პირველ ტიმოთე 4:1-16
4 ღორონთიშ შთაგონებულ სიტყვა არგამათ იჩიებ, ნამდა გემკურს დრო დო ნამთინე გეგნურთანს რწმენას, ქუმურჩქილუანს დემონურ გურაფეფს დო ტყურა ამბეეფს, ნამუთ თეშ იძირედას იჸი ითამ ღორონთშე რე;
2 თინეფ სინდისდაღილ მეტყურეეფიშ აფერისტობას ქუმურჩქილუანა,
3 მით ხალხის უვარიენა ოსურიშ მოჸუნაფას ვარდა გათხუალას დო უზოჯუნა, ვა ჭკუმან ნამთინე ოჭკუმალ, ნამუთ ღორონთიქ თიშო გაჭყჷ, ნამდა მარდულობათ ჭკუმან თინეფქ, მიდგას რწმენა დო სიმართლეშ ზუსტ რჩქინა უღუნა.
4 ღორონთიშ გოჭყაფილ ირფელ ჯგირ რე დო მარდულობათ ქოჭკუმუნან-და, მუთუნშე ოკო ვა თქუან ვარია,
5 მუშენდა ოჭკუმალს ღორონთიშ სიტყვა დო ლოცვა წმინდათ გინაშქვანს.
6 ჯიმალეფს თეს ქელუჩანქ-და, ქრისტე იესოშ ჯგირ მსახურ იჸუაფუქ, რწმენაშ სიტყვეფით დო თი დიდებულ გურაფათ რდილ, ნამდგას ზუსტას მეჸუნქ.
7 ვა მურჩქილუა თინეფს*, მით ღორონთიშ მალანძღარ ტყურა ამბეეფს იჩიებუნა. თეშ გინაწონს, მიზანო გიღუდას, რდე ღორონთიშ ართგურ დო თეს ირნერო გეუჯგუშე*.
8 ფიზიკურ ვარჯიშ თეშიო-თაშიო ჯგირ რე, მარა ღორონთიშ ართგურობა ირნერო ჯგირ რე, მუშენდა თინა მოხვარუნა, მიბღათ ხვამა ქოთ ასე დო ქოთ უკულ.
9 მუდგას იფჩიებუქ, სანდო დო სარწმუნო რე.
10 ზუსტას თეშ გურშენ რე ფხანდენთ დო დუდის ვა ბზოგენთინ, მუშენდა ცოცხალ ღორონთიშ იმენდ მიღუნა, ნამუთ ირნერ ადამიანიშ, განსაკუთრებულო ართგურეფიშ, მარსხებელ რე.
11 ირიათო ქუდაგურე თინეფს დო ქელუჩ თე ირფელიშ კეთება.
12 ახალგაზრდა რექინ თიშ გურშენ მითინქ ვაირდას. ართგურეფს მაგალით ქიმეჩ სიტყვას, საქმეს, ჸოროფას, რწმენას დო სიწმინდეს.
13 ჩქიმ მოულაშახ შურ დო გურით უკითხ ხალხის, ქელუჩ ჯგირიშ კეთება დო ოგურე.
14 ვეგიჭყოლიდუა ძღვინ, ნამდგაქ უხუცესეფიშ საბჭოშ ხეშ გედვალათ მუგაჩ, მუჭოთ თენა სქანიშ გურშენ რდჷ ნაწინასწარმეტყველებ.
15 იფიქრ თე ირფელშე, მთელ გურით მიაჸუნ თინეფს დო არძა ქოძირუნს სქან წიმი ულას.
16 ირიათო ქიდეკვირ სქან დუდის დო თის ხოლო, მუს დო მუჭო ოგურუანქ, ირო თაშ მიქცი დო ქოთ სქან დუდის ირსხენქ დო ქოთ მარჩქილეეფს.
სქოლიოეფ
^ პირდაპირ თარგმან — „დედიბეფს“.
^ თაქ გიმორნაფილ ბერძნულ სიტყვა გულისხმენს რთულ ფიზიკურ ვარჯიშეფს, ნამდგას სპორტსმენეფ ორთუნა.
