Salmu 32:1-11
Davihi nhimiꞌuiꞌéré
32 Tãma ꞌre rowẽ uptabi zaꞌra mono di, iwasédé ꞌRe ihâimana uꞌâsi mono te te ãma ꞌre iꞌaꞌmadâꞌâ mono õ norĩ ma hã, iwasédé te te tãma ꞌre iꞌapari mono norĩ ma hã!
2 Tãma ꞌre rowẽ uptabi zaꞌra mono di, Uburé Danhibꞌapito iwasédé te te ãma ꞌre isaꞌra mono õ norĩ ma hã, duré senaiꞌõ na ꞌre ihâimana zaꞌra mono õ norĩ ma hã!
3 Ĩwasété na ꞌre ĩsiwẽꞌõ mono õ ré hã, bâtâ bâre ꞌre ĩsiwaꞌõ mono zém na hã wa ꞌre ĩnhibꞌuwa pusi.
4 ꞌRe ihâimana uꞌâsi mono, bâtâ na hã duré mara na hã, ma tô asibꞌrata na ĩꞌazâri pirezém na hã ĩma irobꞌmanha.Ĩnhiptetezé hã ma iwi aiꞌutõ, wahum na rowaꞌro ꞌre isaꞌwari mono ne.
5 Tawamhã ĩwasété na wa tô aima ĩsiwẽꞌõ. Ĩnhimiꞌmanharĩ wasété zé hã te aiwi simiꞌuri õ di. Ĩwasédé hã te aima wasuꞌu da, wa tô ĩsima rowairébé.Tawamhã a hã uburé ĩwasédé hã ĩꞌãma ꞌre aꞌmadâꞌâ mono õ di oto.
6 Tahawa, uburé sena na aiꞌãma ꞌre inomro mono norĩ hã, ropire sô ꞌre wairébé mono sidâpâsi, aima ꞌre imreme zusi mono da si, ibâre hã.Ãne wamhã, â sisasisi wawẽ ꞌre ipusi mono hã robzépatazé we ꞌre ne mono wamhã, te te ꞌre iꞌuwe zaꞌra mono da hã mare di za.
7 A hã ĩte ꞌre ĩsimaꞌuri mono zé.A hã te za duré roꞌwaꞌrutu hawimhã ꞌre ĩzani uꞌâsi mo.Asiminhoꞌreptuzém na wa ĩnhoꞌre ꞌrãihâ na ꞌre ĩnhoꞌre, ĩꞌwawimhã ꞌre aimapa mono wa.
8 Uburé Danhibꞌapito te ĩma tinha ãne:“Bâdâdi iwẽ na wa za ãma aima te ꞌre rowasuꞌu, nimomo ꞌre iꞌane mono da hã.Wa za te ꞌre asaprõni uꞌâsi.Duré wa za te ꞌre aiꞌmadâꞌâ pese.
9 Awaru hã, duré awaru poꞌre pore, isadaiꞌré ꞌre, isiꞌuwazi nhiꞌoto na si duré iwata wazizém na si, da te ꞌre iwaratu zaꞌra mono, isimizaꞌreseꞌõ ne, tane a hã asimizaꞌrese ãna ꞌre aihâimana mono tõ.”
10 Iwasété norĩ hã te te ꞌre robzépata zaꞌẽtẽ zaꞌra mono di.Tane nherẽ, Uburé Danhibꞌapito, te te sina ꞌre iꞌumnhasi zaꞌra mono norĩ hã te iꞌwawi ꞌre simapa zaꞌra.
11 Uburé sena na ꞌre iꞌaihâimana zaꞌra waꞌaba mono norĩ, asima ꞌre rowẽ uꞌâsi zaꞌra waꞌaba mono!Duré ato sina ꞌre aihâimana zaꞌra waꞌaba mono, Uburé Danhibꞌapito marĩ iwẽ te te ꞌre iꞌabꞌmanharĩ mono zéb zarina!Aipẽꞌẽ to sina maꞌãpé ꞌre asõꞌre zaꞌra waꞌaba mono, uburé isimiroti wapari pese ꞌwa norĩ hã!
