Vaovao Tsara Nisoratin’i Lioka 12:1-59
-
“Leviran’ny Fariseo” (1-3)
-
Matahaora Zan̈ahary, fa tsy olo (4-7)
-
Masaky mivolan̈a fa mpianatran’i Kristy (8-12)
-
Fan̈oharan̈a momba lelahy mpan̈arivo kanefa tsy misain̈y (13-21)
-
Aza miasaloha eky (22-34)
-
“Ôndrikôndriky vitsy” (32)
-
-
Mila miambin̈y (35-40)
-
Mpanompo atokisan̈a ndreky mpanompo tsy mety atokisan̈a (41-48)
-
Tsy hitondra fihavanan̈a fa fisaratsarahan̈a (49-53)
-
Mila mandiniky raha mandalo (54-56)
-
Mifen̈y hifandamin̈y (57-59)
12 Tan̈atin’ny fotoan̈a zen̈y, nisy vahoaka mandeha andrivony aby vory ke irô nifandiadia. Aviô izy nanomboko nivolan̈a tamy mpianatranany: “Mitandrema amy leviran’ny Fariseo, tsy ino zen̈y fa fihatsarambelatsihindrô.
2 Tsisy raha asitriky farany mare ke tsy hambara, aviô tsisy raha sekire ke tsy ho hay.
3 Ke zay raha volan̈inarô amy mahiziky,* ho ren̈y amy mazava;* aviô zay raha bisibisihinarô an̈atin’ny tran̈onarô ao, hitorian̈a an-tampon-tan̈o.*
4 Sôsoko zen̈y namako aby, ho zaho aminarô, aza mavozo lan̈iany olo mahavita mamono anarô* kanefa afaran’izen̈y efa tsisy raha hafa ho vitandrô eky.
5 Fa hambarako anarô ndraiky azôvy tôkony hatahaoranarô: Matahaora Araiky manan̈a fahifan̈a han̈atsipy amy Gehena* izikoa fa baka namono anarô. Ia, ho zaho aminarô, matahaora Izy.
6 Vola madiniky aroe sady ambany valera* andafaosan̈a fody dimy, tsy zen̈y? Kanefa natà araiky amindrô io tsisy adin̈an’ny* Zan̈ahary.
7 Ary firaka amy fan̈evanarô mbala avoakôntiny fo. Ke anarô aza mavozo, fôtony anarô mbala valera mare mandilatra fody maro.
8 “Zaho man̈ambara anarô, lan̈iany olo masaky mivolan̈a amason’olo fa izy mpianatranaka, Zanak’olo koa hasaky hivolan̈a amin’ny anjelin’ny Zan̈ahary fa izy mpianatranany.
9 Fa lan̈iany olo tsy man̈eky zaho amason’olo, izy tsy hiken̈y man̈oloan̈a anjelin’ny Zan̈ahary.
10 Lan̈iany olo tsy man̈isy fôtiny Zanak’olo mbala hahazo familan-keloko, fa lan̈iany olo tsy man̈isy fôtiny fan̈ahy masin̈y ndraiky, tsisy andra hazahoany familan-keloko.
11 Anarô koa fa hindesin’olo man̈oloan̈a vahoaka,* ndreky mpitondra fanjakan̈a, aviô manam-pahifan̈a, anarô aza miasaloha amy fomba hivolan̈anarô fiarovan-ten̈anarô na amy raha handeha hivolan̈inarô,
12 fôtony amy lera zen̈y tsarabe fan̈ahy masin̈y hampianatra anarô raha tôkony hivolan̈inarô.”
13 Aviô nisy olo araiky tamy vahoaka tao nivolan̈a taminany: “Mpampianatra, mba volàn̈a kony rahalahiko handrasa lova aminaka.”
14 Ho Jesosy taminany: “A havako, azôvy ma nanendry zaho hanjary mpitsara na mpandrasa fanan̈ananarô roe?”
15 Aviô ho izy tamy vahoaka: “Mangalà onon-draha tsarabe anarô ke mitandrema amy raha jiaby mety hahavy anarô tsy ho afa-pô,* fôtony olo araiky ndray manan-draha be karakôry, raha anan̈any aby io tsy mahatana fahin̈ananany.”
16 Izy baka tiô nan̈ano fan̈oharan̈a ty: “Namokatra mare tanin’ny lelahy mpan̈arivo araiky.
17 Ke ho izy tamy jerinany tan̈y: ‘Ino eky raha tôkony hataoko? Aia eky tany han̈ajarisako vokatranaka?’
18 Baka iô ho izy: ‘Ty raha handeha hataoko: Handeha hiravan̈iko rihanaka aby io aviô zaho han̈ôrin̈y maventiventindrô io, ke ao hamoriako vokatranaka jiaby ndreky fanan̈ananaka jiaby.
19 Aviô zaho hivolan̈a amin’ny ain̈inaka: “Maro tsara mare raha navoavorinao, salakady mahampy anao an̈atin’ny taon̈otaon̈o! Ke mangalà kajo amizay, mihinàna, migiaha, ataova raha mamparavoravo anao.”’
20 Fa ho Zan̈ahary taminany: ‘Anao tsy mandiniky, ho foaty anao* alin̈y ty. Ke raha jiaby navorinao io ma handeha amin-jôvy?’
21 Karaha zen̈y raha havoa olo mamory harian̈a ninany tômpiny, kanefa amy* Zan̈ahary izy tsy manan-draha.”
22 Aviô ho izy tamy mpianatranany: “Zen̈y mahavy zaho mivolan̈a aminarô: Aza miasaloha amy raha momba ain̈inarô eky, karaha ataony raha hoaninarô, na amy raha momba vatan̈anarô, karaha ataony lamba sikininarô.
23 Fôtony fahin̈ana mbala valera mandilatra hanin̈y, aviô vatan̈a mbala valera mandilatra lamba.
24 Dinihinarô baka irô goàka aby io: Irô salakady tsy mamafy, tsy mamory vokatra, aviô irô tsisy tran̈o fan̈ajarisan̈a hanin̈y sady tsisy riha, kanefa Zan̈ahary man̈amia hanin̈y irô. Ke tsy mbala valera mandilatra vôron̈o ma anarô?
25 Azôvy aminarô ma mahavita mankalava andra iain̈any, na hely* fo, izikoa fa miasaloha?
26 Ndray raha hely karaha zen̈y fo tsy vitanarô, ke nan̈ino anarô miasaloha amy raha hafa?
27 Dinihinarô baka fomba fanirian’ny folera:* Irô io tsy miasa mare na manjaitry, kanefa zaho man̈ambara anarô fa ndray Solomona tamy voninahitrinany jiaby tsiary ndraiky nisikiny lamba tsara mare karaha araiky amindrô io.
28 Ke izikoa raha maniry an-kiaka an̈y ampisikinin’ny Zan̈ahary tsarabe karaha zen̈y, kanefa irô io maniry niany, amaray hatsipy an̈atin’ny môtro,* izy edy tsy han̈amia raha sikininarô? Anarô mba hely finoan̈a ay!
29 Ke voleza miasaloha momba raha hihoaninarô na raha higiahanarô, aviô aza miasaloha dila loatra eky.
30 Raha jiaby zen̈y baka raha ten̈a tsakarehan’olo amy donia ty, kanefa hain’ny Babanarô fa ilainarô raha aby zen̈y.
31 Ke tsakareha fo Fanjakan̈anany, fa hamezan̈a anarô edy raha aby zen̈y.
32 “Ôndrikôndriky vitsy, anarô aza mavozo, fôtony Babanarô efa nan̈eky han̈amia anarô Fanjakan̈a.
33 Alafaosa fanan̈ananarô, baka iô man̈ameza raha olo sahiran̈a.* Man̈amboara raha fasian̈a vola tsy mety robaka, tsy ino zen̈y fa harian̈a tsy mety lany an-dan̈itry an̈y; tsisy mpangalatra baka avy an̈y aviô an̈y tsisy kalalao mandroba-draha.
34 Fôtony zay tany misy fanan̈ananarô, an̈y koa handihanan’ny fônarô.
35 “Sikìna lambanarô aviô man̈anaova pare,* baka iô riheta jironarô.
36 Anarô tôkony hitovy amy mpanompo miambin̈y tômpondrô mimpody baka amy fetin’ny mariazy, amy zen̈y lera tômpondrô io avy ke mikonkòn̈o, direkty izy hibiafindrô.
37 Sambatra irô mpanompo aby io izikoa lera tômpondrô avy, izy mahita irô miambin̈y! Ambarako anarô marin̈y tsarabe fa, izy hisikiny lamba findesin̈y miasa, baka iô irô irahiny mangala plasy* amy latabatra, ke izy ho avy hikarakara* irô.
38 Sambatra irô izikoa lera tômpondrô avy an̈elan̈elan̈an’ny nevera alin̈y firaka sasakalin̈y,* na sasakalin̈y firaka troazera maraindrain̈y,* izy mahita irô vôn̈ono.
39 Kanefa ty raha tsara hainarô: Izikoa hain’ny tômpin-tran̈o kelera mpangalatra ho avy, tran̈onany tsy mety hambelany hivakian’olo.
40 Ke man̈anaova vôn̈ono fo koa anarô, fôtony amy lera tsy ampoizinarô foeky havian’ny Zanak’olo.”
41 Ke ho Petera: “A Tômpo, izio ma zahay fo an̈anaovanao fan̈oharan̈a in̈y sa olo jiaby?”
42 Ho Tômpo: “Azôvy marin̈y ma mpanompo* atokisan̈a ndreky mahadiniky raha,* araiky hirahin’ny tômponany hikarakara mpanomponany* hafa jiaby ke tsy vôly han̈amia irô hanin̈y mahampy amy fotoan̈a mety?
43 Sambatra mpanompo io, izikoa lera tômponany avy in̈y, izy hitany man̈ano zen̈y!
44 Ankitikitin̈y, ambarako anarô marin̈y tsarabe fa, izy hirahiny hiandraikitry fanan̈ananany jiaby.
45 Fa izikoa ndraiky mpanompo io mieritreritry karaha ty: ‘Mba ela tômpoko in̈y avy ay!’ ke manomboko mamopoko mpanompolahy ndreky mpanompovavy izy, aviô mihina ndreky migiaka ke mamo,
46 ho avy amin’ny andra tsy ampoiziny ndreky amy lera tsy iritriretiny foeky tômponany, ke han̈asazy izy mare ndreky handefa izy amindrô olo tsy mety atokisan̈a aby io.
47 Ho maro popoko ho azon’ny mpanompo zen̈y, fôtony hainy sitrapôn’ny tômponany kanefa izy tsy nan̈ano vôn̈ono na tsy nan̈ano raha nirahiny natao.*
48 Fa lan̈iany olo tsy nahay sitrapôn’ny tômponany ndraiky kanefa nan̈ano raha tôkony havoazany popoko, tsy maro popoko ho azony. Lan̈iany olo namezan̈a raha maro baka, ho maro koa raha takian̈a aminany; aviô lan̈iany olo nan̈ankin̈ana raha be, ho be mihoatran’ny mahazatra raha takian̈a aminany.
49 “Zaho io navy handrehitry môtro ambony tany eto. Fa izio ndraiky koa fa mirehitry, ino koa ma raha mbala tadiaviko mandilatra zen̈y?
50 Fa misy batisa tôkony han̈anaovan̈a batisa zaho, ke miasaloha mare zaho parapivitan’izio!
51 Anarô ma mieritreritry fa zaho io navy hitondra fihavanan̈a ambony tany eto? Aha, zaho man̈ambara anarô fa, zaho io navy hitondra fisaratsarahan̈a.
52 Fa manomboko iziô, hisy olo dimy tran̈o araiky kanefa irô tsy fankahazo, ke telo hanohitry aroe aviô aroe hanohitry telo.
53 Irô hisaratsaraka, ke baba hanohitry zanany lelahy aviô zanakalahy hanohitry babany, reny hanohitry zanany man̈angy aviô zanakavavy hanohitry reniny, rafozambavy hanohitry vinantovaviny aviô vinantovavy hanohitry rafozambaviny.”
54 Baka iô karaha ty koa ho izy tamy vahoaka: “Anarô koa fa mahita rôndro manonga baka andrefa, direkty anarô mivolan̈a: ‘Haresaka mahalen̈y.’ Ary zen̈y ankitin̈y raha miboaka.
55 Aviô izikoa fa hitanarô fa baka atsimo tsiko, anarô mivolan̈a: ‘Hafana mare andra.’ Ary zen̈y ankitin̈y raha misy.
56 Mpihatsaravelatsihy! Anarô koa fa mandiniky tany ndreky lan̈itry, hainarô han̈ano akôry toetrandra, ke nan̈ino fo basy tsy hainarô mandiniky raha mandalo amy fotoan̈a iziô?
57 Nan̈ino anarô tsy mifen̈y hahay raha tôkony hataonarô?
58 Ohatra iziô, izikoa anao mandeha amy manam-pahifan̈a miaraka amin’olo manan̈a ady aminao amy fitsaran̈a, diany anarô mbala an-dalan̈a handeha an̈y in̈y, mifen̈a hifandamin̈y aminany. Amy zen̈y izy tsy hitondra anao man̈oloan̈a mpitsara, ke mpitsara io tsy han̈iraka mpiambin̈y hanambotro anao, aviô mpiambin̈y io tsy handefa anao amy prizon an̈y.
59 Ambarako anao fa tsy hiboaka baka ao foeky anao, izikoa tsy efa voaefanao vola* jiaby tôkony hifainao.”
Lamariky amy Pazy Ambany
^ Na: “mitaokan̈a.”
^ Na: “man̈oloan̈a olo jiaby.”
^ Na: “amin’olo jiaby.” Ankamaraozan’ny tran̈on’olo tamy zen̈y nisy terasy tamy tampony, ke tao nan̈anaovandrô raha isan-karazany.
^ Abt: “vatan̈a.”
^ Abt: “Asariona aroe.”
^ Na: “tsisy tsy jiren’ny.”
^ Na: “synagoga.”
^ Na: “hitsiriritry.”
^ Na: “hisy olo han̈adoso fahin̈ananao.”
^ Na: “amason’ny.”
^ Abt: “hakiho araiky.”
^ Na: “lisy.”
^ Abt: “lafaoro.”
^ Abt: “Fiheza vanian̈anarô.”
^ Abt: “mandry mandriran̈a.”
^ Na: “han̈amia hanin̈y.”
^ Abt: “amy lera fiambesan̈a faharoe.”
^ Abt: “amy lera fiambesan̈a fahatelo.”
^ Na: “mpiandraikitry tran̈o; mpiandraikitry raha an-tran̈o.”
^ Na: “misy jery; mahatsinjo lavitry.”
^ Na: “mpiasa an-tran̈onany.”
^ Na: “raha mifan̈araka amy sitrapôn’ny tômponany.”
^ Na: “firaka amy vola madiniky.” Abt: “leptona.”
