DAMAMA DURÉ DANA MA
8: Datsitsanhodzé
E MARĨ TE WATSUꞌU.
Damama duré dana norĩ ãma tsitsanho dzaꞌra wamhã ꞌre ĩhöimana dzaꞌra mono da tsi te te ĩrowahutu dzaꞌra dzéb dzarina. Ãma ĩtsimiré, atsõrõwa ãma atsãmra nherẽ niꞌwa te te ꞌridawa taꞌa wamhã, aiꞌra te wapa dawi waptẽrẽ ré da te aiwatsuꞌu da ĩꞌatsãmra õ na hã. Ãne wamhã, aiꞌra te dza atsidzutsi atsadawa nhipetse na.
“Niꞌwam norĩ te nharĩ dzaꞌra: ‘Ĩ̱mreme na ꞌmanharĩ. Tadzahã te ĩꞌmanharĩ na ꞌmanharĩ tõ.’ Tahã tsadai õ di aiꞌuté norĩ ma. Õ norĩ hã tsimidzaꞌretse dzaꞌra di, te robꞌmadöꞌö dzaꞌra wa te ĩꞌmanharĩ dzaꞌra dzé hã duré wa te ĩnharĩ dzaꞌra dzé hã. Wa te ĩrowahutu dzaꞌra dzéb dzarina wa te ꞌre ꞌmanharĩ dzaꞌra mono õ wamhã, aiꞌuté norĩ te dza tô wama nharĩ dzaꞌra.” — David.
ROPOTOꞌWAI MREME NHIMIROTI: ‘Marĩ na dawi ꞌre danhiptsaihuri dzaꞌra mono tõ da, dama ꞌre roti dzaꞌra waꞌaba mono nherẽ, te a norĩ waꞌaba dzama marĩ na dawi ꞌre atsiptsaihuri dzaꞌra waꞌaba mo.’ — Romanos 2:21.
E MARĨ WA WẼ DI.
Damama duré dana norĩ te te rétsi waihuꞌu petse dzaꞌra di aiꞌuté duré ĩhöibatém norĩ ĩtsiré romnhoréꞌwa norĩ nhipai u. Taha wa, a norĩ waꞌwa hã damama duré dana norĩ, danhipai u pawapto waihuꞌu petse dzaꞌra waꞌaba di aiꞌra norĩ ĩbö te te ꞌmanharĩ dzaꞌra da. Tadzahã tô tsena ꞌre ĩꞌmanharĩ dzaꞌra waꞌaba mono da tsi ĩrowahutu dzaꞌra waꞌaba dzéb dzarina.
“Ãté tiha na wa natsi ãma tsahu dzaꞌra waꞌra norĩ ma wa te waihuꞌu dzaꞌra ãna te te wawapari dzaꞌra dzô. Tadzahã mitsi nherẽ wa te ꞌmanharĩ dzaꞌra õ wamhã wa te ĩnharĩdzéb dzarina, te dza wawatsuꞌu dzaꞌra ĩꞌupa na hã. Aiꞌuté norĩ te te ꞌre ꞌmadöꞌö dzaꞌra uburé wa te ꞌre ĩꞌmanharĩ dzaꞌra mono dzé hã, wa te waihuꞌu dzaꞌra õ newa.” — Nicole.
ROPOTOꞌWAI MREME NHIMIROTI: ‘Höiwa hawi rowaihu ĩwẽ hã . . . tsena na dama ĩhöimana.’ — Tiago 3:17.
E MARĨ TE DZA ĨꞌMANHA.
Rotsaꞌrata dahöimana prédubdzé atsima ĩpitsutu na hã. E marĩ te natsi ĩꞌmadö ĩropoto na atsima robdze da. E niha te ꞌre aihöimana aimro ma duré aiꞌra norĩ ma. E niha atsiwaihuꞌu norĩ höimanadzé. E te daꞌãma ĩrotsaꞌra. Tawamhã ꞌröwi te dza atsitsadanha: “E wa hã, wa ꞌre ĩ̱höimana te ĩ̱tsima ĩwẽ dzéb dzarina ĩ̱ꞌra ꞌre höimana mono da.”
“Wa hã duré ĩ̱mro, waꞌra norĩ ma wa te ꞌrudzahi õ di dahöimana prédubdzé wa te ĩtsadawa dzamarĩ õ dzarina ꞌre höimana dzaꞌra mono da.” — Christine.
Dama atsiꞌruiwapari ãma upai wamhã. Aiꞌra norĩ ma aiwaihuꞌu petse di aihöimana upa na hã. Aimro ma niwamhã aiꞌra norĩ ma atsiꞌruiwapari wamhã marĩ na upai wamhã, te dza ãma atsanho wẽ aihöimana wapu na duré tsena na aihöimanadzém na.
“Waꞌupadzém na ĩwatsiwatsuꞌu dzaꞌra da tsi duré dama ĩwatsiꞌruiwapari dzaꞌra da tsi. Ãnei õ wamhã, waꞌra norĩ hã, tahã te te ꞌmanharĩ dzaꞌra õ di dza duré.” — Robin.
“Wa norĩ hã, damama wamhã duré dana wamhã, waꞌra norĩ wa te danhipai u rétsi waihuꞌu petse dzaꞌra di. Tãma ãma ĩwatsitsanho dzaꞌra dzé hã ĩpire uptabi, waꞌra norĩ hã bötö bö te te waꞌmadöꞌö dzaꞌra wa. Wahöimanadzé aiwa ĩhöiwarobo ĩtsitowa ne da te tsõré dzaꞌra da, duré aiwa romnhoré wa te natsi dama ĩrowahutu dzaꞌra ne.” — Wendell.
