Zan̈ahary nan̈amia Jesosy natao soron̈o, baka han̈avotan̈a olo na han̈adosoan̈a olo amy fahotan̈a ndreky fahafatesan̈a. Amy Baiboly, avotro na vidipan̈avotan̈a ivolan̈ana liony Jesosy. (Efesianina 1:7; 1 Petera 1:18, 19) Zen̈y nahavy Jesosy nivolan̈a fa izy navy “han̈amia ain̈inany hatao vidipan̈avotan̈a ho takalonolo maro.”​—Matio 20:28, Fandikan-teny Protestanta.

Nan̈ino ma atsika mila avotan̈a?

 Taminy Adama vo niasainy Zan̈ahary, izy tsisy fahotan̈a, lavorary. Tokony ho afaka niain̈y tsisy farany izy. Fa izy koa fa kinia tsy nan̈araka volan̈any Zan̈ahary, izy tsy maintsy hofoaty, fotony zen̈y sazinany. (Genesisy 3:17-19) Izy nanjary panota, ke taranakanany nandova fahotan̈a baka taminany koa. (Romanina 5:12) Baka amy raha zen̈y nahavy Baiboly mivolan̈a Adama ndreky taranakanany ‘nalafony’ Adama hanjary andevony fahotan̈a ndreky fahafatesan̈a. (Romanina 7:14) Tsisy olo afaka ho lavorary karaha Adama tamy voanalohany in̈y, fotony olo jiaby tsisy lavorary.​—Salamo 49:7, 8.

 Ke Zan̈ahary nahinakinaka taranakany Adama, fotony izy koa iro fo, efa tsy tokony ho avotro eky iro. (Jaona 3:16) Fa Zan̈ahary man̈aja fitsipikinany momba ny rariny fo, ke tsy nambelany karaha io fo fahotan̈a nataondro. (Salamo 89:14; Romanina 3:23-26) Tiany aby olo jiaby, ke zen̈y nahavy izy nan̈avotro atsika. Nohony fan̈avotan̈a nataony Zan̈ahary io, atsika afaka ho voavela heloko sady ho afaka koa fahotan̈antsika.​—Romanina 5:6-8.

Ino ma dikany “avotro” zen̈y?

 Izikoa volan̈a avotro zen̈y amy Baiboly, iro telo ty dikanizio:

1.   Izy io vola na raha ifain̈a.​—Nomery 3:46, 47.

2.   Man̈avotro na mankafaka atsika izio.​—Eksodosy 21:30.

3.   Izio mifan̈araka tsarabe amy valerany raha hivangain̈a, na mahasaron̈o tsarabe izio. a

 Diniha akory han̈arehan̈a iro dikany telo nikoran̈intsika tio in̈y amy soron̈o nataony Jesosy?

1.   Raha ifain̈a. Baiboly mivolan̈a fa Kristianin̈y efa “navoavanga.” (1 Korintianina 6:20; 7:23) Nivangainy Jesosy tamy lionany iro ‘olo baka amy foko ndreky fivolan̈ana ndreky vahoaka ndreky firenena jiaby, hamian̈a Zan̈ahary.’​—Apokalypsy 5:8, 9.

2.   Mankafaka. Soron̈o nataony Jesosy ‘mankafaka’ olo amy fahotan̈a.​—1 Korintianina 1:30; Kolosianina 1:14; Hebreo 9:15.

3.   Mifandanja. Soron̈o nataony Jesosy mifandanja aminy ain̈y lavorary nariany Adama. (1 Korintianina 15:21, 22, 45, 46) Karaha ty koran̈iny Romanina 5:19: “Mira raha nataonolo araiky [Adama] tsy nan̈araka volan̈a, ke nahavy olo jiaby nanjary panota in̈y koa raha nataonolo araiky [Jesosy Kristy] nan̈araka volan̈a, ke nahavy olo maro nanjary marin̈y.” Dikanizen̈y, fahafatesanolo araiky mety mahavotro olo maro panota. Ke Jesosy nan̈ano soron̈o ain̈inany hatao ‘vidipan̈avotan̈a mifandanja hamonjian̈a olo’, lan̈iany von̈ono han̈araka volan̈anany.​—1 Timoty 2:5, 6.