მათეშ 13:24—26-ს მოჸუნაფილ რე იესოშ სიტყვეფი: „ზეციერ სამეფო გუ კოჩის, ნამუქით ჯგირ თასი დოთას მუშ ჸვანას. მუჟამსით კათას ლურდუნ, ქუმორთ თიშ ნტერქ, ქობალ თასუდუნ თექ ღვანძგილი ქიმშათას დო მიდართ. მუჟამსით თიქ ჯინჯო გერთუ დო გემკიღუნ, თიმწკუმა გაგმორჩქინდ ღვანძგილქ“. ნამთინე მაჭარალს, საეჭოთ მიორჩქუ, ნამდა თე მაგალით რეალურ ცხოვრებაშე რე ეჭოფილ. მარა რომიშ იურიდულ დოკუმენტეფშე იძირე, ნამდა თეცალ მუდგარენ სინამდვილეს მუთმოხვადუდ.

„რომიშ კანონით მანგიორიშ გინაგაფალო შხვაშ ჸვანას ღვანძგილიშ მიშათასუა დანაშაულო ითვალუდ. თე საკითხშენ კანონი არსებენდ დო თენა თის ოძირანს, ნამდა თეცალ მუდგარენ მართალო მუთმოხვადუდ“, — ჭარ ართ ბიბლიურ ლექსიკონს. კანონიშ მარჩქინე ალესტერ კერი ენწყუნს, ნამდა ჩქინ წანაკოროცხუათ 533 წანას რომაელ იმპერატორ იუსტინიანექ გიშაშკუ „დიგესტეფი“ — რომიშ კანონიშ მოკლე ვერსია დო კლასიკურ იურისპრუდენციაშ ეპოქაშ იურისტეფიშ ნაშრომეფშე ეშაჭარილ ნაწყვეტეფი (სოდგარენ 100—250 ჩქ. წ). მუჭოთ თე ნაშრომშე (Digest, 9.2.27.14) იძირენ, იურისტ ულპიანე მიშინუანს საქმეს, ნამუთ გენიხილ მაჟია საუკუნეს ცხოვრენდუნ ფერ რომიშ სახელმწიფო მოღვაწე ცელსუსიქ. შხვაშ ეზოს თასილ რდუ ღვანძგილი, ნამუქით არძა მოსავალ განადგურ. თე დიგესტეფს მოჩამილ რდუ თი საშვალებეფ, ნამუთ იურიდიულო იცვენდ ჸვანაშ მინჯეს ვარდა ჸვანაშ ქირათ ემაჭოფალს დო დამნაშავეს ზარალიშ საფასურს ოგაფუანდ.

რომიშ იმპერიას თეცალ დანაშაულ არსებენდუნ თინა, თის ოძირანს, ნამდა იესოშ მოჸუნაფილ მაგალით რეალურ ცხოვრებაშე რე ეჭოფილ.