მოციქულ პავლეს ჯგირო არჩქილედ, სატანაშ პროპაგანდა მანგარ ოშკურანჯ რდუნ, მარა ბრელ ქრისტიან თაშ ვა ფიქრენდ. მაგალთო, კორინთის ნამთინე ქრისტიანს მუშ დუდიშ ნამეტანო ჯერდ. თინეფ ფიქრენდეს, ნამდა რწმენას მანგარო გერდეს დო დღას ვემკოლდეს ჭეშმარიტებაშე (1 კორ. 10:12). ათეშგურშენ პავლექ გაფრთხილ თინეფ: „მოშკურ, მუჭო გვერქ ოჩილითუ ევა მუშ მაზაკვალობათინ თეშ, თქვან გონებაქ ხოლო ვეგლელას დო ვედეთხუას ქრისტეს ოსკუნ ფერ ალალობას დო სიწმინდეს“ (2 კორ. 11:3).

პავლეშ სიტყვეფშე იძირე, მუსხით მნიშვნელოვან რე, ნამეტანო ვა ვორდათ ჩქინ დუდშა დაჯერებულ. ათეშენ, თქვან გონება დეცვათინ, ჯგირო გარჩქილედან ოკო მუსხით ოშკურანჯ რე სატანაშ პროპაგანდა.

მუ რე პროპაგანდა? თე კონტექსტის პროპაგანდა ნიშნენს ზუსტ ვარენ ფერ, ტყურა ინფორმაციაშ გიმორნაფას თიშო, ნამდა აკონტროლე ხალხიშ აზროვნება დო მოქმედება. პროპაგანდას ნამთინე თიცალ სიტყვეფით მიშინუანს, მუნერით რე „ტყურა, შეცთომაშა მიშაჸონაფა, მანიპულაცია, გონებაშ მართუა დო ფსიქოლოგიურო გენჭირა. ართ წიგნის ჭარ, ნამდა პროპაგანდა „ვა რე ეთიკურ დო სამართლიან, თეწკუმა ართო თინა საღამაკო რე“ (Propaganda and Persuasion).

მუსხით ოშკურანჯ რე პროპაგანდა? თინა მაწამალარ გაზცალ რე — ვეძირე, ვართ შურ უღუ დო ვა ბგინაფლენთინ თეშ წამალანს ჩქინ გონებას. ართ სპეციალისტ ვანს პაკერდი, ნამუთ ხალხიშ ქცევეფს ირკვიენსინ,  იჩიებ: „პროპაგანდა შურო აზრის ვა ვორეთინ თეშ მოქმედენს ჩქინწკუმა“. ხოლო ართ სპეციალისტ რაგადანს, ნამდა პროპაგანდას ხალხი „ადვილო მეჸუნს თიცალ ოშკურანჯ მოქმედებაშა“, მუნერით რე გენოციდი, ჩხუპი, რასიზმი, რელიგიურ დისკრიმინაცია დო შხვა გლახა მოქმედებეფი (Easily Led—A History of Propaganda).

კათას ქეშულებ დუმაღორან დო მიმოჩილითუან-და, სატანას მუსხით უმოსო შეულებ თეშ კეთება?! თინა ხომ ხალხიშ მოქმედებეფს თინეფიშ გოჭყაფაშ დღაშე ოკვირ?! ამდღა მთელ ქიანა სატანაშ ხეს რე. მუშ ტყურეფ გასიმუასინ თიშენ, შეულებ გეგმირინუას ირფელ, მუთ თე ქიანას რე (1 იოან. 5:19; იოან. 8:44). სატანაქ თეშ აკურღ ხალხის აზროვნება, ნამდა შეცთომაშა მიშაჸუნს მთელ მსოფლიო (2 კორ. 4:4; გამოცხ. 12:9). მუჭო შეილებნა წოხოლე ქეწუდირთათ დო გიორჯიგინათ თიშ პროპაგანდას?

პროპაგანდაქ ჩქინწკუმა ვემოქმედასინ, იესოქ თქუ: „ქიგეგენთ ჭეშმარიტებას დო ჭეშმარიტება გუგათავისუფლენა“ (იოან. 8:31, 32). ჩხუპიშ დროს ჯარიშკოჩის ოსაჭირ სწორ ინფორმაცია, ნამდა ნტერქ ვა დაღორას დო ვენოლას თიშ ხეს. თეგვარო ჩქი ხოლო მოსაჭირნა სანდო ინფორმაცია, ვადმაღორან ჩქინ ნტერქ დო ვამმოჩილითუან. იეჰოვა მარზენა სანდო ინფორმაციას მუშ სიტყვა ბიბლიაშე, სოვრეშეთ ბგებულენთ, მუჭო მივერუათ სატანაშ პროპაგანდას (2 ტიმ. 3:16, 17).

მუშო ოკო რაგად, სატანას ჯგირო უჩქ თენა. ათეშენ, გიმირინუანს თე ქიანას, ნამდა გურ გემიჸოთან ბიბლიაშ კითხირშა დო გურაფაშა. ვემკაბუნათ სატანაშ თე ანკესის (ეფეს. 6:11). ბოლოშა ქინანჭით ჭეშმარიტებას (ეფეს. 3:18). მართალ რე, თეშო დიდ მონდომა რე საჭირო, მარა ვაგგოჭყორდან ართ მაჭარალიშ, ნოამ ჩომსკიშ სიტყვეფქ: „მითინ ვაცად თქვან ტვინ ჭეშმარიტებათ გეიოფშას. თენა თქვანით ოკო აკეთათ“. თაშ ნამდა, „ირ დღას გურგედვალირო გეგმირკვით წმინდა წერილეფ“ დო გაფშით თქვან გონება ჭეშმარიტებათ (საქ. 17:11).

ვაგგოჭყორდან, ნამდა სატანას ვაკო სწორას იფიქრათ დო იმსჯელათ. მუშენ? ართ წიგნის ჭარ, ნამდა პროპაგანდა „არძაშ უჯგუშ საშვალება რე, აკონტროლე თიცალ კათა, მით ვეგმირინუანს ფიქრიშ დო მსჯელობაშ  უნარს“ (Media and Society in the Twentieth Century). თაშ ნამდა, უცფას ვედეჯერათ ირფელ, მუდგას გეგონენთინ (იგავ. 14:15). გეგმირინეთ ღორონთიშ მუნაჩემ ფიქრიშ დო მსჯელობაშ უნარ დო გემანგარით რწმენა (იგავ. 2:10—15; რომ. 12:1, 2).

ჩხუპიშ დროს გიმირინუანა პროპაგანდას, ჯარიშკოჩეფს ჩხუპშა გურ გეუჸოთან დო მორალურო ქუდარაგუანინ. ნტერს შეულებ პროპაგანდაშ გიმორნაფათ თინეფ ართიანს წაუკინდინუას ვარდა დაღორას დო გამაჩილითუას მთავარ ოჩხუპებელ ძალას. მუჭოთ ართ გენერალ იჩიებუნ, პირველ მსოფლიო ჩხუპის გერმანიაშ წაგებაშ ართ-ართ მიზეზ რდუ, „ნტერიშ პროპაგანდა, ნამუქით თეშ დაგიპნოზ ხალხი, მუჭოთ გვერი აგიპნოზენს კურდღელს“. სატანა ხოლო გიმირინუანს თეცალ ტაქტიკას, ნამდა გორთას ქრისტიანულ კრება. მაგალთო, თინა ოცად და დო ჯიმალეფს გილულუას ართიანწკუმა ურთიერთობა. თეს გეძინელ, იეჰოვაშ ორგანიზაციას გემკაჸათასინ თიშენ, შილებე ოფიქრებაფუას, ნამდა თექ უსამართობას უღუ ადგილი.

ვედეღორათ! ქიმეჩით ღორონთიშ სიტყვას საშვალება, სწორ შარას ქიგგოწურუან. მაგალთო, და დო ჯიმალეფწკუმა ართობა ვა ვოდინუათინ, ბიბლია ელამჩანა, „მთელ გურით ქუვაპატუათ ართიანს“ დო ხეთეშე მუვაგვარათ პრობლემეფი (კოლ. 3:13, 14; მათ. 5:23, 24). თინა მაფრთხილენა, ვემვოტუათ კრება დო ხვალე ვა დობსკიდათ ჩქინ დუდწკუმა (იგავ. 18:1). რჯერდან, ნამდა შეილებნა წოხოლე ქეწუდირთათ სატანაშ პროპაგანდას დო მერუათ თის. ქოკითხით თქვან დუც: „ბოლოს, მუჟამსით და დო ჯიმალეფწკუმა ურთიერთობაქ აკომცუნ, მიშ მოსაწონო მიბქცი ღორონთიშ დო ვარ სატანაშ?“ (გალ. 5:16—26; ეფეს. 2:2, 3).

ჯარიშკოჩი მუშ უნჩაშიშ ართგურ ვარენ-და, ჯგირო ვაჩხუპებე. ათეშენ ნტერ ოცად უნჩაშიშ ნდობა მეუდინუას ჯარიშკოჩის. თინეფქ შილებე თეცალ პროპაგანდა გიმირინუან: „ვენდათ თქვან უნჩაშეფს! უფლება ვემეჩათ თინეფს უბედრობა ქიგგოტახან დუც!“. უმოსო ქუდაჯერანინ, შილებე უნჩაშეფიშ შეცთომეფ გეგმირინუან. სატანა ხოლო თაშ იქციებ. თინა ირნერო ოცად მემდინუან  იეჰოვაშ ნდობა დო ვემვაჸუნათ თიშ ხემძღვანელობას.

მუჭო შეილებნა დუდიშ დაცვება? გინოჭყვიდილ გაფდან, ქუდოსკიდათ იეჰოვაშ ორგანიზაციას დო ხუჯ დუკინათ ღორონთშე დორინაფილ ხემძღვანელ ჯიმალეფს, თინეფიშ არასრულყოფილებაშ უმკუჯინუო (1 თეს. 5:12, 13). განდგომილეფ დო შხვა მეტყურეეფ იეჰოვაშ ორგანიზაციას დუც გიანთხუნა (ტიტ. 1:10). თინეფ მუდგას იჩიებნან, სიმართლეთ იძირედასინ ხოლო, „ხეთეშე ვედეჯერათ ირფელ“ (2 თეს. 2:2). მიაჸუნით რჩევას, ნამუთ მოციქულ პავლექ მეჩ ახალგაზრდა ტიმოთეს. ირიათო რშუდან, სოვრეშე გეგით ჭეშმარიტება დო ხეშე ვა გუტუათ თინა (2 ტიმ. 3:14, 15). ბრელ მიზეზ მიღნა, ვენდათ ართგურ დო გონიერ მონას, ნამუსით იეჰოვა ბოლო ოშ წანა რე გიმირინუანს, მუშ ხალხი ჭეშმარიტებაშ შარას ქიგიოწურუას თიშენ (მათ. 24:45—47; ებრ. 13:7, 17).

რშუდან, სატანა ირიათო ტყობაშე ვართ საქმეს, მინშა თინა შქურინაფაშ მეთოდის ხოლო გიმირინუანს. „თენა პროპაგანდაშ ართ-ართ უჯვეშაშ მეთოდ რე“, — ჭარ ართ წიგნის. (Easily Led—A History of Propaganda). მაგალთო, ასურელეფ მუნეფიშ ნტერეფს ხეშა ეშიჸოთანდეს „შკურინაფათ, ნამუთ პროპაგანდაშ ართ-ართ მეთოდ რე“, იჩიებ ბრიტანელ პროფესორ ფილიპ ტეილორქ. თეგვარო სატანა ხოლო გიმირინუანს კოჩიშ, თხოზინიშ, ღურაშ დო შხვადოშხვანერ შიშის, ნამდა ხეშა ქეშაიჸოთან დო მიგოტებაფუან იეჰოვაშ მსახურება (ეს. 8:12; იერ. 42:11; ებრ. 2:15).

ვემეჩათ უფლება სატანას, დუგოშკურინუან, მორალურო ქუდგორაგუან დო მიგოდინაფუან ართგურობა. იესოქ თქუ: „ვა გაშკურნან თინეფიშ, მით სხეულს ჸვილუნს დო მეტ მუთუნიშ კეთება ვეშულებ“ (ლუკ. 12:4). რჯერდან იეჰოვაშ დუნაპირებუშ, ნამდა ქიმერჩანა ძალას, „ნამუთ ჩვეულებრივშე უმოს რე“ დო ქიმგეხვარებნა ვადუშკურდათ სატანას (2 კორ. 4:7—9; 1 პეტ. 3:14).

მუშო ოკო რაგად, მინშა შილებე მუდგარენქ დუგოშკურინუან დო მორალურო ქუდგორაგუან. მარა ვაგგოჭყორდან გურიშ ემაკინალ სიტყვეფქ, ნამუთ იეჰოვაქ იესო ნავეშ სქუას უწუ: „გურ გემანგარ-მაქ! ვა დოიზარზალუას დო ვა გაშკურნას, მუშენდა სოდგა ვედენ, ირდიხას სკანწკუმა იჸუაფ იეჰოვა, სკან ღორონთი“ (იეს. 1:9). მუთუნ ოწუხებელქ ქუგაშუეს-და, ლოცვას ხეთეშე ქეჩით იეჰოვას არძა პრობლემაშ გურშენ. თე დროს შეილებნა დარწმუნებულ რდათ, ნამდა „ღორონთიშ მშვიდობა . . . დოთხილანს თქვან გურეფს დო გონებას“ დო შეგალებენა სატანაშ პროპაგანდას გიორჯგინათ (ფილ. 4:6, 7, 13).

ქორშუნანო, მუნერ პროპაგანდა გიმირინუ ღორონთიშ ხალხიშ ოშკურნაფალო რაბშაკექ, ასურეთიშ კოჩიქ? ფაქტიურო თიქ ისრაელეფს უწუ: მითინს ვემდაღინე თქვან დუდი ასურეთიშ ხეშე. თქვან ღორონც, იეჰოვას ხოლო მუთუნ ვაქიმნე თქვანო. თიქ მიწუეს, დიხას გუვასწორათ თე ქიანა. მარა მუჭო ელუკინ გურშა ღორონთიქ ისრაელეფს? „ვა გაშკურნას მორჩქილაფირ სიტყვეფშა, ნამუთით ასურეთიშ მეფეშ მსახურეფ მირდენდეს“ (2 მეფ. 18:22—25; 19:6). თეშ უკულ იეჰოვაქ მიდაშკუ ანგელოზი, ნამუქით ართ სერიშ დინახალე 185 000 ასურელ გოჭყვიდ (2 მეფ. 19:35).

ქოიჯინუნანო თიცალ კინოშა, სოდეთ ორწყეთ, კოცს შურო აზრის ვარენ თეშ აღორენა? ალბათ გაკორნედეს, ქუწითკო: „ვა დუჯერა! გაღორენა!“. წერმიდგინით, ნამდა ანგელოზეფ გირაგადნა: „ვამგაღორან სატანაშ ტყურეფქ!“.

ვა ურჩქილათ სატანაშ პროპაგანდას (იგავ. 26:24, 25). ურჩქილით იეჰოვას დო ირნერ საქმეს თიშ ნდობა გიღდან (იგავ. 3:5—7). ქიგიგონეთ თიშ რჩევა: „სქუა რდა ბრძენ დო გურ გამხარ“ (იგავ. 27:11). თაშ ქიმიქციებუთ-და, დეცვენთ თქვან გონებას.