Andrefan’i Ameriky Avaratra an̈y misy biby hely, voangorin’ny devoly an̈arany (Phloeodes diabolicus). Araka fikarohan̈a, voangory io mahadin̈y tindrin’ny raha mavesatra kadiriny 39 000 fois mandilatran’ny havisaran’ny vatan̈anany, aviô mbala mety ho velon̈o fo nata voadian’ny tomabily. Karakôry mahavy izio mahadin̈y tindry maresaka be karaha zen̈y?

 Misy karaokany manaron̈o tahezan̈an’ny voangory io, aviô misy koa ambaninany ao. Misy raha mampifandray irô io amy sisiny ankavia ndreky ankavanan̈a. Aviô raha mampifandray karaokan’izio misy karazany. Araiky karazany voanalohany, miaro taovan’ny (organe) voangory io, fôtony man̈aposy raha manindry voangory io. Araiky karazany faharoe ndraiky malemilemy ke mora miforitry. Fa araiky karazany fahatelo ndraiky, mahavy karaokan’ny voangory io ho afaka hihetsiketsiky. Ke lôso afaka mitsôfotsôfotro amy toeran̈a maletry mare voangory io vokatra zen̈y, ohatra antsefasefaka kakazo na vato.

 Tsy basin’izen̈y fo, fa misy raha mifampidipiditry karaha soma puzzle in̈y amy fisasahan’ny tahezan̈an’ny voangory io. Ke izikoa fa misy raha manindry izy in̈y, tsy amy tahezan̈anany iô fo miaritry havisaran-draha io fa faritry hafa koa. Misy sôsono maromaro amy raha mifampidipiditry io, ke proteiny mampifampipetaka izio. Ke izikoa efa misy raha manindry biby hely io, misy matriaka hely amy proteiny aby io. Kanefa zen̈y man̈ampy raha mifampidipiditry io tsy ho tapaka. Izikoa fa mandeha fotoan̈a mbala mahaijanga fo raha matriaka io.

 Mivolan̈a irô mpikaroko aby io fa mety alain̈a tahaka karaokan’ny voangory io izikoa fa man̈amboatra tomabily na pô na tran̈o na raha hafa mila mahadin̈y tindry na kon̈o maresaka.

 Akôry hevitrinao? Navinavy ho azy ma karaokan’ny voangorin’ny devoly io, sa nisy namôron̈o?