Vaovao Tsara Nisoratin’i Matio 13:1-58
-
FAN̈OHARAN̈A MOMBA FANJAKAN̈AN’NY LAN̈ITRY (1-52)
-
Mpamafy (1-9)
-
Antony nahavy Jesosy nampiasa fan̈oharan̈a (10-17)
-
Dikan’ny fan̈oharan̈a momba mpamafy (18-23)
-
Vary ndreky tsimparifary (24-30)
-
Voan’ny motardy ndreky levira (31-33)
-
Jesosy koa fa nampiasa fan̈oharan̈a, tanteraka faminanian̈a (34, 35)
-
Dikan’ny fan̈oharan̈a momba vary ndreky tsimparifary (36-43)
-
Harian̈a nasitriky ndreky perla farany tsara (44-46)
-
Harato (47-50)
-
Raha vaovao ndreky raha kay baka amy tany fikajian̈a fanan̈ana (51, 52)
-
-
Tsy nino Jesosy irô olo baka amy tany faviany aby io (53-58)
13 Tamin’ny andra io, Jesosy koa fa niala tamy tran̈o io tao, izy nandeha nipetrapetraka tamôron-dranomasin̈y.
2 Nisy olo marobe nivory taminany tiô. Ke lôso izy nanonga tan̈abon’ny sambo, baka iô izy nipetraka, fa olo jiaby ndraiky nitsangana tamy jia tamôron-dranomasin̈y tarỳ.
3 Izy nanomboko nampianatra irô raha marobe, ke izy nampiasa fan̈oharan̈a. Ho izy: “Nisy lelahy araiky nandeha namafy vary.
4 Izy koa fa namafy, sasany tamy voam-bary aby io latsaka tamôron-dalan̈a; ke nisy vôron̈o navy, nihinan̈a irô io.
5 Sasany tamy voam-bary aby io ndraiky latsaka tamy tany be vatovato salakady tsy ampy faotaka. Nalaky naniry voam-bary aby io fôtony tsy lalin̈y faotaka tamy tany nisy irô tiô.
6 Fa izikoa fa nanonga masoandra, tsy din̈indrô voam-bary vo naniry aby io hafanan̈a, ke naiky irô io fôtony vahatrandrô tsy lôso lalin̈y.
7 Voam-bary sasany ndraiky latsaka tan̈atin’ny raha maniry feno fatsiky; naniry mare fatsiky aby io ke rakotro tao voam-bary vo naniry aby io.
8 Voam-bary sasany ndraiky latsaka tamy tany tsara. Namoa mare irô io, ke sasany nazahoan̈a voany 100, sasany 60, sasany ndraiky 30.
9 Lan̈iany manan̈a sofin̈y, mitandrin̈esa tsarabe.”
10 Ke mpianatranany aby io nan̈aton̈o izy salakady nivolan̈a karaha ty: “Nan̈ino ma anao mampiasa fan̈oharan̈a izikoa fa mampianatra irô?”
11 Ho izy tamindrô: “Anarô nimboan̈a hahay dikan’ny sekire masin̈y momba Fanjakan̈an’ny lan̈itry, fa irô tsy nimboan̈a hahay zen̈y.
12 Fôtony lan̈iany olo manan̈a, mbala hamezan̈a beben’ny efa anan̈any, ke ho maro ankitin̈y raha hanan̈any; fa lan̈iany olo tsy manan̈a ndraiky, ndray raha hely anan̈any fo mbala hadoso aminany.
13 Zen̈y mahavy zaho mampiasa fan̈oharan̈a izikoa fa mampianatra irô, fôtony irô raha mizaha fo fa tsisy raha hitandrô, baka iô irô maharen̈y fa irô tsy mitandren̈y, aviô tsy haindrô aby dikan’ny raha ren̈indrô.
14 Ke tanteraka amindrô faminanian̈an’i Isaia ty: ‘Anarô haharen̈y, fa tsy ho hainarô foeky dikan’ny raha ren̈inarô; aviô anarô hizaha, kanefa tsisy raha ho hitanarô foeky.
15 Fôn’olo aby ty efa nanjary donto, efa nitampenandrô sofin̈indrô,* aviô masondrô efa nafodindrô, amy zen̈y tsisy raha ho hitan’ny masondrô aviô tsisy raha ho ren̈in’ny sofin̈indrô foeky; amy zen̈y koa fôndrô tsy hahay dikan’ny raha zen̈y, tsao koa irô himpody aminaka ke zaho hampahivan̈a irô.’
16 “Kanefa anarô sambatra, fôtony masonarô mahita, aviô sofin̈inarô maharen̈y.
17 Ambarako anarô mazava tsarabe fa, maro mpaminan̈y ndreky olo marin̈y tihahita raha hitanarô fa irô fo tsy nahita, aviô irô tihaharen̈y raha ren̈inarô fa irô fo tsy naharen̈y.
18 “Fa ziôty ndraiky, tandrin̈esa dikan’ny fan̈oharan̈a momba lelahy namafy vary in̈y.
19 Tsy ino voam-bary latsaka tamôron-dalan̈a in̈y fa olo araiky maharen̈y hafatra* momba Fanjakan̈an’ny Zan̈ahary, kanefa tsy mahay dikan’izio. Ke avy Devoly* man̈ombotro raha nafafy tan̈atin’ny fônany.
20 Tsy ino ndraiky araiky latsaka tamy tany be vatovato in̈y fa, olo maharen̈y hafatra momba Fanjakan̈an’ny Zan̈ahary sady direkty man̈eky izio an-karavoan̈a.
21 Naniry fo voam-bary io fa tsy nahadin̈y ela, fôtony hafatra io tsy tafiditry lalin̈y tan̈atin’ny fônany tan̈y; ke miaraka misy prôblemo na fan̈injehan̈a mavoa izy baka amy fan̈ikiany hafatra io, izy efa vôly edy.
22 Aviô voam-bary araiky latsaka tamy raha maniry feno fatsiky in̈y, olo maharen̈y hafatra io, fa hafatra io baka iô rakotron’ny asalohan’ny fiainan̈a amy donia ty* ndreky angôvo mamitakan’ny harian̈a, ke manjary tsy mamoa.
23 Fa voam-bary nafafy tamy tany tsara in̈y ndraiky, olo maharen̈y hafatra io sady mahay dikan’izio tsarabe; namoa mare irô io, ke sasany nazahoan̈a voany 100, sasany 60, sasany ndraiky 30.”
24 Nampiasa fan̈oharan̈a hafa koa izy. Ho izy tamindrô: “Fanjakan̈an’ny lan̈itry io mety ampitovisin̈y amy lelahy araiky namafy vary* tamy tanimbarinany.
25 Lelahy io mbala nandry fo, fahavalonany navy ke namafy tsimparifary* tamy varinany,* baka iô izy lôso.
26 Vary io koa fa naniry aviô teraka, naniry koa tsimparifary.
27 Ke mpanompon’ny lelahy tômpin’ny tanimbary io nivolan̈a karaha ty taminany: ‘A tômpoko anao, tsy vary ma raha natsabonao tamy tanimbarinao? Ke baka taia fo navian’ny tsimparifary aby io?’
28 Ho izy tamindrô: ‘Fahavalo nan̈ano izio.’ Ho mpanompo aby io taminany: ‘Akôry, tianao himbotanay tsimparifary aby io?’
29 Fa ho izy tamindrô: ‘Aha, ambilà fo antsendriky fa tsao vary aby io ho voahombotro miaraka amy tsimparifary.
30 Ambilà fo irô miaraka maniry. Izikoa fa avy fotoan̈a fandidian̈a vary, zaho hivolan̈a amin’olo hirahiko handidy vary aby io: Avoria antsendriky tsimparifary aby io, baka iô ataova fehiny maromaro, aviô iroa amy môtro. Lera vita zen̈y, iô anarô vo mandeha mamory vary, hataonarô an̈atin’ny rihanaka an̈y.’ ”
31 Nampiasa fan̈oharan̈a hafa koa izy, ke ho izy tamindrô: “Fanjakan̈an’ny lan̈itry io mety ampitovisin̈y amy voan’ny motardy natsabon’ny lelahy araiky tamy vilonany.
32 Io voan-draha farany hely amy voan-draha jiaby. Kanefa izio koa fa maniry, izio manjary an̈ana* farany maventy. Farany izio manjary kakazo maventy be, ke avy vôron̈o miasa tran̈o amy sampan̈an’izio.”
33 Nisy fan̈oharan̈a hafa koa nampiasain’i Jesosy tamin’izy nikoran̈a tamindrô. Ho izy: “Fanjakan̈an’ny lan̈itry io miran̈a levira nalain’ny man̈angy araiky, baka iô naharony tamy lafariny folo kilô, ke lafariny io nivoha.”*
34 Nampiasa fan̈oharan̈a fo Jesosy izikoa fa nikoran̈a raha jiaby zen̈y tamindrô olo aby io. Ia, izy tsy nikoran̈a tamindrô izikoa tsy nampiasa fan̈oharan̈a,
35 amy zen̈y tanteraka raha nambaran’ny mpaminan̈y ty: “Zaho hampiasa fan̈oharan̈a izikoa fa mampianatra, aviô zaho han̈ambara raha nasitriky rango tamy voanalohany tan̈y.”*
36 Irô olo aby io koa fa nirahiny nody, izy niditry tan-tran̈o. Mpianatranany aby io nan̈aton̈o izy sady nivolan̈a karaha ty: “Mba hazavà aminay kony dikan’ny fan̈oharan̈a momba tsimparifary tamy tanimbary in̈y.”
37 Ho izy tamindrô: “Mpamafy vary in̈y Zanak’olo,
38 aviô tanimbary ndraiky donia ty. Tsy azôvy vary fa olo hiditry amy Fanjakan̈an’ny lan̈itry; tsimparifary ndraiky zanakan’ny Devoly.*
39 Fahavalo namafy tsimparifary aby io Devoly. Fotoan̈a fandidian̈a vary io ndraiky vanim-potoan̈a alohan’ny faran’ny donia ty,* aviô irô mpandidy vary aby io ndraiky anjely.
40 Tsimparifary aby io havory, baka iô hiroan̈a amy môtro; karaha zen̈y koa raha ho hisy izikoa fa ho avy faran’ny donia ty.*
41 Zanak’olo han̈iraka anjely hamory zay olo* mampanota olo ndreky lan̈iany olo zatra mandika lalàn̈a. Irô io hadosondrô anjely aby io tsy ho an̈isan’ny Fanjakan̈anany,
42 baka iô irô hatsipindrô anjely aby io an̈atin’ny lafaoro mirehitry. An̈y irô hitomoan̈y aviô ho meloko ndreky ho diso fan̈antinan̈a.*
43 Amy leran’izen̈y ndraiky, olo marin̈y hazava mare karaha masoandra amy Fanjakan̈an’ny Babandrô an-dan̈itry an̈y. Lan̈iany manan̈a sofin̈y, mitandrin̈esa tsarabe.
44 “Fanjakan̈an’ny lan̈itry io miran̈a harian̈a nasitrikin’olo tamy vilo araiky. Nisy lelahy nahita harian̈a io, ke nanitriky izio ndraiky. Ravoravo mare lelahy io ke lôso izy nivarotro raha jiaby nanan̈any, baka iô izy nivanga vilo io.
45 “Fanjakan̈an’ny lan̈itry io koa mety hampiran̈iny amy perla farany tsara nitsakarehan’ny mpivaro-mandeha araiky.
46 Izy koa fa nahita perla araiky valera mare, direkty lôso izy nandeha nivarotro raha jiaby nanan̈any, baka iô izy nivanga perla io.
47 “Fanjakan̈an’ny lan̈itry io koa mety hampiran̈iny amin’ny harato* nalatsaka tan-dranomasin̈y, ke nazahoan̈a* laoko isan-karazany.
48 Nantsoritindrô mpan̈arato aby io tantety harato io izikoa fa feno, baka iô irô nangala fipitrahan̈a. Ke zay laoko tsara navorindrô tan̈atin’ny raha fasian̈a izy,* fa zay laoko tsy mety hoanin̈y ndraiky nariandrô.
49 Karaha zen̈y koa raha hiboaka izikoa fa ho avy faran’ny donia ty.* Irô anjely aby io handeha han̈avaka olo ratsy fan̈ahy amin’olo marin̈y.
50 Irô olo ratsy fan̈ahy aby io hatsipy an̈atin’ny lafaoro mirehitry. An̈y irô hitomoan̈y aviô ho meloko ndreky ho diso fan̈antinan̈a.*
51 “Asa mazava aminarô dikan’ny raha jiaby zen̈y?” Ho irô taminany: “Ia.”
52 Ho izy tamindrô: “Izikoa zen̈y basy, tsara hainarô fa kila mpampianatra nampianarin̈y raha momba Fanjakan̈an’ny lan̈itry, mety ampitovisin̈y amy tômpin-tran̈o araiky man̈aboaka raha vaovao ndreky raha kay, baka amy tany fikajiany fanan̈ananany.”
53 Jesosy koa fa baka nampiasa fan̈oharan̈a aby zen̈y, izy niala tiô.
54 Izy amizay koa fa navy tamy tany faviany, izy nampianatra olo tamy synagoga. Lany fan̈ahy irô, ke ho irô: “Baka taia eky nazahoan’olo ty fahendrena karaha zen̈y? Aviô karakôry ahavitany man̈ano fahagagan̈a jiaby io?
55 Tsy io ma zanakan’ny lelahy mpandrafitry in̈y? Tsy Maria ma an̈aran̈an’ny reniny? Aviô tsy Jakoba, Josefa, Simona ndreky Jodasy ma rahalahiny?
56 Tsy tanàna araiky amintsika eto koa ma iry anabaviny jiaby? Ke baka taia nahaizany raha jiaby zen̈y?”
57 Tsy nety nino izy foeky irô. Kanefa ho Jesosy tamindrô: “Efa amy tany faviany ndreky an-tran̈onany edy mpaminan̈y tsy hajain̈a.”
58 Ke izy tsy nan̈ano fahagagan̈a maro tao, fôtony irô tsy nino izy.
Lamariky amy Pazy Ambany
^ Na: “efa ren̈in’ny sofin̈indrô raha zen̈y fa irô fo tsy sôfy.”
^ Abt: “volan̈a.”
^ Abt: “araiky ratsy in̈y.”
^ Abt: “voan-draha tsara.”
^ Griky: zizaniôn. Izio karazan̈a ahitry naniry tan Israely tan̈y; voan’izio misy poazon.
^ Vary koran̈iny eto io varimbazaha (blé).
^ Na: “feliky.”
^ Na: “nitombo.”
^ Na mety ho: “rango tamy fotoan̈a niasan̈a donia ty.”
^ Abt: “araiky ratsy in̈y.”
^ Abt: “raha.”
^ Abt: “aviô hampan̈ena nify.”
^ Abt: “harato taritin̈y.”
^ Na: “navoavory.”
^ Na: “tan̈atin’ny antômby.”
^ Abt: “aviô hampan̈ena nify.”
