ტყურა: იეჰოვაშ მოწმეეფ თიშენ ვაღნიშნენა ქირსეს, ნამდა იესო ვა წანა.

 სიმართლე: ჩქი ქრისტიანეფ ვორეთ. ჩქი ბჯერა, ნამდა გინოსქილადა ხვალე იესოშ საშვალებათ რე შეიოლებერ (საქმეები 4:12).

 ტყურა: თქვან ოჯახეფ გორთილ რე თიშენ, ნამდა ვაღნიშნენთ ქირსეს.

 სიმართლე: ჩქი ბზრუნენთ ჩქინ ოჯახეფშო დო ბიბლიურ პრინციპეფს იბრინუანთ, ნამდა უმოსო გუვამყარათ თინა.

 ტყურა: თქვა ვაიღნა ქირსეშ დღესასწაულშო დუმახასიათებელ განწყობა — ვა რეთ ხეგოფაჩილეფ, დო ვაიღნა მშვიდობა დო ჯგირ დამოკიდებულება ადამიანეფიშ მიმართ.

 სიმართლე: ჩქი ირდღას ვოცადუთ, ვორდათ ალალ გურიშ დო მშვიდობიანეფ (იგავები 11:25; რომაელები 12:18). მაგალთო, შეხვალამეფიშ ჩატარებაშ დო ქადაგებაშ დროს, ჩქი მეპჸუნთ იესო ქრისტეშ მითითებას: „უსასყიდლოთ გაფნა მეღებულ დო უსასყიდლოთ ქიმეჩით“ (მათე 10:8).თეს გეძინელ, ჩქი ფქადაგენთ, ნამდა ნამდვილ მშვიდობას დედამიწას ხვალე ღორონთიშ სამეფო დამყარენს (მათე 10:7).

•   იესოქ დომჩინეს, ნამდა აბღნიშნითკო თიშ ღურაშ დღა დო ვართ ხოლო დაბადებაშ დღა (ლუკა 22:19, 20).

•   იესოშ მოციქულეფ დო მოწაფეეფ ვაღნიშნენდეს ქირსეს. „ახალ კათოლიკურ ენციკლოპედიას“ ჭარჷ, ნამდა „ქირსე პირველო ახ. წ. 243 წანას აღნიშნეს“, იესოშ ბოლო მოციქულიშ ღურაშე სოდგარენ ართ საუკუნეშე უმოს ხანიშ უკულ.

•   ვა არსებენს მუთუნნერ მტკიცებულება, ნამდა იესოქ 25 დეკემბერს დებად. თიშ დაბადებაშ თარიღ ბიბლიას ვა რე მოშინაფილ.

•   ჩქი დარწმუნებულ ვორეთ, ნამდა ღორონთის ვა მოწონს ქირსეშ დღესასწაულ, მუშენდა თინა წარმართულ წეს-ჩვეულებეფშა რე გერსხილ (2 კორინთელები 6:17).

 ბრელ აღნიშნენს ქირსეს თიშ უმკუჯინუო, ნამდა თინა წარმართულ წეს-ჩვეულებეფშა რე გერსხილ დო ბიბლიურ საფუძველ ვა უღჷ. თეცალ კათა შილებე ფიქრენდას: მუშენ ოკო ვაბღნიშნე ქირსეშ დღესასწაულ? მუშენ ოკო გინიფრთე შხვეფიშ გაძიცალო?

 ბიბლია ელამჩანა, ნამდა ქიდვეკვირათ ჩქინ დუც დო გააზრებულო ვემსახურათ ღორონთის (რომაელები 12:1, 2). ბიბლია თის ხოლო მოგურუანა, ნამდა დუვაფასათ ჭეშმარიტება (იოანე 4:23, 24). თიშ მანგიორო, ნამდა იფიფქრათ, მუს თქუანა შხვეფ ჩქინდე, ოკო მივაჸუნათ ბიბლიურ პრინციპეფს, მუდგაშ გურშენ შილებე ქიგმაძიცუან.

 მართალ რე, ჩქი ვაბღნიშნენთ ქირსეშ დღესასწაულს, მარა პატის ფცენთ შხვეფიშ უფლებას, მუშით გინოჭყვიდან, აღნიშნან დოვარ თე დღესასწაულ. თეწკუმა ართო, ჩქი ვართ შხვეფს უკრძალენთ ქირსეშ აღნიშნებას.