ბრელ გათხილ ვარენ ფერ და შხვა მოწმეეფწკუმა ართო მსახურენს თიცალ ქიანეფს, სოდეთ სამეფოშ მაქადაქებელეფიშ დიდ საჭიროება რე. ნამთინე უკვე წანეფ რე შხვა ქიანას მსახურენს. მუქ მეხვარ თინეფს წანეფიშ წოხოლე, ნამდა გეგნურთუმდესკო შხვა ქიანაშა? მუ დიგურუეს თინეფქ შხვა ქიანას მსახურებათ? მუს ფიქრენა თინეფ მუნეფიშ ცხოვრებაშენ? ჩქი ინტერვიუ ეპჭოფით მუსხირენ დაშე, მით ბრელ ხან რე შხვა ქიანას მსახურენა. გათხილ ვარეთ დო ქუგოკონა მთელ გურით მიღათ მონაწილება დიდ კმაყოფილება მოჸუნსინ ფერ მსახურებას-და, დარწმუნებულ ვორეთ, თე დალეფიშ გამოცდილება გემგოდირთუნა. თინეფიშ მაგალითეფშენ ფიქრი არძა ქრისტიანს გიმადირთუ.

შილებე ფიქრენდათ, ნამდა ვაიღუნა თიცალ თვისებეფი, ნამუთ საჭირო რე შხვა ქიანას პიონერო მსახურებაშენ. 75 წანერ ანიტა ვარდ დარწმუნებულ მუშ დუც. თინაქ ინგლისის ირდუ დო პიონერო მსახურება 18 წანერ რდუნ თეშ დიჭყუ. ანიტა იჩიებ: «მობწონდ შხვეფს იეჰოვაშ გურშენ ვოგურეკო, მარა წარმოდგენილ ვამაფუდ შხვა ქიანას მსახურება. თეიშა დღას ვამგურუაფ შხვა ნინა დო ფიფქრენდ, დღას ვადმაგურედ. გაკვირვებულ ვორდი, მუჟამსით სკოლა „გალაადშა“ ქუდომძახეს. მიჭირდ თიშ დაჯერება, ნამდა ჩქიმცალ უმნიშვნელო პიროვნება რდუ დაპეჯებულ თე სკოლაშა. მარა ჩქიმ დუც ურაგადუდი: „იეჰოვა ქოთვალუნს, თენა შემალებენ-და, ოკო ქობცადე“. თენა 50 წანაშ წოხოლეიან ამბე რე. თიშ უკულ იაპონიას მისიონერო მსახურენქ. მინჩა ახალგაზრდა დალეფს ურაგადუქ: „საინტერესო თავგადასავლეფი ქუგოკონან-და, გეჭოფით თქვან ჩანთეფი დო ქუმორთით!“. მოხიოლ, ნამდა ბრელქ მიქცუ თაშ».

ბრელ დას, ნამუსით შხვა ქიანას მსახურებაშ გამოცდილება უღუნ, დუდშე ოშკურუდ შხვა ქიანაშა გინულა. მუქ მეხვარ თინეფს გაბედულეფ ქოჸოფედესკო?

„მარდუ ვორდინ, ჩქიმ ოცნება რდუ, აზრიან ცხოვრება მიღუდკონ დო შხვეფს მივეხვარკონ“, — იჩიებ 64 წანერ მორინი. 20 წანერ რდუნ თეშ, მორინქ კვებეკშა (კანადა) გეგნორთუ, სოდეთ პიონერეფიშ საჭიროება რდუ. თინა იშინანს: «ჭიჭე ხანშა ქუდმაპეჯეს სკოლა „გალაადშა“, მარა მეგობრეფიშ უმშო უჩინებ გარემოს მოშკურუდ. თინა ხოლო მაწუხენდ, მუჭო დიბტეკო ხვალე დიაჩქიმ, ჩქიმ მუმაწკუმა ართო, ნამუთ დალახებულ რდუ დო მუკოჯინა ოსაჭირუდ. სერეფს ვოთანუანდ დო იეჰოვას ლოცვას ჩილამურეფით ვოხვეწუდ, ქიმმეხვარუკო. მუჟამსით ჩქიმ ოწუხებელ მშობლეფს ქივეჩინ, თინეფქ მიწუეს, ნამდა ვარია  ვამთქუალუდკო „გალაადშა“ ულაშენ. თის ხოლო ვორწყედ, ნამდა კრება ზრუნენდ ჩქიმ მშობლეფშენ. ქობძირ იეჰოვაშ მზრუნველ ხე დო თენა მარწმუნენდ, ნამდა იეჰოვა მა ხოლო ქიმმეხვარებუდ. თიმ დროს უკვე მზათ ვორდ „გალაადიშ“ მაულარო!». 1979 წანაშე მორინქ 30 წანაშე მეტ იმსახურ მისიონერო დასავლეთ აფრიკას. ამდღა თინა კანადას რე დო მუშ მოხუცებულ დიდას ულუანს, მარა სპეციალურ პიონერო მსახურებას იშენით ახერხანს. შხვა ქიანას მსახურებაშ გურშენ მორინი იჩიებ: „იეჰოვა ირიათო მარზენდ, მუთ მოსაჭირუდ თის მუშ დროს“.

უენდიქ, ნამუთ 65 წანერ რე, მარდუ რდუნ თეშ დიჭყუ პიონერო მსახურება ავსტრალიას. თინა იშინანს: „მანგარ მორიდებულ ვორდ დო უჩინებუეფწკუმა მიჭირდ რაგადიშ დოჭყაფა. პიონერო მსახურებაქ არძანერ ხალხწკუმა რაგად ქუდმოგურუ დო დუდშა მეტ რწმენა ქომუჩ. უმოს გვიანო ქიმეფხვად, ნამდა იცალ მორიდებულ ვა ვორდი. პიონერო მსახურებაქ იეჰოვაშა მენდება ქუდმოგურუ. დროხანიშ უკულ დებრწმუნ, ნამდა შხვა ქიანას მა ხოლო მამსახურებედ. ართ გათხილ ვარდუნ ფერ დაქ, ნამუთ 30 წანაშე მეტ ხანს იაპონიას მსახურენდუნ, მიწუ, ნამდა სუმ თუთათ ართო მიმსახურებდესკო იაპონიას. თიწკუმა ართო მსახურებაქ უმოსო ქომკორინუ შხვა ქიანას მსახურება“. 1986 წანას უენდიქ კუნძულ ვანუატუშა გეგნორთ, ნამუთ ავსტრალიაშ აღმოსავლეთით 1770 კმ-ის რე.

უენდი ამდღა ხოლო ვანუატუს რე დო მათარგმნალეფიშ ოფისის მსახურენს. თინა იჩიებ: „მანგარო მოხიოლ თიშ ძირაფა, მუჭო ინწყუმუ ჯგუფეფი დო კრებეფი დაშორებულ ტერიტორიეფს. სიტყვეფით ვეგნმაჩინე, მუშმადიდა პატი რე ჩქიმო იეჰოვაშ საქმეს მონაწილება თე კუნძულეფს“.

65 წანერ კუმიკო იაპონიას პიონერო მსახურენდ ართ პიონერ დაწკუმა, ნამუთ თის ნეპალშა გინულას სთავაზენდ. „თინა ირიათო მირაგადუდ გინულაშ გურშენ, მარა ვარიას ურაგადუდი. მოშკურუდ თიშა, ნამდა ახალ ნინა მაჸიდ დაგურაფალ დო უჩინებ ტერიტორიაშა მაჸიდ მიორჩქვანალ. თეშ გარდა, ეფი ვარდ დასაბაღ თანხაშ შაყარუა შხვა ქიანაშა გინაულარო დო თეშენ ბრელს ფიფქრენდ. მარა ართშა, მუჟამსით მოტოციკლეტით მიფშინ, ავარიას ქუმოფხვად დო საავადმყოფოს მაჸუ დანჯირალქ. თექ ვორდინ თეშ ფიფქრენდ: მის უჩქ, ხოლო მუ მაღოლე? შილებე სერიოზულო დებლახე დო შურო ვამამსახურებუას შხვა ქიანას. ხომ ვა უჯგუ, ართ წანათ ვარა ქიმსახურე შხვა ქიანას. მანგარაშო ბთხულენდ იეჰოვას, ქიმმეხვარუკო თე საკითხიშ გინოჭყვიდუას“. საავადმყოფოშე გეგშაჭარესინ თიშ უკულ კუმიკოქ ჭიჭე ხანით მიდართ ნეპალშა დო უმოს გვიანო თი პიონერ დაწკუმა ართო გეგნორთ თექ ომსახურებშა.

 კუმიკო ნეპალს დახე ვით წანას ქომსახურენდ. თინა თექიანობას იშინანს: „იეჰოვაქ თეშ გეგნმოლახაფუ ჩქიმ პრობლემეფი, მუჭოთ ჯვეშო ისრაელეფს — ჭითა ზღვა. ბედნერ ვორექ, ნამდა თიცალ ადგილს მსახურენდ, სოდეთ მაქადაქებელეფიშ დიდ საჭიროება რე. სახიოლო ამბეს ართ ოჯახის უქადაქენქინ, 5-6 მეზობელ მოურს ორჩქილუშა. ჭიჭე ბაღანეფ ხოლო მირჩქილენა დო ბუკლეტეფს ფთხინა. თეცალ ტერიტორიას მსახურებას მართალო დიდ ხიოლ მოუღ ჩქიმო“.

მუშო ოკო რაგად, თი დალეფი, მიდგაშე ინტერვიუ ეპჭოფითინ, პრობლემეფს შეხვადუდეს. მუჭო გინოლახუნდეს თე პრობლემეფს?

62 წანერ კანადელ დაიანი, ნამუთ 20 წანას კოტ-დ’ივუარს მსახურენდუნ, იჩიებ: «დუდშე მანგარო გამჭირდ, მუშენდა ოჯახშე შორს ვორდი. იეჰოვას ბთხულენდ, ქიმმეხვარკო, ნამდა თექიან ხალხი ქიპჸოროფეკო. „გალაადის“ გურაფაშ დროს ართ ინსტრუქტორქ, ჯეკ რედფორდიქ გუმაფრთხილეს, ნამდა დუდშე შილებედ შოკის ქენმოჸოთესკო უჩინებ ქიანას არსებენდუნ თი პირობეფქ, მაგალთო სიღარიბექ. თიქ მიწუეს: „ვა უჯინათ სიღატაკეს, უჯინით ხალხის, თინეფიშ სახეეფს დო თოლეფს. ქიდეკვირით, მუნერ რეაქცია უღუნა ბიბლიურ ჭეშმარიტებაშენ“. ბედნერ ვორექ, მუშენდა სწორ არჩევანი ვაკეთი. მუჟამსით ხალხის სამეფოშ გურშენ გურიშ ემაკინალ ცნობაშენ ვეჩიებუქინ, ხიოლით თოლეფშე მურიცხეფ ელალენა!». ხოლო მუ ოხვარუდ დაიანს, ქიმიარჩქვანუკო შხვა ქიანას მსახურებას? „ბიბლიას ვოგურუანდინ თინეფწკუმა ჯგირ ურთიერთობა მიღუდ. მოხიოლ თიშ ძირაფა, ნამდა იეჰოვაშ მსახურებას იჭყანდეს. დრო-ხანიშ უკულ დუც ჩქიმ ჸუდეს ვორდიკონ თეშ ბგინაფლენდ. მუჭოთ იესოქ დემეპირესინ, სულიერ დიდალეფი, მუმალეფი, დალეფი დო ჯიმალეფი ქეშებძინ“ (მარ. 10:29, 30).

46 წანერ ანი აზიაშ თიცალ ქიანას მსახურენს, სოდეთ ჩქინ საქმიანობას ხეს უშალენა. თინა იჩიებ: „წანეფიშ დინახალე შხვა ქიანას შხვადოშხვა ადგილს ვმსახურენდი დო ბცხოვრენდ დალეფწკუმა, მით წარმოშობათ დო ხასიათით მანგარო გენსხვავებუდეს ჩქიმდე. მინშა თეშ გურშენ ვაუგენდით ართიანს დო გურ ხოლო ბრელშა ელამჭუაფნა ართიანშა. თეცალ დროს ვოცადუდ, უმოსო დევეახლოვკო თინეფს, მიდგაწკუმა ბცხოვრენდი, ნამდა უმოს უჯგუშო გებჩინებაფეკო თინეფიშ კულტურა. თეშ გარდა ირნერო ვოცადუდ, მეტ ჸოროფა გეგმომრჩქინუდკო დო უმოსო ქუგამგებუდკო თინეფშა. მოხიოლ, ნამდა ჩქიმ მონდომას შედეგიქ ქუმაჸუნ დო ბრელ ჯგირ მეგობარ პჸუნს, მიდგაქ მიმეხვარ მსახურებაშ გაგარძელებას“.

 53 წანერ გერმანელ და უტე, 1993 წანას მადაგასკარს მისიონერო ქუდანიშნეს. თინა იჩიებ: „დუდშე რთულ რდუ თექიან ნინაშ დოგურაფა, კლიმატშა მერჩქვანა, მალარია, ამება დო პარაზიტ ჭიეფწკუმა ბრძოლა. მარა შხვეფქ მანგარო ქელამდირთეს. თექიან დალეფი, თინეფიშ სქუალეფ დო ბიბლიას ვოგურუანდინ თინეფ, თექიან ნინას მოგურუანდეს. დებლახებუდინ, ჩქიმწკუმა ართო მსახურენდუნ თი მისიონერ და მილუანდ. მარა არძაშ უმოსო იეჰოვაქ მიმეხვარ. ლოცვას ირიათო ურაგადუდ ჩქიმ ოწუხებელიშ გურშენ. თეშ უკულ მუსხირენ დღას ვარდა თუთას მოთვინებათ უჯინედ ჩქიმ ლოცვაშ პასუხის. იეჰოვაქ არძა პრობლემაშ გინოლახუას ქიმმეხვარ“. უტე უკვე 23 წანა რე მადაგასკარს მსახურენს.

თი მაუწყებლეფცალო, მიდგაქ თიცალ ტერიტორიაშა გინორთეს, სოდეთ მაქადაქებელეფიშ დიდ საჭიროება რდუნ, გათხილ ვარენან ფერ დალეფ იჩიებუნა, ნამდა შხვა ქიანას მსახურებაქ თინეფიშ ცხოვრება გასქვამ დო გამდიდრ. მუ კურთხევეფი უღუნა თინეფს?

73 წანერ ჰაიდი, ნამუთ გერმანიაშე რე, 1968 წანაშე კოტ-დ’ივუარს მსახურენს მისიონერო. თინა იჩიებ: «ჩქიმო დიდ ხიოლ მოუღ თიშ ძირაფას, ნამდა ჩქიმ სულიერ სქუალეფ „ჭეშმარიტებას გილულა“. ნამთინე, მიდგას ბიბლიას ვოგურუანდინ, ამდღა პიონერო ვარდა უხუცესო მსახურენს. ბრელ დედას ვარდა ბების მიძახ. ართ უხუცესის, ნამდგას ბიბლიას ვოგურუანდინ, მუშ ჩილ დო სქუაწკუმა ართო, მუშ ოჯახიშ წევრო მივორჩქუქ. თაშ ნამდა, იეჰოვაქ ქომოლსქუა, ნოსა დო სუმ მოთა ქუმაჩუქ» (3 იოან. 4).

72 წანერ კარენი, ნამუთ კანადაშე რე, 20 წანაშე მეტ რე დასავლეთ აფრიკას მსახურენს. თინა იჩიებ: „მისიონერო მსახურებაქ ქუდმოგურუ, ნამდა ვორდა უმოს დუდგუნოდვალირ, მოჸოროფე დო მომთმენი. შხვადოშხვა ეროვნებაშ და დო ჯიმალეფწკუმა მსახურებაქ უმოსო გომინჯუ თოლეფი. ქიმეფხვად, ნამდა ართ დო იგივე საქმექ შილებე შხვადოშხვანერო გიკეთებუას. მუშმადიდა კურთხევა რე, ნამდა ამდღა მსოფლიოშ შხვადოშხვა კუნთხუს მეგობრეფი პჸუნს! მართალ რე, ჩქინ ცხოვრებაქ დო დავალებეფქ დითირ, მარა ჩქინ მეგობრობა იგრძელებ“.

79 წანერ და მარგარეტი მისიონერო ლაოსის მსახურენდ. თინა იჩიებ: „შხვა ქიანას მსახურებაქ ქომუჩ საშვალება, ჩქიმ თოლით ქობძირკო, მუჭო მოჸუნს იეჰოვას მუშ ორგანიზაციაშა არძა რასაშ, წარმოშობაშ დო სოციალურ ფენაშ კათა. ბოლოშა დებრწმუნ, ნამდა იეჰოვა ხემძღვანელენს მუშ ორგანიზაციას დო თიშ დუნაპირებ აუცილებერო შესრულებ“.

გათხილ ვარენან ფერ დალეფს, მით შხვა ქიანას მსახურენან, დიდ წვლილ მიშუღუნა ქადაქებაშ საქმეშა. თინეფ ცქვაფაშ ღირსი რენა (მსაჯ. 11:40). თეცალ დალეფიშ რიცხვის ირიათო აძინუ (ფსალმ. 68:11). ქეშეილებუნანო თქვა ხოლო დოთირუათ თქვან გეგმეფი დო მიაჸუნათ თი დალეფიშ მაგალითის, მიდგაშე ინტერვიუ ებჭოფით? თაშ ქიმიქციებუთ-და, თქვან თოლო ქოძირუნთ, ნამდა ჯგირ რე იეჰოვა! (ფსალმ. 34:8).