Misy karazan̈a kokiazy zay balanes an̈arany, ndreky raha manampahin̈ana hafa koa mipetaka amy vatany sambo, ke raha zen̈y ten̈a miteraka problemo. Mampiadan̈a diany sambo izio ke mandany gazoaly. Isaka taon̈o vitsivitsy koa sambo io tsy maintsy ajanon̈o hely tsy miasa, fotony mila diovin̈y. Ke siantifiky aby io mandiniky zavaboary baka hahitavandro vahaolan̈a amizio.

 Diniha hely baka: Hitany pikaroko fa misy karazan̈a trozon̈o joby araiky zay (Globicephala melas) mahavita man̈adio hoditrinany. An̈abony hoditrinany iô baka misy soson̈o marôkorôko, ke zanaka balanes aby io tsy afaka mipetaka iô. An̈elan̈elany tany marôkorôko aby io koa misy ranondraha madity miady aminy ahidrano ndreky baktery. Trozon̈o io man̈aboaka ranondraha vaovao fo, isaka misy hoditry miala.

 Siantifiky aby io mitady fomba han̈adiovan̈a vatany sambo, ke iro mandiniky fomba fan̈adiovany trozon̈o hoditrinany. Taloha, paintira raha nampiasain̈y. Fa karazan̈a paintira ten̈a fampiasainolo maro mamono biby andranomasin̈y an̈y. Ke efa tsy nimboan̈a nampiasain̈y eky iro io vo tsy ela zay. Manampahizan̈a aby io nahita hevitry: Amy vatany sambo io asian̈a lavaka maromaro, baka io an̈abonizio asian̈a harato vy. Lavaka aby io man̈aboaka ranondraha simiky tsy mandrobaka tontolo iain̈ana. Ranondraha io izikoa fa avoa ranomasin̈y, manjary matevin̈y ndreky madity ke loso karaha ribany sambo. Izio mahatakatra kadiriny 0,7 milimetara iô. Izikoa fa mandeha fotoan̈a, izio mahendaka baka io miaraka miala amy biby na raha hafa nipetaka tio. Koa fa vita zen̈y, misy ranondraha vaovao koa mandrakotro sambo io.

 Misy testy natao tamy laboratoara, ke izikoa fa nampiasain̈y fomba fiasa araiky io, hita fa nanjary sasatra ahitan̈a biby nipetaka tamy sambo. Hahazo hatsaran̈a baka amy zen̈y iro orinasa mampiasa sambo aby io, fotony be vola miala amindro izikoa fa handeha han̈adio sambo antanety in̈y.

 Akory hevitrinao? Hoditriny trozon̈o joby io ma baka taminy evolision, sa izio nisy namoron̈o?