სამხრეთ ამერიკას, ამაზონიშ ტყას, ხმაურიან დო ხალხით ეფშა ქალაქეფშე შორს, ცხოვრენს შხვადოშხვა ტომიშ, ნინაშ დო ეროვნებაშ ხალხ. 2017 წანაშ კვირკვეს მოწმეეფიშ ჯგუფიქ, სოდეთ 13 კოჩ რდუ, ქიმწიჭყეს სამქადაგებლო მოგზაურობა. თინეფქ მალწყარ მარონს ეკი ქეკაჸუნეს დო აღმოსავლეთით თიშ შენაკადეფს ქიგიაჸუნეს. მუ რდუ თინეფიშ მიზან? თინეფს ოკოდეს თექ მახორუ ხალხის გეგნოჩესკო ბიბლიურ იმენდ.

 ართ თუთათ ადრე სოიშახ 12 დღიან მოგზაურობას დიჭყანდეს, ჯგუფიშ წევრეფქ დიშაყარეს, ნამდა ირფელ წინასწარ დაგეგმესკო. ჯგუფიშ ართ-ართ წევრ, ვინსლი იჩიებ: „ჩქი გეგმიბრკვით თე ტერიტორიაშ გურშენ დო თიშ ისტორია. თეწკუმა ართო გუვაანალიზით, მუჭო მივემზადითკო თე მოგზაურობაშო“. თითოულს დამრიგეს წყარს ვა უტენსინ ფერ კონტეინერეფ, სოდეთ ინობდვანდით ჰამაკის დო ბადეს, ნამუთ კოღონეშფე დოფთხილანდეს. თე მოგზაურობაშ დროს ჟირშა ოკო იმბგზავრითკო თვითმფრინავით დო მუსხირენ საათის ჭიჭე ნავით.

 მუჭო მიღეს და დო ჯიმალეფქ თე მოწვიება? კლოდ დო ლიზეტიქ, მით სუმენეჩ წანას რენა გინოჩილათირ, ხიოლით ქეშეხვადეს თე მოწვიებას. კლოდ იჩიებ: „მანგარო მოხიოლუდ, მარა თეწკუმა ართო, ჭიჭეს ქუმოშქურუდ. გუნაგონ მაფუდ, ნამდა მინ დიხას თე მალწყარიშ ქვინჯის ამაღალებურ ქუალეფ რდუ, მუთ დინებას აჩქარენდჷ“. ლიზეტ შხვა მუდგარენშენ წუხენდჷ; თინა იჩიებ: „ფიფქრენდჷ, მუჭო მიჩიებინუდკო ამერიკელ ინდიელეფიშ ნინაშა“.

 ართ-ართ მაქადაგებელ, მაიკლ ხოლო იგივეს გენიცადენდჷ. თიქ თქუ: „ვაიანაშ ტომიშ გურშენ ბრელ მუთუნ ვამჩქუდეს. ათეშენ ინტერნეტშე ქიდიბგურე მუსხირენ სიტყვა, ნამდა თინეფწკუმა ჩიება ქიდიბჭყიკო“.

 შერლიქ მუშ მეუღლე იოანწკუმა ართო მიდართჷ თე სამქადაგებლო მოგზაურობაშა. თიქ გაგმოჭარ თი ნინეფიშ სია, ნამდგაშა თე ტერიტორიას მახორუ ხალხ იჩიებუდ. თინა იჩიებ: „ჩქი თითქმის არძა თე ნინაშა გეგნობჭარით ვიდეოეფ ვებგვერდშე jw.org; თეწკუმა ართო, ქიფშით წიგნ, სოდეთ მიშაღალირ რდუ ძირითად ფრაზეფ ვაიანა ნინაშა“.

 4 კვირკვეს, თახაშხა დღას, მაქადაგებელეფიშ ჯგუფიქ სენ-ლორან-დიუ-მარონშე თვითმფრინავით გენორთჷ მარიპასულაშა, ნამუთ საფრანგეთიშ გვიანაშ ჭიჭე ქალაქ რე.

 უკულიან ოთხ დღას თე ჯგუფ მატორიან ნავით მალწყარ მარონიშ ჟინ შენაკადის მიშჷ დო სოფელს მახორუ ხალხის უქადაგდეს. თე ჯგუფშე ართ-ართ, როლანდ იჩიებ: „ჩქი ქეშეფხვადით ამერიკელ ინდიელეფს; თინეფქ დეინტერესეს ბიბლიურ საკითხეფით, უღდეს ბრელ კითხვეფ დო ნამთინექ ბიბლიაშ გურაფა ხოლო მითხუ“.

 ართ სოფელს იოან დო შერლიქ გეჩინებაფეს ახალგაზრდა ჩილ დო ქომონჯ, მიდგაშ ნათესექ ბრელ ხან ვარდჷ, მუთ დუდ იჸვილ. იოან იჩიებ: «ჩქი თინეფს ვოჯინეთ ვიდეოშა „მუჭო გორჷ ამერიკელ ინდიელქ მუშ გუმაჭყაფალ“, ნამუთ JW მაუწყებლობას რე მოჩამილ. თე ვიდეოქ მანგარო შეხუ თინეფიშ გურს. თინეფქ ქომჩეს მუნეფიშ ელ-ფოსტაშ მისამართ, ნამდა ხოლო დევეკავშირითკო ართიანს».

 არძაშ უმოს შორ ტერიტორია, სოდეთ მაქადაგებელეფიშ ჯგუფიქ მერთჷ, რდუ ანტეკუმ-პატა. სოფელიშ დუდკოჩიქ შულადირ მოწმეეფიშ ჯგუფის ჰამაკეფიშ გოფაჩუაშ უფლება ქიმეჩ. თინეფქ მალწყარს გიბონეს, მუჭოთ თეს ადგილობრივეფ ორთუდეს.

 ანტეკუმ-პატაშე მაქადაგებელეფიშ ჯგუფიქ სოფელ ტვენკეშა მიდართჷ, სოდეთ შეხვადეს გურჭვილ ხალხის; თინეფს საჸოროფო პიროვნება აფდეს ღურელ დო თვალუნდეს. ერიკ, ნამუთ თე მოგზაურობას ხემძღვანელენდჷ, რაგადანს: „ტომიშ ბელადიქ, ნება ქომჩეს თე ხალხის გურშა ეუქექეთკო. ბელად დო მუშ ოჯახის მეწონეს თი მუხლეფქ, ნამუთ ეშუკითხით ბიბლიაშე ვაიანა ნინაშა; თეწკუმა ართო ვოძირეთ ვიდეო, სოდეთ ღურელეფიშ გათელებაშ იმენდშა რდუ ყურადღება გამახვილებურ“.

 მაქადაგებელეფქ მარიპასულაშე გვერდ საათ თვითმფრინავით იმგზავრეს, ნამდა გრან-სანტიშ ჭიჭე ქალაქშა გენურთუმდესკო. თახაშხა დო ჯუმაშხას მაქადაგებელეფ ბიბლიურ ცნობას გინოჩანდეს თექიან მახორუეფს. ცააშხას თინეფს ხუთ საათ დო გვერდიქ დესაჭირეს, ნამდა მალწყარ მარონით ართ სოფელ, აპატეშა ქიმერთესკო.

 მოგზაურობაშ თებაშახ მაქადაგებელეფიშ ჯგუფიქ ართ დღათ ადრე ტყას მახორუ მარონეფშა ქიმერთჷ; თინეფ მეზობელ ქიანაშ, სურინამიშ კოლონიზაციაშ დროს აფრიკაშე სამხრეთ ამერიკაშა მოჸუნაფილ მონეფ რდეს. მოწმეეფქ არძა ქუდაპეჯეს კრებაშ შეხვალამაშა, ნამუთ ჩატარეს სპეციალურო მონწყილ დიდ კარავს. კლოდ იჩიებ: „მანგარო მახიოლეს შეხვალამაშა მოულირ თესხი ხალხიშ ძირაფაქ, ნამუთ თიმ ოჭმარეს დუვაპეჯით“. კარსტენქ, ნამუთ პირველო რდუ თე ადგილს, აუკანი ნინაშა წეკითხჷ საჯარო მოხსენება, ნამუშ სათაურ რდუ: „ხვალე თენა რენო რინა?“. თე შეხვალამას შხვადოშხვა სოფელშე მოულირ 91 კოჩიქ დესწრჷ.

 საბოლათ, თე ჯგუფიშ წევრეფქ დირთეს სენ-ლორან-დიუ-მარონშა. თინეფ გახარებულეფ რდეს, მუშენდა ბრელქ ქუმურჩქილუ სახიოლო ამბეს, გეჭოფეს პუბლიკაციეფ დო უჯინეს იეჰოვაშ მოწმეეფიშ მომზადებულ ვიდეოეფს.

 ლიზეტ იჩიებ: „ნინათ ვეკმარაგადე, მუშმადიდა ხიოლ დო ბედნერობა მომიღ თე სამქადაგებლო მოგზაურობაქ“. სინდი ხოლო თეცალ აზრის იჩიებ: „თეცალ შანსის მაჟიაშა ხოლო ვა გუტენდ ხეშე. თქვა ხოლო შეილებნა გიმოცადათ თეცალ ხიოლ“.

 თე სამქადაგებლო კამპანიაშ უკულ ბრელ და დო ჯიმას სურვილქ გურჩქინდჷ კინ დირთესკო თექ. მიკაელ იჩიებ: „ხიოლით მიდეფშით ხოლო ართშა“. ვინსლიქ უკვე გეგნორთჷ სენ-ლორან-დიუ-მარონშა. კლოდ დო ლიზეტიქ, მით 60 წანას რენა გინოჩილათირ, აპატეშა გინულა გეგნოჭყვიდეს.