Danhimirotsaꞌrata mono rowaptẽrẽ ãma
“Te rowaptẽrẽ wamhã, ĩ̱ma hã Ropotoꞌwa ĩ̱ꞌrata ĩhöimana ne, te te ĩ̱pa tété tsina duré te te ĩ̱dzaprõni tsina bödödi ĩwẽ ãma.” — MARÍA.
“Ĩ̱mro ma tô ꞌwapé câncer 13 wahub ré, taha parimhã ma tô ĩ̱wi aiꞌutõ. Wa aré natsi rowaptẽ Ropotoꞌwai wi ꞌröwi ĩ̱pẽꞌẽ na bötö tsidöpötsi. Ĩ̱ma hã Ropotoꞌwa te natsi ĩ̱wapa duré te te tsadaihuꞌu petse di te ĩrobdzépatadzé hã. Tahã te ĩ̱ma rowẽ wadze.” — RAÚL.
“Rowaptẽrẽ danhibdzari ĩwẽ uptabi Ropotoꞌwai hawimhã dama.” — ARNE.
María, Raúl, Arne, duré ĩꞌahö norĩ ma hã rowaptẽrẽ danhibdzari ĩwẽ uptabi. Rowaptẽrẽ na, te robdzanhamri dzaꞌra Ropotoꞌwai ma, te ãma tiwata dzaꞌra duré te tiwi waptẽrẽ dzaꞌra ĩtsimipawaptobdzéb dzô. Te tsadzei petse dzaꞌra Bíblia te te ĩnharĩ na hã: ‘ꞌRe ĩhöimana uꞌötsi mono te te tsima ꞌre ĩwẽ mono dzéb dzarina, tsiwaꞌru marĩ hã wa te tiwi ꞌre waptẽrẽ dzaꞌra mono wamhã, te dza te te wama ãma ꞌre aꞌuwaimrami.’ — 1 João 5:14.
Daꞌahö na te rotsaꞌrata dzaꞌra ni rowaptẽrẽ marĩ dai õ na hã. Aibö Steve na ĩtsitsi ãne duré ma tô rotsaꞌrata. Te tinha: “Ĩ̱ꞌãma hã 17 wahu wamhã, tsiꞌubdatõ ĩ̱tsiwaihuꞌu norĩ ma ĩ̱wi aiꞌutõrĩ dzaꞌra. Mitsi ma tô dörö robduri na duré maparane ma tô tidöꞌö dzahuré öporé na. Wa aré natsi tsadanha Ropotoꞌwa rowaptẽrẽ na: ‘E marĩ wa tahã ma watobro.’ Tadzahã te te ĩ̱dzadaꞌöbö õ di. Tawamhã, wa rotsaꞌrata ‘e marĩ da bété rowaptẽrẽ’.
Steve ne daꞌahö na te rotsaꞌrata dzaꞌra ni Ropotoꞌwa te te ĩtsadaꞌöbö õ na hã ĩtsimirowaptẽrẽ dzaꞌra. Taha wa, te rowaptẽrẽ dzadzöri dzaꞌra ni. Ĩhöiba amo norĩ rowaptẽrẽ na tsiwatsuꞌu dzaꞌra õ di duré Ropotoꞌwai ma. Te rotsaꞌrata dzaꞌra: “Ropotoꞌwai ma waihuꞌu petse di oto ĩ̱dzô ĩwatobrodzé duré ĩ̱wi tsô ĩrowaptöꞌödzé, tawamhã e marĩ da wa dza tãma watsuꞌu rowaptẽrẽ na.”
Niꞌwam norĩ ma hã, Ropotoꞌwa te te wapari õ di ĩtsimirowaptẽrẽ dzaꞌra hã ĩwatsédé duréihã te te ĩꞌmanharĩ dzaꞌra dzéb uꞌöbö. Piꞌõ Jenny na ĩtsitsi te tsiwatsuꞌu: “Wa ĩ̱tsiꞌmadö ĩ̱watsété na Ropotoꞌwai ma duré wa ĩ̱tsiꞌruiwapa tiha ĩwatsédé ahö na te ĩꞌmanharĩ na. Taha wa, ĩ̱ma hã Ropotoꞌwa te te ĩ̱wapari õ di dza.”
Bété a hã. E a hã te natsi ĩrowaptẽ Ropotoꞌwai wi e aima hã rowaptẽrẽ marĩ dai õ di. Aima wẽ di dza waihuꞌu wamhã Ropotoꞌwai mreme te te ĩnharĩdzém na rowaptẽrẽ ãma hã. Wa dza umnhatsi dzaꞌra ni Ropotoꞌwai mreme te te ĩnharĩdzém na. a Te tsadaꞌö dadzadanharĩ norĩ ãne na hã:
-
E Ropotoꞌwa tô tsena te wapa wanhimirowaptẽrẽ.
-
E marĩ wa, nimahã rowaptẽrẽ norĩ te te tsadaꞌöbö õ di.
-
E marĩ, wa dza ꞌmanha Ropotoꞌwa ĩ̱nhimirowaptẽrẽ te te wapari da.
-
E niha rowaptẽrẽ te dza ĩ̱pawapto.
a Ropotoꞌwai mreme ꞌremhã ĩré hã Ropotoꞌwai ma romhuriꞌwa norĩ nhimirowaptẽrẽ ahö na. Ta norĩ ꞌremhã Jesus Cristo nhimirowaptẽrẽ norĩ. Bíblia waꞌõtõ ꞌremhã dama ĩwaihuꞌu pe rowatsuꞌu ĩꞌrata na hã ĩré hã rowaptẽrẽ norĩ 150 nhipai u.
