Rémora io karazan̈a laoko miavaka hely. Izio mahavita mipetaka na mikoly mare amy biby hafa andranomasin̈y an̈y. Baka io izy koa tsy sahiran̈a foeky izikoa fa hiala amy biby io sady tsy mandratra biby io koa izy. Rikian̈a mare pikaroko aby io izikoa fa mahita zen̈y.

 Diniha hely baka: Rémora io mahavita mipetaka amy biby andranomasin̈y an̈y, ndray malamadamatra hoditry biby io. Tafiditry amy zen̈y ziô makoba, rekin, tortue de mer, baka io trozon̈o na baleine. Lan̈iany hanin̈y tsy lanindro biby aby io hoaniny rémora io. Hoaniny koa lan̈iany biby madiniky mandeha amy vatan̈andro biby aby io. Izikoa izy fa mandeha an̈aty ranomasin̈y an̈y, izy tsy voatery milomon̈o be fotony biby ipitahany in̈y fo mitondra izy. Zen̈y koa miaro izy amy biby mety hihina izy. Iro pikaroko aby io mandiniky rémora io fotony tiandro ho hay karakory hahavitany laoko io mipetaka moramora amy raha samihafa, kanefa izy mipetaka tsarabe.

 Rémora miaraka amy rekin maventy be

 Amy lohany rémora io misy raha fisaka lavalava, avio somary boribory zay. Sisinizio matevin̈y avio malemilemy, ke izio afaka mipetaka mare amy raha ipitahany, sady tsy mora miala. An̈ivonizio ndraiky misy raha madiniky maro oe milahadahatra. Ke an̈atinizio ao misy taolan̈a madiniky mahery be. Rémora io izikoa fa hipetaka amy biby hafa, raha milahadahatra aby io mitsangana mahitsy tsarabe, baka io mifampitosy aminy hoditry biby io. Taolan̈a mahery an̈atinizio ao man̈ampy izio mifampitosy tsarabe amy biby io. Rémora io mahay sady mifampitosy marikitry hoditry biby hafa avio izy mahaimipetaka amindro io fo koa. Ke zen̈y mahavy izy mipetaka tsara iô fa tsy vôsotro foeky, ndray biby io mandeha mare karakory, na izy mivily tampoko.

 Nampiafatra iro pikaroko aby io raha an̈abo lohany rémora io, ke iro nan̈amboatra raha mitovitovy amizio. Raha namboarindro io koa somary boribory lavalava, baka io mahavita mipetaka amy raha isankarazany. Iro nan̈ohatra nan̈apetaka izio tamy raha. Izikoa izy fa nantsoritin̈y in̈y, raha io tsy nety niala foeky ndray efa navesatra mare nandilatra izy angovo nampiasain̈y nantsoritan̈a izy.

 Raha nalain̈a tahaka baka tamy rémora io mety hahavitan̈a fitaovan̈a isankarazany. An̈isanizen̈y ziô, fitaovan̈a apetaka amy biby andranomasin̈y an̈y izikoa fa han̈ano fikarohan̈a momba iro, na koa fitaovan̈a fikarohan̈a momba raha amy farany ambaniny ranomasin̈y an̈y. Iô koa fitaovan̈a mety han̈anton̈ana jiro na han̈anton̈ana raha hafa an̈aty rano an̈y, ohatra ambany pô an̈y na ambaniny sambo.

 Akory hevitrinao? Navinavy hoazy fo ma fahaizany rémora mipetaka amy biby hafa io sa izio nisy namoron̈o?