Vaovao Tsara Nisoratin’i Marka 2:1-28
2 Kanefa izikoa fa afaka andra vitsivitsy, nimpody ta Kapernaomy tan̈y ndraiky Jesosy, ke ren̈in’olo fa izy tan-tran̈o.
2 Maro olo vory tao, ke feno pamaka tran̈o io firaka tam-baravaran̈a. Ke izy nanomboko nan̈ambara volan̈an’ny Zan̈ahary tamindrô.
3 Baka iô nisy lelahy malemy nindesin’olo efa-dahy nandeha taminany.
4 Kanefa naro loatra olo, ke tsy vitandrô foeky nitondra lelahy io tamy Jesosy tarỳ. Ke nadosondrô tafontran̈o fananjò tany nisy Jesosy, baka iô nilokandrô tiô, ke najotsondrô baka tamy lavaka tiô brankara nandrian’ny lelahy malemy io.
5 Izikoa fa hitan’i Jesosy fa irô nanan̈a finoan̈a, ho izy tamy lelahy malemy io: “Voavela fahotan̈anao, zanako.”
6 Nisy mpanoratra lalàn̈a nipetraka tiô, ke irô nieritreritry karaha ty tan̈atin’ny fôndrô tao:
7 “Nan̈ino ma ngiah ty mivolan̈a raha karaha zen̈y? Izy tsy man̈isy fôtiny Zan̈ahary. Azôvy ma mahavita man̈ambela fahotan̈a, izikoa tsy Zan̈ahary zaraiky fo?”
8 Direkty hain’i Jesosy* raha tan̈atin’ny jerindrô, ke ho izy tamindrô: “Nan̈ino ma anarô mieritreritry raha karaha zen̈y an̈atin’ny fônarô ao?
9 Aia ma moramora, mivolan̈a amy lelahy malemy io: ‘Voavela fahotan̈anao’, sa: ‘Mitsangàna, alaiva brankaranao, baka iô mandihana’?
10 Fa baka ho hainarô fa Zanak’olo manan̈a fahifan̈a han̈ambela fahotan̈a ambony tany eto...” Ho izy tamy lelahy malemy io:
11 “Ho zaho aminao: Mitsangàna, alaiva brankaranao, baka iô mindao mody.”
12 Ke lelahy io nitsangana, baka iô direkty nalainy brankaranany, aviô izy niboaka nan̈oloan̈a olo jiaby tiô. Lany fan̈ahy olo jiaby sady nan̈amia voninahitry Zan̈ahary, ke ho irô: “Atsika mbala tsiary nahita raha karaha ty foeky!”
13 Nimpody tamôron-dranomasin̈y tan̈y ndraiky koa Jesosy; maro olo nan̈aton̈o izy, ke irô nampianariny.
14 Izy mbala tan-dalan̈a fo, izy nahita Levy zanakan’i Alfeo nipetraka tamy birô fan̈ifan̈a hetra, ke ho izy taminany: “Alô han̈araka zaho.” Direkty Levy nitsangana, baka iô nan̈araka izy.
15 Tafaran’izen̈y, Jesosy nihinan̈a* tan-tran̈on’i Levy. Naro mpamory hetra ndreky mpanota niaraka nihinan̈a tamy Jesosy ndreky tamy mpianatranany aby io. Ankamaraozandrô io nanjary mpan̈ara-dia Jesosy.
16 Fa izikoa fa hitandrô mpanoratra lalàn̈a an̈isan’ny Fariseo aby io fa Jesosy niaraka nihinan̈a tamy mpanota ndreky mpamory hetra, karaha ty ho irô tamy mpianatranany aby io: “Izy ma miaraka mihinan̈a amy mpamory hetra ndreky mpanota?”
17 Ren̈in’i Jesosy raha zen̈y, ke ho izy tamindrô: “Tsy olo matanjaka mila dôkotera, fa olo marary. Tsy handeha hikaiky olo marin̈y antony naviako, fa handeha hikaiky mpanota.”
18 Irô mpianatran’i Jaona ndreky irô Fariseo aby io efa zatra nifady hanin̈y.* Ke irô nan̈aton̈o Jesosy, baka iô ho irô taminany: “Nan̈ino ma zahay mpianatran’i Jaona ndreky irô mpianatrandrô Fariseo aby io matetiky mifady hanin̈y, kanefa mpianatranao tsy mifady hanin̈y?”
19 Ho Jesosy tamindrô: “Mpan̈ainga koa mbala ankilan-dry namany, tsisy antony tôkony hampifady hanin̈y irô namany aby io. Izikoa mpan̈ainga mbala ankilandrô iô fo, irô tsy afaka mifady hanin̈y.
20 Fa ho avy andra han̈adosoan̈a mpan̈ainga io ankilandrô iô, ke amin’ny andra zen̈y irô vo hifady hanin̈y.
21 Tsisy olo mangala tapaka lamba vao hikopandrian̈a lamba kay. Izikoa zen̈y edy atao, hahaihatriaka fo lamba kay io, fôtony izio hantsoritin’ny araiky vao.
22 Aviô tsisy olo man̈ano divain vao an̈atin’ny saka angôzy* efa kay. Izikoa zen̈y raha atao, divain io hampipaofaka saka angôzy io, ke ho very divain io, baka iô saka angôzy io efa tsy mety hampiasain̈a eky. Ke divain vao atao an̈atin’ny saka angôzy vao.”
23 Tandraraiky, andra sabata tam’izen̈y, Jesosy nandalo tamy tanimbary. Sady mandeha fo irô mpianatranany aby io nan̈ombotro tahom-bary.*
24 Ke ho irô Fariseo aby io taminany: “Zahava! Nan̈ino ma irô man̈ano raha tsy fatao amin’ny andra sabata?”
25 Kanefa ho izy tamindrô: “Mbala tsiary nivakianarô ma raha nataon’i Davida tamin’izy tsisy hanin̈y, ke silaon̈o izy ndreky irô olo niaraka taminany aby io?
26 Eraka raha tantarain̈a momba Abiatara lohandohan’ny mpisôron̈o, izy niditry tamy tran̈on’ny Zan̈ahary tao ke nihinan̈a môfo atao fan̈atitry.* Kanefa tsisy olo nahazo nihinan̈a môfo aby zen̈y izikoa tsy mpisôron̈o zaraiky fo. Baka iô nan̈amezany koa irô olo niaraka taminany aby io.”
27 Aviô ho izy tamindrô: “Sabata io natao nin’olo, fa tsy olo natao nin’ny Sabata.
28 Ke zen̈y mahavy Zanak’olo Tômpon’ny Sabata.”
Lamariky amy Pazy Ambany
^ Abt: “hain’i Jesosy tan̈atin’ny jerinany tan̈y.”
^ Na: “nandry nandriran̈a hihina”; fomban’olo tamin’ny andran’ny Baiboly koa fa nihina, irô nandry nandriran̈a nikodidin̈y latabatra.
^ Na: “nifehy.”
^ Izio saka angôzy fasian̈a divain.
^ Na: “tahom-barimbazaha.”
^ Na: “môfo atolotro.”
