꞌra waꞌaba mono õ di, aihiꞌrata hawi aihâimanazé uꞌâbâ waꞌaba hã.
4 ꞌRe ihâimana uꞌâsi mono hã ma tô tinha, ãne: “Aimama ꞌre wazé pese zaꞌra waꞌaba mono, ana zama.” Ãne duré isimiroti amo hã: “Niꞌwa hã timama ma, duré tina ma nherẽ, iwasédé hã te te pisutu wamhã, da te iwĩrĩ da si, iꞌru zahi.”
5 Tane nherẽ, te ãne dama ꞌre iroti zaꞌra waꞌaba mo, niꞌwa hã ãne timama ma, duré tina ma, te te nharĩ wamhã: “Aiꞌãma ĩsime waihuꞌu õ di, uburé marĩ hã ĩma ihâimana hã ꞌRe ihâimana uꞌâsi mono ma si, wa tô ãma ĩnhopru.”
6 Ãne wamhã, te tãma ꞌre iroti zaꞌra waꞌaba mo, timama norĩ hã te te oto ꞌre upari waihuꞌu zaꞌra mono tõ da. Ãne wamhã, ꞌRe ihâimana uꞌâsi mono nhimiroti hã ꞌre ꞌmadâꞌâ pese zaꞌra waꞌaba mono õ di, aihiꞌrata hawi aihâimanazé uꞌâbâ waꞌaba.
7 Aihâimana siꞌamoi pese na ꞌre iꞌaihâimana zaꞌra waꞌaba mono norĩ! Izaias hã ma tô iꞌuwaibaba na aiꞌãma robꞌuiꞌéré siromo zaꞌra waꞌwa, ãne:
8 “Ã hã aꞌuwẽ norĩ hã timreme na si te te ꞌre ĩwazéb zaꞌra. Tazahã, ipẽꞌẽ ꞌremhã romhâ na te ĩwi ꞌre hâimana zaꞌra.
9 Taré te ĩꞌãma ꞌre wata zaꞌra. Isimirowahutu zaꞌra hã, tiꞌai ãma danhimiroti.”
Zezusi hã, ꞌre idasihâiba wamnarĩ zaꞌra mono zém na te te irowasuꞌuzé
10 Tawamhã Zezusi hã daꞌahâ uptabi na idahâimana zaꞌra zô ma tô sima dazô hâ. Ãne te dama tinha:
— Maꞌãpé, ĩwapari pese zaꞌra waꞌaba. Duré maꞌãpé sadaihuꞌu zaꞌra waꞌaba.
11 Marĩ hã dazadawa na ꞌre isisisi mono na, dapẽꞌẽ ꞌremhã ãma ꞌre dasiwasété zaꞌra mono õ di za. Tazahã, marĩ dazadawa hawi ꞌre iwairébé mono na si te za ãma ꞌre dasiwasété zaꞌra.
12 Tawamhã isiré ꞌre inomro mono norĩ hã ma tô Zezusihi u ꞌrâwi ubumro. Ãne ma tô siwi sadanha:
— Rowahutuꞌwa. E ma tô iwaihuꞌu zaꞌra, farizeu norĩ te te siwi iꞌaimreme wẽꞌõ na hã te te aiwapari zaꞌra wa.
13 Tawamhã Zezusi hã ma sadaꞌâbâ zaꞌra, ãne:
— Ĩmama, hâiwa ãma ꞌre isãmra mono hã uburé robꞌre te te iꞌaꞌre õ hã te za isari hawi azaꞌoꞌo.
14 Ãma aihâtâꞌâ zaꞌra waꞌaba tõ, farizeu norĩ ãma hã. Ta norĩ hã dazaprõniꞌwa, tobꞌa zaꞌra nherẽ. Itobꞌa zahuré sisaprõni zahuré wamhã, te za siré tiwaptãꞌã zahuré, abꞌre wa.
15 Tawamhã Pedru hã ma tô tiwi waptẽ:
— Maꞌãpé wama waihuꞌu zaꞌra na, dawana ré ãma irowasuꞌuzé hã romnhimiréꞌé na.
16 Tane nherẽ, Zezusi hã ma tô ãne tãma nharĩ zaꞌra:
— E a norĩ waꞌaba zama zahadu sadaihuꞌu zaꞌra waꞌaba ã bâ.
17 Marĩ hã dazadawa na ꞌre isisisi mono hã, danomo u te za ꞌre sisisi. Taha pari te za dahâiba hawi ꞌre wairébé.
18 Tazahã, marĩ hã dazadawa na ꞌre iwairébé mono hã, dapẽꞌẽ hawi te ꞌre wairébé. Ta hã te te ꞌre dahâiba wamnarĩ zaꞌra.
19 E marĩ wa. Dapẽꞌẽ hawi ꞌre wairébé mono wa, rosaꞌrata wasédé hã, dapãrĩ hã, damro na danhimisaihuri hã, dasina danhipsaihuri hã, danhimisaihuri hã, dazadawa nhipe, duré daꞌãma iwasétézé hã.
20 Ã norĩ hã te tô te te ꞌre dahâiba wamnarĩ zaꞌra. Tazahã, niꞌwa hã sisibꞌrata upsõi ãna sai wamhã, ta hã te te hâiba wamnarĩ dai õ di.
Zezusi hã, piꞌõi ꞌra zudeuꞌõ nherẽ, te te tãma ipesezé
21 Tawamhã Zezusi hã ta hawi ma tô mo, Tiru na ꞌri nhoꞌõmo nhisi niwĩ, duré Sidõ* na ꞌri nhoꞌõmo nhisi niwĩ, danhiptiꞌa nhoꞌõmo u.
22 Tawamhã piꞌõ Canaꞌã hawi tame danhiptiꞌai ãma ꞌre isãmra mono hã ma tô itẽme sina rotété. Hârâ ꞌrãihâ na ma tô ꞌmahâ, ãne:
— Apito, Davihi nhihudu, maꞌãpé ĩꞌãma aipẽꞌẽzé na. Ĩꞌra sipiꞌõ hã, waꞌuburé ré te tihâiba. Te robzépata zaꞌẽtẽ.
23 Tane nherẽ, Zezusi hã te te sadaꞌâbâ õ di. Tahawa isiré ꞌre inomro mono norĩ hã ma tô itẽme sina rotété zaꞌra. Ãne te tãma nharĩ zaꞌra:
— Maꞌãpé satõrĩ, ã hã piꞌõ hã. Wazarina zaꞌra te wei mo, hârâ ꞌrãihâ na wei hârâ mono sina.
24 Tawamhã Zezusi hã ma sadaꞌâbâ zaꞌra, ãne:
— ꞌRe ihâimana uꞌâsi mono hã Izaraéu nhihudu norĩ u si, ma tô we ĩzatõ. Ta norĩ hã te poneꞌẽrebâ isimani, siwaꞌru ꞌre ihâimana zaꞌra mono ne, ꞌre hâimana zaꞌra.
25 Tawamhã piꞌõ hã ma tô itẽme sina rotété. Hiꞌrãtitõ ma tô ãma tiwata. Ãne te tãma tinha:
— Apito, maꞌãpé ĩꞌãma aime na.
26 Tawamhã Zezusi hã ma sadaꞌâ, ãne:
— Iꞌuwaibaba õ di, iꞌuꞌẽtẽ wapu hã daꞌra norĩ wi da te ꞌre iwaibui mono da hã, wapsã ma, da te ꞌre sãmra mono da.
27 Tane nherẽ, piꞌõ hã ma tô ãne sadaꞌâ asa:
— Apito, ta hã tô iꞌuwaibaba. Tane nherẽ, wapsã ꞌrare norĩ zama te te ꞌre huri, meza hawi itedeꞌwa norĩ saiꞌaꞌa hã.
28 Tawamhã Zezusi hã ãne hã te te wapari wamhã, ma tô tinha, piꞌõi ma:
— Piꞌõ, siptete di, asina ĩꞌumnhasi zaꞌẽtẽ zé hã. Ihâimana da si tô, asima iwẽzéb zarina.
Tawamhã awaꞌawi pesere ma tô iꞌra sipiꞌõ hã tipese.
Zezusi hã daꞌahâ uptabi na te te idaꞌapesezé
29 Tawamhã Zezusi hã ta hawi ma tô mo, Galiléia na isõꞌu zapoto nhisi u. Ta hawi ma tô saiꞌu, ẽtẽ ꞌrãihâ na. Tame ma tô nhamra.
30 Tawamhã daꞌahâ uptabi na ma tô aiꞌabaꞌré ni, Zezusihi u. Ma tô itẽme ãwisi zaꞌra ni, imorĩꞌõ norĩ hã, iꞌrãtẽire norĩ hã, itobꞌa norĩ hã, imremeꞌõ norĩ hã duré aimawi hã dahâzé daꞌãma ꞌre ihâimana zaꞌra mono norĩ zama. Ta norĩ hã ma tô nasi sõré ni, ipapara. Tame ma uburé apese.
31 Tawamhã ma tô ãma tatobꞌuzu zaꞌra ni, imremeꞌõ norĩ hã imreme ré wa oto, imorĩꞌõ norĩ hã pese zaꞌra wa, iꞌrãtẽire norĩ hã morĩ wẽ zaꞌra wa, duré itobꞌa norĩ hã te te oto robꞌmadâꞌâ zaꞌra wa. Tawamhã Izaraéu nhihudu norĩ te, ꞌRe ihâimana uꞌâsi mono ãma ma tô tawata zaꞌra ni.
Zezusi hã daꞌahâ uptabi na te te duré idaꞌasaihurizé
32 Tawamhã Zezusi hã isiré ꞌre inomro mono norĩ zô ma tô hâ. Ãne ma tô tãma nharĩ zaꞌra:
— Wa daꞌãma aiwamri pese, ã hã uburé idahâimana zaꞌra norĩ ãma hã. Siꞌubdatõ bâdâ ma tô daꞌãma aiꞌutõ, ĩsiré idahâimana zaꞌra na hã. Tane nherẽ, marĩ õ di, da te ihuri da hã. Te ĩsima wẽ õ di, dasa hã te tãma sõmri zaꞌra õ ré, te dama irobꞌru da hã, bâdâdi na danhimizaꞌreseꞌõ siꞌutõrĩ zaꞌra õꞌumnhasite.
33 Tawamhã isiré ꞌre inomro mono norĩ hã ma tô siwi sadanha, ãne:
— E niha wa za dasa hã wasiwi ꞌmasãmri ni, ãme aꞌubuniwimhã, ã hã uburé idahâimana zaꞌra norĩ ma hã.
34 Tawamhã Zezusi hã te sadanharĩ zaꞌra, ãne:
— E niha iꞌuꞌẽtẽ wapu hã te aima tihâimana zaꞌra waꞌwa.
— 7 na te wama tihâimana zaꞌra. Duré peꞌa hã umrore na. — Ãne ma tô siwi sadaꞌâ.
35 Tawamhã Zezusi hã ma tô dama robꞌru, tiꞌai wa, dasiꞌubumroi mono da.
36 Taha pari, ma tô waibu, 7 na iꞌuꞌẽtẽ wapu hã duré peꞌa zama. ꞌRe ihâimana uꞌâsi mono ãma te tiwata. Tawamhã ma tô te te wẽꞌẽ. Taha pari isiré ꞌre inomro mono norĩ ma, ma tô te te sõmri. Ta norĩ hã ma tô te te dama sõmri zaꞌra.
37 Tawamhã uburé ma tô tasaihuri ni, da te iꞌmahâpãrĩ mono zéb u. Tawamhã isiré ꞌre inomro mono norĩ hã, iwẽꞌẽi ré hã 7 na siꞌõno hã ma tô ubumro zaꞌra, isiꞌatarẽme ré hã.
38 Aibâ norĩ si hã tisa te te ihuri hã 4 miu na ihâiba zaꞌra hã. Piꞌõ norĩ duré aiꞌuté norĩ zaꞌrata zamai ãna hã.
39 Tawamhã Zezusi hã ma tô oto dama robꞌru, oto dasiꞌabaꞌré da. Taha pari, ma tô ubaꞌre wa ãzé, Magadã na tiꞌa nhisi u te te saprĩ da.
Ĩwaꞌõtõ piꞌreba watsuꞌu mono
^ 15:21 Tiru duré Sidõ me hã ꞌri nhoꞌu, zudeuꞌõ norĩ ꞌre isiꞌubumroi mono zé
