Vaovao Tsara Nisoratin’i Lioka 1:1-80
1 Fôtony maro olo efa nifen̈y nanoratra tantaran’ny raha nandalo sady ikentsika fa ten̈a marin̈y,*
2 eraka raha nampitaindrô mpanompo nan̈ambara hafatra io tamintsika sady vavolombelon̈o nahita maso raha jiaby nandalo rango tamy voanalohany tan̈y,
3 zaho koa mba nanapa-kevitry hanoratra raha jiaby zen̈y aminao, Teofilo hajain̈a, fôtony zaho efa nikaroko tsarabe momba raha jiaby rango tamy voanalohany aviô efa nalaiko antoko tsarabe irô io, ke nisoratiko erakan’ny filaharany,
4 amy zen̈y ho hainao fa marin̈y ankitin̈y raha nampianarin̈y anao.*
5 Tamin’ny andran’i Heroda* mpanjakan’i Jodia, nisy mpisôron̈o araiky baka tamy fizaran̈a nisy i Abia. Zakaria an̈aran̈anany. Vadiny baka amy taranakan’i* Arona, Elizabeta an̈aran̈anany.
6 Irô samby olo marin̈y sady tsisy tsin̈y* nan̈oloan̈a Zan̈ahary. Narehandrô tsarabe didy ndreky raha jiaby nitakin’ny lalàn̈an’i Jehovah.
7 Kanefa irô tsy nanan-janaka, fôtony Elizabeta tsy afaka niteraka, aviô irô roe samby efa natoe.
8 Tamy Zakaria nan̈ano asan’ny mpisôron̈o nan̈oloan̈a Zan̈ahary, eraka raha nanendren̈a fizaran̈a nisy izy,
9 izy niditry tamy toeran̈a masin̈in’i Jehovah tao, fôtony tamy zen̈y, anjaranany nanolotro emboko man̈itry karaha efa fataon’ny mpisôron̈o.
10 Vahoaka jiaby nivavaka tambelan̈a tao, tamy lera fanoloran̈a emboko man̈itry.
11 Nisy anjelin’i Jehovah niboaka tamy Zakaria. Anjely io nitsangana tankavanan̈an’ny alitara fan̈oroan̈a emboko man̈itry.
12 Taitry sady navozo mare Zakaria koa fa nahita izy.
13 Fa ho anjely io taminany: “A Zakaria, anao aza mavozo, fôtony fiangavian̈anao efa nitandrin̈esan’ny Zan̈ahary, ke Elizabeta vadinao hiteraka tsaiky lelahy. Ataova Jaona an̈aran̈anany.
14 Anao ho ravoravo mare, aviô maro koa olo ho ravoravo lera izy teraka,
15 fôtony hiavaka izy amason’i Jehovah. Fa izy fo tsy mahazo migiaka divain na raha hafa misy toaka foeky. Aviô ndray izy mbala tsendriky teraka,* izy ho feno fan̈ahy masin̈y.
16 Izy hampimpody ankamaraozan’ny zanakan’Israely amy Jehovah Zan̈aharindrô.
17 Aviô koa, izy handeha alohan’ny Zan̈ahary sady hanan̈a toe-tsain̈y* ndreky angôvo mitovy amy nin’i Elia. Ke izy han̈ampody fôn’ny baba hanjary karaha fôn’ny* zanaka, baka iô izy han̈ampy olo tsy man̈araka volan̈a ho hisy jery izikoa fa man̈ano raha, karaha ataon’olo marin̈y, amy zen̈y izy han̈oman̈a vahoaka nin’i Jehovah.”
18 Ho Zakaria tamin’ny anjely io: “Akôry azahoako antoko fa marin̈y raha zen̈y? Zaho kony efa matoe ay! Baka iô vadiko koa efa mahazoazo taon̈o.”
19 Ho anjely io taminany: “Zaho Gabriela, araiky mitsangana man̈oloan̈a Zan̈ahary. Zaho io nirahin̈y hikoran̈a aminao ndreky han̈ambara vaovao tsara zen̈y aminao.
20 Volan̈anaka in̈y tsy maintsy ho tanteraka amy fotoan̈a voatôndro. Kanefa, fôtony anao tsy nino raha nivolan̈iko, anao hanjary moa. Anao tsy hahavita hivolan̈a foeky firaka raha aby zen̈y ho tanteraka.”
21 Tan̈atin’ny fotoan̈a zen̈y, niambin̈y Zakaria fo irô vahoaka aby io. Gaga irô fôtony ela loatra izy tamy toeran̈a masin̈y tao.
22 Izy koa fa niboaka, izy tsy nahavita nikoran̈a tamindrô. Ke haindrô fa vo baka nahita fahitan̈a izy tamy toeran̈a masin̈y tao. Nan̈ano beko moa tamindrô izy fôtony izy moa.
23 Izikoa fa tapitry andra nan̈anaovany fanompoan̈a masin̈y,* izy nody.
24 Izikoa fa nandeha andra maromaro, navesatra Elizabeta vadiny, ke izy tsy niboaka tran̈o foeky tan̈atin’ny dimy fanjava. Ho izy:
25 “Ty raha nataon’i Jehovah taminaka: Izy nitsinjo zaho, baka zaho tsy ho voabaràka amason’olo eky.”
26 Kibonany koa fa tsiota fanjava, Zan̈ahary nan̈iraka anjely Gabriela nandeha ta Nazareta, tanàna araiky ta Galilia,
27 handeha amy virjiny araiky efa fiansen’i Josefa, lelahy araiky baka amy taranakan’i Davida. Maria an̈aran̈an’ny virjiny io.
28 Anjely io koa fa niditry tamy tany nisy izy, ho izy taminany: “Mbalatsara anao, man̈angy ten̈a ankasitrahin̈y! Jehovah miaraka aminao.”
29 Taitry mare izy izikoa fa naharen̈y volan̈a aby zen̈y, ke izy nifen̈y hahay ino mety ho dikan’ny mbalatsara in̈y.
30 Ke ho anjely io taminany: “A Maria, anao aza mavozo, fôtony anao efa nankasitrahan’ny Zan̈ahary.
31 Anao havesatra, ke hiteraka tsaiky lelahy. Ataova Jesosy an̈aran̈anany.
32 Izy hiavaka, ke Zanakan’ny Araiky Farany An̈abo hikahian̈a izy. Hamezan’i Jehovah Zan̈ahary izy sezy fiandrianan̈an’i Davida babany.
33 Izy ho mpanjaka amy taranakan’i Jakoba mandrakizay, aviô fanjakan̈anany tsy ho hisy farany foeky.”
34 Kanefa ho Maria tamin’ny anjely io: “Amy fomba akôry eky hampatanteraka raha zen̈y? Ndray zaho fo mbala tsiary nan̈ano firaisan̈a tamy lelahy!”
35 Ke ho anjely io taminany: “Fan̈ahy masin̈y ho avy aminao, baka iô angôvon’ny Araiky Farany An̈abo handrakotro anao. Zen̈y mahavy tsaiky haterakanao io kahian̈a masin̈y, Zanakan’ny Zan̈ahary.
36 Hitanao, Elizabeta havanao, araiky kahian̈a man̈angy tsy miteraka in̈y, mavesatra ndray izy efa matoe. Kibonany iziô efa tsiota fanjava.
37 Tsisy tsy tanteraka baka raha ambaran’ny Zan̈ahary.”
38 Ke ho Maria: “Indriô zaho mpanompovavin’i Jehovah! Irarian̈a ho tanteraka aminaka raha zen̈y, eraka raha nivolan̈inao.” Anjely io baka tiô niala taminany tiô.
39 Tafaran’izen̈y, niraparapa Maria nandeha tamy faritry feno bongo, tamy tanàna araiky ta Joda.
40 Izy niditry tamy tran̈on’i Zakaria, ke nan̈ano mbalatsara Elizabeta.
41 Niaraka Elizabeta naharen̈y mbalatsaran’i Maria in̈y, nihetsiky tsaiky tan̈atin’ny kibonany tao. Aviô Elizabeta feno fan̈ahy masin̈y,
42 ke nivolan̈a mare: “Amy man̈angy jiaby, anao ny ten̈a tahin-dran̈ahary! Tahin-dran̈ahary koa tsaiky an̈atin’ny kibonao!
43 Azôvy ma zaho ke mahazo voninahitry karaha ty? Ndraiky renin’ny Tômpoko navy aminaka atỳ!
44 Niaraka zaho naharen̈y anao nan̈ano mbalatsara, nihetsiky tsaiky an̈atin’ny kibonaka ato fôtony izy ravoravo.
45 Sambatra koa anao nino, fôtony ho tanteraka aminao aby raha nirahin’i Jehovah nambara taminao.”
46 Ke ho Maria: “Zaho* hidera Jehovah fôtony izy be ankitin̈y,
47 aviô tsy tanako foeky haravoan̈anaka baka amy raha nataon’ny Zan̈ahary Mpamonjy zaho,
48 fôtony nizahavany fo mpanompovavinany ndray olo ambany. Manomboko iziô, taranaka jiaby hivolan̈a fa zaho sambatra,
49 fôtony Araiky mahery nan̈ano raha niavaka taminaka. Masin̈y an̈aran̈anany,
50 aviô amy taranaka mifandimby, izy mamindra fô amy zay olo mavozo izy.
51 Izy nan̈ano raha niavaka tamin’ny angôvon’ny baontan̈ananany, baka iô izy nan̈aparitaka olo man̈ambony ten̈a.*
52 Nadosony tamy sezy fiandrianan̈andrô irô olo manan̈a fahifan̈a aby io, fa olo ambany ndraiky nampanongainy.
53 Nataony voky raha tsara olo mosary, fa olo manan-draha ndraiky nalefany nody tan̈am-polo.
54 Izy nan̈ampy Israely mpanomponany, fôtony tsy hadin̈any foeky fa izy nampan̈anten̈a hamindra fô
55 amin’i Abrahama ndreky taranakanany, eraka raha efa nivolan̈iny tamy razambentsika.”
56 Maria nidôko tamin’i Elizabeta tao kadiriny telo fanjava, baka iô izy lôso nody.
57 Navy amizay fotoan̈a nitirahan’i Elizabeta. Izy niteraka lelahy.
58 Ren̈indrô jiràny ndreky havany aby io fa Jehovah namindra fô taminany, ke irô niaraka niravoravo taminany.
59 Tamin’ny andra fahavalo, navy irô handeha hamositry tsaiky hely io. An̈aran̈an’ny tsaiky io efa tseky hataondrô Zakaria, karaha an̈aran̈an’ny babany.
60 Kanefa ho mamany: “Aha! Jaona an̈aran̈anany.”
61 Fa ho irô taminany: “Havanao kony tsisy manan̈a an̈aran̈a karaha zen̈y ay!”
62 Ke nan̈ano beko moa irô nan̈ontany baban’ny tsaiky io azôvy tiany hikahian̈a izy.
63 Izy nangataka raha* mety hanoratan̈a, ke izy nanoratra: “Jaona an̈aran̈anany.” Ke gaga mare irô jiaby.
64 Tiô ny iô vavanany nibian̈a, aviô lelanany nivaha, ke izy nanomboko nivolan̈a ndreky nidera Zan̈ahary.
65 Olo jiaby nipetraka nan̈odidin̈y tiô navozo, aviô raha jiaby zen̈y nataon’olo koran̈a nan̈eran̈a faritry feno bongo ta Jodia tan̈y.
66 Kila olo naharen̈y raha zen̈y lôso diniky aby, ke ho irô: “Han̈ano akôry eky tsaiky zen̈y?” Fôtony tan̈an’i Jehovah lastiô niaraka taminany.
67 Zakaria baban’ny tsaiky io nanjary feno fan̈ahy masin̈y, ke izy naminan̈y karaha ty:
68 “Irarian̈a Jehovah Zan̈aharin’Israely hahazo dera, fôtony izy nahinakinaka vahoakanany ke nan̈avotro irô.
69 Izy nanangana tandroko fan̈avaotan̈a nintsika* baka tamy taranakan’i* Davida mpanomponany,
70 eraka raha nirahiny nivolan̈in’ny mpaminan̈inany masin̈y taloha be tan̈y.
71 Izy nampan̈anten̈a fa han̈avotro atsika amy fahavalontsika ndreky amin’olo jiaby mankahala atsika.
72 Izy hamindra fô amintsika, eraka raha efa nampan̈antin̈ainy irô razambentsika aby io, aviô halainy onon̈o fifan̈ikian̈a masin̈y efa nataony.
73 Zen̈y vava nataony tamin’i Abrahama razambentsika.
74 Izy koa fa baka nan̈avotro atsika tam-pelatan̈anan’ny fahavalontsika, eraka vava efa nataony, izy han̈amia atsika tombontsoa tsy havozovozo foeky han̈ano fanompoan̈a masin̈y aminany.
75 Ke atsika tsy hivadiky aviô han̈ano ny marin̈y man̈oloan̈a izy amin’ny andra jiaby iain̈antsika.
76 Fa anao ndraiky, zanako, mpaminan̈in’ny Araiky Farany An̈abo ikahian̈a anao, fôtony anao handeha alohan’i Jehovah ke han̈amboatra lalan̈anany
77 ndreky han̈ambara amy vahoakanany fa irô ho voavonjy baka amy fan̈ambilàny fahotan̈andrô,
78 fôtony Zan̈aharintsika io ten̈a mahinakinaka. Baka amin’ny hinakinaka zen̈y, hisy hazavan̈a baka an̈abo hipiriaka amintsika
79 ke hampazava olo mipetraka amin’ny hiziky ndreky amy kandindon̈on’ny fahafatesan̈a aviô hitariky diantsika amy lalan̈an’ny fiadanan̈a.”
80 Tsaiky io nahaibe aviô nahaimatotro;* izy nidôko tamy tany paiky tan̈y parapavian’ny andra niboahany tamin’Israely.
Lamariky amy Pazy Ambany
^ Na: “sady inoantsika ankitin̈y.”
^ Na: “raha nampianarin̈y anao am-bava.”
^ Abt: “baka amy zanakavavin’i.”
^ Abt: “nandeha tsisy tsin̈y.”
^ Na: “Aviô rango izy mbala tan-kibon-dreniny.”
^ Na: “hafanam-pô; fan̈ahy.”
^ Abt: “fôn’ny baba amy.”
^ Na: “fanompoan̈a natao nin’olo jiaby. ”
^ Na: “olo manan̈a fô man̈ambony ten̈a.”
^ Na: “lardoazy kakazo.”
^ Abt: “tran̈on’i.”
^ Abt: “nahaifatatra fan̈ahinany.”
