Misy vôron̈o kahian̈a Léipoa ocellé amy faritry atsimon’ny Australie an̈y. Ataon’ny vôron̈o io raha hahavy hafanan̈an’ny tran̈onany hatakatra kadiriny 34 degre, mandavantaon̈o na matsan̈a na alin̈y. Akôry an̈anaovany zen̈y?

 Isaka ririn̈iny vôron̈o io mangady lavaka ambany tany han̈anaovany tran̈onany. Kadiriny metara araiky halalin̈an’ny lavaka io, aviô kadiriny telo metara iô habezany. Lavaka io amy zay finoan’ny lahiny vôron̈o io bozaka, ravin-draha ndreky raha maniry hafa. Amy mahalen̈y faramparany amy lera ririn̈iny in̈y, irô raha maniry amy lavaka io koa fa mandomando, lahin’ny vôron̈o io man̈ano lavaka vaovao han̈antodizan’ny vaviny. Aviô amy zay tran̈onany io totofany fotaka miaraka amy jia. Koa fa elaela, lo irô raha maniry aby io ke mahay mafana fo. Tran̈om-bôron̈o io amy zay lôso mafana.

 Ke isaka vavin’ny vôron̈o io handeha han̈antody, adoson’ny lahiny io fotaka mandrakotro tran̈ony io. Izikoa fa baka man̈atody amy lavaka ao amy zay vaviny io, direkty totofan’ny lahiny io tran̈ony io. Mety hatakatra 35 antodin’ny vôron̈o io, manomboko fanjava Septambara firaka Fevrie. a

 Matetiky vavandrô vôron̈o aby io atsôfotrondrô an̈atin’ny jia ao baka hahaizandrô hafanan̈a. Aviô misy raha amboarindrô amy tran̈om-bôron̈o io, arakaraka lasaizon. Ohatra:

•   Koa fa lohataon̈o, lôso mafana mare tran̈om-bôron̈o io baka amindrô raha maniry lo aby io. Ke kikisan’ny vôron̈o io fotaka mandrakotro tran̈o fan̈antodizan̈a io baka hafanan̈a io miboaka. Aviô amy zay izio totofany fotaka manintsinintsy.

•   Izikoa ndraiky lera hasara in̈y, ampian’ny lahin’ny vôron̈o io fotaka an̈abon’ny tran̈ony io baka hiarovan̈a antody amy masoandra. Fa isaka maraindrain̈y, kikisan’ny vôron̈o io fotaka io, aviô soloany ndraiky, lera jia ndreky tran̈onany io manintsinintsy.

•   Koa fa fararano, lo irô raha maniry jiaby in̈y ke tsy man̈aboaka hafanan̈a eky. Adoson’ny lahin’ny vôron̈o io ankamarozan’ny fotaka mandrakotro tran̈onany io, baka azon’ny masoandra antody ndreky fotaka naparitany io, ke mafana. Baka iô ampodiny totofany amy fotaka mafana io ndraiky tran̈ony io, ke mafana fo antody io amin’ny alin̈y.

 Kadiriny maherin’ny dimy lera lanin’ny vôron̈o lahiny io hitateran̈a fotaka isan’andra. Ke kadiriny hely tsy ho kilô araiky fotaka tateriny io. An̈adosoany fotaka mandrakotro tran̈onany io, aviô ampodiny iô ndraiky, karaha zen̈y fo ataony. Zen̈y mahavy fotaka io lôso malemy ke mora amy zana-bôron̈o miboaka baka amin’izio ao lera irô foy.

 Akôry hevitrinao? Baka amy evolision ma fahaizan’ny vôron̈o léipoa mitana hafanan̈a amy tran̈onany io, sa nisy namôron̈o?