დებაბდჷ 1934 წანას, ონტარიოშ ჭიჭე ქალაქ ტიმინსის. ჩქიმ მშობლეფ თექ შვეიცარიაშე რდესჷ გინნაულა. 1939 წანას დიაჩქიმქ „გინაჯინალ კოშკიშ“ კითხირ ქიდიჭყჷ, ოსწრუდ იეჰოვაშ მოწმეეფიშ შეხვალამეფს დო მა დო ჩქიმ 6 და დო ჯიმა ხოლო გილაპჸუნდით. მალას თიქ დინათ.

მუაჩქიმს ვემეწონ დიაჩქიმიშ გადაწყვეტილებაქ, მარა დიაჩქიმს თეშ უჸორდჷ ჭეშმარიტება, ნამდა მტკიცას აფუდ გინოჭყვიდილ, ქიმიაჸუნუკო თის. თის იეჰოვაშ მსახურება თიმწკუმა ხოლო ვემუტებ, მუჟამსით 1940-იან წანეფიშ დაჭყაფუს, კანადას იეჰოვაშ მოწმეეფიშ საქმიანობაქ აკრძალურქ იჸუ. მუაჩქიმ თის ოგორანდჷ დო ჸინჩას ურაგადუდ, მარა ჩქიმ დიდა თის იშენით გემუანო ეჩიებუდ დო პატის ცენდჷ. თიშ ჯგირ მაგალითიქ მა დო ჩქიმ და დო ჯიმალეფს გინმოჭყვიდირაფუეს, ქიდიპჭყითკო იეჰოვაშ მსახურება. საბედნეროთ, ჭიჭე ხანშა მუაჩქიმქ დითირუ დამოკიდებულება დო უმოს გემუანო მოქცუდეს.

1950 წანაშ ზაფხულს დევესწრჷ ნიუ-იორკის ჩატარებულ კონგრესის, ნამდგაშ თემა რდჷ „თეოკრატიაშ წიმი ულა“. მთელ მსოფლიოშე მოულირ თანაქრისტიანეფიშ ძირაფაქ დო გალაადიშ კურსდამთავრებულეფიშ ინტერვიუეფიშ მორჩქილაფაქ უმოს სურვილ გომრჩქინ, მეტ გუვაკეთიკო იეჰოვაშ მსახურებას, მუდგაქ გინმოჭყვიდირაფუ, ქიდიპჭყიკო სრულ დროთ მსახურება. ჸუდეშ დორთელს შევავსჷ პიონერო მსახურებაშ ბლანკ. ჭიჭე ხანშა კანადაშ ფილიალქ მოპჭარ, ნამდა სრულ დროთ მსახურებაშ დოჭყაფაშახ, აუცილებერ რდჷ, დიბნათიკო. ათეშენ, 1950 წანაშ 1 ოქტომბერს დიბნათ. ართ თუთაშა პიონერობა ქიდიპჭყჷ დო პირველ დანიშნულება ხოლო მიბღჷ ქალაქ კაპუსკასინგის, ნამუთ ჩქიმ ჸუდეშე მანგარ შორს რდჷ.

1951 წანაშ გიშულირს ფილიალქ ფრანგულ ნინაშა მორაგადე მაუწყებელეფს ფთხისჷ, დეფიფქრითკო,  შემალებედეს დო ვარ კვებეკიშ პროვინციაშა გინულა, სოდეთ ხალხ ფრანგულ ნინაშა რაგადანდჷ. თექ მაუწყებელეფიშ მანგარ საჭიროება რდჷ. რახანს ბაღანობაშე მიჩქუდ ინგლისურ დო ფრანგულ, ულა გეგნოპჭყვიდ დო ფილიალქ რუინს დაბნიშნჷ, სოდეთ ართ ნაჩინებ ხოლო ვა პჸუნდჷ. ხვალე დუდშე გეჩითინ თი ჯიმაშ მისამართ მიღუდ. ირფელქ გვალო ჯგირო მიდართჷ. მა დო მარსელქ დებჯიმაკოჩით. კვებეკის ოთხ წანას პიონერო მსახურენდჷ დო უკულ სპეციალურ პიონერო დებნიშნჷ.

კვებეკის ვორდინ თეშ, მემწვიეს გალაადიშ 26-ა კლასშა, ნამუთ ნიუ-იორკიშ ქალაქ საუთ-ლანსინგის იტარებუდ. გამოშვება 1956 წანაშ 12 ფრევალს მიღუდეს დო დასავლეთ აფრიკაშა გომტუეს, თი ქიანაშა, ნამდგას ამდღა განა ჯოხო. b მარა დიო კანადაშა დიბრთჷ თი აზრით, ნამდა მუსხირენ მარაშა ჩქიმ საბუთეფ დემზადებუდ დო უკულ განაშა იფშჷ.

ტორონტოს მუსხირენ მარას ვარინ, 7 თუთას მაჸუ ოჯინექ საბუთეფშა. თექ კრიპსეფიშ ოჯახიქ მემიღ მუნეფიშ ჸუდეშა, სოდეთ თინეფიშ ძღაბ, შეილა, გეფჩინებაფე. ჩქი ართიანქ ქიმეჸოროფეს. თიშა ხეშ თხუალა მილამუდუნ, გვალო თიმ პერიოდის მიბღჷ ვიზა. მა დო შეილაქ ბრელ იბლოცით თე საკითხიშ გურშენ დო უკულ გეგნოპჭყვიდით, ნამდა ოკო მილინუდკო ჩქიმ დანიშნულებაშა. მარა მიბრაგადეთ, ნამდა ურთიერთობას წერილეფით გუვაგრძელენდით დო ქიდვეკვირებუდით, შემალებედეს დო ვარ მომავალს დაქორწინება. თე გადაწყვეტილებაშ მეღება ვა რდჷ ადვილ, მარა უკულ დროქ ქუმოძირუეს, ნამდა სწორას მიფქცით.

შარას ართ თუთას ვორდჷ, დიო მატარებელით მიფშჷ, უკულ სატვირთო გემით დო თიშ უკულ სამალიოტით. ბოლოს, მუთ იჸუ, გენობრთჷ განაშ დედაქალაქ აკრაშა. თექ საოლქო ზედამხედველო დუმანიშნეს. ჩქიმ ოლქშა, განაწკუმა ართო, მიშეშ ამდღანერ კოტ-დ’ივუარ დო ტოგო. თე ადგილეფშა გილაულარო ფილიალქ მანქანა ქომუჩ დო უმენტაშო ხვალე გილეფშჷ. და დო ჯიმალეფიშ ძირაფას ჩქიმდა დიდ ხიოლ მოუღუდ.

 საბატონ დო ჟეშხას რაიონულ კონგრესეფშა გილეფშჷ დო მოხსენებეფს ვორთუდ. თიმ დროს საკონგრესო დარბაზ ვა მიღუდეს, ათეშენ თაკარია ჩხანას ვემწიპჭვითკონ თიშენ, ჯიმალეფ ბამბუკიშ კონსტრუქციას ეიონწყუნდეს დო პალმაშ ნოჸელეფით გინორთუნდეს. თიმ პერიოდის კონგრესშა მოულირეფს ოჭკუმალს ურთუდეს. ჩქი მაცივარ ვა მიღუდეს, ათეშენ საქონელ თექ პჸუნდეს დო მუჭოთ გივახვილუდითინ თეშ იჸვილუდ.

კონგრესეფს მინშა ოძიცე მუდგარენეფ ხოლო ხვადუდ. ართშა ართ მისიონერ ჯიმა ჰერბ ჯენინგზ c მოხსენებათ გიშეშ, მუჟამსით სამზარეულოშ ტერიტორიაშე ჩხოუქ ენტეს. თინა აუდიტორიაშ დო სცენაშ შქას აფენთებულ გილერულედ. მუჟამსით ჯიმა ჰერბიქ რაგად მიოტუ, ჩხოუქ გაჩენდჷ დო აჸონებულ იჯინედ. უკულ ოთხ ჯიმაქ თე ჩხოუ ოჭოფ დო კინ სამზარეულოშ ტერიტორიაშა დართინუ, მუ დროსით აუდიტორია ტაშის მეუგანდჷ.

კონგრესშე კონგრესშა ხოლოშიან სოფელეფს მახორუეფს ვოჯინუანდჷ ფილმის „ახალ ქვეყნიერებაშ საზოგადოება მოქმედენს“. ფილმ ჩუვართიკონ თიშენ, ჟირ სტოლბაშ ვარდა ჟირ ჯაშ შქას დიდ ნოჭკერს ბზინდუნდჷ დო პროექტორს მეურინუანდჷ. ნამთინე აიშახ შურო ვა რდჷ მუთუნნერ ფილმშა ნაჯინა. ათეშენ მანგარო მოწონდეს, მუდგას უჯინედეს. ნათუაშ მომენტეფ გამკორჩქინდუდუნ, ხალხ წუმოცენდჷ დო ტაშის მიოგანდჷ. თე ფილმიქ ბრელს მეხვარ თიშ ძირაფას, მუნერ ართობა უღუნა მთელ მსოფლიოს იეჰოვაშ მოწმეეფს.

1958 წანას საერთაშორისო კონგრესშა იბდჷ ნიუ-იორკშა. თე კონგრესშა დასწრებელო შეილაქ ხოლო მორთჷ კვებეკშე, სოდეთ სპეციალურ პიონერო მსახურენდჷ. ხიოლით გილაფუბრინუნდჷ, მუშენდა ქოპჭარუნდით ართიანს, მარა ასე, მუთ იჸუ, ქეშეფხვადით. თის ხე ქოფთხი დო მიწუ, ნამდა თანახმა რდჷ. ჯიმა ნეითან ნორს d წერილ ქიმეპჭარ დო ქოპკითხჷ, ქიშილებედ დო ვარ, შეილაქ ხოლო გამკორთუკო გალაად დო ჩქიმწკუმა ართო მალართუკო აფრიკაშა. თიქ ქოვა მიწუ. შეილაქ განაშა გენორთჷ. ჩქი 1959 წანაშ 3 ოქტომბერს აკრას დეფქორწინით. ბგინაფლენდით, მუჭო მაკურთხეს იეჰოვაქ თიშ გურშენ, ნამდა თიშ მსახურება ჩქინ ცხოვრებას პირველ ადგილს გივორინეთ.

1961 წანას კამერუნს დუმანიშნეს. ჯიმალეფქ თექ ახალ ფილიალიშ ჩამოყალიბებას მონაწილებაშ  მეღება ქოფთხის, ათეშენ ქიანაშ საქმე მიღუდ. რახანს ფილიალს მსახურება ჩქიმო ახალ დანიშნულება რდჷ, ბრელ მუდგარენ მაფუდ დაგურაფალ. 1965 წანას ქიგებგით, ნამდა შეილა ორსულო რდჷ. ალალას ქოიწუათინ, დროქ დემესაჭირეს, ქიმვარჩქვანითკო თი აზრის, ნამდა მალას მშობლეფ იპჸუაფუდით. უკვე თე ამბეს მივახიოლანდით დო კანადაშა დორთაშ გეგმეფს ვონწყუნდითინ თეშ, მანგარ გლახა ამბექ ქუმაღოლეს.

შეილას ბაღანაქ მეშორ. ექიმქ მიწუეს, ნამდა თინა ბოშ ჸოფე. თე ამბეშე 50 წანაშ უმოს რე მიკულირ, მარა წუთით ხოლო ვა გოპჭყოლადუნა. მართალ რე, ჩქინ ბოშიშ ღურაქ გურ მანგარო მიწყუნუეს, მარა გუვაგრძელით მსახურება ჩქინ დანიშნულებას, ნამუთ მანგარო მიჸორდეს.

ნეიტრალიტეტიშ გურშენ კამერუნს და დო ჯიმალეფ ხშირას ხვადუდეს წინააღმდეგობას. სიტუაციაქ განსაკუთრებულო საპრეზიდენტო არჩევნეფიშ დროს გეუფრაშ. 1970 წანაშ 13 მესის იეჰოვაშ მოწმეეფიშ საქმიანობა კამერუნს ოფიციალურო აკრძალეს. ჩქინ ფილიალიშ ახალ სქვამ შენობა, ნამდგაშა გვალო 5 თუთაშ გინნაულა ვორდით, სახელმწიფოქ გეგლმონწყეს. მარაშ დინახალე არძა მისიონერს, თინეფ შქას მა დო შეილას ხოლო, მთავრობაქ კამერუნ ქუდმოტებაფუეს. მანგარო გამჭირდეს თექიან და დო ჯიმალეფიშ დოტებაქ, მუშენდა მიჸორდეს თინეფ დო თიშე ხოლო ბნერვიანენდით, მუჭო იშჷ თინეფიშ ამბე თე თხოზინიშ დროს.

კამერუნშე საფრანგეთიშ ფილიალშა მიდაბრთით, სოდეთ 6 თუთას ქუდოფსქიდით. მუთ შემლებუდ ირფელს ვორთუდ კამერუნს მახორუ და დო ჯიმალეფშო. თიმ წანაშ დეკემბერს ნიგერიაშ ფილიალს დუმანიშნეს, ნამდგას კამერუნს სამქადაგებლო საქმიანობაშ ხელმძღვანელობაქ დევალ. ნიგერიელ და დო ჯიმალეფქ მანგარ ჯგირო მემღეს. მა დო შეილა თექ მუსხირენ წანას მსახურენდით ხიოლით.

1973 წანას მანგარ ძნელ ამბექ მაჸის გინაჭყვიდირალქ. შეილას ჯანმრთელობაშ სერიოზულ პრობლემეფქ ქუდაჭყჷ. ართშა კონგრესშა დასწრებელო ნიუ-იორკშა ვორდით ინულირინ თეშ, შეილაქ გვალო ქიმკოჭირდჷ დო ანგარებულო მიწუ: „მეტ ვეშემლებ, ირო გლახათ ვორექ, თაშ ვაგმარზინე“. მანგარო ვაფასენქ, ნამდა შეილა ჩქიმწკუმა ართო 14 წანაშ უმოს ხანს მსახურენდჷ ართგურო დასავლეთ აფრიკას, მარა სიტუაციაქ დითირ. ბრელ იფჩით დო იბლოცით თე საკითხიშ გურშენ დო მანგარ ძნელქ ქუმაჸის, მარა ართო გეგნოპჭყვიდით, ნამდა კანადაშა დიფრთითკო, სოდეთ შეილას უჯგუშო შეიალებედ მკურნალობა. მისიონერობაშ დო სრულ დროთ მსახურებაშ მეტებაქ არძაშ უმოს ძნელ გინაჭყვიდირალ ამბექ იჸუ ჩქინ ცხოვრებას.

კანადაშა დიბრთითინ, სამუშა ქიდიპჭყჷ ჩქიმ ართ ჯვეშ მეგობარწკუმა, ნამდგას მანქანეფიშ ბიზნეს უღუდ ტორონტოს. ბინა ქიფქირეთ დო მეორად ავეჯ ქიპჸიდით. თაშ ნამდა, თეშ გინიბლით ახალ ჸუდეშა, ვალეფ ვეგებდვალუნა. იმენდ მიღუდეს, ნამდა ართ დღასით კინ დუვართუდით სრულ დროთ მსახურებას, ათეშენ ვოცადუდით, ქიანაშის მუთუნს ვამვაბუნითკო. მუ ჯგირქ იჸუ, ნამდა ველუდითინ თიშე ბრელით უმოს ადრე დუვართით სრულ დროთ მსახურებას.

ქალაქ ნორვალს ახალ საკონგრესო დარბაზ იშენებუდ დო თექ მუფშენდჷ ირ საბატონს.  ბოლოს საკონგრესო დარბაზიშ ზედამხედველობა ქოფთხუეს. შეილაშ ჯანმრთელობაქ ჭიე-ჭიეთ გეგშენწყუ დო ვორწყედით, ნამდა უკვე შემალებედეს ახალ დავალებაშ მეღება. ათეშენ, 1974 წანას საკონგრესო დარბაზშა გინიბლით ოცხოვრებშა. მანგარო მოხიოლუდეს, ნამდა შემალებუეს კინ დუვართითკო სრულ დროთ მსახურებას.

საბედნეროთ, შეილაშ ჯანმრთელობა იუჯგუშებუდ დო ჟირ წანაშა შემალებუეს რაიონულ მსახურებაშ დოჭყაფაქ. ჩქინ რაიონ რდჷ კანადაშ ართ-ართ პროვინციას, მანიტობას, სოდეთ ზოთონჯის სასწაულ ჸინ დო ჩხურ უჩქჷ, მარა გემუან და დო ჯიმალეფწკუმა ურთიერთობა მიტიბუანდეს გურს. თაქ ართ მნიშვნელოვან მუდგარენ ქიდიბგურეთ: ვა უღჷ მნიშვნელობა, სო მსახურენქ, მთავარ რე, სოდეთ იჸიქინ თექ, ართგურო გაგრძელე იეჰოვაშ მსახურება.

მუსხირენ წანას რაიონულ მსახურებაშ უკულ, 1978 წანას, კანადაშ ბეთელს დუმანიშნეს. ჭიჭე ხანშა, მანგარ ნწარე, მარა მნიშვნელოვან გაკვეთილ დიბგურე. ართშა, საათდოგვერდიან მოხსენებაშ კეთება დუმავალეს ართ-ართ მნიშვნელოვან შეხვალამას, ნამუთ მონრეალს იტარებუდ. მანგარ გლახაქ იჸუ, ნამდა მოხსენებაქ თეშ ვა მაკეთებუ, ხალხიქ ინტერესით ქოურჩქილუკონ დო თეშ გურშენ სამსახურებრივ განყოფილებაშე ართ ჯიმაქ რჩევა ქომუჩ. ასე ქოფხვადუქ, ნამდა იშენდოიშენ ჯგირ ორატორ ვა ვორექ, მარა თიმწკუმა თაშ ვა ფიფქრენდჷ, ათეშენ გამჭირდჷ თე ჯიმაშე რჩევაშ მეღებაქ. ვა გუგით ართიანს დო ჩქინ შქას გლახა ჩიებაქ მიდართჷ. ფიფქრენდჷ, ნამდა თინა ნაბეტან კრიტიკულ რდჷ ჩქიმ მიმართ, მუშენდა შურო ვა უცქვაფ დო ხვალე გლახა მუ რდუნჷ თის მეჩიებუდ. რჩევაქ თიშ გურშენ ვემმაღებუ, ნამდა ყურადღება თიშა გეგნიბღჷ, მუნერ ფორმათ მუჩეს თინა დო ვართ თი პიროვნება გიმოხანტუდ იშენდოიშენ გურს, მით რჩევას მარზენდჷ. თაქ ვორექ ჩილათირ დო თეს მანგარო ბნარღენქ.

მუსხირენ დღაშა ფილიალიშ კომიტეტიშ წევრიქ ქუდომრაგადუ თე ამბეშენ. მა ალალას უწი თის, ნამდა გამჭირდჷ რჩევაშ მეღებაქ დო მანგარო ბნარღენდჷ თეს. უკულ, რჩევა მუჩუნ თი ჯიმას ხოლო ქუდურაგადე დო ბოდიშ უწი. თიქ ხოლო მთელ გურით ქუმაპატუ. თე შემთხვევაქ თანდაბლობაშ თიცალ მანგარ გაკვეთილქ იჸუ ჩქიმო, ნამდა დღას ვა მოჭყორდუ (იგავ. 16:18). თიშ უკულ, ბრელშა მილოცებ თე საკითხიშ გურშენ დო ირო ვოცადუქ, რჩევას ქომუჩანან, ვა გამჭირდას მეღებაქ.

40 წანაშე უმოს რე, კანადაშ ფილიალს მსახურენქ. 1985 წანაშე მოჸუნაფილ, მიღჷ პატი, ფილიალიშ კომიტეტის იმსახურე. 2021 წანაშ ფრევალს ჩქიმ საჸოროფო მეუღლექ, შეილაქ, დომღურ. შეილა ვა პჸუნსინ, მანგარო მიჭირს, თეს ჩქიმ ჯანმრთელობაშ პრობლემეფ ხოლო გიაძინუ. მარა იეჰოვაშ მსახურება მოხვარ, ხიოლ ვა ვოდინუე დო ბრელ ვეფიფქრე ულირშე (ეკლ. 5:20). მართალ რე, ქიანაშ სირთულექ მაჸუ მიკაულარქ, მარა ხიოლ, ნამუთ იეჰოვაშ მსახურებაქ მომიღ, ირფელს გინოწონუნს. 70 წანა რე, იეჰოვას სრულ დროთ ვომსახურუქ, მუდგაქ ხიოლით ეფშა ცხოვრება მომიღ. ბლოცულენქ, ნამდა ახალგაზრდა და დო ჯიმალეფქ იეჰოვა პირველ ადგილს ქიგიორინუან, მუშენდა თინეფქ ხოლო გეგმოცადან თი კურთხევეფ დო ხიოლ, ნამუთ ღორონთიშ მსახურებას მოუღ.