Kubalisa uYohane 6:1-71
6 Emva koko, uYesu wemka waya phesheya koLwandle LwaseGalili, olukwabizwa ngokuba yiTibheriya.+
2 Wayelandelwa ngabantu abaninzi,+ kuba bebona imimangaliso emikhulu awayeyenza ngokuphilisa abantu abagulayo.+
3 Ngoko uYesu wenyukela entabeni, waza wahlala phantsi nabafundi bakhe.
4 Ngelo xesha kwakusele kusondele iPasika,+ itheko lamaYuda.
5 Uthe uYesu akubona abantu abaninzi besiza kuye, wathi kuFilipu: “Singazithenga phi izonka ukuze sityise aba bantu?”+
6 Wayithetha le nto kuba efuna ukubona ukuba uza kuthini, kuba wayeyazi into awayesele eza kuyenza.
7 UFilipu wathi: “Nokuba singathenga izonka ngeedenariyo* eziyi-200, size sinike ngamnye intwana, azinakubanela.”
8 Omnye umfundi wakhe, uAndreya, umntakwabo Simon Petros, wathi kuye:
9 “Kukho inkwenkwana apha enezonka ezihlanu zerhasi neentlanzi ezimbini ezincinci. Kodwa zingabanela njani abantu abaninzi kangaka?”+
10 UYesu wathi: “Bahlaliseni phantsi.” Yayininzi indawo enengca apho, ngoko abantu bahlala phantsi. Phakathi kwabo kwakukho amadoda amalunga ne-5 000.+
11 UYesu wazithatha ezo zonka, wabulela, waza wazinika abo bantu babehleli phantsi; wenza into efanayo nangezo ntlanzi zincinci, batya banela.
12 Emva kokuba betyile bahlutha, wathi kubafundi bakhe: “Qokelelani ukutya okuseleyo, kungabikho nentwana elahlwayo.”
13 Ngoko bakuqokelela, bagcwalisa iibhaskithi eziyi-12 ngamaqhekeza awayeshiywe ngabo babesitya ezo zonka zihlanu zerhasi.
14 Xa abantu babona lo mmangaliso, bathi: “Ngokuqinisekileyo lo, ngulo Mprofeti ekwakuthiwe uyeza ehlabathini.”+
15 UYesu wayesazi ukuba babezimisele ukumbamba bamenze ukumkani, ngoko waphinda wemka+ waya entabeni yedwa.+
16 Kwathi kwakuhlwa, abafundi bakhe behla baya elwandle,+
17 bakhwela isikhephe, besiya ngaphesheya kolwandle eKapernahum. Kwakusele kumnyama, wabe uYesu engekafiki.+
18 Ulwandle lwalusilwa, kuba kwakuvuthuza umoya onamandla.+
19 Kodwa emva kokuba behambe malunga neekhilomitha ezintlanu okanye ezintandathu,* bambona uYesu ehamba phezu kolwandle, esondela ngasesikhepheni, boyika.
20 Kodwa wathi kubo: “Ndim; sanukoyika!”+
21 Ngoko ke bakuvuyela ukumkhwelisa esikhepheni, ibe kungaphelanga xesha lide bafika kuloo ndawo babesiya kuyo.+
22 Ngemini elandelayo, abantu ababeshiyeke ngaphesheya kolwandle, babona ukuba isikhephe simkile, kushiyeke nje esincinci. Babesazi nokuba uYesu wayengahambanga ngesikhephe nabafundi bakhe, kodwa babehambe bodwa.
23 Kwafika izikhephe ezazivela eTibheriya, kufutshane nendawo ababetyele kuyo isonka emva kokuba iNkosi ibulele.
24 Ngoko bathi abo bantu bakubona ukuba uYesu nabafundi bakhe abekho apho, bakhwela kwezo zikhephe baya eKapernahum beyokumfuna.
25 Xa bamfumana phesheya kolwandle, bathi kuye: “Mfundisi,*+ ufike nini apha?”
26 UYesu wathi kubo: “Ndiyaniqinisekisa ukuba, anindikhangeli kuba nibone imimangaliso endiyenzayo, kodwa nindikhangela kuba nitye izonka, nanela.+
27 Sanukusebenzela ukutya okutshabalalayo, kodwa sebenzelani ukutya okungatshabalaliyo, okunika ubomi obungunaphakade,+ aza kuninika kona uNyana womntu; kuba uyathandwa* nguThixo, uTata wakhe.”+
28 Bathi kuye: “Simele senze ntoni ukuze senze izinto ezithandwa nguThixo?”
29 UYesu wathi kubo: “UThixo uthanda ukuba nizikholelwe nize nizenze izinto ezithethwa ngulowo amthumileyo.”+
30 Emva koko bathi: “Nguwuphi ummangaliso oza kusenzela wona,+ siwubone, ukuze sikukholelwe? Uza kwenza ntoni?
31 Ookhokho bethu batya imana entlango,+ kanye njengokuba kubhaliwe kwathiwa: ‘Wabanika isonka esivela ezulwini, batya.’”+
32 Ngoko uYesu wathi kubo: “Ndiyaniqinisekisa ukuba, ayingoMoses owaninika isonka esivela ezulwini, kodwa isonka sokwenene esivela ezulwini nisinikwa nguTata.
33 Kuba isonka sikaThixo ngulowo uhla evela ezulwini aze alinike ubomi ihlabathi.”
34 Ngoko bathi: “Nkosi, hlala usinika esi sonka.”
35 UYesu wathi kubo: “Ndim isonka sobomi. Nabani na oza kum, soze alambe, ibe nabani na okholwayo kum aze azenze izinto endizithethayo, soze anxanwe.+
36 Kodwa ke njengoko benditshilo kuni, nindibonile kodwa anikholwa.+
37 Bonke endibanikwa nguTata baza kuza kum, ibe soze ndimgxothe umntu oza kum;+
38 kuba ndehla ndivela ezulwini+ ndingezanga kwenza ukuthanda kwam, kodwa ukuthanda kwaLowo undithumileyo.+
39 Ukuthanda kwaLowo undithumileyo kukuba ndingalahlekelwa nangomnye kwabo andinike bona, kodwa ufuna ndibavuse+ ngomhla wokugqibela.
40 Kuba ukuthanda kukaTata kukuba, wonke umntu omamkelayo uNyana, akholwe aze azenze izinto azithethayo, afumane ubomi obungunaphakade,+ ibe ndiza kumvusa+ ngomhla wokugqibela.”
41 Ngoko amaYuda akhalaza kuba ethe: “Ndim isonka esehla sivela ezulwini.”+
42 Athi: “AyingoYesu na lo, unyana kaYosefu, onotata nomama esibaziyo?+ Yenzeka njani ke into yokuba athi, ‘Ndehla ndivela ezulwini’?”
43 UYesu wathi kuwo: “Yekani ukukhalaza.
44 Akukho mntu unokuza kum engatsalwanga nguLowo undithumileyo, uTata,+ ibe ndiza kumvusa ngomhla wokugqibela.+
45 Kubhaliwe kwiincwadi zabaProfeti kwathiwa: ‘Bonke baza kufundiswa nguYehova.’*+ Wonke umntu omvileyo uTata, waza wazamkela iimfundiso zakhe, uyeza kum.
46 Loo nto ayithethi kuthi kukho umntu ombonileyo uTata.+ Akukho mntu umbonileyo uTata, ngaphandle kwalowo uvela kuye.*+
47 Ndiyaniqinisekisa ukuba, nabani na okholwayo uza kufumana ubomi obungunaphakade.+
48 “Ndim isonka sobomi.+
49 Ookhokho benu batya imana entlango, kodwa bafa.+
50 Kodwa nabani na otya isonka esehla sivela ezulwini, soze afe.
51 Ndim isonka esiphilayo esehla sivela ezulwini. Nabani na otya esi sonka uza kuphila ngonaphakade; ibe isonka endiza kumnika sona yinyama yam, ukuze abantu bafumane ubomi.”+
52 Emva koko amaYuda akhalaza esithi: “Angathini lo mntu ukusityisa inyama yakhe?”
53 Ngoko uYesu wathi kuwo: “Ndiyaniqinisekisa ukuba, ukuba aniyityi inyama yoNyana womntu, nisele negazi lakhe, anizukubufumana ubomi.*+
54 Nabani na otya inyama yam, asele negazi lam, uza kufumana ubomi obungunaphakade, ibe ndiza kumvusa+ ngomhla wokugqibela;
55 kuba inyama yam ikukutya kokwenene, negazi lam lisisiselo sokwenene.
56 Lowo utya inyama yam, asele negazi lam, uhlala emanyene nam, ibe nam ndihlala ndimanyene naye.+
57 Kanye njengokuba uTata ophilayo endithumile, ibe nam ndiphila ngaye, nalowo utya inyama yam uza kuphila ngam.+
58 Siso ke esi isonka esehla sivela ezulwini. Asifani nesonka esatyiwa ngookhokho benu kodwa bafa. Nabani na otya esi isonka uza kuphila ngonaphakade.”+
59 Ezi zinto wazithetha njengoko wayefundisa kwindlu akhonzela kuyo amaYuda* eKapernahum.
60 Bathi bakuyiva le nto, abaninzi kubafundi bakhe bathi: “Iyothusa le nto ayithethayo; asinakumamela le nto thina.”
61 UYesu wayesazi ukuba abafundi bakhe bayakrokra, ngoko wathi kubo: “Iyanikhathaza na le nto?
62 Kobeka phi ke xa nibona uNyana womntu enyukela apho wayevela khona?+
63 Ngumoya kaThixo onika ubomi;+ imizamo yabantu ayincedi nganto. Izinto endizithethe kuni zisuka kumoya oyingcwele, ibe zinika ubomi.+
64 Kodwa abanye benu abazikholelwa izinto endizithethayo.” Kaloku uYesu wayesazi kwasekuqaleni ukuba ngoobani ababengamkholelwa, emazi nalowo wayeza kumjikela.+
65 Waphinda wathi: “Yiloo nto ndithe kuni, akukho mntu unokuza kum ngaphandle kokuba uTata ufuna eze.”+
66 Ngenxa yoko, abaninzi kubafundi bakhe babuyela kwizinto zabo,+ bayeka ukumlandela.
67 Ngoko uYesu wathi kubapostile bakhe abayi-12: “Nani nifuna ukundishiya?”
68 USimon Petros wamphendula wathi: “Nkosi, singaya kubani,+ inguwe nje onamazwi anika ubomi obungunaphakade?+
69 Siyayikholelwa ibe siyayazi into yokuba wena unguLowo Ungcwele kaThixo.”+
70 UYesu wathi kubo: “Nikhethwe ndim noyi-12, andithi?+ Kanti omnye wenu ungumtyholi.”*+
71 Wayethetha ngoYudas unyana kaSimon Skariyoti; kuba yena wayeza kumjikela, nangona wayengomnye wabapostile abayi-12.+
Umbhalo osemazantsi
^ Funda Isihlomelo B14.
^ Ngokoqobo, “malunga namabala emidlalo aseRoma ayi-25 okanye ayi-30.” Funda Isihlomelo B14.
^ Okanye “Rabhi.”
^ Ngokoqobo, “ubekwe isitampu.”
^ Funda Isihlomelo A5.
^ Ngokoqobo, “kuThixo.”
^ Ngokoqobo, “aninabo ubomi kuni.”
^ Okanye “kwindawo enabantu abaninzi.”
^ Okanye “ungumnyelisi.”
