Mateus 16:1-28
16 Tawamhã Farizeu norĩ hã duré saduceu norĩ me, ma tô Zezusihi u sina rotété zaꞌra, te te te siwi pibu da. Tahawa, ma tô tiwi waptẽrẽ zaꞌra, marĩ dama iꞌmanharĩ waihuꞌuꞌõ hã sõꞌawi te te ꞌmanharĩ da, ꞌRe ihâimana uꞌâsi mono hawi sena na we te te isiꞌra na te te waihuꞌu zaꞌra da.
2 Tane nherẽ, Zezusi hã ma tô ãne sadaꞌâbâ zaꞌra:
— Robrazéb u hã oto, te za inharĩ ꞌwa, ãne: “Hâiwa wẽ di za, hâiwa pré wẽ wa, ãhã na hã.”
3 Duré awẽm na mararé hã te za inharĩ ꞌwa, ãne: “Tã te za we titaꞌa, hâiwa pré dâꞌâ wa.” Marĩ hã aima ꞌmadâꞌâ waihuꞌu pese zaꞌra waꞌaba di, hâiwa na marĩ ꞌre ihâimana zaꞌra mono na hã. Tane nherẽ, sadaihuꞌu zaꞌra waꞌaba õ di, ã bâtâ mono na ꞌre iromhâimana mono zé ãma iwaihuꞌuzéb da, iwairébé mono hã.
4 Dapoto téb ꞌre, dawasété na ꞌre idahâimana zaꞌra mono hã duré ꞌRe ihâimana uꞌâsi mono ma sena na ꞌre idahâimana zaꞌra mono õ hã te waptẽrẽ zaꞌra ni, marĩ dama iꞌmanharĩ waihuꞌu õ hã. Tane nherẽ, marĩ dama iꞌmanharĩ waihuꞌuꞌõ hã aima ihâimana zaꞌra waꞌaba da hã, mare di. Zonahã ma iromhâimanazép si, te za aima tihâimana zaꞌra waꞌwa, ãma iwaihuꞌu zaꞌra waꞌaba zéb da hã.
Tawamhã Zezusi hã ihawib zaꞌra ma tô oto mo.
Farizeu duré saduceu norĩ te iꞌuꞌẽtẽ wapu mapuzém na Zezusi hã te te ãma isimiréꞌézé
5 Tawamhã Zezusihi siré ꞌre inomro mono norĩ hã ma tô saprĩ zaꞌra, Galiléia isõꞌu na. Tane nherẽ, ma tô poꞌre haꞌâri zaꞌra, iꞌuꞌẽtẽ wapu na. Te te siré ꞌmaiꞌâri zaꞌra õ di.
6 Tawamhã Zezusi hã te tãma nharĩ zaꞌra, ãne:
— Maꞌãpé, asimizaꞌrese sina ꞌre aihâimana zaꞌra waꞌaba mono. Duré ãma ꞌre pibui pese zaꞌra waꞌaba mono, farizeu norĩ te, duré saduceu norĩ te, iꞌuꞌẽtẽ wapu mapuzé wi hã.
7 Tawamhã isiré ꞌre inomro mono norĩ hã ãne hã te te wapari zaꞌra wamhã, ma tô sima nharĩ zaꞌra, ãne:
— Iꞌuꞌẽtẽ wapu hã wa te wei wasiré ꞌmaiꞌâri zaꞌra õ wa, ma tô ãne hã wama waihuꞌu zaꞌra.
8 Tawamhã Zezusi hã te te sima inharĩ zaꞌra zé te te wapari wamhã, ma tô sadanharĩ zaꞌra, ãne:
— E niha ĩsurure, ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zé hã! E marĩ da, te asima inharĩ zaꞌra waꞌwa, iꞌuꞌẽtẽ wapu hã baba wa.
9 E zahadu bété, sadaihuꞌu zaꞌra waꞌaba ã bâ. E ãma aipoꞌre puꞌu zaꞌra waꞌaba ã bâ, imrotõ na iꞌuꞌẽtẽ wapu te iwẽꞌẽi mono na hã, 5 miu na aibâ norĩ ma hã. E niha siꞌõno hã ma tô ãma asiwi iꞌmasisi ꞌwa.
10 E duré bété 7 na iꞌuꞌẽtẽ wapu na, 4 miu na aibâ norĩ ma hã. E niha siꞌõno hã ma tô ãma asiwi iꞌmasisi ꞌwa.
11 E sadaihuꞌu zaꞌra waꞌaba ã bâ, iꞌuꞌẽtẽ wapu na te inharĩ õ na hã. Maꞌãpé ꞌre asiꞌmadâꞌâ pese zaꞌra waꞌaba mono, farizeu norĩ te, duré saduceu norĩ te, iꞌuꞌẽtẽ wapu mapuzé wi hã.
12 Tawamhã isiré ꞌre inomro mono norĩ hã ma tô oto sadaihuꞌu zaꞌra, iꞌuꞌẽtẽ wapu mapuzém na te te tãma inharĩ zaꞌra õ na hã. Tazahã, ꞌre siꞌmadâꞌâ pese zaꞌra mono da, farizeu duré saduceu norĩ nhimiroti wi hã.
Pedru hã Zezusi te te iwaihuꞌuzé, Danhoꞌreptuiꞌwa na
13 Tawamhã Zezusi hã, Filipihi te Cézaréia na tiꞌa nhisi niwĩ wisi wamhã, ma tô sadanharĩ zaꞌra, isiré ꞌre inomro mono norĩ hã, ãne:
— E ꞌwa hã ꞌre imorĩ na, te da te dasima ꞌre wasuꞌu zaꞌra, Tiꞌai ãma Dasiré Ipodo hã.
14 Tawamhã isiré ꞌre inomro mono norĩ hã ma tô siwi sadaꞌâ, ãne:
— Niꞌwam norĩ ma hã, a hã u, Zuwã Batista. Duré u a hã, Elias. Duré niꞌwam norĩ ma hã a hã u, Zeremia. Duré niꞌwam norĩ ma hã a hã u, nima hã ꞌRe ihâimana uꞌâsi mono zadawa ꞌmahârâꞌwa.
15 Tawamhã Zezusi hã te sina sadanharĩ zaꞌra, ãne:
— A norĩ waꞌwa hã bété, e niha ma tô asima ꞌre ĩwasuꞌu zaꞌra waꞌaba mo.
16 Tawamhã Simau Pedru hã ma tô sadaꞌâ, ãne:
— A hã Cristu, ꞌRe ihâimana uꞌâsi mono idâꞌâꞌõ ꞌra.
17 Tawamhã Zezusi hã ma tô waihuꞌu Pedruhu ma, ãne:
— Simau, Zuwãhã ꞌra, aima rowẽ uptabi di. E marĩ wa. Ã hã, niꞌwa tiꞌai ãma aꞌuwẽ hã te te aima hâiꞌré õ wa. Ĩmama hâiwa ãma ꞌre isãmra mono si ma tô aima hâiꞌré.
18 Tô sena wa za aima waihuꞌu, ãne: A hã Pedru. Ã hã ẽtẽ nhisiwi wa za saꞌra, uburé ĩzazeiꞌwa norĩ hã. Tawamhã dadâꞌâ nhiptetezé hã te te ãma iꞌaiꞌuté da hã, mare di.
19 Wa za aima sõmri zaꞌra, ꞌridawazém* norĩ hã Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zéb u ꞌre danhisisi mono da, ꞌridawazé hã. Tiꞌai ãma marĩ hã a hã sawi zahi wamhã, hâiwa ãma zama te za te te ꞌre azawi, ꞌRe ihâimana uꞌâsi mono hã. Tane duré tiꞌai ãma marĩ ma, a hã rowairébé wamhã, hâiwa ãma zama te za te te ꞌre arowairébé.
20 Tawamhã Zezusi hã isiré ꞌre inomro mono norĩ wi ma tô sawi pese, niꞌwai ma te te wasuꞌu zaꞌra tõ da, õ hã Danhoꞌreptuiꞌwa na hã.
Zezusi hã, tidâꞌâzém na duré apâ za ihâiwaꞌutuzém na isiwasuꞌuzé
21 Tawamhã ta hawim haré Zezusi hã ma tô ãma sãnaꞌrata, sõꞌawi ꞌre isiwasuꞌu mono zém na hã isiré ꞌre inomro mono norĩ ma, tô iꞌru zahi zarina za imorĩ na hã Zeruzalẽ u hã, duré tame za te te irobzépata zaꞌẽtẽ na hã, Zudeu norĩ ma rotiꞌwa norĩ nhibꞌratamhã, sasedoti norĩ ma ipire norĩ nhibꞌratamhã duré ꞌRe ihâimana uꞌâsi mono nhimiroti zahi na dama rowahutuꞌwa norĩ nhibꞌratab zama, za da te iwĩrĩ na hã, duré siꞌubdatõ bâdâ ãma siꞌutõrĩ õ ré, za apâ ihâiwaꞌutu na hã.
22 Tawamhã Pedru hã ma tô saprõ, tisiré norĩ nhiti. Tame ma tô mreme tete na tãma tinha, ãne:
— ꞌRe ihâimana uꞌâsi mono te te aima iꞌrui õ da si! Ãne hã niwa aima iromhâimana da hã, mare di za!
23 Tawamhã Zezusi hã ma tô sô aipiꞌra. Ãne te tinha, Pedruhu ma:
— Satanasi, ĩnhiti aimorĩ! A hã ẽne bâdâdi wa, te te ꞌre idaꞌmarõpãrĩ zaꞌra mono ne, te ĩma aihâiba. A hã, ꞌRe ihâimana uꞌâsi mono nhimirosaꞌrata zarina rosaꞌrata õ di. Tiꞌai ãma danhimirosaꞌrata na te irosaꞌra.
24 Tawamhã Zezusi hã te duré tinha, isiré ꞌre inomro mono norĩ ma, ãne:
— Niꞌwa hã ĩzarina ꞌre morĩ da, te te sima wẽ wamhã, poꞌre siꞌâri te te sima ꞌre iwẽ mono zéb zarina ꞌre ihâimana mono zém na hã, wedepoꞌo nhonhiꞌrãmi te te âri, ĩzarina morĩ da.
25 E marĩ wa. Niꞌwa hã sisõꞌreptu da wamhã, te za tihâimanazé hã simini. Duré niꞌwa hã ĩꞌuꞌâbâ tihâimanazé te te simini wamhã, te za sõpẽtẽ dahâimanazé tô sena hã.
26 E marĩ da bâ, niꞌwai ma uburé marĩ tiꞌai ꞌremhã tãma ꞌre hâimana zaꞌra mono nherẽ, tô sena dahâimanazé hã te te simini wamhã. E marĩ na te te waꞌâbâ da bâ, te te isiminizé, apâ ihâimanazé tãma ꞌre hâimana mono da hã.
27 Tiꞌai ãma Dasiré Ipodo hã, niwamhã te za wei mo tiwaihuꞌu pese ré, tite hâiwa hawi romhuriꞌwa norĩ ré. Tawapsi, te za awaꞌâ dahâiba mono bâ, uburé marĩ da te tãma ꞌre iꞌmanharĩ zaꞌra mono zéb zarina.
28 Tô sena wa za aima waihuꞌu zaꞌra waꞌwa, ãne: Niꞌwam norĩ hã te ãme tihâimana zaꞌra, dâꞌâ zaꞌra õ ré, Tiꞌai ãma Dasiré Ipodo hã Uburé Danhibꞌapito uptabi na, za apâ we imorĩzé hã, te te iꞌmadâꞌâ zaꞌra hã.
Ĩwaꞌõtõ piꞌreba watsuꞌu mono
^ 16:19 ꞌridawazé “ꞌridawazé” hã siptete na ꞌre ihâimana mono zé, duré isimiroti pire te wasuꞌu.
