Vaovao Tsara Nisoratin’i Lioka 24:1-53
24 Kanefa tamin’ny andra voanalohany tamin’ny herin̈iandra,* bônera be irô nandeha tam-pasan̈a tan̈y nitondra raha man̈itry efa noman̈indrô.
2 Fa vato namodian̈a fasan̈a io hitandrô efa avoahodin̈y,
3 aviô irô koa fa niditry, tsy hitandrô tao fatin’i Jesosy Tômpo.
4 An̈atiny irô mbala very hevitry momba raha zen̈y in̈y, indriô nisy lelahy aroe avoa lamba mangilangilatra nitsangana narikitry irô.
5 Navozo mare irô man̈angy aby io ke irô niôndriky. Ho irô lelahy aby io tamindrô: “Nan̈ino ma anarô mitady araiky efa velon̈o amin’olo maty atỳ?
6 Izy efa tsy ato. Izy efa natsangana tamy maty. Alaiva onon̈o baka raha nivolan̈iny taminarô tamin’izy mbala ta Galilia in̈y.
7 Izy nivolan̈a fa Zanak’olo tsy maintsy hatolotro amin’olo mpanota ndreky hivonen̈a amy pôtô, aviô afaka telo andra izy hitsangana.”
8 Ke nazondrô onon̈o volan̈anany aby in̈y.
9 Irô baka tiô niala tamy fasan̈a io aviô lôso irô nandeha nitantara raha jiaby in̈y tamindrô 11 Lahy ndreky tamy mpianatra hafa jiaby.
10 Tsy azôvy man̈angy aby io fa i Maria Magdalena, Johana, baka iô Maria maman’i Jakoba. Nisy man̈angy hafa niaraka tamindrô koa mba nan̈ambara raha aby zen̈y tamindrô apostoly aby io.
11 Irô nieritreritry fa irô man̈angy aby io nikapokapoko, ke irô tsy ninoandrô.
12 Fa Petera nitsangana aviô lôso izy nandeha nilomoay tam-pasan̈a tan̈y. Izy niôndriky nizaha, kanefa lamba lin in̈y fo raha hitany tao. Izy baka tiô niala tiô, sady lôso diniky momba ino raha nandalo.
13 Tamin’ny andra io fo, nisy aroe tamindrô mpianatra aby io nandeha tamy tanàna hely araiky kahian̈a Emaosy, mandilatra helin’ny 11 kilômetra* baka a Jerosalema.
14 Irô io nifampikoran̈a momba raha jiaby nandalo in̈y.
15 An̈atiny irô mbala nikoran̈a ndreky nifanakalo hevitry momba raha aby zen̈y, Jesosy nan̈aton̈o aviô nan̈ano dia araiky tamindrô.
16 Irô nahita izy, fa izy fo tsy haindrô.*
17 Ho izy tamindrô: “Ino ma raha koran̈inarô an-dalan̈a atỳ io?” Ke irô tafidôko, aviô hita tamy saorandrô fa irô nalahelo.
18 Araiky tamindrô, tsy azôvy zen̈y fa Kleopasy, nivolan̈a taminany karaha ty: “Anao ma vahiny mipetraka manaokan̈a a Jerosalema ke tsy arakanao foeky* raha jiaby nandalo tatoato?”
19 Ho izy tamindrô: “Ino ma zen̈y?” Ho irô taminany: “Raha momba Jesosy baka a Nazareta! Izio mpaminan̈y niavaka mare nan̈oloan̈a Zan̈ahary ndreky olo jiaby, tamy raha nataony ndreky tamy raha nivolan̈iny.
20 Irô lohandohan’ny mpisôron̈o ndreky irô mpitondra atsika aby io nanolotro izy baka izy ho voaheloko ho foaty aviô izy nifantsihindrô tamy pôtô.
21 Kanefa zahay nan̈anten̈a fa izy handeha han̈avotro Israely. Aviô sôsoko raha jiaby zen̈y, niany andra fahatelo tafaran’ny niboahan’ny raha aby zen̈y.
22 Lany fan̈ahy koa zahay naharen̈y raha nambaran’ny man̈angy sasany taminay teto, fôtony bônera irô efa nandeha tam-pasan̈a tan̈y
23 kanefa fatinany tsy hitandrô. Irô koa fa nimpody baka tan̈y, irô nivolan̈a fa irô zen̈y nahita anjely nan̈ambara tamindrô fa izy efa velon̈o.
24 Ke sasany taminay nandeha tam-pasan̈a tan̈y; tsisy ny hafa tamy raha nivolan̈indrô man̈angy aby in̈y raha hitandrô. Fa irô fo tsy nahita izy.”
25 Ke ho izy tamindrô: “Anarô tsy mandiniky tsara, aviô ela fônarô vo mino raha jiaby nivolan̈indrô mpaminan̈y aby io!
26 Tsy tôkony niaritry raha jiaby zen̈y ma Kristy amy zen̈y izy hahazo voninahitrinany?”
27 Ke nazavainy tamindrô raha jiaby nivolan̈in’ny Soratra Masin̈y momba izy, nanomboko tamy Mosesy ndreky Mpaminan̈y jiaby.
28 Farany, irô navy narikitry tanàna hely handeha himboandrô, izy amizay nan̈ano sarisary nanohy dianany.
29 Kanefa izy niangaviandrô hidôko. Ho irô: “Anao midokoa miaraka aminay, fôtony andra io efa ho tsôfotro sady efa hahiziky.”
30 Tamin’izy nihinan̈a* niaraka tamindrô, izy nangala môfo, aviô izy nan̈ano mersy Zan̈ahary; baka iô nitapahany izio ke natôndrony tamindrô.
31 Tiô irô vo tontohitry,* ke haindrô izy. Kanefa izy nanjavon̈o nan̈oloan̈a irô tiô.
32 Ke irô nifampikoran̈a karaha ty: “Tsy karaha nisy môtro nirehitry in̈y ma tan̈atin’ny fôntsika tao tamin’izy nikoran̈a tamintsika tan-dalan̈a, ke nazavainy tamintsika tsarabe Soratra Masin̈y?”
33 Ke tamy lera zen̈y tsarabe irô nitsangana aviô nimpody ta Jerosalema. Irô nahita irô 11 Lahy ndreky irô olo nivory niaraka tamindrô aby io
34 nivolan̈a tamindrô: “Efa nitsangana tamy maty ankitin̈y Tômpo, aviô izy efa niboaka tamy Simona!”
35 Ke nitantaraindrô roe lahy tamindrô raha nandalo tan-dalan̈a tan̈y in̈y ndreky raha nahaizandrô izy tamin’izy nanapaka môfo.
36 Irô mbala nikoran̈a raha aby zen̈y in̈y fo, izy nitsangana tan̈ivondrô tiô ke ho izy tamindrô: “Irarian̈a anarô hahazo fiadanan̈a.”
37 Kanefa irô navozo angôvo jiaby sady fombo mare, fôtony irô nieritreritry fa irô nahita anjely.*
38 Ke ho izy tamindrô: “Nan̈ino ma anarô mialamboetry, aviô nan̈ino ma anarô misalasala an̈atin’ny fônarô ao?
39 Zahava baka tan̈ananaka ndreky vitinaka! Zaho fo ty. Kasiha baka zaho misy ahitanarô izy. Anjely baka tsisy nôfotro ndreky taolan̈a karaha ahitanarô zaho ziôty.”
40 Sady nivolan̈a zen̈y izy, aviô naboakany irô tan̈ananany ndreky vitinany.
41 Kanefa, karaha mbala tsy nino fo irô fôtony irô ravoravo loatra sady lany fan̈ahy mare. Ke ho izy tamindrô: “Misy raha mety hoanin̈y ma aminarô ato?”
42 Ke izy namezandrô tapaka tôno laoko.
43 Ke nalainy izio aviô nihoaniny tamasondrô tiô.
44 Ke ho izy tamindrô: “Tamy zaho mbala niaraka taminarô, zaho efa nan̈ambara fa tsy maintsy ho tanteraka raha jiaby voasoratra momba zaho amy Lalàn̈an’i Mosesy ao ndreky amy raha nisoratindrô Mpaminan̈y aby io* aviô amy Salamo ao.”
45 Ke nibiafiny tsarabe jerindrô, baka hazava tsara amindrô raha tian’ny Soratra Masin̈y koran̈iny.
46 Aviô ho izy tamindrô: “Ty raha efa voasoratra: Kristy hijaly baka iô izy hitsangana amy maty amin’ny andra fahatelo.
47 Aviô fibibahan̈a azahoan̈a familan-keloko io hitorian̈a amin’ny an̈aran̈anany amy firenena jiaby. Ke raha zen̈y atomboko a Jerosalema eto.
48 Anarô ho vavolombelon̈on’ny raha aby zen̈y.
49 Ke halefako aminarô raha nampan̈antin̈ain’ny Babako. Fa anarô ndraiky midokoa an-tanàna eto parapazahoanarô* angôvo baka an̈abo.”*
50 Ke nindesiny niboaka tanàna irô, aviô irô navy firaka ta Betania. Izy nampanonga tan̈ananany baka iô irô nitsofiny rano.
51 Izy mbala nitso-drano irô in̈y fo, izy nadoso tamindrô ke nampanongain̈a tan-dan̈itry.
52 Ke irô nankôhoko nan̈oloan̈a izy, aviô irô nimpody ta Jerosalema sady ravoravo mare.
53 Isan’andra irô nidera Zan̈ahary tamy tempoly tao.
Lamariky amy Pazy Ambany
^ Dimansy izio. Tamindrô Jiosy aby io, io andra voanalohany amin’ny herin̈iandra.
^ Abt: “60 stadio.” 1 stadio = 185 m.
^ Abt: “Kanefa masondrô nisakanan̈a tsy hahay izy.”
^ Na mety ho: “Anao zaraiky fo ma vahiny a Jerosalema tsy mahay?”
^ Na: “nandry nandriran̈a tamy latabatra.”
^ Abt: “Tiô masondrô vo nibian̈a tsarabe.”
^ Abt: “fan̈ahy.”
^ Abt: “raha voasoratra amy Mpaminan̈y ao.”
^ Abt: “firaka anarô ampisikinin̈y.”
^ Na: “an-dan̈itry.”
