Rango fa ela, dokotera pandidy aby io efa nila lakoly mety ampiasain̈y amy fandidian̈a ndreky hitahan̈a ratra na tataka amy vatan̈a. Ankamarozany lakoly fampiasainolo tsy mety ampiasain̈y an̈aty vatan̈a an̈y. Iro io mamparary, salakady lakoly izikoa fa maiky, manjary mahaimahery fo avio tsy mety mipetaka amy faritry mando amy vatan̈a. Fa manampahaizan̈a aby io nahita vahaolan̈a izikoa fa nandiniky momba ditiny lalinta. a

 Diniha hely baka: Lalinta izikoa fa mavozo, man̈aboaka dity mikoly mare, amy zen̈y izy afaka mipetaka tsarabe ndray amy ravindraha mando. Raha zen̈y miaro izy. Vatan̈anany baka io amy zay ataony miforitry.

 Pikaroko aby io nandiniky momba dity io, ke hitandro ino mahavy izio lakoly voajan̈ahary mety tsara. Ohatra, an̈atiny dity io misy raha simiky mampikoly, baka io misy angovo man̈atsory. Lalinta io izikoa fa mipetaka amy toeran̈a araiky, ditinany miditry amy faritry ipitahany io an̈y. Dity io ndray voapoetsikiny raha mavesatra, izio mbala tsy robaka fo. Pikaroko aby io nan̈amboatra fitaovan̈a mangala tahaka dity io, ke loso nahavita lakoly maheriheriny lakoly fampiasainy dokotera. Salakady izio koa afaka mipetaka tsarabe amy taova mbala velon̈o. Misy olo mivolan̈a fa dity io “mipetaka amy taova, ke tsisy ny hafa amy taolan̈a malemy mipetaka amy taolan̈a in̈y fo.”

 Iro manampahaizan̈a aby io mino fa iro pandidy aby io efa afaka hampiasa lakoly io fo amy zay izikoa fa hamody tataka amy vatan̈a, fa efa tsy hampiasa taretry ndreky vy madiniky eky. Izio mety ho afaka ampiasain̈y hitahan̈a taolan̈a malemy, na koa hamitrahan̈a fitaovan̈a fitahan̈a amy toeran̈a araiky ten̈a ilavan̈a izy, an̈aty vatan̈a ao. Hita tamy fan̈andraman̈a natao fa lakoly io mety tsarabe han̈intsen̈ana lavaka an̈aty fôny kamankory ndreky hanampenan̈a lavaka aminy atiny valavo.

 Matetiky pahay siansy aby io mahita vahaolan̈a mety tsarabe izikoa fa mandiniky zavaboary. Karaha ty nambarany Donald Ingber, direkterany Institut araiky nan̈amboatra lakoly io: “Mila hay antsendriky ino zavaboary tokony hidinihin̈y. Anao baka io amy zay mila mahita hevitry tsara izikoa fa mandiniky izio.”

 Akory hevitrinao? Ditiny lalinta io ma vokatrany evolision, sa izio nisy namoron̈o?